Ku bokona mu madisá

Ku bokona mu madisá

 DIAMBU DIA KAPA | KIEBHI KI TU DIBHANA NI MAKA

Uôma Mukonda Dia Mavuua

Uôma Mukonda Dia Mavuua

Alona uambe: “Kioso ki ng’evu o ngunga ia mu xika, o muxima uami ua mateka ku ngi titila, kienhiki ngai mu suama mu dikungu. Maji né muene mu dikungu mu nga lengela nga kexile hanji mu teketa kiavulu. O uôma ua ngi vudile dingi kioso ki nga kexile bhu kanga, mukonda bhu kanga ki bhuexile kididi kia kulengela. Kioso ki nga kexile mu kuenda mu kikoka, nga mateka o kudila, ki ngi tenene kubhuima. Kua bhitile ji ola javulu phala eme kutululuka. O ngunga ia mateka dingi o kuxika.”

Alona

O ita ki iene ngó iene mu thandanganhesa o athu, kana. Mu kifika, o kuijiia kuila eie mba ndandu iê ua kuata uhaxi ua dikota u jibha, u divua kála ua diota ku mina. Athu a mukuá a kala ni uôma mukonda dia ima ia-nda bhita ku hádia. Ene a dibhuidisa, ‘O kuila o tuana tuetu ni alaul’etu, a-nda kala mu ngongo muezala ni ita, ujibhangânga, ixi ia xidi ni mavuua ni mauhaxi?’ Kiebhi ki tu tena kudibhana ni maka enhá?

Mu kuijiia kuila kuene ima ia iibha, “o njimu o kiluezu u ki muena mu kanga, anga u suam’ê kiá.” (Jisabhu 27:12) Kála ki tuene mu langa o mukutu uetu mu xitu, tua tokala ué kubhanga ima phala kulanga o muxima uetu ni kilunji. O kutala ji filme mba kuívua minangu iezala ni ujibhangânga, ku bhangesa etu ni tuana tuetu kukala ni uôma uavulu. O kueha o kutala ni kuívua o ima íii, ki kilombolola kuila ki tu xikina kuila kuene kuiibha mu ngongo, kana. Nzambi ka  bhange o mixima ietu phala kukala-mu ima ia iibha. Mu veji dia kiki, tua tokala ku ta-mu “ioso ima ia kidi, . . . ioso o ima iaiuka, . . . ioso o ima iazele, . . . ioso ima iauabha.” Se tu bhanga kiki, “o Nzambi mukua ku tu bhana o paze” ua-nda tu bhana kutululuka kua muxima.Filipe 4:8, 9.

O KUSAMBA KUALA NI VALOLO IA DIKOTA

O kixikanu kia kidi, ki tu kuatekesa kudibhana ni maka a moneka ku muenhu. O Bibidia i tu tangela kuila “mu kale ku mesu azele, mu kale mù samba.” (1 Phetele 4:7) Tu tena kubhinga kua Nzambi phala ku tu kuatekesa ni ku tu bhana unjimu ni kusuína, phala tu tene kuditunda kiambote mu kudielela kuila “muène u tu ivua mu ioso i tu mu bhinga.”1 Nzuá 5:15.

Ni muadi ué, Avi

O Bibidia i tu tangela kuila, Satanaji muéne “o sobha ia mundu iú,” ki Nzambi kana. I tu tangela ué kuila “o mundu uoso-phe ua zeka mua Kadiaphemba.” (Nzuá 12:31; 1 Nzuá 5:19) Kienhiki, kioso Jezú kia tu longo o kusamba, muéne ua londekesa kuila Satanaji muthu ua kidi, muéne uixi: “Tu kudile ku Dimonho.” (Matesu 6:13) Alona uambe: “Kioso o ngunga kia mateka o kuxika, nga bhingi kua Nzambi phala ku ngi kuatekesa kutululuka. Muadi uami ué uéza, etu tua sambe kumoxi. O kusamba, kikuatekesu kia dikota.” Kála ki zuela o Bibidia: “Jihova ua zukama kua ió a dikola kua muene, oso a dikola kua muene mu kidi.”Jisálamu 145:18.

MABESÁ U TUA KINGILA KU HÁDIA

Mu Diskursu diê dia bhange ku Mulundu, Jezú ua longo o maxibulu mê o kusamba: “Utuminu ué uize.” (Matesu 6:10) O Utuminu ua Nzambi ua-nda zubha o maka oso ene mu thandanganhesa o athu. Bhu kaxi ka Jezú, “Kilamba kia Paze,” Nzambi “ita ua i suikika katé ku maxokololo a’xi.” (Izaia 9:6; Jisálamu 46:9) “[Nzambi] anga ua kà fundisa ni mabatuilu mê mu’axaxe ka ifuxi iavulu . . . Muiji umoxi ki ua kà lekela dingi xibhata mu kubhânga jimvunda ni muiji ua mukuá, ka kà di longa dingi kúlua ita. . . . O u a kuatesa uôma ka moneka.” (Mikeia 4:3, 4) O miji ioso a-nda sanguluka “a kà tunga jinzo, anga a kala-mu; a kà dima milenga ia mivide, anga a ká dia idima iê.” (Izaia 65:21) ‘Ki bhua ka kala mukua-bhata uila: Nga kata, lémbua.’Izaia 33:24.

Lelu, sumbala ni ima iavulu iene mu bhanga o athu phala kudilanga, saí bhabha ki tu tena kulenga o ‘ima ia iibha i moneka sé ku i kingila,’ mba kueha kukala mu kididi mba mu kithangana ki ki tokala. (Ndongixi 9:11) Tundé ukulu, o ita, ujibhangânga ni mauhaxi ene mu katula o mienhu ia athu ambote. Kidielelu kiahi kiala na-kiu o athu enhá?

Nzungule dia athu, Nzambi ngó u tena kua tanga, a-nda vutuka dingi ku muenhu. Lelu ala hanji ku muxima ua iuka ua Nzambi katé o kizuua kioso ‘oso ala mu jimbila a-nda tunda-mu.’ (Nzuá 5:28, 29) Ia lungu ni difukunukinu, o Bibidia i tu tangela kuila o “kudielela kua kidi, ku kuatesa mienhu ietu [kála ngunji] ia naviiu. Kuene kua kuata, kua kolo.” (Jihebeleu 6:19) “Nzambi-iú ua tumu ku k’ijidisa kua ene oso mu ku . . . fukununa [Jezú] ku’alunga.”Ikalakalu 17:31.

Lelu, katé muene ió a mu bhanga o vondadi ia Nzambi, a-nda bhita ni maka. Maji mu kuzukama kua Nzambi bhu kaxi ka musambu ni kukolesa o kixikanu kiâ mu kudielela ku mabesá a tu tangela o Bibidia kuila tua-nda kua tambula ku hádia, kuene mu kuatekesa Paul, Janet, ni Alona kudibhana ni maka a moneka ku mienhu iâ. Kála kia bhange Nzambi kua ene, Nzambi ‘a m’izalese [ué] ni ngalasa ni paze, mu kuxikana ku muala na-ku kua Muène.’Loma 15:13.