Athu ka uabhela kuzuela maka alungu ni kufuá. Maji saí kizuua tua-nda dibhana ni maka enhá. O kufuá kua muthu, ku bhekela ndolo iavulu ku muxima.

Se-ku kima ki tena ku tu bhangesa ku kala polondo phala ku dibhana ni kufuá kua ndandu ietu, kaza dietu, mba kua mon’etu. O kufuá ku tena ku tu tula, sé ku ki kingila. Kienhiki, athu ka tena ku lenga o ndolo ni malamba ijila mu kufuá.

António, ua fundu tat’ê a mu lanvula ku dikalu, uambe: “O kufuá kuedi kala, muthu u jika o dibhata diê, anga uambata o sabhi. Eie ku tena ku bokona m’onzo. U mu lembalala kia ngó ku muxima. Kiki o kidi. Sumbala u sota ku dituna o kidi kiki—maji se-ku dingi kima ki tena ku bhanga o muthu.”

Doroteia, ua fundu muadi uê kioso kia kexile 47 a mivu, ua soto o itambuijilu ia ibhuidisu iê. Sumbala ua kexile mu longa o ana kuila, o athu a kala dingi ku muenhu kioso kia fuá, muéne ka kexile ni itambuijilu ia kidi ia lungu ni maka enhá. Muéne uebhuidisa o mukunji ua ngeleja Anglicana: “Ihi i bhita n’etu kioso ki tu fuá?” O mukunji ua tambuijila: “Se-ku muthu ua kijiia kiambote, tu kingile phala kuijiia.”

O kuila tua tokala ku “kingila phala kuijiia?” O kuila saí ukexilu u tu kuatekesa kuijiia se o kalunga o disukilu muene dia ima ioso?