• MUVU UA MU VUALA: 1981

  • MUKUA: GUATEMALA

  • MUSOSO: UA BHITI BHU JIPHAXI JAVULU MU UNDENGE

MUSOSO UAMI: A ngi vuala ku Acul, mbanza iofele iala bhu kaxi ka milundu mu ixi ia Guatemala.

O muiji uami ua tokala ku akua Ixil, kibuka kia athu a tundu ku muiji ua Maya. Katu-ko o kuzuela o dimi dia Xiphânha, nga kulu ni kuzuela ué o dízui dietu dia uvualukilu. Kioso kia ngi vuala, mu ixi ia Guatemala mua kexile ita ia dikota ia jibha mundu uavulu, o ita ioio ia bhange 36 ia mivu. Mu kithangana kieniókio, athu avulu akua Ixil, afu.

Kioso ki nga tenesa mivu iuana, o dikota diami, dia kexile ni sambuadi dia mivu, ua kexile mu tonoka ni ngalanada anga i baza. Mukonda dia kiki, nga kituka kifofo; maji o phange’iami uafu. O undenge uami uoso nga u bhiti mu kididi mua kexile mu kala o ana-ndenge exile ifofo, mu Mbanza ia Guatemala, kuene ku nga dilongo o kutanga o Braile. Mu kididi kieniókio, manhi se mukonda diahi o atuameni a ngi fidisile kuzuela ni ana-ndenge ni akuetu, o jikoleka jami ja kexile mu ngi lenga. Izuua ioso nga kexile mu kala ubheka, nga kexile mu kingila ni vondadi ioso o mbeji jiiadi ku muvu ji nga kexile mu bhita ni manh’etu kubhata, muéne uexile muthu uambote, ni mukua henda. Maji muéne uafu kioso ki nga tenesa dikuinhi dia mivu. Mukonda dia kufunda manh’etu, o muthu ua betele ku ngi zola, muxima uami ua tolokele.

Ki nga tenesa 11 ia mivu, nga vutuka ku diembu diami, nga kexile mu dibhata dia phang’iami ia tata imoxi ua kexile kiá ni muiji uê. Ene a ngi dikila kiambote mu xitu, maji kana muthu ua tenene ku ngi kuatekesa kudivua kiambote. Saí ithangana nga kexile mu dikola kua Nzambi: “Mukonda diahi manh’etu uafu? Mukonda diahi ngala ngi kifofo?” O athu akexile mu ngi tangela kuila, Nzambi muéne ua mesenene kuila ngi bhita mu ibhidi ioso ioio. Mu kiki, ng’ambe kuila, Nzambi ki mukua henda kana, muéne muthu ua iibha. Eme nga mesenene ku di jibha, maji ki ngi ki bhange mukonda ki ngi kexile ni uta.

Mukonda dia kukala kifofo, akexile mu ngi beta ni ku ngi tobhesa. Mu ithangana iavulu, mukonda dia kukala ngi mona-ndenge, a ngi ngombela. Maji ki ngi kexile mu ki zuela muthu, mukonda kana muthu ueji ngi suua. O athu ka mesenene kuzuela n’eme. Akexile mu ngi bhanga phoko, nga tolokele o muxima, eme ki ngi dielele dingi muthu.

 O BIBIDIA IA LUNGULULA O UKEXILU UA MUENHU UAMI: Kioso ki nga kexile ni 13 a mivu, Mbangi jiiadi ja Jihova (dikaza), eza kôkuami mu xikola, mu kithangana kia kunhoha.

Mesene imoxi mu xikola, ua ngi kuatele henda, muéne ua a bhingile phala ku ngi kunda. Ene a ngi tangela o ikanenu ia Bibidia kuila ku hádia, o afu a-nda fukunuka, o ifofo ia-nda tena kumona. (Izaia 35:5; Nzuá 5:28, 29) Nga uabhele kiavulu o ima ia kexile mu ngi longa, maji kia bhonzele kiavulu kuzuela nau, mukonda mu undenge uami ki ngi kexile mu zuela ni athu. Maji sumbala ng’exile ngi mukua jisonhi, ene ni henda ioso ni muanhu uoso, a suluka ni ku ngi kunda ni ku ngi longa o Mak’â Nzambi. O dikaza didi dia kexile mu tunda dikanga, 10 dia ji kilómetulu akexile mu banda milundu phala kubhixila mu diembu dietu.

O phang’iami ua ngi tangele kuila ene exile athu a zuata kiambote, maji kexile jimvuama. Maji né kiki, ene a ngi zolele kiavulu, akexile mu ngi bhekela maujitu. Ng’ejidile kuila, o Jikidistá ja kidi, ene ngó eji tena kuzola o athu mu ukexilu uenhó.

Nga di longo o Bibidia ni kikuatekesu kia madivulu o ósonekene mu Braile. Sumbala nga kexile mu tendela ioso ia kexile mu ngi longa, maji saí ima ia ngi bhonzele kiavulu ku i xikina. Mu kifika, kia ngi bhonzele kuxikina kuila, Nzambi ua ngi zolele ni kuila athu a tokalele ku ngi zola kála kia ngi zolo Nzambi. Ng’ejidile kiá se mukonda diahi Nzambi uehela o hadi, maji kia ngi bhonzele ku mu mona kála Tata ua zolo an’ê. *

O milongi i nga kexile mu di longa mu Bibidia ia ngi kuatekesa bhofele-bhofele ku lungulula o ibanzelu iami. Mu kifika, nga di longo kuma Nzambi u kala ni henda ia athu a mu tala hadi. Nzambi uambe ia lungu ni jiselevende jê akexile mu a zukutisa: “Nga mono kidi muene o phaxi ia ifuxi iami . . . eme ngejiia o malamba mâ.” (Makatukilu 3:7) Kioso ki nga mateka kuijiia o ídifua ia Jihova, nga dibhakula kua muéne. Ku muvu ua 1998, a ngi batizala eme nga kituka mbangi ia Jihova.

Kumoxi ni phange ua ngi tambuluile ku muiji uê

Kioso ki nga tenesa muvu ua batizu, ngai mu xikola phala o ifofo ia zukamene ku mbanza ia Escuintla. O kafunga ka kilunga ua mono kuila kia ngi bhonzele kutunda ku mbanza iami mu nga tungile phala kuia mu iônge. O kilunga kia zukamene kia kexile ué ku mulundu, kua kexile mu banda o dikaza dia kexile mu kuíza mu ngi longa o Bibidia, kia ngi bhonzele kiavulu kubhixila-ku. O kafunga ua soto muiji mu mbanza ia Escuintla, a mesenene ku ngi tambulula ku bhata diâ ni ku ngi kuatekesa kuia mu iônge. Ene a ngi zolele kala nga tokalele ku muiji uâ.

Ngeji tanga misoso iavulu ia lungu ni henda ia ngi londekesa o jiphange jami mu kilunga. O misoso ioso íii, ia ngi londekesa kuila ngala bhu kaxi ka Jikidistá ja kidi.—Nzuá 13:34, 35.

MABESÁ U NGA TAMBULA: Mu mivu iavulu nga kexile mu divua kála ngi muthu sé valolo, sé kidielelu.

Maji lelu o muenhu uami uala ni valolo. Ngi mukunji ua kulonga o Bibidia mu kilunga kia Jimbangi ja Jihova, nga dibhakula mu kulonga akuetu o njimbu iambote mu veji dia kuxinganeka ngó o ukexilu uami ua ufofo. Ngala uami ni ujitu ua kukala kafunga mu kilunga, ni kubhanga madiskursu mu kilunga kiami. Ngene mu bhanga ué madiskursu mu iônge ia makota, muene múia jimidi ni jimidi ja athu.

Mu kubhanga diskursu ni Bibidia iami mu Braile

Ku muvu ua 2010, ngai mu Xikola Phala o Jiphange Akudi (lelu Xikola ia Akunji a Utuminu) mu ixi ia El Salvador. O xikola íii, ia ngi kuatekesa kukala ni uhete ua kubhanga kiambote o kikalakalu mu kilunga. Ia ngi kuatekesa ué kumona kuila Jihova ua ngi zolo, ni kuila muéne u tena kulonga muthu uoso-uoso phala kubhanga o kikalakalu kiê.

Jezú uambe: “O kubhana kota mu kuzediuisa, o kutambula ndenge.” (Ikalakalu 20:35) Lelu, ngi tena kuzuela sé phata kuila nga zediua, sumbala m’ukulu, nga kexile mu banza kuila ki ngeji tena, maji lelu ngi tena kiá ku kuatekesa o athu.

^ kax. 13 Phala kuijiia dingi mukonda diahi Nzambi uehela o hadi, tanga o kibatulu 11 kia divulu Mu Kidi Ihi i Longa o Bibidia? a di bhange ku Jimbangi ja Jihova.