IHI i u xinganeka kioso ki u banza mu dixita? Nange u xinganeka kididi kiezala ni ixete ia mu nuha kia iibha. O kuila ueji xinganeka ku sanga kima kia valolo mu dixita didi, kála ulu mba madiamande?

Maji ku hama ia mivu ia bhiti a sange kima kia valolo ku dixita. O kima kiki ki kiexile diamande mba ulu, maji kima kiala ni valolo ia dikota. Kima kiahi kia valolo kia sange? Mukonda diahi o kima kiki kiala ni valolo phala etu lelu?

UA SANGE KIMA KA KI FIKILE

Ku dimatekenu dia hama ia 20, Bernard P. Grenfell ni Arthur S. Hunt, ji ngijiie mu Xikola ia Katunda ia Oxford, endele mu ixi ia Ijitu. Kuenhoko mu ixete mu honga ia Nilu, ene a sange jimbandu ja mikanda akexile mu ji bhanga ni dibu. Mu ku bhita kithangana, ku muvu ua 1920, kioso o mala enhá kia kexile mu sokejeka o mikanda íii, o ngana Grenfell, ua sumbu ji mbandu ja mikanda ja mukua jo fukunuine ku Ijitu. Muéne ua tambula o ji mbandu jiji mu dijina dia Inzo ia ku Bhakela o Madivulu ia John Rylands ku mbanza ia Manchester, ku ixi ia Englaterra. Maji o mala enhó afu ande dia ku zubha ku sokejeka o mikanda ienioio.

O ngana Colin H. Roberts, uexile ué ngijiie ia Xikola ia Katunda ia Oxford muéne ua zubha o kikalakalu kiki. Kioso kia kexile mu kuongeka o mikanda ienioió, muéne ua mono mbandu ia mukanda ia sokele ni bilete. Muéne ua sangulukile mu ku mona kuila mu isoneku ia Ngeleku mua kexile izuelu iejidile kiambote. Ku pholo kua kexile o izuelu i tu sanga mu divulu dia Nzuá 18:31-33. Ku dima kua kexile mbandu ia izuelu ia ji velusu ja 37 ni 38. Roberts uejidile kuila ua sangele kima kia valolo.

KU SOTA KUIJIIA O MIVU IÊ

Roberts, ua banzele kuila o mbandu ia mukanda uenhó uexile uokulukulu. Maji ia kexile ni mivu ikuxi? Phala kuijiia muéne ua sokesa o isoneku ia mukanda iú ni isoneku ia mikanda ia mukuá iokulukulu, ia kexile ni mivu. Muéne ua bhange kiki ni milongi—ia paleografia. * O ku bhanga kiki, kua mu kuatekesa kuijiia bhofele o mivu ia mukanda. Maji muéne ua mesenene kuijiia o mivu ia kidi. Mu kiki-phe, muéne ua katula foto ku mbandu ia mukanda iu ua tumikisa o ji foto ku jingijie iu ua a bhingi ku mu tangela o mivu ia kidi. Ihi ia zuela o jingijiie?

Kioso kia di longo o ukexilu ua isoneku, o jingijiie jitatu a mono kuila o mukanda a u sonekene ku muvu ua 125 K.K.—ki ku bhitile mivu iavulu kioso kia fuile poxolo Nzuá. Maji o paleografia ukexilu uambote u tua tokala ku dielela kioso ki tu mesena kuijiia o mivu ia kidi ia mikanda, o ngijiie ia mukua uambe kuila, nange o mukanda a u soneka ku hama ia kaiadi. Maji o mbandu—ia mukanda iú—iokulu uene o mukanda ua Mikanda ia Ngeleku, uo sange kiá o athu tundé ukulu katé lelu.

IHI ILONDEKESA O MBANDU IA MUKANDA IA RYLANDS

Mukonda diahi o mukanda mu tu sanga o divulu dia Nzuá uala ni valolo phala o athu a uabhela o Bibidia lelu? Mukonda dia ima iiadi. Kia dianga, o ukexilu ua kamukanda kaka, ka londekesa kuila o Jikidistá m’ukulu a bhanene valolo ku Mikanda Ikola.

Mukonda diahi o mukanda mu tu sanga o divulu dia Nzuá uala ni valolo phala o athu a uabhela o Bibidia lelu?

Ku hama ia kaiiadi mu K.K., o milongi akexile  mu isoneka—mu mikanda (rolo) ni mu divulu (códice). O mikanda iexile jimbandu ja papela akexile mu ji bhanga ni dibu, o ji papela jiji akexile mu ji bandeka phala ku bhanga papela ionene. O mukanda iú akexile mu u nhinga ni ku u nhingununa kioso kia mesenene. A betele dingi ku soneka ku mbandu imoxi ia papela.

Maji o mukanda ua sange Roberts, ua kexile ni isoneku ku mbandu jiiadi. Kiki kia londekesa kuila ua tundile mu divulu ki u tundile mu mikanda. O divulu didi akexile mu di bhanga ni jipapela ja bhangele ni dibu, akexile mu ji bandeka ni ku ji tunga phala ku kala divulu.

Mukonda diahi o divulu dia betele-o-kota o mikanda ndenge? O Jikidistá ku hama ia dianga exile aboki a njimbu iambote. (Matesu 24:14; 28:19, 20) Ene akexile mu boka o njimbu ia Bibidia mu ididi ioso mua kexile mu sanga o athu—mu jinzo, mu itanda, ni mu ikoka. (Ikalakalu 5:42; 17:17; 20:20) Kienhiki o ku kala ni Mikanda Ikola mu divulu kua betele-kota.

O divulu dia betele ku kuatekesa o jiphange mu kilunga ku katula jikopia ja Mikanda Ikola. Kienhiki o madivulu a Matesu ni Marku ni Luka ni Nzuá, akexile mu a katula jikopia veji javulu, kiki kia kuatekesa o kilunga kia Nzambi ku kula kiavulu.

Mukanda ua Rylands ku pholo ni ku dima

Kima kia mukuá ki bhangesa o mukanda ua Rylands ku kala ni valolo phala etu lelu, o ku tu londekesa kuila o Bibidia a i soneka muene kala kia tumina Nzambi. Maji mu mukanda iú, ki tu sanga-mu o jivelusu joso ja divulu dia Nzuá, maji o njimbu i tu sanga mu jivelusu iene imoxi i tu tanga mu ji Bibidia jetu lelu. O mukanda ua Rylands, u tu londekesa ué kuila mu Bibidia ka katula-mu kizuelu, sumbala o isoneku akexile mu i kopiala mu Bibidia phala ku i ta mu mikanda ia mukua veji javulu.

Sé phata o mukanda ua Rylands, muala o izuelu i tu sanga mu divulu dia Nzuá, kilondekesu kia kuila o Bibidia a isoneka muene kála kia isonekene mu mikanda ia dianga. Mu divulu diê dia lungu ni misoso ia Bibidia, o ngana Werner Keller, uambe: “O mikanda íii iokulu, ilondekesa kuila ioso i tuene mu tanga mu ji Bibidia jetu a i soneka ni kidi kioso.”

Tuejiia kuila o Jikidistá ja kidi ka bhingi o ima iene mu sanga o jingijiie phala ku kala ni kixikanu, kana. Ene a xikina kuila, ‘Mikanda ioso a i bhusu kua Nzambi.’ (2 Timote 3:16) Maji kisangusangu kia dikota kioso kia sanga kima kiokulu kia valolo, kilondekesa o kidi kiene mu zuela o Bibidia tundé ukulu kuila: “O Maka ma Ngana-phe ma xalelà-ku.”1 Phetele 1:25.

^ kax. 8 Kala kizuela o divulu Manuscrito da Bibidia Grega, paleografia o milongi i longa o isoneku iokulu.” Mu ku bhita kithangana, o ukexilu ua ku soneka u lunguluka. Kiki ki tena ku kuatekesa kuijiia o mivu ia mukanda kioso kia i sokesa ni mikanda ia mukua iala ni mivu ia kidi.