O athu akexile mua tatesa ni kua zukutisa. Mukonda dia kiki ene akexile mu dikola kua Nzambi izuua ioso mu kubhinga kikuatekesu, maji mu kithangana kieniókio ka tambuile kikuatekesu. O athu iá, akua Izalaiele, exile o mundu ua Nzambi m’ukulu. O kifuxi kia dikota kia akua Ijitu, kiene kia kexile mua bhikisa ni kua zukutisa. (Makatukilu 1:13, 14) Mu mivu iavulu, akua Izalaiele akexile mu kingila Nzambi phala kua bhulula bhu maku a akua Ijitu. Maji mu kithangana kia tokala, Nzambi ua bhange kima phala ku kuatekesa o mundu uê. (Makatukilu 3:7-10) O Bibidia i tu tangela kuila, Nzambi ua luu ita ni akua Ijitu. Muéne ua bheka mabhebhu avulu ku akua Ijitu iu ua buika o sobha ia Ijitu ni kilombo kiê kioso mu Kalunga Kakusuka. (Jisálamu 136:15) Jihova Nzambi ua londekesa kuila “kindanda kia ita” mu kubhulula o mundu uê.—Makatukilu 15:3, 4..

Mu kuluua ita ni akua Ijitu, Nzambi ua londekesa kuila saí ita muéne u i xikina. Mu ithangana ia mukuá, muéne ua tumina o mundu uê ua Izalaiele kuluua ita. Mu kifika, muéne ua a tumina kuluua ni akua Kanana, mukonda a iibhile kinene. (Matendelelu 9:5; 20:17, 18) Muéne ua kuatekesa Davidi, Sobha ia Izalaiele kuluua ni akua Fidíxia. Katé muene ua mu bhana itendelesu ieji mu kuatekesa kutolola akua Fidíxia.—2 Samuuele 5:17-25.

O misoso íii ia Bibidia, ilondekesa kuila, se o jinguma ja mesenene kubhanga kia iibha ku mundu uê ni kuzubha o ubhezelu ua kidi, Nzambi ua kexile mu tumina o mundu uê kuluua ita. Maji tala ku luiji, ima itatu ia lungu ni ita ia kexile mu tumina Nzambi.

  1. NZAMBI NGÓ UA KEXILE MU SOLA SE NANHI UA TOKALELE KULUUA O ITA. Saí kithangana, Nzambi uambela akua Izalaiele: “Mu nvunda íii, enu ki mua-nda kubhanga.” Mukonda diahi? Nzambi ueji kua bhângela. (2 Malunda 20:17; 32:7, 8) Muéne ua bhange kiki mu ithangana iavulu, kála mu kithangana ki tua zuela kiá ku dimatekenu dia milongi íii. Maji mu ithangana ia mukuá, Nzambi ua tumina o mundu uê ua Izalaiele m’ukulu kuluua, phala kutambula ni kulanga o Ixi ia Kanana.— Matendelelu 7:1, 2; Josuué 10:40.

  2. NZAMBI NGÓ UEJIDILE O KITHANGANA KIA TOKALELE KULUUA O ITA. O jiselevende ja Nzambi ja tokalele ku mu kingila ni muanhu uoso katé o kithangana  kieji kua tumina kuluua ita phala kuzubha o hadi ni kuiibha mu’axaxi kâ. Sé o kizuelu kia Nzambi, ene ka tokalele kuluua o ita. Se a ki bhangele, Nzambi keji kua kuatekesa. O Bibidia i tu tangela kuila, kioso akua Izalaiele kia kexile múia mu ita sé Nzambi kua tumina, ene akexile mua tolola ni kua jibha. *

  3. Though God waged war against the Canaanites, he spared some, such as Rahab and her family

    NZAMBI KA UABHELA O KALUNGA KA ATHU NÉ MUENE KA AKUA PHULU. Jihova Nzambi, muéne ua Bhange o muenhu ni athu. (Jisálamu 36:9) Mu kienhiki, muéne ka mesena kuila o athu a fua. Maji saí athu ni kuiibha kuoso a tatesa ni kujibha akuâ. (Jisálamu 37:12, 14) Phala kufudisa o athu enhá, saí ithangana Nzambi ua kexile mu tumina o mundu uê kuluua ita ni athu akua phulu. Maji mu mivu ioso ia kexile mu tumina akua Izalaiele kuluua ita, muéne ua londekesa kuila uexile ué Nzambi ia “jihenda,” “ua kokoloka o kutema” mu kudibhana ni ió akexile mu tatesa akua Izalaiele. (Jisálamu 86:15) Mu kifika, muéne ua tangele akua Izalaiele kuila, ande dia kuluua ita ni diembu, kia dianga a tokalele ‘kubhanga ngolokela ia kuta kikutu kia paze,’ phala kubhana kithangana ku akua diembu kia kulungulula o ilunji iâ ni kuxisa o ita. (Matendelelu 20:10-13) Mu kubhanga kiki, Nzambi ua londekesa kuila ‘kene mu kuuabhela kalunga ka mukua phulu, maji ki mu uabhela o mukua phulu kudiela mu njila iê ia iibha n’a kole muenhu.’—Izekiiele 33:11, 14-16. *

Tundé ku dimatekenu, tua mono kuila m’ukulu, Nzambi ua bhangele ita phala kuzubha o hadi ioso ni kuiibha. Maji Nzambi muéne ua kexile mu zuela o kithangana kia kuluua o ita, ni kuzuela ué se nanhi ua tokalele kuluua ita. O kuila Nzambi ua kexile mu bhanga ita mukonda ua zolele kumona athu kufua? Kana. Muéne ua zembe o usuéia. (Jisálamu 11:5) O kuila o ibanzelu ia Nzambi ia lungu ni ita ia lunguluka ku hama ia dianga kioso Mon’ê, Jezú Kristu kia mateka o kuboka?

^ kax. 7 Mu kifika, saí ithangana, akua Izalaiele a a tolola kioso kiendele mu luua ni akua Amaleke ni akua Kanana, mukonda Nzambi ua a tangele kuila ka tokalele kubanda mu ita. (Dialuilu 14:41-45) Mu kubhita mivu iavulu, Joziia Sobha ia fiiele, uendele mu ita sé Nzambi ku mu tumina, mukonda dia kiki muéne uafu.—2 Malunda 35:20-24.

^ kax. 8 Akua Izalaiele ka kexile mu bhanga ngolokela ia kuta kikutu kia paze ande dia kuluua ita ni akua Kanana. Mukonda diahi kana? Mukonda akua Kanana a a bhele 400 ja mivu phala kuxisa o uendelu uâ ua iibha. Kioso akua Izalaiele kiendele mu bhânga ni akua Kanana, o akua Kanana a iibhile kinene, ka mesenene kulungulula o mixima iâ. (Dimatekenu 15:13-16) Kienhiki, ene oso a tokalele ku a jimuna mu ixi. Maji kuexile athu akua Kanana mukonda dia kulungulula o mixima iâ, ka a jibhile kana.—Josuué 6:25; 9:3-27.