• MUVU UA MU VUALA: 1987

  • MUKUA: AZERBAIJÃO

  • MUSOSO: O TATA, MUXULUMANU, O MAMA, JUDÉ

MUSOSO UAMI:

y A ngi vualela mu mbanza ia Baku, mu ixi ia Azerbaijão, eme ngi mona ua kaiadi mu divumu dia mam’etu. Tat’etu uexile mukua muxulumanu, mam’etu uexile Judé. O jitata jami a di zolele kiavulu né muene ni ku kala kála muthu ni ngeleja iê. Mam’etu ua kexile mu kuatekesa Tat’etu kioso Tat’etu kia kexile mu jejuuala, Tat’etu ué ua kexile mu kuatekesa Mam’etu kioso Mam’etu kia kexile mu bhanga o fesa ia Phasu. Ku dibhata dietu, tua kexile mu tanga o Alcorão, Tora ni Bibidia.

Nga kexile mu di mona kála ngi Muxulumanu. Eme ki ngi kexile ni phata kuila Nzambi kuene kuala maji ng’exile ni ibhuidisu ia kexile mu ngi thandanganhesa kiavulu. Nga kexile mu dibhuidisa, ‘Mukonda diahi Nzambi ua bhange o athu ni mukonda diahi muéne u talesa hadi ku athu ni ku a ta mu túbhia mu mivu iavulu sé dizubhilu?’ Kuma athu akexile mu zuela kuila ima ioso i bhita, vondadi ia Nzambi, kienhiki nga kexile mu banza ‘o kuila Nzambi muéne uene mu bhekela hadi ku athu?’

Kioso ki nga tenesa 12 kia mivu, nga mateka o ku samba o misambu itanu ia tokala ku bhanga o ji muxulumanu mu kizuua ni kizuua. Mu kithangana kieniókio, Tat’etu ua te phang’iami ia muhatu n’eme mu xikola ia ji Judé. Akexile mu tu longa o ijila ia Tora ni dimi dia Hebalaiku. Ande dia ku mateka o milongi mu xikola, a tu bhingile ku samba mu ku kaiela o ijila ia ji Judé. Mu kienhiki, ku bhata dietu ki kukia, tua kexile mu bhanga o misambu ia ji muxulumanu, mu ngoloxi ki ngi bhixila mu xikola ngi bhanga o misambu ia ji Judé.

Nga kexile mu sota o itambuijilu ia tokala ia ibhuidisu iami. Nga kexile mu kuibhula o ji mesene jami mu xikola: “Mukonda diahi Nzambi ua bhange o athu? Kiebhi Nzambi kia mona tat’etu, muxulumanu? Tat’etu muthu uambote, mu kiki, mukonda diahi muéne u di mona kala kifusa? Mukonda diahi Nzambi ua mu bhange?” O itambuijilu i nga tambula ki ia ngi xikinisa, mukonda ki iexile ia kidi.

O BIBIDIA IA LUNGULULA O UKEXILU UA MUENHU UAMI:

O kixikanu kiami kua Nzambi kia bhu ku muvu ua 2002. Tuaile ku ixi ia Alemanha, mu ku bhita semana imoxi, tat’etu ua kumbama. Mu mivu iavulu nga kexile mu samba mu ku bhinga sauidi iambote phala o muiji uami. Mu kuijiia kuila o Muteni-a-Ioso  uala ni kutena kuavulu o muenhu ni kalunga ndenge, nga mu bhingi nga mu dióndo phala ku kuatekesa tat’etu. Ng’ambe ku muxima uami, ‘o kima ki nga mu bhinga kua Nzambi, ki kima kia dikota kana.’ Nga dielele kuila Nzambi ueji tambuijila o misambu iami. Maji ta’etu ua suluka ni ku kata katé kiafu.

Nga divu kia iibha ku muxima, mu ku mona kuila Nzambi mbé kene mu suua athu. Eme nga di bhuidisa: ‘O kuila o maka ala n’eme inga Nzambi ki muthu ua kidi?’ Nga divu kia iibha, ki ngi kexile mu samba dingi, né muene o misambu ia ji muxulumanu. Ki ngi uabhele o jingeleja ja mukuá, mukonda dia kiki-phe, ki ngi kexile dingi mu xikina Nzambi.

Mu ku bhita mbeji jisamanu, o Jimbangi ja Jihova a phupu ku dibhitu dietu. Kuma ki tu kexile mu banza kiavulu mu jingeleja ja Jikidistá, Phang’iami n’eme tua mesenene kua londekesa kuila kejidile kima kia lungu ni Nzambi. Tua ebhuidisa: “Kiebhi o Jikidistá kiene mu bheza Jezú, ku bheza dikulusu, ku bheza Madiia ni iteka ia mukuá se o Dikuinhi dia Ijila iamba kuila o ku bhanga kiki kituxi?” Ni kikuatekesu kia Bibidia, o Jimbangi ja Jihova a tu londekesa kuila o ubhezelu ua iteka ki u tokala ku Jikidistá ja kidi ni kuila o misambu ia tokala ngó Nzambi. Mu kuívua kiki, nga diuana kiavulu.

Mu kiki-phe tua ebhuidisa dingi: “Abha o Tilindade? Se Jezú muéne Nzambi, ki bhita kiebhi Nzambi ku kala mu ixi ni ku mu jibha kuala o athu?” Ene a ngi jikula dingi o Bibidia ia a ngi tambuijila o kibhuidisu kiami, a ngi lombolola ué kuila Jezú ki muéne Nzambi, ka soko ué ni Nzambi. Mukonda dia kiki o Jimbangi ja Jihova ambe kuila ene ka xikina kuma Nzambi Tilindade. Eme nga banze moxi diami kuila ‘o Jikidistá jiji ka difu ni Jikidistá ja mukuá.’

Né muene kiki, nga mesenene kuijiia se mukonda diahi o athu a fua ni mukonda diahi Nzambi uehela o hadi. O Jimbangi ja Jihova, a ngi londekesa o divulu Kuijiia Kuambata ku Muenhu ua Kalelaku, * dia kexile ni kibatulu kimoxi kia kexile ni itambuijilu ia ibhuidisu iami. Mu kithangana kieniókio, ene a mateka ku ngi longa o Bibidia.

Kala kizuua ki tua kexile mu di longa, nga kexile mu sanga o itambuijilu ia Bibidia ia ibhuidisu iami. Ngeza mu kuijiia kuila o dijina dia Nzambi, Jihova. (Jisálamu 83:18) O kifua kiê kia beta-o-kota, o henda. (1 Nzuá 4:8) Muéne ua bhange o athu mukonda ua mesenene kua bhana o muenhu. Nga di longo kuila sumbala Nzambi uehela o hadi maji muéne u i zemba ni kuila ku hádia ua-nda zubha o hadi ioso. Nga di longo ué kuila o kituxi kia Adá ni Eva, kia bhekela maka a dikota ku athu oso mu ngongo. (Loma 5:12) Mukonda dia kituxi, tuene mu funda athu u tua zolo, mu kifika tat’etu. Maji Nzambi ku mundu ua ubhe, ua-nda bhuisa o jiphaxi joso, oso afu a-nda kua fukununa.Ikalakalu 24:15.

O Bibidia ia ngi tambuijila o ibhuidisu iami ioso. Nga mateka dingi ku xikina kua Nzambi. Mu kuijiia kiambote o Jimbangi ja Jihova, nga mono kuila ene ala mu ngongo ioso. Nga diuana kiavulu mu ku mona o undandu ni ukamba uâ uambote. (Nzuá 13:34, 35) O ima i nga di longo ia lungu ni Jihova, ia ngi bhangesa ku mu bheza, ni ku kituka Mbangi ia Jihova. A ngi batizala mu kizuua kia 8 dia mbeji ia Katatu ka 2005.

MABESÁ U NGA TAMBULA:

O itambuijilu ia Bibidia ia lungulula o muenhu uami uoso, lelu nga beta o ku zediua. O milongi ia Mak’â Nzambi a ngi bhekela kutululuka kua muxima. Ngi sanguluka kiavulu mu kuijiia kuila nga-nda di sanga dingi ni tat’etu kioso kia-nda fukunuka kála kilondekesa o Mak’â Nzambi.Nzuá 5:28, 29.

Nga kazala ni diiala diambote, u xila kiambote Nzambi, dijina diê Jonathan. Tundé ki tua kazala kua bhiti kiá samanu dia mivu. Kiiadi kietu tua di longo kuila o Mak’â Nzambi ene o kidi, ka bhonzo phala ku a tendela. O mak’â Nzambi ala ni valolo ia dikota kála ulu. Kiki kiene ki tu bhangesa ku uabhela kiavulu ku tangela o athu o ilongesu ia Bibidia ni kidielelu kiê. Lelu ngejiia kuila o Jimbangi ja Jihova ki “athu a iibha” maji ene o Jikidistá ja kidi.

^ kax. 15 A di bhange ku Jimbangi ja Jihova maji kene mu di bhanga dingi.