O divulu, Enciclopédia Británica di jimbulula kuila o Phasu, “o fesa ia beta-o-kota iene mu bhanga o jingeleja phala ku lembalala o Difukunukinu dia Jezú Kristu.” Maji o kuila o fesa íii ia tokala muene ku Jikidistá?

Phala kuijiia se o kima kia kidi muene, tua tokala ku ki tonginina kiambote. Mu kiki, phala kuijiia se o fesa ia Phasu ia tokala ku Jikidistá mba kana, tua tokala ué kuijiia o ifua ioso ia lungu ni fesa íii ia Phasu.

Kia dianga, Jezú ka bhingi o akaiedi’ê ku bhanga fesa ia difukunukinu diê kana, maji ua a bhingi phala ku lembalala o kufua kuê. O poxolo Phaulu uexana o fesa íii ‘Lembalasa ia Ngana.’1 Kolindo 11:20; Luka 22:19, 20.

Kia kaiadi, o divulu Enciclopédia Británica, diambe ué kuila kuene ijila iavulu ia Phasu “ki i lungu” ni difukunukinu dia Jezú kana, “maji ia tundu mu ijila ia jiphagão.” Mu kifika, mu jixi javulu o fesa ia Phasu ene mu i bhanga ni ima kála o diiaki ni dibhulu, o divulu di zuela dingi kuila: “O dibhulu a d’ijidile kála kiama kiala ni kifua kia ku vuala kiavulu, o dibhulu didi dia kexile mu lombolola o uijilu ua kithangana kia idima iavulu.”

O ngana Philippe Walter, mulongexi ua madivulu okulu, ua jimbulula kiebhi o ima íii kia bokona mu fesa ia Phasu. Muéne ua soneka kuila, “mu kithangana kia ku bokuesa o jiphagão mu kilunga phala ku kituka Jikidistá,” ki kua bhonzele ku sokesa o difukunukinu dia Jezú ni ji fesa ja jiphagão ja lungu ni “ku tunda kua’lunga phala ku kala ku muenhu.” O ngana Walter uambe dingi kuila kiki kia fuamene kiavulu phala ku bhangesa o “Jifesa ja Jikidistá” ku ji soneka mu kalendalu ka jiphagão, phala ku suínisa athu avulu ku kala Jikidistá.

O ukexilu iú ua ku “bhangesa o jiphagão ku kituka Jikidistá,” ki u kexile mu bhita kioso o jipoxolo kia kexile ku muenhu, mukonda ene akexile mu “fudisa” o ilongesu ia makutu phala ki i bokone mu kilunga kia Nzambi. (2 Tesalonika 2:7) O poxolo Phaulu ua zuelele kuila kioso kieji ‘kutunda’ mu kilunga kueji “moneka athu a tanga ima ia makutu, ia kutondalesa, hé a sunga jixibulu ku mbandu iâ.” (Ikalakalu 20:29, 30) Mu ku bhita ku hama ia dianga, o poxolo Nzuá ua soneka kuila saí maiala akexile kiá mu nganala o Jikidistá. (1 Nzuá 2:18, 26) Kienhiki, o njila a i jikuile phala o ilongesu ia makutu ku bokona moxi ia kilunga kia Nzambi.

“Ki mu sote ku di ta mu kikalakalu kimoxi ni iá a kambe kuxikana, kala enu uenu mua sokela-nâ.”2 Kolindo 6:14

Maji saí iá a banza kuila, ki kiexile kima kia iibha o ijila ia Phasu ku kala moxi ia kilunga kia Nzambi—mukonda kiki kieji kuatekesa o “jiphagão” ku tendela kiambote o valolo ia difukunukinu dia Jezú. Maji Phaulu keji xikina kana. Sumbala muéne ua kexile mu sanga ijila iavulu ia jiphagão mu jinjila jê mu kuia ku Loma, maji muéne ka kexile mu longa o ijila ienioió ku athu phala kua kuatekesa kuijiia kiambote Jezú. Mu veji dia kiki, muéne ua dimuna o Jikidistá: “Ki mu sote ku di ta mu kikalakalu kimoxi ni iá a kambe kuxikana, kala enu uenu mua sokela-nâ. Kuma o kuiuka ku kala kiebhi mu kisangela ni kubhengalala? Mba o muanha u di lunga kiebhi ni usuku? Ngana muène uixi, dingi: Uila kiki, Tundenu mu mundu uâ, mu di kalele, eme ngi Ngana. Kana kubabata kima kia ufusa.”2 Kolindo 6:14, 17.

Mbote iahi i tu katula mu ku tonginina kiambote o ijila ia fesa ia Phasu? Ia tu kuatekesa o ku mona kuila o fesa ia Phasu ki ia tokala ku Jikidistá kana.