“Jinganga ku Thunda jiza. . . a jikula mu imbamba iâ, a mu bhanga ujitu, ni ulu, ni uasu ua dizumba ua libana, ni uamukuá ua sumuna; a mu bhana.”Matesu 2:1, 11.

IHI i ueji bhana ku muthu u uejiia kuila muthu uonene kála sobha? M’ukulu saí mazumba ambote, exile ni valolo ia dikota kála o ulu, kienhiki akexile mu a bhana ku ji sobha kala maujitu. * Mukonda dia kiki, ku maujitu a bhana o jinganga jiji kua “Sobha ia Jijudé,” maujitu aiadi exile mazumba ambote.Matesu 2:1, 2, 11.

Maji a Bálsamu

O Bibidia i zuela ué kuila kioso o sobha ia muhatu mukua Saba kiai mu menekena Solomá, ua “bhana kua sobha hâma ni makuinhi a iiadi a ji talendu ja ulu ni ima ia te kiavulu ua i bhana ni kusukumuna kuoso, ni ji phelu ja nzaji; o ima ia te kiavulu ia bhana sobha ia Saba, ia muhatu, kua sobha Solomá ima kiluua a i muene kala ioio.” * (2 Malunda 9:9) O jisobha a tumikisa ué kua Solomá maji a bálsamu kála ujitu.2 Malunda 9:23, 24.

Mukonda diahi o ima íii ni ima ia mukuá ia kexile mu tunda mu ima íii iexile ni valolo ia dikota ni ku i ta kalu iavulu m’ukulu? Mukonda o ima íii akexile mu bhanga na-iu ima iavulu, kála o ku i uesa ku mukutu ua muthu, ku bhanga na-iu o sidivisu ia Nzambi ni ku i uesa ku kimbi ande dia ku ki funda. (Tanga o kitutu “M’ukulu o Mazumba Ambote Akexile mu Bhanga Nau Ima Iavulu.”) O ima íii a i tele kalu iavulu, mukonda akexile mu i takana dikanga ni ku i sumba kalu iavulu.

AKEXILE MU ZAUKA O KIKANGALAKATA KIA ARÁBIA

Kásia

M’ukulu saí mixi ia mazumba ia kexile mu sabhuka mu honga ia Njolodá. Maji mixi ia mukuá ia kexile mu tunda dikanga mu jixi jengi. O Bibidia i zuela ia lungu ni mazumba avulu ambote. O a beta kua ejiia, o diloza dia açafrão, aloué, maji a bálsamu, kanela, uasu ua dizumba ni mira. Kua kexile ué mazumba a mukuá a ku touesa o kudia, kála o kominhu, olatelá, ni mafué a mukuá a ku touesa o kudia.

Diloza dia açafrão

Kuebhi kua kexile mu tunda o mafué iá? O aloué, kásia, ni kanela a i sangele mu ixi ia China, India ni ixi ia Sri Lanka. O mafué a mazumba kála o mira ni uasu ua dizumba a tunda mu mixi ni isasa i sabhuka mu kikangalakata ki tunda mu ixi ia Arábia kiia katé ku Somália mu África. O maji a nardu, a tokalele ngó ku Índia, a tundile mu Himalaias.

“O mazumba ambote a tolele, a a tele kitadi kiavulu, athu avulu akexile mu a sota, mukonda dia kiki, iene iexile uenji uambote.”—The Book of Spices (Divulu Dia Mazumba Ambote)

Phala o ima íii ku bhixila mu mbanza ia Izalaiele, o jingenji a tokalele ku bhita mu kikangalakata kia Arábia. Ene akexile mu bhita mu kikangalakata kiki, mukonda ku muvu ua midi mba midi jiiadi A.K.K. o ixi ia Arábia iene ngó “ia betele kota mu ku kala ni mauenji ku Leste ni Oeste,” kiene kiambe o divulu The Book of Spices (Divulu Dia Mazumba Ambote). O ji sanzala ni ji sabhalalu ja kexile mu mbanza ia Negeve ia lungila ku sulu ia Izalaiele kuene kua kexile mu bhita o jingenji  ni ku sumbisa o mauenji mâ. O ididi íii, “ilondekesa kuila o uenji iú ua kexile mu bhana kitadi kiavulu . . . tundé ku sulu ia Arábia katé ku Mediterrânio,” kiene kiambe o kisangela kia Patrimônio Mundial da Humanidade kia UNESCO.

O jingenji ja kexile mu kuenda njila ia lebha izuua ioso, 1.800 km phala ku bhixila mu ixi ia Arábia. (Jobe 6:19) O Bibidia i zuela ia lungu ni jingenji akua Ijimaiele akexile mu tunda mu mbanza ia Ngiliiade ni ima i bhana dizumba diambote kála o “uasu ua dizumba ni mubafu ni mirra,” ene akexile múia ku ta uenji mu Ijitu. (Dimatekenu 37:25) O an’â Jakobo a sumbisa ndenge’â Zuze ku ubhika ku jingenji jiji.

“O UENJI A BETELE-O-KOTA MU KU U SUEKA”

Mafué a mazumba

Mu hama ni ji hama ja mivu, o jingenji akua Arábia ene akexile ku pholo mu ku ta o uenji iú ua mazumba. Ene ngó akexile mu sumbisa o uasu ua mazumba ku Ásia, kala o kásia ni kanela. Phala ku zozesa o athu ku Mediterraneo phala ka di te mu uenji iú mu ku bhanga ukamba ni akua Leste, o jingenji akua Arábia a tange misoso ia makutu mu kuamba kuila kiexile kiluezu kia dikota ku sanga o mazumba ambote. O ididi mua kexile mu tunda o mazumba ambote, nange iene ia “betele-o-kota mu ku i sueka,” kiene kiambe o The Book of Spices (Divulu Dia Mazumba Ambote).

Kominhu

Misoso iebhi ia kexile mu tanga akua Árabia? Herodotus, diiala mukua Ngeleku, mutangi ua misoso ku hama ia katanu A.K.K. uambe kuila, akexile mu ta misoso ia lungu ni jinjila ji kuatesa uôma ja kexile mu tunga ikalanga ia iangu ia kanela mu ndanji ia lebha kiavulu i xanana. Herodotus ua soneka dingi kuila phala ku sanga o dizumba didi diambote, o athu akexile mu ta jithumba ja xitu bhoxi ia ndanji. O jinjila ni uilu uoso ua kudia xitu, a kuata jithumba javulu ja xitu ni ku j’ambata mu ikalanga iâ, o ikalanga íii i bua bhoxi mukonda  dia ku nema kuâ. Kienhiki, o athu ni lusolo luoso a bonga o iangu ia kanela ni ku i sumbisa ku jingenji. O misoso íii ia makutu ia di muangene kiavulu. Kienhiki, mukonda dia “iluezu ia kexile mu tanga o athu ia lungu ni ku sanga o ji kanela, kiene kia bhangesa o [ji kanela] ku ji sumbisa kitadi kiavulu,” kiene kiambe dingi o The Book of Spices (Divulu Dia Mazumba Ambote.)

Olotelá

Mu ku bhita thembu, o kikutu kia akua Arábia kia kexile mu ki sueka a ki tungununa, mukonda dia kiki, kene ngó dingi akexile mu ta o uenji iú. Ku hama ia dianga A.K.K., o mbanza ia Alexandria, mu ixi ia Ijitu, ia kituka kididi kia dikota kia ku sumbisa o mazumba ambote. Kioso o jingenji kia di longo o ku katula mbote mu kitembu kia Musanza ua Kalunga ua Índia, o jingenji mu ji naviiu ja akua Loma akexile mu sumbisa mu ji tabhu ja Ijitu katé ja Índia. Mukonda dia kiki, o mazumba ambote a vudile mu jixi joso, ka kexile mu a ta dingi kalu iavulu.

Lelu, o ulu ua beta-o-kota mu ku kala ni valolo, o mazumba ambote ndenge. Lelu sé-ku muthu u tena ku xinganeka ku bhana ku jisobha mazumba ambote kála maujitu. Maji né kiki, jimidi ni jimidi ja athu mu ngongo ioso ene mu ta hanji o mazumba iá ambote ku mikutu iâ ni ku bhanga nau milongo. O mazumba iá ene mu a ta ué mu kudia phala ku ku touesa kiambote. Mu kidi, o dizumba diambote di bhangesa athu avulu ku di uabhela kála kia uabhele o athu m’ukulu, jimidi ja mivu ku dima.

Kanela

^ kax. 3 Mu Bibidia, o kizuelu “mazumba ambote,” mu dimi dia Ngeleku kilombolola ima io bhange ni mafué a bhana dizumba diambote, ki kilombolola ima ia ku touesa na-iu o kudia.

^ kax. 4 “O ima ia te kiavulu,” o maji a bhana dizumba diambote mba uasu u tunda mu mixi mba isasa.