Mu Bibidia ihi Ilombolola o izuelu ‘muthu a mu kapala?’

Fikula ia mu Londekesa Muthu Mukua Asídia a mu Kapala.

Saí ithangana, o izuelu íii ilombolola o diiala a mu te o ukexilu ua kapadu. M’ukulu saí maiiala akexile mu a kapala phala ku a kaxtikala mba kua ambata kala abhika. Saí maiiala a a kapele akexile mu tambula konda ia maxilu a ahatu mu jinzo ja jisobha. Mu kifika, Henge ni Saxingazi akexile mu tambula konda ia ahatu a sobha ia Pélesa, Asuuelu, mba Xerxe I.Estere 2:3, 14.

Maji ko athu oso a a tumbula mu Bibidia kuila ji kapadu, a a kapala. Saí jingijie ambele kuila, o izuelu ia tokalele ku muthu u kalakala mu inzo ia sobha. Nange kiene kia kexile Ebede-Meleke, dikamba dia Jelemiia ni diiala mukua Etiiopia, ua dikundu ni Filipe o Mak’â Nzambi. Ebede-meleke uexile muthu ua kexile mu bhanga ikalakalu m’onzo ia sobha mukonda o Bibidia ilondekesa kuila muéne ua tenene kuzuela ni sobha zedekiia. (Jelemiia 38:7, 8) O Bibidia ilondekesa kuma o mukua Etiiopia uexile mukua ku tambula konda ia jimbongo ja sobha, “uendele mu Jeluzaleme mu kubheza Nzambi.”Ikalakalu 8:27.

Mukonda diahi o abhidi m’ukulu akexile mu tungula o jimbudi mu jihombo?

Mu ku jimbulula o kufundisa kua-nda kuíza ku hádia, Jezú uambe: “Kià keza Mon’a Muthu-phe, ni ungana uê, . . . muène anga u a tungula, kala mubidi u tungula jimbudi mu jihombo.” (Matesu 25:31, 32) Mukonda diahi o abhidi akexile mu tungula o jimbudi mu jihombo?

O jimbudi ni jihombo akexile mu a ta kididi kimoxi, ia akexile ué mu dila kididi kimoxi. M’usuku ene akexile mua ta mu kibhanga phala ka a die mu iama ia muxitu, mba phala ka a nhane kuala o mii mba kafue ni mbambi. (Dimatekenu 30:32, 33; 31:38-40) O jimbudi ka kexile mu zeka kumoxi ni jihombo bhenge-bhenge o tumbudi phala ka a bete mba ka a kuame kuala o jihombo. o divulu, All Things in the Bible (Ima Ioso mu Bibidia) di zuela kuila, o mubhidi ua kexile ué mu tungula o jimbudi mu jihombo kioso o jimbudi “kiemita, mba mu kithangana kia ku a katula lete mba ku a bhuta o ndemba.” Kienhiki, o kifika kia Jezú kia kexile mu londekesa o ifua iejidile kiambote o jingivuidi jê mukonda avulu mu ixi ia Izalaiele exile abhidi.