• MUVU UA MU VUALA:1954

  • MUKUA: CÁNADA

  • MUSOSO: UEXILE MUKUA KU NGANALA

MUSOSO UAMI:

Nga kudila mu mbanza ia Montreal, mbanza ia iibha. Kioso ki nga tenesa mivu i samanu, tat’etu uafu, mukonda dia kiki mam’etu muéne ua mateka ku tambula konda dia dibhata dioso. Tua kexile tu dinake, eme ng’exile o dikota.

Kioso ki nga kexile mu kula, nga kexile ngó mu nua ji droga, ku di ta mu jinvunda ni ku di lunga ni jibandi. Ki nga tenesa dikuinhi dia mivu, nga mateka kuambata mikanda ku iuaia ni ku sobha kitadi phala ku ki futa ni avasu. Nga kexile mu dinga kiavulu o athu, nga kexile mu sanguluka kiavulu mu ku nganala o athu. Eme nga kexile mu divua kiambote mu ku bhanga kiki.

Kioso ki nga tenesa 14 kia mivu, nga kituka hete mu ku nganala o athu. Mu kifika, nga kexile mu sumba ji Leloji, ji nela, a ji bhangele ni ulu uofele maji mu ku ji sumbisa nga kexile mu ta-mu ijimbuete ia londekesele kuila o ima íii a i bhange ni ulu uavulu ua 14 kia ji kilate. Nga kexile mu ji sumbisa mu ikoka ni mu itanda. Nga kexile mu divua kiambote mukonda ki nga bhingile ku kalakala kiavulu phala ku nganhala kitadi kiavulu. Saí kizuua, nga nganhala 10.000 dia ji dolale mu kizuua kimoxi ngó!

Mu kitala kia 15, kioso kia ngi kaie mu xikola mu nga kexile phala ngi lungulule o ukexilu uami ua iibha, ki nga kexile dingi ni kididi kia ku kala. Nga mateka ku zeka mu ikoka, mu ji jaludim ni mu mabhata a makamba.

Mukonda dia ikalakalu iami ia ku nganala o athu, a xiku dia ngoji akexile mu ngi kuata kiavulu. Kuma o ima i nga kexile mu sumbisa ki nga kexile mu i nhana, ene ka kexile mu ngi ta mu kaleia. Maji akexile mu ngi bhinga madijimu avulu mukonda dia ku nganala o athu ni ku sumbisa sé ku kala ni mikanda i ngi tumina o ku sumbisa. Ki ngi kexile ni uôma ua athu, katé muene nga kexile mu sobha kitadi ku ji mvuama phala ku ki futa ni ávasu. O ku bhanga kiki, kiexile kiluezu kia dikota, mukonda dia kiki saí ithangana nga kexile mu kuenda ni uta uami. Saí ithangana nga kexile mu kalakala ni kibuka kia jibandi.

O BIBIDIA IA LUNGULULA O UKEXILU UA MUENHU UAMI:

Ngevu kima kia lungu ni Bibidia mu veji ia dianga kioso ki nga tenesa 17 dia mivu. Nga tungile ni saí iami, muéne ua mateka ku di longa o Bibidia ni Jimbangi ja Jihova. Maji nga iibhile o ijila  ia Bibidia mukonda dia kiki, nga mu xisa eme ngai mu tunga ni muhatu uéngi nga kexile kiá ku mu tangesa.

Nga banze ku mateka ku di longa o Bibidia, kioso o muhatu uami iú kia mateka ué o ku di longa o Bibidia ni Jimbangi ja Jihova! Muéne ua lungulula o ukexilu ua muenhu uê, muéne ua kituka muhatu ua lenduka, mukua muanhu, kiki kia ngi sangulukisa kiavulu. Nga xikina o kuia mu kiônge mu Kididi kia Ubhezelu kia Jimbangi ja Jihova. Ki nga bhixila-ku, o athu a ngi tambulula kiambote, exile athu a kidi. Ene ka difuile ni athu nga kexile mu di lunga nâ! O jindandu jami ka ngi zolele; mu undenge uami uoso, o jindandu jami ka ngi londekesele henda. O henda i nga sange bhu kaxi ka Jimbangi ja Jihova, iene o henda i nga kexile mu sota ku muenhu uami. Kioso o Jimbangi ja Jihova kia bhingi phala ku ngi longa o Bibidia, eme nga xikina ni muxima uoso.

O ima i nga kexile mu di longa mu Bibidia, ia bhulula o muenhu uami. Nga bakanene ni makamba a iiadi ku nhana kitadi phala ku futa o makongo mami a 50.000 a ji dolale. Maji nga sanguluka kiavulu mu ku dituna ku bhanga kiokio! O makamba mami a suluka, ai muene mu nhana. Muthu umoxi a mu kuata a mu te mu kaleia, o ua mukuá a mu jibha.

Mu ku suluka ni ku di longa o Bibidia, nga mono kuila nga bhingile ku lungulula ima iavulu ku muenhu uami. Mu kifika, nga di longo o itendelesu i tu sanga mu divulu dia 1 Kolindo 6:10: “Ni mii, ni akua luimbi, ni jihôlua, ni axingi a jindaka, ni ingulungumba, ene oso kà tena kubhingana mu Utuminu ua Nzambi.” Mu ku tanga o velusu íii, nga mateka o ku dila mukonda dia ukexilu uami ua iibha. Nga mono kuila nga bhingile ku lungulula o muenhu uami uoso. (Loma 12:2) Eme ng’exile ngi mukua njinda, mukua makutu.

Maji nga di longo ué kuila Jihova mukua henda, mukua ku loloka. (Izaia 1:18) Nga sambe, nga dióndo kua Jihova phala ku ngi kuatekesa ku lungulula o ukexilu ua iibha ua muenhu uami. Ni kikuatekesu kiê, bhofele-bhofele, nga tenene ku lungulula o ukexilu uami ua iibha. Mu kifika, o kima kia dikota ki nga bhange, o ku kazala ni muhatu uami.

Lelu ngala ku muenhu mukonda dia ku kaiela o itumu ia Bibidia

Nga kexile ni 24 kia mivu ki nga kazala, nga kexile ni tuana tutatu. Kienhiki, nga tokalele ku sanga salu ia kidi. Maji ki nga di longele kiavulu mu xikola, ki nga kexile ni maufunu. Nga sambe dingi kua Jihova n’a ngi kuatekese. Kienhiki, ngai mu sota salu. Nga zuela ni ji ngana akua matenda kuila nga mesenene ku lungulula o ukexilu uami ni ku kalakala ni kidi kioso. Saí ithangana, nga kexile mu a tangela kuila, nga kexile mu di longa o Bibidia ni kuila nga mesenene ku kituka muthu uambote. Ji ngana javulu akua matenda a ditunine ku ngi bhana salu. Maji mu ku bhita izuua, nga sange ditenda diéngi. Kioso ki nga zubha ku jimbulula kiebhi ki ng’exile m’ukulu, o ngana mukua ditenda ua kexile mu ng’ibhula, uambe: “Ki ngi kijiia se mukonda diahi, maji o muxima uami ua mu ngi tangela ku ku bhana salu.” Nga mono kuila Jihova ua kexile mu ngi tambuijila o musambu uami. Mu ku bhita thembu, eme ni muhatu uami a tu batizala kala tu Jimbangi ja Jihova.

MABESÁ U NGA TAMBULA:

Lelu ngala ku muenhu mukonda dia ku kaiela o itumu ia Bibidia ni ku kala ni ukexilu uambote ua Jikidistá. Ngala ni muiji uambote ua sanguluka. Ng’ejiia kuila Jihova ua ngi loloka, mukonda dia kiki ngala ni kitongoluelu kia zele.

Ngi muboki ua thembu ioso mu 14 kia mivu, ngene mu ku kuatekesa o athu kuijiia ihi i longa o Bibidia, o muhatu uami ua kituka ué muboki ua thembu ioso. Mu 30 a mivu, nga sanguluka kiavulu mu ku kuatekesa 22 kia athu ku bheza Jihova, athu ene mu kalakala kumoxi n’eme. Ngene múia hanji mu itanda—maji ki ngene múia-ku phala ku nganala o athu kala ngi kexile mu bhanga m’ukulu. Lelu kioso ki ngiia-ku, ngi sota kuzuela ni athu maka alungu ni kixikanu kiami. Ngi a kuatekesa ku kala ni kidielelu kia ku kala ni muenhu ku hádia ku mundu ua ubhe, kua-nda kamba athu akua ku nganala akuâ.Jisálamu 37:10, 11.