Nzambi ua mesena kuila tu kala tu makamba mê.

O makamba a dizuelesa mudiâ phala kudizola kiambote. Nzambi ué u tu bhinga phala kuzuela nê phala tu kale makamba a muéne. Muéne u zuela: ‘Kienhokio mua-nda ku di kola ko kuami, anga múia, mu ngi sambela, eme ué nga kà m’ivua.’ (Jelemiia 29:12) Mu kuzuela ni Nzambi, eie ‘ua-nda mu zukama, muéne ua-nda ku zukama ué.’ (Tiiaku 4:8) O Bibidia i tu tangela: “Jihova ua zukama kua ió a dikola kua muene.” (Jisálamu 145:18) Kioso ki tu zuela ni Nzambi mu musambu, o ukamba uetu ni muéne u kola dingi.

“Jihova ua zukama kua ió a dikola kua muene.” —Jisálamu 145:18

Nzambi ua mesena ku ku kuatekesa.

Jezú uambe: “Mba muthu uebhi mudienu, muène se mon’ê ua mu bhingi mbolo, u mu bhana ditadi? Mba ua mu bhinga mbiji, u mu bhana nhoka? Sumbala enu . . . muejiia kubhana an’enu maujitu mambote, kuambe dingi Tata ienu uene mu Diulu, u fula kiebhi kukala kota mu kubhanga ima iambote oso a mu bhinga?” (Matesu 7:9-11) Mu kidi, Nzambi u tu bhinga kusamba mukonda ‘muéne ua tu kuatela muanu.’ (1 Phetele 5:7) Katé muene ki u kala mu ithangana ia bhonzo, muéne u ku suínisa kulengela kua muéne. O Bibidia i tu tangela: “Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena.”Filipe 4:6.

O athu a a bhange ni vondadi ia kubheza Nzambi.

O jingijiie jene mu dilonga o ukexilu ua athu, amba kuila mazunda ni mazunda a athu, a bhindamena o kusamba. Katé muene ió amba kuila ki kuene Nzambi, a samba uá. * Kiki kilondekesa dingi kuila, o athu a a bhange muene ni vondadi ia kubheza Nzambi. Jezú uambe: “A beta ku zediua oso évua o maka ma Nzambi anga a ma lunda!” (Luka 11:28) Mu kiki, tu tena kuzukama kua Nzambi, mu kuzuela nê izuua ioso.

Se tu kaiela o kitendelesu kia Nzambi kia ku mu sambela, mabesá-hi u tua-nda tambula?

^ kax. 8 Ku muvu ua 2012, saí kisangela kia kutokuesa kiambe kuila, mu ixi ia Estados Unidos, 11 ia ji pursentu ja athu amba kuila ki kuene Nzambi, a samba lumoxi ku mbeji.