Ihi i ua tokala o ku bhanga phala ku kala u dikamba dia Nzambi? Tua di longo ima itatu i u tena o ku bhanga phala u tene ku kala dikamba dia Nzambi. Ienii:

  1. Kuijiia ni ku tumbula o dijina dia Nzambi, Jihova

  2. Kuzuela ni Nzambi izuua ioso mu ku samba ni ku di longa o Maka mê, o Bibidia

  3. Ku kolokota ku bhanga o ima i sangulukisa o muxima ua Jihova

Zukama kua Nzambi mu ku tumbula o dijina diê, ku samba, ku di longa o Maka mê ni ku bhanga o ima i mu sangulukisa

Kienhiki, o kuila ua mu bhanga o ima íii phala ku zukama kua Nzambi? O kuila saí kima ku muenhu uê ua bhingi ku ki lungulula? Tuejiia kuila ku bhinga nguzu phala ku bhanga kiki. Maji xinganeka o mabesá u ua-nda tambula.

Jennifer mukua Estado unidos uambe: “Nguzu ioso i u bhanga phala ku kala ni ukamba uambote ni Nzambi, iala ni valolo ia dikota. O ukamba iú u bheka mabesá avulu, mu kifika, o kidielelu kietu kua Nzambi ki dibandekesa dingi, o kuijiia kuetu kua lungu ni muéne ni henda ietu kua muéne ivula dingi. Kiki o kima kia Beta-o-kota ku muenhu!”

Se eie ua mesena ku kala ni ukamba uambote ni Nzambi, o Jimbangi ja Jihova a tena ku ku kuatekesa. Ene a tena ku di sokejeka kiambote phala ku di longa o Bibidia n’eie sé ku futa. Eie u tena ué kuia mu iônge iâ mu Kididi kia Ubhezelu mu ua-nda sanga athu a bhana valolo ia dikota mu ukamba uâ ni Nzambi. * Mu ku bhanga kiki, ua-nda divua kála kia divu o mukua Jisálamu, uexi: “Eme-phe kia ngi uabhela ku zukama kua Nzambi.”Jisálamu 73:28.

^ kax. 9 Phala ku bhinga ku di longa o Bibidia mba ku sanga o Kididi kia Ubhezelu ku diembu diê, tua ku dióndo zuela ni muthu ua ku bhana o kadivulu kaka mba jikula o Kijimbuete kietu, www.jw.org/kmb. Tala o dimbu › TU SONEKENE ku luiji dia mbandu.