O munza ukôla ki tu tena ku u mona, maji u jibha athu—kiene ué kiala Satanaji

Ku bhonza kiavulu ku i tungula. Mukonda ki iala ni kolo né muene dizumba, i tena ku kuata o muthu sé muéne ku kijiia. Athu avulu ku mundu uoso ene mu fua mukonda dia venenu íii: O munza ukôla (monóxido de carbono.) Maji ki tu bhingi ku thandanganha. Kuene maukexilu a tena ku tu kuatekesa ku tungula o munza iú ni ku di langa. Athu avulu ene mu ta ji makina mu jinzo jâ phala ku a dimuna.

Kála o munza iú ukôla, Satanaji ki muthu u moneka ku mesu, kienhiki o athu ka tena ku mu mona, muéne kifumbe kia dikota. Maji Nzambi u tu kuatekesa. Eie ku bhingi ku kala ni uôma ua Satanaji se u katula mbote ku ima iene mu tu bhana Nzambi phala ku tu kuatekesa:

O ufolo ua ku sola. O divulu dia Tiiaku 4:7, di tu tangela: “Zokenu-phe ni Diabhu, muène u mi lenga.” Sumbala Satanaji muthu uala ni kutena kuavulu, muéne ka tena ku ku jijidika ku bhanga ima ki u mesena o ku bhanga. Eie u sola se u i bhanga mba kana. O divulu dia dianga dia Phetele 5:9, dizuela: “Kolokotenu-phe mu kuxikana, mbé mu tene kubhânga ni Diabhu.” Lembalala kuila Satanaji ua xisa Jezú kioso Jezú kia ditunu o ku bhanga kala kia mesenene muéne mu ithangana itatu. (Matesu 4:11) Eie ué u tena ku dituna o jitendasá ja Satanaji.

Ukamba ni Nzambi. O divulu dia Tiiaku 4:8 di tu suínisa kiavulu, di zuela: ‘Zukama kua Nzambi.’ Jihova u kuixana phala eie u kale u kamba diê dia kazola. Kiebhi ki u tena o ku bhanga kiki? O ukexilu ua beta-o-kota, o ku di longa ia lungu ni muéne bhu kaxi ka Bibidia. (Nzuá 17:3) O ima i u di longa ia lungu ni Jihova, ia-nda ku suínisa ku mu zola ni ku bhanga o vondadi iê ni muxima uoso. (1 Nzuá 5:3) Kioso ki ua-ndaia ni ku zukama kua Tat’ê ia diulu, kiebhi muéne kia-nda divua? O divulu dia Tiiaku, di tambuijila: ‘Nzambi u ku zukama ué.’

Jihova u bhana ima mu nzumbi phala ku ku langa

O kikanenu kia ku tu langa. O divulu dia Jisabhu 18:10, di zuela: “Dijina dia Jihova mukua ni mbonge ia matala ia di jikidila; muthu uoso ua iuka, kuene kua lengela, anga a mu bhaka kididi kia kondama.” Maji o izuelu íii ki ilombolola kuila o dijina dia Nzambi, dia di bhange kála kiteka ki tena ku tu langa. Mu veji dia kiki, o izuelu íii ilombolola kuila oso a xila o dijina dia Nzambi a tena ku lengela kua muéne mu ku sota ki kuatekesu mu ithangana ioso.

Phangu ia kidi. O divulu dia Ikalakalu 19:19, di tu tangela o musoso ua lungu ni athu mu mbanza ia Efezo  a kituka Jikidistá, di zuela: “Sai ue athu k’atolo, a tambuile uanga, a bheka o madivulu mâ, anga a ma ta mu tubhia ku mesu ma mundu. Hé a kuata konda kioso ki ate o madivulu, ma tena konda ia makuinhi a tanu a midi ia itadi ia phalata.” * O Jikidistá jojo, a te mu tubhia o ima ioso ia lungile ni uanga sumbala ia tele kitadi kiavulu. O phangu íii i tena ku tu bhana unjimu ua dikota lelu. O mundu iú uezala ni uanga ni uloji. Katé muene ni ima iofele i tu bhanga, i tena kuixana o madimonho. Kima kiambote ku texa o ima ioso íii né muene se ia tu bhonzo o ku bhanga kiki.Matendelelu 18:10-12.

Rogelio, u tua mu tange kiá mu dimatekenu dia milongi íii, ka xikinine kuila kuene Diabhu mu 50 a mivu. Maji muéne ua lungulula o ibanzelu iê. Mukonda diahi? Rogelio u tambuijila: “Nga mateka ku tanga o Bibidia. O ima i nga kexile mu tanga mu Mikanda Ikola ia ngi xikinisa kuila Diabhu kuene kuala. O kuijiia kuku, kuene mu ngi kuatekesa ku di langa ku mibhetu ia Diabhu.”

“O ima i nga kexile mu tanga mu Mikanda Ikola ia ngi xikinisa kuila Diabhu kuene kuala. O kuijiia kuku, kuene mu ngi kuatekesa ku di langa ku mibhetu ia Diabhu”

Ua mesena ku mona o kizuua kioso Satanaji ka-nda kala dingi mu ixi? Eie u tena ku mona. O Mikanda Ikola i tu tangela kuila, ku hádia Satanaji, mukua ku nganala o athu, a-nda ‘mu takula mu kizanga kia túbhia ni xôfidi.’ (Dijingunuinu 20:10) Mu kidi, o túbhia ni xôfidi, ki i tena ku jikatesa muthu mu nzumbi. Mu kiki-phe, o kizanga kia tubhia, kilombolola ku jima Satanaji ku hádia ni hádia. Satanaji ka-nda moneka dingi mu ixi. Kisangusangu kia dikota phala o azodi a Nzambi!

Mu kithangana kienhiki, suluka ni ku di longa ia lungu ni Jihova ni jinjila jê. * Xinganeka o kithangana kioso athu kia-nda tena o kuzuela kuila, “Satanaji kene-ku dingi!”

^ kax. 8 Se o itadi íii ia phalata, iexile o dénadia dia akua Loma, kueji bhinga o kitadi kia kizuua kimoxi kia makuinhi atanu a midi ia akalakadi phala ku sumba o madivulu moso enhó—kitadi kiavulu!

^ kax. 11 Phala kuijiia dingi ia lungu ni Satanaji ni uanga, tanga o kibatulu 10 kia divulu, Mu Kidi Ihi i Longa o Bibidia? Bhinga o divulu didi ku Jimbangi ja Jihova mba tanga-diu mu internete www.jw.org/kmb.