“NZAMBI nzumbi,” athu ka tena ku mu mona. (Nzuá 4:24) Maji o Bibidia i zuela kuila, kua kexile athu m’ukulu edile kala a muene Nzambi. (Jihebeleu 11:27) Kiki ki bhita kiebhi? O kuila u tena ku mona o “Nzambi ua kambe ku moneka ku mesu?”—Kolose 1:15.

Tu di sokesa ni muthu a mu vuala kifofo. O kuila o ku kamba o ku mona ki mu fudisa kuijiia ia mu bhita mu’axaxe kê? Kana. O kifofo u tena kuijiia ioso ia mu bhita mu maukexilu avulu a tena ku mu kuatekesa kuijiia o athu, o ima ni ikalakalu. Saí diiala kifofo, uambe: “O mesu ala ku muxima.”

Sumbala eie ué ku tena ku mona Nzambi ni mesu’ê, maji u tena ku mu mona ni “mesu’ê a muxima.” (Efezo 1:18) Talesa maukexilu atatu a ku bhanga kiki.

‘A I MONA MU IMA IA BHANGE MUÉNE’

O mauhete a kifofo a lungu ni kuívua ni ku babata o ima, ki mu kuatekesa kuijiia o ima i kamba o ku mona. Eie ué u tena ku tonginina o ima iene mu ngongo ni ku mona kuila Nzambi ua i bhange. ‘O ídifua iê-muène ia kambe kumoneka ku mesu, athu a i mona mu ima ia bhange muéne.’—Loma 1:20.

Mu kifika talesa o ixi ietu. Iene ka i bhange ngó phala athu ku kala-mu kana, maji a i bhange mu ukexilu ua kuila o athu a sanguluka ku muenhu. Kioso ki tuala mu muaha uatu, anga tuivua kithembu kia zaila ku mukutu uetu, kioso ki tu dia dilalaja diedi nzué mba tuívua o jinjila ja mu kuimba, tu sanguluka kiavulu. O kuila o maujitu enhá ka tu londekesa kuila o Mubhangi uetu, Nzambi ia henda, uambote ni mukua ku bhana?

Ihi i u tena o ku di longa ia lungu ni Nzambi ku ibhangelu iê mu ngongo? Kima kimoxi, o kuijiia kuila, o diulu dilondekesa o unene ua Nzambi. Lelu o jingijiie ja mu londekesa kuila o ngongo ia mu di nana ngó kana maji iene i bhanga kiki ni lusolo! M’usuku Kioso ki u mona ku diulu diezala ni ji thethembua, xinganeka: ‘Kuebhi kua mu tunda o kutena kuoso kuku ku bhangesa o ngongo o ku di nana?’ O Bibidia i tu tangela kuila o Mubhangi uala ni “kutena.” (Izaia 40:26) O ibhangelu ia Nzambi i tu londekesa kuila muéne “Muteni-a-Ioso”—Nzambi “ukôla mu kutena kuê.”—Jobe 37:23.

“UENE BHU JIHATA JÁ TATA, MUENE UA TU [JIMBULUILA] NZAMBI”

Saí mama ua mu sasa ana kiiadi ifofo, uambe: “O ku di zuelesa, kuene o ukexilu uâ ua beta o kota ua ku di longa ni kuijiia o ima. U a tangela ioso i ua mu mona ni kuívua, ni ku i jimbulula. O mesu’â, eie.” Kiene kimoxi ué, sumbala “kiluua ku kala muthu u mona Nzambi,” Jezú, o Mon’â Nzambi “uene bhu jihata já Tata, muene ua tu [jimbuluila] Nzambi.” (Nzuá 1:18) Mukonda dia ku kala o kibhangelu kia dianga, o Mon’a umoxié-lele ua Nzambi ni kamba dia kazola dia Nzambi, Jezú u di bhanga kala “mesu’etu” u tu kuatekesa kuijiia Nzambi. Muéne o muthu ua tokala u tena ku tu kuatekesa kuijiia o Nzambi ua kambe ku moneka ku mesu.

Talesa kiebhi kia jimbulula Jezú, ua bhiti mivu iavulu bhu mbanji ia Tat’ê:

  • Nzambi u kalakala sé ku bhuila. “Tata iami ua mu kalakala katé kindala.”Nzuá 5:17.

  • Nzambi uejiia o ima i tu bhanga. “Tat’enu uejiia kiá ima ioso i mua bhindamena, kioso enu kiluua ngó mu mu bhinga.”Matesu 6:8.

  • Nzambi u tu dikila. “Tata ienu uene mu diulu . . . muène mukua kubhangesa dikumbi diê di  bandela athu abhukumuka ni athu ambote, u tumikisa mvula ni kua ia aiuka ni ku ísueia.”Matesu 5:45.

  • Nzambi u zola muthu ni muthu. “tudièdie tuiadi, kala ku tu sumbisa mu mulambongo? Ni kamoxi-ku-phe ngó ki ka laúka bhoxi sé Tat’enu ku ki andala. Kuambe dingi enu-phe katé ni jindemba ku mítue ienu a ji’aleka. Uila kiki, ki mu kale ni uôma. Tudièdie né tua ndumba, enu mua beta ukota.”Matesu 10:29-31.

MUTHU UA LONDEKESA O ÍDIFUA IA NZAMBI

O ifofo ka mona o ima kala ki mona o athu ala ni mesu. O kifofo u tena kuijiia kuila uala mu kilembeketa maji ka tena kuijiia kuila o kilembeketa kididi kia vundu. Uejiia ngó kuila kididi kia talala kifikidila o muthu ku muanha. Kala o muthu a mu vuala kifofo ka tena ku mona o kilembeketa né o muanha, etu ki tu tena ku tendela Jihova sé kikuatekesu. Kienhiki, Jihova ua tumikisa muthu mu ixi ua tenene ku londekesa o ídifua Iê ni ukexilu.

O muthu iú Jezú. (Filipe 2:7) Jezú ka zuela ngó ia lungu ni Tat’ê maji ua tu londekesa ué kiebhi kiala Nzambi. O dixibulu dia Jezú, Filipe uebhuidisa: “Ngana, tuidikise Tata.” Jezú uixi: “Uoso ua ngi mono eme, ua mono ue Tata.” (Nzuá 14:8,9) Ihi i u tena o ku “mona” ia lungu ni Tata mu ima ia bhange Jezú kioso kia kexile mu ixi?

Jezú uexile muthu uambote, ua lenduka, o athu ka kexile ni uôma ua kuzuela nê. (Matesu 11:28-30) O ukexilu uê uambote ua bhangesa athu avulu ku mu zukama. Jezú ua divu kia iibha kioso kia monene akuâ akexile mu bhita ni hadi iu ua kexile mu sanguluka ni ió a sangulukile. (Luka 10:17, 21; Nzuá 11:32-35) Kioso ki uia ni ku tanga, kuívua o misoso ia Bibidia ia lungu ni Jezú, bhanga kiki mu ukexilu u ku kuatekesa ku tendela kiambote o muenhu ua Jezú. Se u xinganeka kiebhi Jezú kia kexile mu di bhana ni athu, ua-nda tena kuijiia kiambote o ídifua iambote ia Nzambi ni ku mesena ku Mu zukama.

KU SOKEJEKA KIAMBOTE O IMA

Mu ku zuela ia lungu ni kiebhi o kifofo kia mona o ima mu ngongo, sai musoneki uambe: “Muéne ka tambula o njimbu kala ki tambula o muthu u mona, u tambula o njimbu mu maukexilu avulu (mu ku babata, bhu kaxi ka dizumba, mu kuívua, ni maukexilu a mukuá), iu ua tokala ku bunda o ima.” Mu kiki, kioso ki uia ni ku tonginina o ibhangelu ia Nzambi, mu ku tanga ia lungu ni ima ia zuela Jezú ia lungu ni Tat’ê, ni ku xinganeka kiebhi Jezú kia londekesa o ídifua ia Nzambi, ua-nda kuijiia kiambote Jihova. Ua-nda mu mona kala muthu ua kidi.

Jobe, selevende ia Nzambi m’ukulu kiene kia divu. Mu dimatekenu ua zuela ima ka “ijidile.” (Jobe 42:3) Maji kioso kia tokuesa kiambote o ibhangelu ia Nzambi Jobe uambe: “Ngana, ki nga kuijidile kiambote, nga kuívua jinga ngó ni matui mami; maji o kiki, mesu’a mi ala ku ku mona.”—Jobe 42:5.

“Eie se u mu sota, uanda ku mu sanga”

Kiki ki tena ku bhita ué n’eie. “Eie se u mu sota [Jihova], uanda ku mu sanga.” (1 Malunda 28:9) O Jimbangi ja Jihova a-nda sanguluka kiavulu mu ku kuatekesa ku sota ni ku sanga o Nzambi ua kambe ku moneka ku mesu.