Ku bokona mu madisá

Ku bokona mu madisá

 DIAMBU DIA KAPA

Ihi i Zuela o Bibidia ia Lungu ni Ita?

Ihi i Zuela o Bibidia ia Lungu ni Ita?

Kiebhi ki ueji tambuijila o kibhuidisu kiki? Athu avulu ene mu banza kuila Nzambi ua uabhela o ita. Ene amba kuila m’ukulu Nzambi ua tumina o abhezi’ê kuluua ita; mu Bibidia muala misoso iavulu ilondekesa o maka enhá. Maji athu a mukuá a mona kuila o Mon’â Nzambi Jezú, ua longo o maxibulu mê kuzola o jinguma jâ. (Matesu 5:43, 44) Mukonda dia kiki, ene amba kuila, lelu Nzambi ka xikina dingi o ita kála m’ukulu.

Mudiê ihi i u banza? O kuila Nzambi ua uabhela o ita? Se kiene, muéne u kuatekesa mbandu iebhi? O kuijiia o itambuijilu ia ibhuidisu íii, kua-nda ku kuatekesa kutonginina kiambote o ibanzelu iê ia lungu ni ita. Mu kifika, se u mona kuila Nzambi ka xikina ngó o ita, maji u kuatekesa ué o mbandu ku ua tokala eie, nange ueji divua kiambote ni ku dielela kuila o mbandu iê ia-nda nganhala o ita, mukonda iene o mbandu ia mu kuatekesa Nzambi. Maji kiebhi ki ueji divua se uevuile kuila Nzambi ua mu kuatekesa o mbandu ia jinguma jê? Eie nange ueji lungulula o ibanzelu iê.

Kuene dingi kima kia mukuá kia beta-o-kota. O kuijiia o ibanzelu ia Nzambi ia lungu ni ita, ki kubhangesa ku mu zola mba ku mu zemba. Eie se uene mu tala hadi mukonda dia ita, sé phata eie ua bhingi kuijiia o kitambuijilu kia kibhuidisu kiki: O kuila Nzambi mukua kusuínisa o ita mba muéne u tala ngó, ka suua o hadi ia athu?

Eie ua-nda diuana mu kuijiia kuila o itambuijilu ia Bibidia ki i difu ni ibanzelu ia athu. Mu kidi, tundé m’ukulu, o ibanzelu ia Nzambi ia lungu ni ita iene imoxi, ki i lunguluka kana. Tua-nda kuijiia o ibanzelu ia Nzambi ia lungu ni ita m’ukulukulu ni ku hama ia dianga kioso Jezú kia kexile mu ngongo. Kiki kia-nda tu kuatekesa kuijiia kiebhi Nzambi kia mona o ita lelu, ni ku tu kuatekesa ué kuijiia se ku hádia kua-nda kala dingi ita mu ngongo.