O milongi iala ku luiji, ia-nda tu londekesa kiebhi o Jimbangi ja Jihova kiene mu zuela ni jivizinhu jâ. Tu xinganeke Mbangi ia Jihova, dijina diê Nguxi ua mu zuela ni diiala, dijina diê Maniko.

O BIBIDIA—DIVULU DI TANGA MISOSO IA KIDI

Maniko: Ngi ku tangela kiá kuila eme ki ngi mukua ngeleja kana. Ki tuala ni kima phala kuzuela.

Nguxi: Nga sakidila ku ngi tangela. Ngi loloke dijina diami Nguxi. Eie nanhi?

Maniko: Eme Maniko.

Nguxi: Kima kiambote kuijiia o dijina diê, Maniko

Maniko: N’eme uami.

Nguxi: Kubhata ku ua kudila ki mu kexile mu bheza Nzambi?

Maniko: Tua kexile. Maji kioso ki nga tundu kubhata mukonda dia xikola, nga lembua kuia mu ngeleja.

Nguxi: Nga mu mona. Ufunu uahi u ua di longo bhu xikola?

Maniko: Nga di longo o ukexilu ua athu, ni misoso. Nga uabhela kiavulu o misoso phala kuijiia kiebhi kia kexile o athu m’ukulu.

Nguxi: O kuijiia o misoso kima kiambote. Nange ua kijiia kuila o Bibidia divulu dia misoso. O kuila ua banze kiá ku tokuesa o misoso ia Bibidia?

Maniko: Mu kidi, kana. Ngejiia kuila divulu diambote maji nuka nga banzele kuila o Bibidia divulu dia misoso.

Nguxi: Eie u njimu. Se u ng’ehela nga mesena ku kulondekesa misoso ia kidi i tu sanga mu Bibidia.

Maniko: Seku-maka. Maji ki ngala ni Bibidia.

Nguxi: Kiambote. Nga-nda kulondekesa mu Bibidia iami. O musoso ua dianga uala mu divulu dia 1 Malunda mu kibatulu 29, mu velusu 26 ni 27. O jivelusu jiji ji zuela: “Kienhiki Davidi, dia mon’a Jese, kia tumina ku thandu dia mundu ua Izalaiele, mu makuinhi auana a mivu. Mu Hebolone ua tumina-mu sambuadi dia muvu, o mu Jeluzaleme ua tumina-mu makuinhi atatu a muvu ni itatu.”

Maniko: Kiebhi ki uejiia kuila iú musoso ua kidi?

Nguxi: Mukonda o jingijiie akexile mu zuela kuila Sobha Davidi ka kexile ku muenhu.

Maniko: Kiki kidi? Mukonda diahi akexile mu zuela kiki?

Nguxi: Ki ku kexile ima iavulu phala kulondekesa kuila muéne ua kexile muene ku muenhu, katu-ko o Bibidia. Maji ku muvu ua 1993, saí kibuka kia jingijiie a sange ditadi kua sonekene o kizuelu “Inzo ia Davidi.”

Maniko: Kima kiambote.

Nguxi: O muthu ua mukua a mu tange mu Bibidia, akexile ku muamba kuila ka kexile ku muenhu Pônsio Pilatu, uexile nguvulu mu izuua ia Jezú. Muéne a mu tange mu divulu dia Luka kibatulu 3 mu velusu 1. Mu velusu íii muéne a mu tumbula ni jinguvulu ja mukuá ja kexile mu tumina mu izuua iê.

Maniko: O velusu íii i zuela kuila: “Kioso ki ala Pônsio Pilatu ku nguvulu ia Judeia, ni Helode sobha ia Ngalileia.”

Nguxi: Nga sakidila. Mu mivu iavulu o jingijiie akexile mu zuela kuila o Pônsio Pilatu ka kexile ku muenhu. Maji mu ku bhita 50 a mivu, a sange ditadi ku Oriente Médio” kua sonekena o dijina diê.

Maniko: Manhi? Nuka ng’evuile o maka enhá.

Nguxi: Ngi sanguluka mu ku kulondekesa o maka enhá.

Maniko: Ngi ku tangela o kidi kuila tundé ukulu nga xikina kuila o Bibidia divulu diambote, maji ki ngi kijidile kuila diene diala ni valolo phala o izuua ietu. Diene diala ni misoso ia kidi, maji ki ngi xikina kuila diene di tena ku tu kuatekesa.

O BIBIDIA—DIVULU DIO KULU MAJI DIALA NI VALOLO IA DIKOTA LELU

Nguxi: Athu avulu ene mu banza ué kiki. Maji eme ki kiene ki ngi banza. Nga-nda ku tangela se mukonda diahi: O ibhindamu ietu ia muenhu ki i lunguluka tundé ku dimatekenu dia mundu. Mu kifika, tundé ukulu tuene mu bhindamena o kudia, izuatu ni kididi kia kuzeka. Tuene mu bhindamena ué kuzuela ni athu, ni ku kala ni muiji ua zediua. Ku xikina kuila etu enioso tu bhana valolo ku ima íii?

Maniko: Sé phata.

Nguxi: O Bibidia i tena ku tu kuatekesa mu maukexilu oso enhá. Mu kiki tu tena ku zuela kuila o Bibidia divulu dio kulu, maji diala ni valolo ia dikota lelu.

Maniko: Kiki kilombolola ihi?

Nguxi: Kilombolola kuila: Mu Bibidia tu sanga-mu itumu iala ni valolo lelu kála kia kexile na-iu kioso kia i soneka m’ukulu.

Mu Bibidia tu sanga-mu itumu, iala ni valolo lelu kála kia kexile na-iu kioso kia i soneka m’ukulu.

Maniko: Kiambote. Maji kiebhi?

Nguxi: O Bibidia i tena ku tu kuatekesa ku kala ni unjimu kioso ki tu di bhana ni kitadi, ku zediua ku muiji ni ku kala dikamba diambote. O divulu didi dia difu ni mapa ilondekesa o njila. Ku xikina kuila mu izuua ietu kia mu bhonza ku kala munumi uambote ni kuendesa kiambote o muiji?

Maniko: Kiene mu bhonza muene. Tundé ki nga kazala ni muhatu’ami tua bhange kiá muvu, maji kiene mu tu bhonza ku divua mudietu.

Nguxi: Kidi muene. Maji mu Bibidia tu sanga-mu itumu i tena ku ku kuatekesa. Mu kifika, o divulu dia Efezo kibatulu 5. Tu tange o velusu 22, 23, ni 28. Ua mesena ku tanga?

Maniko: Xe. Iambe kiki: “Enu ahatu, beleselenu anumi’enu, kala Ngana muène mua mu belesela. Kuma o ngana uala ni ukota ua kutumina ndona iê, mukuâ ni Kristu ki ala ni ukota ua kutumina o [Kilunga]. Kristu muène o Mubhuludi ua [Kilunga,] kuma uene o mukutu uê.” O velusu 28 iambe: “Kiene ue o jingana ja tokala kuzola o jindona jâ, kala mikutu iâ ene. Diiala uoso ua zolo muhatu’ê, muenié ua di zolo.”

Nguxi: Kima kiambote. Nga sakidila. Ku xikina kuila se o diiala ni muhatu a belesela o kitumu kiki o muiji uâ u zediua?

Maniko: Xe, a zediua. Maji ki ku bhonza kuzuela, o ki bhonza o ku bhanga.

Nguxi: Kidi kiê, se-ku muthu ua iuka. Mu kibatulu kiki tu sanga-mu ué velusu i tu suinisa kuila ki tu tokala ku kingila kuila akuetu a bhanga ngó ima ia iuka. * Mu ukamba uoso-uoso ku bhinga kuila kala muthu u bhanga o mbandu iê. Muhatu’ami n’eme tua mono kuila o Bibidia i tena ku tu kuatekesa ku bhanga kiki.

Maniko: Kima kiambote.

Nguxi: Etu tuala ni kididi kia madivulu mu Internete mu tu tena ku tokuesa milongi ia ukaza. Tua tokala ku soneka ngó o kizuelu ukaza, mua-nda moneka maba avulu a ukaza. Diba diebhi dia ku uabhela dingi?

Maniko: Didi: “Kolokotesa o ukaza uê mu ku di zuelesa kiambote.”

Nguxi: O mbandu íii ia-nda ku bhana milongi ia-nda ku kuatekesa ku zediua mu ukaza. Talesa o kaxi kaka. Ua mesena ku ka tanga?

Maniko: Xe, kambe kiki: O ku dizuelesa kimbote mu ukaza, kua difuangana kala menha a kunguluka mu jaludim ni ku tululuka kuoso. o kukala ni mixima ia batama kima kia tokala phala ku tululuka mu ukaza.

Nguxi: Nga sakidila. a te-mu kibatulu kia Bibidia. Ua mesena ku ki tanga?

Maniko: Xe, 1 Phetele 3:8. Kiambe kiki: “Mu kuzubha-phe, kalenu ni muxima umoxi ni kixinganeku kimoxi, mu di xinganeke jinge mudienu. Mu di zole kala mu jiphange, mu nengane ni muxima, mu batâma.”

Nguxi: O kibatulu kiki kia Bibidia sumbala a ki soneka kiá 2000 ja mivu ku dima, kiene ki zuela o ibhindamu ia diiala ni ia muhatu, se a ki kumbidila ene a zediua. kala ki tua tange kiá ku diama, kuila o ku di zuelesa mu ukaza, kua difuangana kala menha a kunguluka mu jaludim.

Maniko: Nga mono kuila o Bibidia i zuela ima iavulu ki ngi ijidile.

Nguxi: Nga sanguluka mu kuijiia kuila kiene kiki ki ua banze. Nga mesena ku di sanga dingi n’eie mu kididi kiki phala kuívua o ibanzelu iê ia lungu ni milongi iala bhabha “kolokotesa o ukaza uê mu ku dizuelesa kiambote” i tu sanga mu Kijimbuete Kietu. *

Maniko: Se-ku maka. Eme ni muhatu’ami tua-nda di longa kumoxi.

Eie uala ni kibhuidisu kia lungu ni Bibidia, iu ua mesena kikuatekesu? Ua mesena kuijiia dingi ia lungu ni ilongesu mba ni ukexilu ua ku longa ua Jimbangi ja Jihova? Se kiene, ku kale ni hele ia kuibhuidisa ku Mbangi ia Jihova. O Jimbangi ja Jihova a-nda sanguluka mu ku ku jimbuluila o maka enhá.

^ kax. 43 Tanga Efezo 5:17.

^ kax. 53 Phala kuijiia dingi, Tanga o kibatulu 14 kia divulu Mu Kidi Ihi i Longa o Bibidia? A di bhange ku Jimbangi ja Jihova.