MIVU ku dima, o jurnale ia akua Korea, The Chosun Ilbo, ia bhekele minangu ia bhangesa o athu ku banza kiavulu. O jurnale iebhuidisa, “‘Muthu ua Kazola, Shim Cheong,’ Uoso ua Kambele Kuijiia Kima Kia Lungu ni Jezú—O Kuila Uai ku Ifernu?”

O minangu íii ia bhekesa njinda iavulu ku athu mukonda Shim Cheong, ka munzangala ka muhatu mu sabhu ia akua Koreia, ua bhana o muenhu uê phala ku kuatekesa tat’ê uexile kafôfo. Mu mivu iavulu, athu avulu ene mu mu ximana mu ima ia bhange muéne. Kienhiki, mu ixi ia Koreia, “Shim Cheong” ene mu mona kala phangu iambote ia henda ia tokala ku kala na-iu o mona ua muhatu.

Ku athu avulu, o ku banza kuila muthu kala iú a-nda mu u kaxtikala mu túbhia tua ifernu mukonda ka mu batizala kala Kidistá, kuiibha kua dikota. Mbé o misoso íii ia bhitile ande dia njimbu iambote ia lungu ni Kristu ku i tula mu diembu diê.

O minangu iejile ué ni mbandu muebhuidisa padele. O padele muenhó a mu ibhuidisa se o athu a fuile sé kuijiia Jezú a-nda ku a ta mu túbhia tua ifernu. Kiebhi kia tambuijila o padele? Muéne uambe: “Manhi. Maji tua dielela kuila Nzambi ua-nda bhanga Kima [phala o athu enhá].”

KITUMU KIA KU BHULUKA

O divulu, Nova Enciclopédia Católica, diambe: “O muthu ua bhingi ku mu batizala phala muéne ku bhuluka. Kala kia zuela muéne Kristu, o muthu ka tena ku bokona mu Utuminu ua Nzambi, se muthu iú a kamba ku mu vuala mu menha ni mu nzumbi. (Nzuá 3.5).” Mukonda dia kiki, saí athu a xikina kuila oso a fua sé ku a batizala, a a takula mu ifernu mba a tala hadi mu ukexilu uéngi.

Maji saí athu avulu uá, ka xikina mu maka enhá. Mazunda a athu afu sé kuijiia kima kia lungu ni Bibidia. O kuila athu enhá a tokala ku a kaxtikala mu túbhia thembu ioso katé ku hádia ni hádia? Ihi i zuela o Bibidia ia lungu ni maka enhá?

KIDIELELU KIA BIBIDIA

O Bibidia ilondekesa kuila Nzambi u bhana valolo katé kua ió afu kiá sé kuijiia o itumu iê. O divulu dia Ikalakalu 17:30 di tu dielelesa: “Mu jitembu ja kukamba ku k’ijiia, Nzambi ua dixibhidiê.” Kidielelu kiahi-phe kiala na-kiu ió afu kiá sé kuijiia Nzambi?

Ihi ilombolola o kikanenu kia Jezú: “Ua kà kala ni eme mu Palaízu?”

O kitambuijilu tu ki sanga mu izuelu ia Jezú kia zuela ni kifumbe kiafu bhu mbandu iê. O diiala diambe kua Jezú: ‘Jezú ngi lembalale, hádia ki uíza ku Usobha mu Utuminu ué.” Kiebhi kia tambuijila Jezú? Jezú ua tambuijila: ‘Kidi ngi ku kuambela lelu, ua kà kala ni eme ku kididi kiambote mu Palaízu.’Luka 23:39-43.

O Jezú ua kexile mu tangela o diiala kuila ueji bokona mu diulu? Kana. O diiala ka mu ‘vualele lua kaiadi’ mu menha ni mu nzumbi, ia zuelele Jezú kuila kua bhingi phala o muthu ku bokona mu Utuminu ua diulu. (Nzuá 3:3-6) Maji Jezú ua kexile mu tangela o kifumbe kieniókio kuila ueji vutuka ku muenhu, “mu Palaízu.” Mukonda muéne uexile Judé, uejidile kiambote o Palaízu iexile mu ixi—o jaludim ia Edene—io tange mu divulu dia dianga dia Bibidia. (Dimatekenu 2:8) O ia mu tangela Jezú ia mu bhana kidielelu kia kidi kia difukunukinu phala ku kala mu Palaízu mu ixi.

O Bibidia i tanga ni kidi kioso kuila “hádia ku kala difukunukinu dia athu aiuka ni athu abhukumuka.” (Ikalakalu 24:15) O “athu abhukumuka” ió ka tenene ku belesela o itumu ia Nzambi mukonda kejidile o itumu ia Nzambi. Jezú ua-nda fukununa o kifumbe ua ‘bhukumukine’ ua zuela nê mu taka ni mazunda ni mazunda a athu afu kiá sé kuijiia o vondadi ia Nzambi. Kienhiki, kioso kia-nda fukunuka a-nda ku a longa o itumu ia Nzambi ni ku a  mona sé mu kidi a zolo muéne Nzambi mba kana mu ku belesela o ijila iê.

KIOSO KIA-NDA FUKUNUNA O “ATHU ABHUKUMUKA”

Kioso o “athu abhukumuka” kia-nda ku a fukununa, o kuila a-nda ku a fundisa mu ima ia bhangele m’ukulu ande dia kufua? Kana. O divulu dia Loma 6:7, di zuela: “Uoso uafu, ua jituka kiá ku nguzu ia ituxi.” Kienhiki o “athu abhukumuka” a futa o ituxi iâ kioso kia fua. Kala kiki-phe, ene a-nda ku a fundisa mu ima ia-nda bhanga kioso kia-nda ku a fukununa kana mu ima ia bhangele sé ku kijiia m’ukulu ande dia ene kufua. Mabesá ebhi a-nda tambula ene?

Kioso kia-nda ku a fukununa, o “athu abhukumuka” a-nda kala ni kithangana kia ku di longa o itumu ia Nzambi a-nda i tanga kioso kia-nda jikula o madivulu a ubhe. Kienhiki, ene a-nda ku a fundisa “kioso kia tokala mu imbamba iâ ia bhanga jinga,” mu kua mona se a mu belesela o itumu ia Nzambi mba kana. (Dijingunuinu 20:12, 13) Phala o athu avulu “abhukumuka,” kiki kia-nda kala o kithangana kiâ kia dianga kia ku tambula o muenhu ua kalelaku mu ixi mu ku di longa ia lungu ni vondadi ia Nzambi.

O mulongi iú ua Bibidia, ua kuatekesa athu avulu ku kolesa dingi o kixikanu kiâ kua Nzambi, kala Yeong Sug. A mu sase mu ngeleja ia Katolika. Athu avulu ku muiji uê, exile ji padele. Kuma ua mesenene ué ku kala madele, ua bokona mu kididi kia ji padele mba ji madele. Mu ku bhita thembu, ua tundu-mu mukonda ua luualele mukonda dia ima ia kexile mu bhita mu kididi kieniókio. Muéne ué ka tenene ku xikina mu ulongelu ua túbhia tua ifernu mukonda mu ku banza kuê, o ku kaxtikala athu mu túbhia tua ifernu, ku kamba henda.

Kienhiki, saí Mbangi ia Jihova ua londekesa kua Yeong Sug o izuelu íii mu Bibidia: “Kuma ió oso ala ni muenhu ejiia kuma a-nda kufua, maji o ió afu kiá k’ejiia dingi kima kioso-kioso; né ue kisakidilu kia kima, ene kala na-kiu dingi .” (Ndongixi 9:5) O Mbangi ia Jihova ia mu kuatekesa ku tendela kuila o jikuku jê ja fuile kiá ka mu a kaxtikala mu túbhia tua ifernu. Maji a zeka mu’alunga, a mu kingila ku a fukununa.

Mu kuijiia kuila athu avulu hanji nuka evuile o kidi kia Bibidia, Yeong Sug ua te ku muxima o izuelu ia tange Jezú mu divulu dia Matesu 24:14: “O Njimbu iíi Iambote ia Utuminu ua Nzambi, ia bhingi ku i tula mu ngongo ioso, mu kubhana umbangi ku akua jixi joso; kiene kiua kia kèza dizubhilu.” Lelu muéne ua mu boka o njimbu iambote ni ku tangela ku akuâ o kidielelu kia sange muéne mu Bibidia.

“NZAMBI KENE NI KATHOMBO”

O Bibidia i zuela kuila “Nzambi kene ni kathombo, maji ku akua jixi joso, uoso u mu xila muène, hé u bhanga ioso iaiuka, Muène u mu tambulula.” (Ikalakalu 10:34, 35) Kiki o kima kia iuka ki tua mesena ku kingila etu enioso kua Nzambi, ‘ua zolo o kufundisa kua kidi ni ku tetuluka.’Jisálamu 33:5.