Ku bokona mu madisá

Ku bokona mu madisá

 DIAMBU DIA KAPA | O KUILA NZAMBI U KU SUUA?

Nzambi u ku Mona

Nzambi u ku Mona

“Mbata o mesu a Nzambi phe, a mu kengelela o njila ia muthu, hé U mona o uendelu uê uoso.”JOBE 34:21.

O ana-ndenge, a bhindamena dingi o ku a langa

MUKONDA DIAHI ATHU ALA NI PHATA: Kala kia tokuesa, mu kibuka kietu kia jithéthembua (Via Láctea) mu tena ku kala 100 ia mazunda a ji planeta. Mukonda dia ngongo ku sanzumuka kiavulu, athu avulu a dibhuidisa, ‘Mukonda diahi o Mubhangi ua tena ioso, u tena ku mona o ima ia mu bhanga o athu a tungu mu ixi ia tolo kiki, kála dibêbe dia menha?’

IHI I LONGA O MAK’Â NZAMBI: Nzambi ka tu bhana ngó o Bibidia, iu ua tuehela ubheka sé ku tu suua. Maji mu veji dia kiki, muéne u tu kanena: “Ngi ku bhana kaiula, kuma nga ku te muene diesu.”Jisálamu 32:8.

Tala o kifika kia Hangale, muhatu mukua Ijitu ua kexile ku muenhu ku hama 20 A.K.K. Hangale ka kexile mu xila ngana iê, Salai, mukonda dia kiki, Salai ua mu tatesa kiavulu katé kia lenge mu kikangalakata. O kuila mukonda dia Hangale ku bhukumukina ngana iê, Nzambi ka mu suu dingi? O Bibidia izuela: “O anju ia Jihova anga i mu sanga.” O anju ia kanena Hangale, uixi: “Jihova ua ku ivu o kutata kuê.” Hangale-phe ua tangela Jihova, uixi: “Eie u Nzambi [mukua] ku mona.”Dimatekenu 16:4-13.

O “Nzambi [mukua] ku mona,” uene mu tu mona ué. Mu kifika: O mama ia henda u langa kiambote an’ê, bhenge-bhenge o ana-ndenge. Mukonda o ana-ndenge, a bhindamena dingi o ku a langa. Nzambi ué u tu suua dingi kioso ki tu toloka muxima. Jihova uzuela “Nga tunga bhulu, bhu kididi kikôla; nga tunga ue ni oso mukua muxima ua toloka, ua batama, phala kuphaphumuna muxima ua oso a batama ni kuphaphumuna muxima ua oso a toloka.”Izaia 57:15.

Maji eie nange u dibhuidisa: ‘Kiebhi Nzambi kia ngi mona? O kuila muéne u ngi fundisa mukonda dia pholo iami, inga muéne u ngi tala ku muxima ni kuijiia kuila ngi mukuá ituxi?’