Kiebhi kiexile o matadi a kuhuhila o masa m’ukulu?

O jimbutu ja tiliku akexile mu ji huhila ku matadi phala ji kale fuba phala kubhanga na-iu jimbolo. O ahatu oso mba o jiselevende, akexile mu bhanga o kikalakalu kiki izuua ioso. M’ukulu o jibuia ja matadi a kuhuhila akexile mu j’ivua izuua ioso.Makatukilu 11:5; Jelemiia 25:10.

O ifikula ia akua Ijitu, ilondekesa kiebhi kia kexile mu bhanga kiki. O jimbutu ja tiluku akexile mu ji ta ku ditadi, o ditadi didi a d’ixana ué saddle-quern. O muthu u fukama ku dima dia ditadi anga u kuata ditadi diofele dia kuhuhila ni maku a iiadi, anga u kuata kuhuha o jimbutu ja tiliku. Saí divulu dizuela kuila o matadi enhó a ku huhila, akexile mu pezala kilu jiiadi mba jiuana. Se muthu u takula o ditadi didi kua mukuá, dieji tena ku jibha.Afundixi 9:50-54.

O ukexilu ua kuhuha o tiliku, uexile phala o mbote ia muiji m’ukulu, mukonda dia kiki, o kitumu kia Bibidia, kia fidisile o muthu kutambula o ditadi dia kuhuhila dia ió ua mu dile dikongo. O divulu dia Matendelelu 24:6, dizuela: “Matadi ma kuhuhila masa kene ku ma tambula ku kikunji ene kiiadi kiâ ni dia thandu, ni dia bhoxi ne-mbé dia thandu ngó diene, kuma kiokio kuximbika muenhu.”

Ihi ilombolola o kukala “bhu jihata?”

O Bibidia i tu tangela kuila Jezú “uene bhu jihata já Tata.” (Nzuá 1:18) O kizuelu kiki kilombolola o ukamba uambote, ua kidi, uala nau Jezú ni Nzambi. O izuelu íii ia lungu ni ukexilu ua kexile mu kaiela o Jijudé mu kithangana kia kujandala.

Mu izuua ia Jezú, o Jijudé ja kexile mu xikama bhu ialu iexile kala hama, akexile mu i ta mu kididi kia jandalu, o meza a kala bhu kaxi, mu kuxikama ene a bhetama. O mitué ia athu oso i lunga ku meza, o inama iâ a i sununa, i lunga kuéngi, o muthu u xamenena bhu hama ni phuna ia lukuaku lua kiasu. O ukexilu iú ua kuxikama, ua kuatekesele o muthu kudia ni kukuata ima ia mukuá ni lukuaku luê lua kadilu. Kuma athu oso a xamenene ku mbandu iâ ia kiasu, kala muthu ku mbandu ia mukuâ, saí divulu diambe kuila: “O mutué ua iú u zukama bhu jihata ja muthu ua xikama ku dima diê, kienhiki tu tena kuzuela kuila, muéne ua kexile ‘bhu jihata’ ja mukuâ.”

O kukala bhu jihata ja mutuameni ua muiji, kuexile kijingu kia dikota phala o muthu iú. Kienhiki, mu fesa ia sukina ia Phasu, o “xibulu imoxi a mu zola kuala Jezú,” poxolo Nzuá, ua xamenene bhu jihata ja Jezú. Mu kiki, Nzuá ua tenene ku ‘bhetamena kua Jezú’ phala ku mu ibhula kima.Nzuá 13:23-25; 21:20.