Ku bokona mu madisá

Ku bokona mu madisá

 DIAMBU DIA KAPA | O KUILA O KUSAMBA KU TU KUATEKESA?

O Misambu—i Tena ku ku Kuatekesa

O Misambu—i Tena ku ku Kuatekesa

Ande dia kuzanga nguzu iê mu kubhanga kikalakalu kioso-kioso, nange ueji dibhuidisa, ‘Mbote iahi i nga-nda katula?’ O kuila kiaiibha kuibhula o mbote ijila mu kusamba? Kana. Ki kima kia iibha kumesena kuijiia se o misambu i tena ku tu kuatekesa.

Mu milongi ku dima, tua mono kuila o kusamba ki kima ngó kioso-kioso kiene mu bhanga o athu mu ngeleja mba ukexilu phala kutulukisa o muthu kana. O Nzambi ia kidi uivua muene o misambu. Se tu samba kala kia mesena muéne, ni kubhinga ima ia tokala, muéne u tuivua. Muéne u tu bhinga ku mu zukama. (Tiiaku 4:8) Ihi i tua-nda tambula se tu kala ni ukexilu ua ku samba ku muenhu uetu? Tu di longe o mabesá ejila mu kusamba.

Kutululuka ku muxima.

Kioso ki u kala ni maka, o kuila u thandanganha kiavulu? O Bibidia i tu suinisa ‘kusamba sé kufula’ mu ithangana íii, ni ‘kubhinga kua Nzambi ioso i tua mesena.’ (1 Tesalonika 5:17; Filipe 4:6) O Bibidia i tu kanena kuila se tu samba kua Nzambi, “o kutululuka kua Nzambi kua somboka o kitongoluelu kioso kia muthu, kuanda ku [tu] bateka mixima ni ilunji.” (Filipe 4:7) O mixima ietu ia-nda tululuka se tu xila o ibhindamu ietu ioso kua Tat’etu ia diulu. Mu divulu dia Jisálamu 55:22, muéne u tu bhinga ku bhanga kiki: “Se uevu kimbamba kia ku xina, iza na-kiu kua Jihova, muene u ku sokesa na-kiu.”

“Se uevu kimbamba kia ku xina, iza na-kiu kua Jihova.” —Jisálamu 55:22

Athu avulu ku mundu, ala kiá ni kutululuka kuku. Hee Ran mukua Corea do Sul uambe:   “Ne muene se ngala ni maka a bhonzo, kioso ki ngi samba ngi mona kala a ngi katula kimbamba kia neme, mu kiki ngi kolokota.” Cecilia, mukua Jifilipina uambe: “Nga thandanganha kiavulu ni ana’mi ni manh’etu, lelu muéne ka ngejiia dingi mukonda dia uhaxi. Maji mukonda dia musambu ki ngi thandanganha kiavulu. Ngejiia kuila Jihova ua-nda ngi kuatekesa ku a langa.”

I ku suinisa ki u kala mu ibhidi.

Saí ima ia mu kuxina, kála uhaxi ka tena ku u saka, mba ima ia mukua ia bhonzo? O kusamba kua “Nzambi ió athu oso kuene mú tambula o dikuatekesu,” ku tena ku tu tululukisa. O Bibidia izuela kuila, “Muène mukua ku tu kuatekesa mu hadi ietu ioso.” (Kolindo 1:3, 4) Mu kifika, saí ithangana, kioso Jezú kia kexile ni jiphaxi javulu, “U fukama, anga u kala mù samba.” Ihi ia bhiti? “Bhu tulukila anju ia tundu mu diulu, hé i mu suinisa.” (Luka 22:41, 43) Diiala dia mukuá  Nehemiia, akexile ku mu zukutisa ku athu a mesenene ku mu fidisa ku bhanga o kikalakalu kia Nzambi. Muéne ua sambe: “Kiki-phe, eie u Nzambi, suínisa o maku mami.” O izulukutu ia kaiela, ilondekesa kuila Nzambi ua mu kuatekesa phala ka kale ni uôma ua jinguma jê, ni kuzubha o kikalakalu kia kexile mu bhanga. (Nehemiia 6:9-16) Reginald, mukua Gana, u tanga o musoso ué ua lungu ni musambu: “Kioso ki ngi samba mu ithangana ia ibhidi, ngi divua kála nga tangela o maka mami ku muthu uala ni kutena kua ku ngi kuatekesa, u ngi tangela kuila ki u bhingi ku thandanganha.” Mu kidi, Nzambi u tena ku tu tululukisa kioso ki tu mu bhinga mu musambu.

Unjimu u tunda kua Nzambi.

Saí ima i tu sola, i bhekesa ibhidi ku muenhu uetu ni ku muiji uetu katé ku hádia ni hádia. Kiebhi ki tu tena kusola mba kubatula kiambote o maka? O Bibidia i zuela: “Se sai muthu mudienu ua kambe unjimu, a u bhinge Nzambi, muène anga u mu bhana-u. Mbata muène ubhana kiavulu, mukua kuila ene oso u a bhana ni vondadi, kene mu baúla muthu.” (Tiiaku 1:5) Se tu bhinga unjimu kua Nzambi mu musambu, muéne u tena ku tu bhana o nzumbi iê ikôla phala ku tu kuatekesa kusola kiambote o ima ku muenhu uetu. Mu kidi, tu tena kubhinga o nzumbi ikôla ia Nzambi mukonda Jezú u tu tangela kuila ‘Tat’enu ia diulu, ua-nda bhana o Nzumbi Ikôla kua ió oso a mu bhinga!’Luka 11:13.

“Nga sambe kua Jihova phala ku ngi kuatekesa kusola kiambote.”—Kwabena, Ghana

Jezú ué ua bhindamene kubhinga kikuatekesu kua Tat’ê phala ku sola kiambote. O Bibidia i tu tangela kuila, kioso Jezú kia mesenene kusola o 12 kia mala eji kala jipoxolo jê, “Jezú anga uia ku mulundu mu kusamba; anga ufula kilu mu usuku uoso ni kusambela Nzambi.”Luka 6:12.

Kála Jezú, athu avulu a tululuka mu kuijiia kuila Nzambi uene mu tambuijila o misambu iâ phala ku sola kiambote. Regina mukua Jifilipina, u tanga o ibhidi iavulu ia mu bhita na-iu, kála o ku di dikila, ni kudikila o muiji ué, tundé kiafu muadi uê, muéne a mu katula ku salu, ni ibhidi ia kusasa o tuana ubheka uê. Ihi iene mu mu kuatekesa kusola kiambote? Muéne u zuela: “Ngi sakidila o kikuatekesu kiene mu ngi bhana Jihova bhu kaxi ka musambu.” Kwabena, mukua Gana, ua zuela se mukonda diahi ua bhingi kikuatekesu kua Nzambi, muéne uixi: “A ngi katula ku salu ia kutunga jinzo ni jisabhalalu, nga kexile mu nganhala kitadi kiavulu.” Mu kuxinganeka o ima ia tokalele o kubhanga phala ku di dikila, muéne uambe: “Nga sambe kua Jihova phala ku ngi kuatekesa kusola kiambote.” Muéne uambe dingi: “Jihova ua ngi kuatekesa kusola salu iambote i ngi bhana kithangana kia soko phala ku mu bheza ni ku dikila o ibhindamu iami.” Eie ué, u tena kutambula o kikuatekesu kia Nzambi phala u tene kusola kiambote o ima i ku kuatekesa kukolokota mu ukamba uê ni muéne.

Tua mono ngó ima iofele ia lungu ni mabesá ejila mu kusamba. (Phala kumona dingi mabesá a mukuá, tanga o kaxa “Mabesá Ejila mu Kusamba.”) Maji phala kutambula o mabesá enhá, kia dianga ua tokala kuijiia Nzambi ni vondadi iê. Se kiki kiene ki ua mesena, tua mu ku suínisa kubhinga ku Jimbangi ja Jihova phala ku ku kuatekesa kudilonga o Bibidia. * Kiki o kima kia dianga ki ua tokala o kubhanga phala kuzukama ku ‘mukua kuívua o misambu.’Jisálamu 65:2.