Ku bokona mu madisá

Ku bokona mu madisá

 DIAMBU DIA KAPA | EIE U TENA KU KALA U DIKAMBA DIA NZAMBI

O Kuila Uejiia o Dijina Dia Nzambi ni ku di Tumbula?

O Kuila Uejiia o Dijina Dia Nzambi ni ku di Tumbula?

O kuila uala ni dikamba ua kambe ku muijiia o dijina? Nange kana. Saí muhatu mukua Bulgaria, dijina diê Irina, uambe: “Kana-ku muthu u tena ku kala dikamba dia Nzambi se muéne kejiia o dijina dia Nzambi.” Maji kala ki tua mono ku milongi ia tundu-mu, Nzambi ua mesena kuila eie u kala u dikamba diê. Mu kaxi ka Bibidia, Nzambi uíza ko kuê phala u muijiie, muéne u zuela: “Eme ngi Jihova, didi diene o dijina diami.”Izaia 42:8.

Mu kaxi ka Bibidia, Nzambi uíza ko kuê phala u muijiie, muéne u zuela: “Eme ngi Jihova, didi diene o dijina diami.”Izaia 42:8

O kuila Nzambi u mesena kuila u muijiia o dijina ni ku di tumbula? Tala: O dijina dia Nzambi dio soneke ni ijimbuete iuana mu dimi dia Hebalaiku, o ijimbuete íii a ixana Tetragrama, imoneka 7.000 ja ji veji mu Mikanda ia Hebalaiku. Mu Bibidia o dijina dia Nzambi diene dia beta o ku moneka. Kiki kilondekesa kuila Jihova ua mesena kuila etu tuijiia o dijina diê ni ku di tumbula. *

Phala athu kiiadi ku kala makamba, kia dianga, a tokala ku di jidisa o majina. O kuila uejiia o dijina dia Nzambi?

Maji saí athu amba kuma, kikôla ku tumbula o dijina dia Nzambi mukonda Nzambi muthu ukôla, Muteni-a-Ioso. Kidi, tua tokala ku xila o dijina dia Nzambi, kala ki tuene mu bhanga ni dijina dia kamba dietu dia kazola. Maji Nzambi ua mesena kuila, uoso ua mu zolo a ximane o dijina diê ni ku di jidisa ku athu. (Jisálamu 69:30, 31; 96:2, 8) Lembalala kuila Jezú ua longo o akaiedi’ê ku samba kiki: “Tata ietu uene mu diulu, dijina dié a dixile.” Tu tena ku xila o dijina dia Nzambi mu ku di tangela ku athu. O ku bhanga kiki, kia-nda tu zukamesa dingi kua Nzambi.Matesu 6:9.

O Bibidia i tu londekesa kuila Nzambi u suua kiavulu oso “ene mu ku xila dijina diê.” (Malakiia 3:16) O athu enhá, Jihova u a kanena: “Ngi mu tudika ditala, ka mu tena, mukonda ua ng’ ijiia o dijina. Muene kia ng’ixana, eme ng’itaia; bhu kíbhidi ngi mu kala bhu mbandu.” (Jisálamu 91:14, 15) Tua tokala kuijiia ni ku tumbula o dijina dia Nzambi se tua mesena ku kala tu makamba a muéne.

^ kax. 4 Maji saí ji Bibidia javulu, o dijina dia Nzambi ki di moneka-mu sumbala diene di moneka veji javulu mu Mikanda ia Hebalaiku, mba Kikutu Kiokulu. Ene a jimuna o dijina dia Nzambi ia a te-mu majina a ujitu kála “Ngana” mba “Nzambi.” Phala kuijiia dingi o maka enhá tala o milongi i tu sanga mu difue dia 195 ndu 197 dia divulu, Mu Kidi Ihi i Longa o Bibidia? a di bhange ku Jimbangi ja Jihova.