Lelu o athu a mu a talesa hadi iavulu. Athu avulu a mu dikola kua Nzambi phala ku a bhulula ku jiphaxi, ene a dibhuidisa ué se Nzambi ua-nda ku a bhulula muene. O kuila Nzambi uivua o ku dikola kua athu enhá? Ihi i tu zuela ia lungu ni athu a luua o ita phala kubhuluka ku hadi iene mu tala? O kuila Nzambi uene mu a kuatekesa mu kuijiia kuila a mu luua ita phala ku bhuluka ku kizukutisu?

O ita ia Alumajedone iene ia-nda zubha o ita ioso

Kia dianga ua tokala ku tululuka mu kuijiia o kidi kiki: Nzambi uene mu mona o hadi ioso ia mu bhita lelu ku mundu, muéne ua mesena ku bhanga kima. (Jisálamu 72:13, 14) Mu Bibidia, Nzambi ua kanena kua ‘ió a mu tala hadi ku a bhana kunhoha.’ Kizuua kuxi? Katé kia “kà tukulukila Ngana Jezú ku diulu ni ji-anju jê ja nguzu . . . Mu ku a bhesa kaxtiku oso kejiia Nzambi, ni ió nguauâ kutumaka o Njimbu Iambote ia Ngana ietu Jezú Kristu.” (2 Tesalonika 1:7, 8) O kutukuluka kua Jezú, kua-nda bhita ku hádia ku “ita ia kizuua kia Dikota kia Nzambi, Muteni-a-Ioso.” O ita íii a ixana ué Alumajedone.—Dijingunuinu 16:14, 16.

Mu ita íii, Nzambi ka-nda tumina o athu, maji ua-nda tumina Mon’ê Jezú Kristu ni ji-anju phala kuluua ita ni akua phulu. Jezú ni ji-anju ja diulu ja-nda zubha o hadi ioso ni kizukutisu.—Izaia 11:4; Dijingunuinu 19:11-16.

Katé lelu, Nzambi ka lungulula o kibanzelu kiê kia lungu ni ita. Muéne uene mu banza hanji kuila o ita ukexilu ua tokala phala kuzubha o jiphaxi ni kizukutisu. Maji kala ki tuejiia, tundé ukulu Nzambi muéne u sola o kithangana kia kuluua o ita, ni nanhi ua tokala kuluua o ita. Kala ki tuejiia kiá, Nzambi ua tange kuila, o ita ia-nda zubha o jiphaxi joso ni kizukutisu, ia-nda bhita ngó ku hádia, o Mon’ê Jezú Kristu  muéne ua-nda luua o ita íii. Kiki kilombolola kuila, o ita iene mu luua o athu mu ngongo ki Nzambi uene mu i tumina, né muene se o athu a mesena kubhuluka ku jiphaxi ka tokala ku luua ita.

Mu kifika: Xinganeka jiphange jiiadi ja mu bhânga, o tata kala ku bhata. Mu ku bhita kithangana ene a dieha hanji, anga exana tat’â mu mutelembe ua kafuetele. Umoxi u tangela tat’â kuila, o phang’ê muéne ua mateka. O ua mukuá uamba kuila, o phang’ê ua kexile ku mu zukutisa. Kala muthu u dikola kua tata mukonda kala muthu ua mesena kuila o tata u kala ku mbandu iê. Maji kioso kia zubha ku a evua, o tat’â u a tendelesa ku mu kingila katé kia vutuka ku bhata phala ku batula o maka. Ene a kingila bhofele. Maji a di kuata dingi, a kala mu bhânga. Kioso ki bhixila o tata kubhata ki mu ibhila kiavulu ia bhange o ana, muéne-phe u a kaxtikala mukonda ka mu belesela.

Kiene kimoxi ué lelu, o ifuxi iene mu luua o ita ene mu dikola kua Nzambi phala ku a kuatekesa. Maji Nzambi kene mu di ta mu ita iene mu luua o athu. Mu veji dia kiki muéne u zuela mu Maka mê: “Kana ku vutula muthu uoso-uoso phulu mu phulu,” ni kuila “ki mu kale mù vutula phonzo ku muthu uoso-uoso.” (Loma 12:17, 19) Muéne uambe ué kuila o athu a tokalele ku mu ‘kingila ni muanhu uoso’ kubhanga kima, kala kia-nda bhanga mu ita ia Alumajedone. (Jisálamu 37:7) Se o ifuxi i kamba ku kingila Nzambi, anga a kuata mu luua ita, muéne u mona kuila o athu enhá ka mu xila, kiki ki mu ibhila kiavulu. Kienhiki mu ita ia Alumajedone, Nzambi ua-nda londekesa kuila ua iibhila kiavulu iene mu bhanga o athu, iu ua-nda batula o maka oso bhua xaxi ka ifuxi, mu ku ‘suikika o ita katé ku maxokololo a’xi.’ (Jisálamu 46:9; Izaia 34:2) Sé phata o Alumajedone o ita ia-nda zubha o ita ioso iene mu luua o athu mu ngongo.

O kuzubha o ita mu ngongo, dibesá dia-nda bheka o Utuminu ua Nzambi. Jezú uambe ia lungu ni Utuminu iú mu musambu uê ua fuma: “Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:10) O Utuminu ua Nzambi ki ua-nda zubha ngó o ita, maji ua-nda zubha ué o kuiibha kuoso kuene mu bhekesa o ita. * (Jisálamu 37:9, 10, 14, 15) Kiki kiene mu bhangesa o akaiedi a Jezú ku mesena kiavulu o mabesá a Utuminu ua Nzambi.—2 Phetele 3:13.

Maji tua tokala ku kingila thembu kuxi phala Nzambi ku tu bhulula ku jiphaxi joso ni kizukutisu? O ikanenu ia Bibidia ia mu dikumbidila lelu ilondekesa kuila, tuala “mu izuua isukidila-ku” ia mundu iú. (2 Timote 3:1-5)  * Kua kambe ngó, o Utuminu ua Nzambi ua-nda zubha o izuua isukidila-ku mu ita ia Alumajedone.

Kala ki tua mono kiá, o a-nda fua mu ita ia Alumajedone, ió “nguauâ kutumaka o Njimbu Iambote ia Ngana ietu Jezú Kristu.” (2 Tesalonika 1:8) Maji ijiia kuila Nzambi ka mesena kuila muthu ufua, né muene o akua phulu. (Izekiiele 33:11) Mukonda “muène ka mesena kuila ku kala muthu u texika” mu ita ia Alumajedone, kienhiki, muéne ua mu bhangesa kuila o njimbu iambote ia ngana ietu Jezú, a “i tula mu ngongo ioso, mu kubhana umbangi ku akua jixi joso” ande dia kuíza o dizubhilu. (2 Phetele 3:8, 9; Matesu 24:14; 1 Timote 2:3, 4) Bhu kaxi ka njimbu iambote ia mu boka o Jimbangi ja Jihova, lelu o athu ala ni ujitu ua kuijiia Nzambi, ni kubelesela o njimbu iambote ia lungu ni Jezú ni kukingila o kizuua kia-nda bhua o ita ioso mu ngongo.

^ kax. 9 O Utuminu ua Nzambi ua-nda buika ué o kalunga, o nguma ia dikota. Kala kilondekesa o milongi mu mbandu 16, Nzambi ua-nda fukununa athu avulu afu, katé muene ni ió afu mukonda dia ita.

^ kax. 10 Phala kuijiia dingi ia lungu ni izuua isukidila-ku, tanga o kibatulu 9 kia divulu Mu Kidi Ihi i Longa o Bibidia? a di bhange ku Jimbangi ja Jihova.