Kikalakalu kiahi kia kexile na-kiu o kabhitangu ka masoladi a Loma?

Kiteka kia kabhitangu ka masoladi Marcus Favonius Facilis

O Mikanda Ikôla ia Ngeleku i tumbula kiavulu o mala exile kabhitangu ka masoladi a Loma. O diiala ua kexile ku pholo dia ió a jibha Jezú, uexile kabhitangu, ni Koloneliu, diiala ki Judé, ua tuamena o ku kituka Kidistá, uexile ué kabhitangu ka masoladi. O disoladi ua tumine ku beta poxolo Phaulu, ni Julio ua mbatele Phaulu katé mu Loma kiiadi kiâ exile kabhitangu ka masoladi.Marku 15:39; Ikalakalu 10:1; 22:25; 27:1.

O kabhitangu ua kexile mu tumina 50 mba 100 ia masoladi. O kabhitangu ua tokalele ku longa o masoladi mê, ku iala kioso kiala o izuatu iâ ni ji falamenda, muéne ué ua kexile ku pholo mu kua sokejeka phala o ita.

O ku kala kabhitangu, kuexile kijingu kia dikota, dijina dia ujitu dia tundile o majina moso mu usoladi. Uoso a mu solele ku kala kabhitangu ua tokalele ku kala mutuameni uejiia o kuendesa kiambote o masoladi. O unjimu ni kuijiia kua masoladi a Loma kua tundile ku kabhitangu kâu. Saí divulu diambe kuila, o tubhitangu tua masoladi “exile maiala ji hete a betele o kuijiia ni unjimu ua usoladi masoladi oso ndenge.”

Mu ukexilu uebhi o malumuenu okulu ka difu ni a lelu?

Lumuenu Luokulu lua akua ijitu

O malumuenu okulu ka difuile ni a lelu mu kuila a a bhangele ni matadi o zelesele kiambote, matadi a ngondo, phalata ni ulu. O kizuelu malumuenu ki moneka mu veji ia dianga mu Bibidia, mu kithangana kioso kia kexile mu tunga o balaka, o kididi kia dianga mua kexile mu bheza akua Izalaiele Nzambi. O ahatu a bhana malumuenu phala ku iudika o mbasinha ia ku sukuila ni mbunda iê i tula bhoxi. (Makatukilu 38:8) O malumuenu nange akexile mu a temesa phala ku bhanga na-iu o imbamba íii.

O malumuenu o sange koxi a mavu mua lungile o mbanza ia Izalaiele, a a sange kumoxi ni imbamba ia mukuá ia ku di uabhesa na-iu o ahatu. O malumuenu enhó exile kála bola, o kikuatelu kiâ a ki bhangele ni mabaia kiexile kála muhatu. O ku dima lua lumuenu, ka kexile mu fuamesa-ku.

O ukexilu ua malumuenu ua ku ialesa kiambote o pholo ia muthu ua mu di talesa, ku difu ni malumuenu a lelu. Kiki ki tu kuatekesa ku tendela ia mesenene kuzuela Phaulu, kioso kiambe: “Ki tual’iki tu muena mu lumuenu lua fefetela.”1 Kolindo 13:12.