O kuila Nzambi ua-nda kuehela kuila o athu a tumina jinga o akuâ ni ku bhanga ima i bhangesa o athu ku kamba ku kala ni muenhu uambote ku hádia? Kana, kala ki tua mono, muéne ua-nda zubha o uadiama ni hadi ioso i tuene mu tala tundé ukulu. O Mubhangi ua athu ni ixi, ua mesena kuila eie uijiia kuila o kithangana kiê kia ku zubha o ima íii kia zukama kiá. Kiebhi muéne kiene mu tu ijidisa o ima íii?

Tala o kifika kiki: Kioso ki u banza kuenda njila ni dikalu, kia dianga eie uene mu sota kuijiia kiambote o njila mu ku sota ji mapa ni itendelesu ia mukuá i tena ku ku kuatekesa kuenda kiambote. Kienhiki, mu ku mona o ijimbuete ia ku tangela kuila ueji i sanga mu njila, eie u kala dingi ni kidielelu kuila ua múia muene mu kididi ki ua mesena. Kiene kimoxi ué, Nzambi ua tu bhana o Maka mê, a tu tangela kiebhi kieji kala o ima mu ngongo ioso. O ku mona o ima íii ku bhita, ku tu xikinisa kuila o dizubhilu dia zukama muene.

O Bibidia i tu tangela kuila kueji kuíza kithangana kia dikota nuka kia bhitile tundé ku dimatekenu, o kithangana kiki kieji bheka o dizubhilu dia mundu. Mu kithangana kiki mueji bhita ima iavulu mu ngongo ioso, ima nuka ia bhitile mu ngongo. Tala ima imoxi io tange mu Mak’â Nzambi.

1. IMA IA MU LUNGULUKA KU MUNDU O kikanenu ki tu sanga mu divulu dia Matesu kibatulu 24, ki tanga izulukutu ieji bhita mu ngongo, o izulukutu íii ieji bhita mu kithangana kimoxi ngó. O Izulukutu íii ieji londekesa kuila o “dizubhilu dia mundu” dia zukama. O izulukutu íii ia-nda suluka ni ku bhita katé kia-nda kuíza o “dizubhilu.” (Velusu 3, 14) O izulukutu íii, o nzala, oxi kutunguta mu ididi iavulu, ku bhukumuka kua athu, ku kamba henda, ji mesene ja makutu ja ji ngeleja ji nganala o athu. (Velusu 6-26) Mu kidi, o izulukutu íii iene mu bhita kiá tundé ukulu, kidi. Maji, mu ku zukama o dizubhilu dia mundu, o ima ioso íii ieji bhita mu kithangana kimoxi. O izulukutu íii ieji bhita kumoxi ni izulukutu itatu i tua-nda tanga ku luiji.

2. O UKEXILU UA IIBHA UA ATHU O Bibidia i zuela kuila “mu izuua isukidila-ku”—o kithangana kieji bheka o dizubhilu dia mundu—o athu ku mundu, eji kala ni maukexilu a iibha. O Bibidia iambe: ‘Kuma athu a kà kala azodi a ene ngó, injenji, akua ukumbu, a tènda akuâ, a nonga, a xibhaka tata ni mama, a kamba ku sakidila, a kamba ujitu ua Maka ma Nzambi. Ka moneka henda ia muthu, kene ku loloka, akua ku tatela ngó akuâ, keji ku fikisa jihanji, a kaka, a di zemba ni ima iambote.’ (2 Timote 3:1-4) Mu kidi, tundé ukulu kuene mu kala athu ni maukexilu a iibha, maji mu “izuua isukidila-ku” o maukexilu a iibha a athu eji di bandekesa dingi kiavulu, mukonda dia kiki o Bibidia i zuela kuila o ‘jithembu jeji bhonza’ kiavulu. O kuila uene mu mona o maukexilu iá a iibha ku athu?

3. O IXI A MU I BUIKA O Bibidia i zuela kuila Nzambi ua-nda ‘buikisa ió oso ene mu buikisa oxi!’ (Dijingunuinu 11:18) Mu ukexilu uebhi o athu a mu buika o ixi? O izuua ia Noué a i tange ué mu Bibidia kuila ia iibhile: ‘Ixi anga i kala ia sekala bhu pholo ia Nzambi, mu ngongo anga mu izala usuéia. Ngana Nzambi anga u tala ixi, u mona kuma ia sekala.’ Mukonda dia kiki, Nzambi uambe: “Nga-nda ku a buidisa kumoxi ni ixi ioso.” (Dimatekenu 6:11-13) O kuila uene mu mona ni mesu mê kuila o ixi ioso iezala ni usuéia? O athu a múia dikanga mu ku bhanga ima ia iibha, m’ukulu ndenge: O athu a tena ku buika o ixi ni ku jima o mbutu ia athu. Ene ala ni mauta a katunda. Maji o ixi a mu i buika ué mu ukexilu uéngi. O ima kala—o munza u tuene mu bhuima, o iama, o mixitu, o musanza ua kalunga—a mu i zanga ku athu mukonda dia luímbi luâ.

 Dibhuidise, ‘o kuila m’ukulu-kulu o athu akexile ni kutena mba mauta a katunda phala ku buika o ima íii?’ Maji lelu o athu a mu iudika ni ku bhaka mauta a katunda ni ku zanga o ixi. O ji makina ja katunda jene mu bhanga o athu lelu, jedi kala jene mu kuatekesa o athu kuijiia ni ku langa o ibhidi i tena ku moneka. Maji o athu ka a bhange ni ku tena kua kuijiia o ima ia-nda bhita ku pholo ni ku i fidisa phala ki i bhite. Ande dia ima ioso iene ni muenhu kulu dia mundu ku i jima-ku, Nzambi ua-nda buika oso ió ene mu buika o ixi. Kiki kiene kia tange Nzambi!

4. O NJIMBU IAMBOTE A MU I BOKA MU NGONGO IOSO O mbandu ia mukuá ia kijimbuete kieji londekesa kuila o dizubhilu dia zukama, ia lungu ni kikalakalu kia dikota, nuka a ki bhangele ku mundu, o Bibidia iamba: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.” (Matesu 24:14) O kikalakalu kiki kia ku boka, ki kieji difua ni ikalakalu ia ku boka iene mu bhanga o ji ngeleja tundé ukulu. Mu izuua isukidila-ku, eji beta ku boka njimbu, “o Njimbu . . . Iambote ia Utuminu ua Nzambi.” Eie uejiia athu ene mu boka o njimbu íii ku akuâ? Né muene se kuene mu kala athu a mu boka o njimbu íii, o kuila ene, ene mu boka ngó kididi kimoxi inga ene mu i “tula mu ngongo ioso, mu kubhana umbangi ku akua jixi joso?”

O njimbu ia Utuminu ua Nzambi a mu i tula mu ngongo ioso mu ji hama ni ji hama ja madimi

O Kijimbuete www.jw.org ki beta ku longa “o Njimbu iíi Iambote ia Utuminu ua Nzambi.” Mu kijimbuete kiki tu sanga-mu madivulu a zuela o njimbu íii ó lungulule mu 700 a madimi. O kuila uejiia dingi kijimbuete kiéngi ki beta ku longa o njimbu iambote ia Utuminu mu madimi avulu? Mivu iavulu ku dima, ande dia Internete ku i bhanga, o Jimbangi ja Jihova a ejidile kiá kiavulu mu kuila athu a muanga o njimbu iambote ia Utuminu ua Nzambi. Tundé ku muvu ua 1939, mu kapa ia O Mulangidi tu sanga-mu o izuelu íii “U Bhana Ngolokela ia Utuminu ua Jihova.” Saí divulu di zuela ia lungu ni ji ngeleja, diambe kuila o se-ku ngeleja iéngi ia soko ni Jimbangi ja Jihova mu ku boka o njimbu iambote, “ni ku suína kuoso ni mu ngongo ioso.” O kuboka kuku, kulondekesa kuila kua kambe ngó bhofele o ‘dizubhilu dia-nda kuíza,’ mukonda dia Utuminu ua Nzambi..

JITHEMBU JA BHONZO

O kuila o ima i uana íii ia tange o Bibidia, i tua mono mu mbandu íii, uene mu i mona kubhita ku mundu? Mu hama ia mivu ku dima, o kadivulu kaka kene mu kuatekesa o athu ene mu tanga o  kadivulu kaka kuijiia o izulukutu ia mundu phala kua kuatekesa ku mona kuila o dizubhilu dia mundu dia zukama kiá. Maji kuene hanji athu akua jiphata ka xikiná, amba kuila o ima íii ki kidi kana, makutu. Ene amba ué kuila mukonda dia athu ku kala mu kumona o ima i bhita mu jixi ja mukua, o kuiibha ku mundu kuedi kála kua mu di bandekesa dingi kiavulu. Kienhiki athu avulu a mona o jipolova ji londekesa kuila tuala ku disukilu dia jithembu jiji ja bhonzo.

Saí jingijiie amba kuila kua kambe ngó bhofele, o ima mu ixi ia-nda lunguluka kiavulu. Mu kifika ku muvu ua 2014, o kisangela kia jingijiie kia bhange o kadivulu Bulletin of the Atomic Scientists, kia dimuna o adiakimi ku Estados Unidos mu kiônge kuila o athu mu ngongo ala mu ibhidi iavulu, i tena ku jima o mbutu ia athu. O jingijiie ambe kuila: “O ku tonginina kiambote o ibhidi íii, i tu bhangesa kuzuela kuila, ku tena ku moneka divuua dia dikota ku athu mu ngongo.” Athu avulu a xikina kuila tuala mu jithembu ja bhonzo. O athu a soneka o kadivulu kaka, ni ió ene mu ka tanga, kene ni phata kuila o jithembu jiji ji lombolola izuua isukidila-ku ni kuila o dizubhilu dia mundu dia zukama. Maji mu veji dia ku kala ni uôma ua ima ia-nda bhita ku hádia, eie u tena ku sanguluka mukonda dia ima ia-nda kuíza ku pholo. Mukonda diahi? Mukonda eie u tena ku bhuluka ku dizubhilu!