IIHI ia tokala ku bhanga o diiala phala ku bhangesa muhatu’ê ku sanguluka? Athu avulu ene mua longa kuila, o kima kia dianga kia tokala ku kala na-kiu o diiala phala ku kuatekesa o muiji uê, o ku kala ni kitadi kiavulu. Ahatu avulu ene ni kitadi kiavulu, maji né kiki ka sanguluka ku muenhu uâ. Mu kifika, saí muhatu mukua Xiphanha, dijina diê Loza, uambe ia lungu ni muadi uê, uixi: “Muadi uami ua kexile mu dibhana kiambote ni athu a mukuá, ua lendukile, maji kubhata muéne uexile muthu ua iibha.” Juana, mukua Nigéria, uambe kiki: “Se ki ngi xikinine ia zuela muadi uami, muéne ua kexile mu ngi tangela, ‘eie ua tokala ku xikina ioso i ngi zuela, mukonda eme ngi muadi uê.’”

Kiebhi o diiala kia tokala ku kumbidila o ikalakalu iê kubhata ni henda ioso? Ihi ia tokala ku bhanga o diiala phala ku kuatekesa o muhatu uê ‘ku sanguluka?’Lute 1:9.

IHI I ZUELA O BIBIDIA IA LUNGU NI DIIALA KU TUMINA O MUHATU UÊ

Sumbala ku pholo ia Nzambi o diiala ni muhatu a soko ngó, maji o Bibidia ilondekesa kuila kala muthu ku muiji uala ni kikalakalu kiê-muene. O divulu dia Loma 7:2 di zuela kuila o muhatu ua kazala u belesela o ‘kitumu kia muadi uê.’ Mu matenda ene mu sola-mu muthu phala kuendesa o ikalakalu, Nzambi ué ua solo o diiala phala kuendesa o muhatu uê. (1 Kolindo 11:3) O anumi a tokala kuendesa o mabhata mâ.

Enu mu anumi, kiebhi ki mua tokala kuendesa o mabhata menu kála kia tumu Nzambi? O Bibidia i zuela: ‘Zolenu ahatu enu kala Kristu kia zola o kilunga.’ (Efezo 5:25) Sumbala Jezú Kristu nuka ua kazala maji o phangu iê i tena ku ku kuatekesa ku kala diiala diambote. Tu tale kiebhi kiki ki tena o ku bhita.

JEZÚ PHANGU IAMBOTE PHALA O ANUMI

Jezú ua soto ku kuatekesa akuâ. Jezú ua tangela o ahatu akexile mu tata ni ku dila mukonda dia malamba mâ, muéne uixi: “Zenu kokuami, . . . eme nda ngi mi nhohese.” (Matesu 11:28, 29) Muéne ua kexile mu kuatekesa o athu mu ku a bhana ia bhindamene ni ku a kuatekesa ku kala makamba a Jihova. Kiki kia bhangesa athu avulu ku zola Jezú, ene ejidile kuila muéne ueji kua nhohesa!

Kiebhi o anumi kia tena o ku kaiela o phangu ia Jezú. Kuatekesa muhatu uê ni ikalakalu kubhata. Saí ahatu a divua kála kia divuile Loza, muéne uambe: “Eme ng’exile ngó kála ngi mubhika ua muadi uami.” Maji saí diiala, dijina diê  Kweku, ua zediua mu ukaza, muéne uambe kiki: “Eme ngene mu kuibhuila muhatu uami phala ku ngi tangela kiebhi ki ngi tena ku mu kuatekesa kubhata. Kuma nga zolo muhatu uami, ki ngi mona ikalakalu kubhata, eme ngi bhanga.”

Jezú ua suuile o athu ni ku a kuatela henda. Saí muhatu, ngadiama, ua katele kiavulu mu 12 kia mivu. Mu kuívua kuila Jezú ua kexile ni kutena kua ku saka athu, muéne uixi: “Se nga mu babata ngó ku kizuatu kiê, ngi di sanza.” Kidi muene! Muéne ua zukama kua Jezú, ua kuata ku kizuatu kiê iu ua di sanze. Sumbala saí athu a mono kiki, amba kuila o muhatu uenhó, ka tokalele ku bhanga kiokio, maji Jezú ua mono kuila o muhatu uenhó ua kexile mu sota o ku di sanza. * Jezú ni henda ioso, uambe: “Mona, . . . u di sanze ku uhaxi ué.” Jezú ka bazela o muhatu, mu veji dia kiki, ua mono kuila muéne ua katele kiavulu. Mu ku bhanga kiki, Jezú ua londekesa kuila muéne uexile mukua henda.Marku 5:25-34.

 Kiebhi o anumi kia tena o ku kaiela o phangu ia Jezú. Se o muhatu uê ka mu divua kiambote, mu londekese kuila ua mu zolo, mu kuatele muahu. Di te mu kididi kia-muene, sota ku mu tendela. Mu kifika, Ricardo uambe kiki: “Kioso ki ngi mona kuila muhatu uami ua luuala, ngi di langa phala ki ngi zuele dingi kima ki tena ku mu luualesa.”

O ku kaiela o phangu ia Jezú i tena ku kuatekesa o diiala ku kituka muadi ni tata iambote

Jezú ua kexile mu di kunda ni jixibulu jê. Jezú ua kexile mu di kunda kiavulu ni jixibulu jê. Muéne uambe: “Ima ioso i ngevu kua Tata iami, nga m’ijidisa-iu.” (Nzuá 15:15) O Bibidia i tu londekesa kuila, saí ithangana Jezú ua mesenene ku kala ubheka uê phala ku xinganeka ni ku samba. Maji mu ithangana iavulu, Jezú ua kexile mu zuela ni jixibulu jê kiebhi kia kexile mu divua. Ande dia ku mu jibha kála kifumbe, muéne ua a tangela ni kidi kioso kuila “ua kexile ni malamba.” (Matesu 26:38) Né muene kioso o ima ia kexile mu bhanga o jixibulu, ia mu luualesele, Jezú ka kexile mu thathamana ni ku kala sé ku di kunda ni jixibulu jê.Matesu 26:40, 41.

Kiebhi o anumi kia tena o ku kaiela o phangu ia Jezú. Zuela ni muhatu uê kiebhi ki ua mu divua ni kiebhi ki ua mu banza. O muhatu u tena ku luuala se o muadi uê, u zuela sé uôma mba sé hele bhuoso bhuala athu avulu maji kubhata muéne ka zuele ni muhatu uê. Maji tala kiebhi kiene mu divua Ana kioso muadi uê kia mu tangela ioso ia mu banza. Ana uambe: “Ngi mona kuila, muéne ua ngi zolo ni kidi kioso, eme ngi mu zola dingi.”

Kana ku kala sé ku di kunda ni muhatu uê, phala muéne ka divue kia iibha. Saí muhatu uambe: “Kioso muadi uami kia kexile mu di zangala n’eme, muéne u dituna kuzuela n’eme mu izuua iavulu. Muéne ua kexile mu ngi bhanga phoko, nga kexile mu divua kála ngi mukua ikuma.” Maji Edwin, u sota ku kaiela o phangu ia Jezú, muéne uambe: “Kioso ki ngi di zangala, ngi di xibha, maji ngi sota kithangana kia tokala phala kuzuela o maka ni ku a batula.”

Juana u tua mu tange ku dimatekenu uene mu mona muadi uê ku kala ni ukexilu uambote tundé kia mateka ku di longa o Bibidia ni Jimbangi ja Jihova. Juana uambe: “Muéne ua kituka muthu uengi, diiala diambote, u sota ku kaiela o phangu ia Jezú.” Jimidi ni jimidi ja makaza ene mu tambula o ulongelu iú ua Bibidia. Ua mesena ué ku di longa o Bibidia? U tena kuzuela ni Jimbangi ja Jihova n’a ku longe o Bibidia kubhata diê sé ku futa kitadi..

^ kax. 10 Mu Kitumu kia Mozé, o muhatu iú ua xidile, uoso u mu kuata, u xila ué.Ijila 15:19, 25.