Ka ngi vuala ku muiji ua jimvuama kana, maji ku muvu ua 1984, nga kituka kilumba kia fuma. A ngi solo ngi muhatu ua beta o kuuabha mu ixi ia Hong Kong. O foto iami ia kexile mu madivulu ni mu ji jurnale. Ngimbi, nga kini, nga bhange madiskursu, nga moneka mu mutelembe ua izunzumbia, nga zuata izuatu iambote, nga kexile ué mu di lunga ni jimvuama, kála o muenexi ua Hong Kong.

Ku muvu ua kaiela, nga mateka ku bhanga jifilme, mu ithangana iavulu eme ng’exile o muthu ua betele-o-kota mu filme. O akua kusoneka o ji jurnale a mesenene kuijiia o musoso uami, o akua ku katula jifoto a mesenene ku ngi katula jifoto, o jimvuama a mesenene ku kala n’eme mu ididi ia katunda, ni kudia nau kumoxi. O athu a mesenene ngó ku ngi tala eme.

Mu filme ia ujibhangânga

Maji mu kubhita kithangana, nga mono kuila o ima íii ki iene i zediuisa o muthu kala ki nga kexile mu xinganeka. Nga kalakala kiavulu mu jifilme ja kubhânga, kiexile kiluezu, mukonda mu ixi ia Hong Kong, o athu a bhanga o jifilme a bhânga muene mu kidi, ka bhanga kála kia kexile mu bhanga o athu mu Hollywood, kienhiki eme nga kexile mu bhanga o ima mu kidi kála o kubanda ni mota ku thandu dia dikalu. Jifilme javulu ji nga bhangele, jexile ja ufusa ni ja ujibhangânga. Ja mukuá jexile ja uanga.

Ku muvu ua 1995, nga kazala ni diiala uexile ni ditenda dia kubhanga jifilme. Sumbala eme nga kexile ni ima ioso phala kuzediua ku muenhu—fuma, jimbongo, ni diiala dia ngi zolele kiavulu—maji eme ki ngi sangulukile. Nga banze kueha o kubhanga jifilme.

NGA DILEMBALALA KIOSO KI NGA KEXILE MU DILONGA O BIBIDIA MU UNDENGE

Nga lembalala kioso ki nga kexile mu di longa o Bibidia mu undenge. Ji sábhalu joso, eme ni phang’ami, tua kexile múia mu kunda muiji uexile Jimbangi ja Jihova. O tata, Joe McGrath, ua kexile mu tu longa o Bibidia ni an’ê kitatu kia ahatu. Ene exile muiji uambote akua henda, o “Papa Joe,” ua zolele kiavulu o muhatu’ê, ni kuxila an’ê. Nga zolele kiavulu kuia nau mu iônge. Saí ithangana nga kexile múia mu iônge ionene. Iexile ithangana iambote. Nga kexile mu divua kiambote mu kukala kumoxi ni Jimbangi ja Jihova.

Maji nga bhiti ni ima ia iibha ku bhata diami. O ukexilu ua tat’etu, ua bhekela dilamba diavulu kua manh’etu, muéne ua luualele kiavulu. Kioso ki nga kexile ni dikuinhi dia mivu, mama ka kexile dingi múia mu kilunga kia Jimbangi ja Jihova. Eme nga suluka, maji  sé kisangusangu, nga di batizala mu kitala kia 17 ia mivu. Maji ki ku bhitile thembu iavulu, nga bhange kima kiaiibha, eme nga xisa o kilunga.

NGA BANZE KUVUTUKA

Kioso ki nga kazala, tufunga tuiadi mu kilunga kia Jimbangi ja Jihova mu nga tundile ejile mu ngi kunda. Ene a ngi tangela ihi i nga tokalele kubhanga phala kuvutuka kua Jihova, a bhingi kua Cindy, uexile mukunji a jixi jengi, phala ku ngi kuatekesa. Mu kithangana kieniókio, ki ngi kexile dingi ni kixikanu kia soko, eme nga mu bhingi phala ku ngi xikinisa kuila o Bibidia ene muene o Mak’â Nzambi. Muéne ua ngi londekesa o ikanenu ia Bibidia ia dikumbidila kiá. Mu kubhita thembu tua kituka makamba, muéne ua ngi bhingi kumateka ku di longa né o Bibidia. Nga xikina. Kiene ki nga dianga kuijiia kuila, Jihova Nzambi ia henda, muéne ua mesena ngi zediua.

Kioso ki nga mateka dingi kuia mu iônge, nga mono kuila nga betele ku sanguluka bhu kaxi ka Jimbangi ja Jihova, o kukala ni jikoleka jami ndenge. Maji o ima i nga bhiti na-iu kioso ki ng’exile mona-ndenge ia ngi fidisa kudielela o athu, eme ué ki ngi di zolele. Saí phange mu kilunga ua ngi kuatekesa, kioso kia ngi londekesa mu Bibidia kiebhi ki nga tokalele ku di bhana ni ibanzelu ienioió, nga di longo ué ku bhanga makamba a kidi.

NGA SANGE KIMA KIA BETA-O-KOTA O FUMA NDENGE

Ku muvu ua 1997, tuai ku Hollywood mu mbanza ia California, ku ixi ia Estados Unidos. Kuenhoko nga suína mu kukuatekesa dingi o athu kudilonga o unjimu ua Mak’â Nzambi. O kulonga o Bibidia ku athu kua ngi sangulukisa dingi, o fuma ioso mu kubhanga o jifilme ndenge. Mu kifika, ku muvu ua 2002, nga di sange ni Cheri, tua dijidile ukulu ku ixi ia Hong Kong. Muéne ua bhitile ué mu ima mu nga bhitile. Muéne a mu solele ué kukala muhatu ua betele kuuabha mu ixi ia Hong Kong, eme nga mu bhinganene. Kioso kia ngi solo, muéne ua ngi te o kitundu bhu mutué. Muéne ua kexile ué mu bhanga jifilme, uexile ué ni ditenda dia kubhanga jifilme, iu ua kexile mu kalakala ni maiala a mukua exile ué ni matenda a kubhanga jifilme. Muéne uendele ué mu kala ku Hollywood.

Nga kexile ni henda ia Cheri, kioso ki ngevu kuila o sai iê ua fuile. Muéne ka sangele kidielelu mu ngeleja iê ia Budista. Muéne uexile ué ni fuma, athu avulu a mesenene o fuma iê, maji muéne ka sangulukile, ka dielele ku muthu. Nga mateka ku mu tangela o ima i nga kexile mu dilonga, maji mukonda dia ngeleja iê, ka kexile mu bhana valolo mu ima i nga kexile ku mu tangela.

Kamba diami Cheri mu filme

Saí kizuua ku muvu ua 2003, Cheri ua ngi xindi, muéne ua kexile mu mbanza ia Vancouver, ku ixi ia Canada, kua kexile mu bhanga filme. Ni kisangusangu kioso ua ngi tangela kuila saí kizuua muéne ua kexile mu kuenda mu mbanza ni dikalu, mu kithangana kieniókio ua mateka kusamba ni dízui dia suína: “Ngi tangele, eie o Nzambi ia kidi? Dijina diê nanhi?” Mu kithangana kieniókio, muéne ua bhixila bhu kididi kia ubhezelu iu ua mono o dijina Jihova. Muéne ua mono kuila Nzambi ua kexile ku mu tambuijila o ibhuidisu iê, iu ua mesenene ku di sanga ni Jimbangi ja Jihova ni lusolo-luoso. Nga mu kuatekesa, ki ku bhiti izuua, muéne ua kexile kiá mu kilunga kia dimi dia China mu mbanza ia Vancouver.

Mu kubhita mivu, Cheri uambe: “O Jimbangi ja Jihova a ngi zolo mu kidi.  Ngi tena kua tangela o ima iala ku muxima uami.” Nga sangulukile kiavulu kioso ki ngevu kiki, mukonda kioso Cheri kia kexile mu bhanga jifilme, muéne ka kexile ni makamba. Cheri ua suluka ni kuia mu iônge. Maji ku muvu ua 2005, a mu bhingi kubhanga filme jiiadi mu ixi ia China, muéne ua xikina. Kienhiki ua vutuka ku ixi ia Hong Kong. Maji ku muvu ua 2006, Cheri ua bhakula o muenhu uê kua Jihova, ia a mu batizala kála Mbangi ia Jihova mu kiônge kia dikota ku ixi ia Hong Kong. Sumbala muéne ua mesenene kubhanga kiavulu mu sidivisu ia Jihova, maji ka tenene kubhanga kiki, mukonda dia ikalakalu iê ia lungu ni kubhanga jifilme, muéne ua luualele kiavulu.

KUSANGULUKA MU KU KUATEKESA ATHU

Ku muvu ua 2009, o muenhu ua Cheri ua lunguluka. Muéne ua solo kuxisa o ditenda dia kubhanga jifilme phala kukalakala dingi kiavulu mu sidivisu ia Jihova. Muéne ua bhange makamba avulu mu kilunga. Muéne ua kituka muboki ua thembu ioso, ua sangulukile kiavulu mu ku kuatekesa o athu kusanguluka ku muenhu mukonda dia kuijiia o Njimbu Iambote ia Utuminu ua Nzambi.Matesu 24:14.

Mu kiki Cheri ua mateka kudilonga o dimi dia Nepalês phala ku kuatekesa o kibuka kia Jimbangi ja Jihova akexile mu zuela o dimi didi ku ixi ia Hong Kong. Athu avulu a zuela o dimi dia Nepalês mu ixi ia Hong Kong, ka a bhana valolo mukonda kejiia kuzuela kiambote o dimi dia Kingileji mba o dimi dia China, ka a bhana ué valolo mukonda dia ijila iâ ki i difu. Cheri ua ngi tangele kuila muéne ua sangulukile kiavulu mu ku kuatekesa athu enhó kuijiia kiambote o Bibidia. Mu kifika, saí kizuua muéne ua kexile mu boka mu nzo ni inzo, ua sange muhatu u zuela o dimi dia Nepalês, o muhatu iú uejidile bhofele maka alungu ni Jezú, maji kejidile o Nzambi ia kidi, Jihova. Cheri ua kuata o Bibidia phala ku mu londekesa kuila Jezú ua sambele kua Tat’ê ia diulu. O muhatu iú kioso kia di longo kuila muéne u tena kuzuela ni Nzambi ia kidi, Jihova, muéne ua xikina kuívua o njimbu iambote. Mu kubhita thembu, muadi uê ni mon’ê ua muhatu, a mateka uá kudilonga o Bibidia.Jisálamu 83:18; Luka 22:41, 42.

Cheri lelu

Kioso ki nga mono o kisangusangu kia Cheri, mukonda dia ku kala muboki ua thembu ioso, eme nga dibhuidisa: ‘Ihi ia mu ngi fidisa ku kala muboki ua thembu ioso?’ Mu kithangana kieniókio nga kexile ué mu ixi ia Hong Kong. Nga banze ku di popheka phala ku bandekesa dingi o kikalakalu kiami kia ku longa o kidi kia Bibidia. Nga mono kuila o kuívua o athu ni ku a kuatekesa kuijiia o Mak’â Nzambi, ku ngi sangulukisa kiavulu.

Nga mono kuila o ku kuatekesa o athu kuijiia o Mak’â Nzambi ku ngi sangulukisa kiavulu

Mu kifika, ngene mu longa o Bibidia ku muhatu mukua Vietname, ua luualele ithangana ioso, ni kudila. Lelu muéne ua sanguluka iu ua uabhela kiavulu kuia mu iônge ia Jimbangi ja Jihova.

Ki kala Cheri mba eme, tua sange kima kia beta-o-kota, o fuma ndenge. Sumbala o kithangana ki tua bhiti mu kubhanga jifilme kia tu bhekela fuma, maji o kulonga o athu kuijiia Jihova Nzambi kia beta-o-kota, mukonda ki mu bhana kijingu. Se phata tua mono o kidi kia izuelu ia Jezú: “O kubhana kota mu kuzediuisa, o kutambula ndenge.”Ikalakalu 20:35.