O BIBIDIA I LUNGULULA O UKEXILU UA ATHU

Jihova ka ngi bhana dikunda

Kala Kia Tange Susana Plasín Udías

MUVU UA MU VUALA: 1922

MUKUA: ESPANHA

MUSOSO: KATAKA

MUSOSO UAMI: A ngi vualela ku mbanza ia Bilbao, ku ixi ia Espanha. Tu kiuana kia jiphange, eme ngi mona ua kaiiadi mu divumu dia mam’etu. Tua kexile tu akua Katolika, nga kexile múia mu ngeleja izuua ioso. Ki nga tenesa 23 a mivu, nga kituka mesene ia ku longa—nga uabhelele kiavulu o kikalakalu kiki, nga ki sotele mu 40 a mivu. Ku ioso i nga kexile mu longa, nga zolele kiavulu ku longa o ilongesu ia Katolika, mu usuku nga kexile mu bhanga o kikalakalu kia kataka—ku longa o ana ahatu phala ku tambula o kumunhá kâ, ka dianga.

Mu ku bhita 12 dia mivu ni ukaza ua sanguluka, muadi uami uafú, eme nga xala ni kiuana kia ana phala ku a sasa. Nga kexile ngó 33 a mivu! Nga soto kikuatekesu mu ngeleja iami ia Katolika, maji nga kexile ni ibhuidisu iavulu. Nga kexile mu dibhudisa: ‘Mukonda diahi o athu ene mu suluka ni kufuá se Kristu ua tu bhulula kiá? Mukonda diahi tuene mu samba phala o Utuminu ua Nzambi uíze, se athu ambote a-ndaia ku diulu?’ Eme nga kexile mu banza ué: ‘Se Nzambi u tu fundisa kioso ki tufuá, mukonda diahi tu bhinga dingi ku tunda ku diulu, ku tunda mu kididi kia ku fundisa o imbi, mba mu ifernu?’

Nga bhange o ibhuidisu íii ku jipadele mu ngeleja. Padele imoxi ua ngi tambuijila: “Ki nga kijiia. Uibhuidisa o Bispo. Maji mukonda diahi ua mesena kuijiia? Eie ku xikina Nzambi? Kana kuibhula!” Maji nga suluka ni ku sota o itambuijilu. Mu ku bhita thembu, ngai mu ngeleja ia Jesuíta, Pentekostale, ni akua Gnósticos. Maji ka tena ku ngi bhana o itambuijilu ia tokala.

O BIBIDIA IA LUNGULULA O UKEXILU UA MUENHU UAMI: Kioso ki nga kexile kiá 60 a mivu, dixibulu diami dia kexile mu kitala 7 dia mivu, ua ngi xana phala kuia mu kiônge kia Jimbangi ja Jihova. Nga uabhela kiavulu ioso i nga mono, ni ioso i ngevu mu kiônge, maji mukonda dia ku kamba kithangana, ki nga kexile dingi mu di sanga ni Jimbangi ja Jihova. Mivu jiiadi ku pholo, dikaza diexile Mbangi ia Jihova, Juan ni Maite, a phuphu o dibhitu dietu. Mu mbeji jitatu, tua kexile mu di longa kiavulu, ku bhanga ibhuidisu ni ku ngi bhana o itambuijilu, ia ngi bhangesa ku xikina o ku di longa o Bibidia.

Nga uabhele kiavulu o ku di longa o Bibidia! Nga kexile mu tokuesa ioso i nga kexile mu di longa phala ku mona se o Jimbangi ja Jihova, akexile muene mu longa o kidi. Nga mono kuila, ku mivu iavulu nga kexile mua vundu. Nga thandanganha kiavulu mukonda o ilongesu i nga di longele mu ngeleja ki i difuile ni ilongesu i nga kexile mu di longa mu Bibidia. Maji o ilongesu ia ngeleja iami ia kolele ku muxima uami kála jindanji mu mavu.

Mu ku bhita thembu, muadi uami ua kaiiadi, ua kate kiavulu iu uafú. Maji, mukonda dia kitala kiami, ki ngi kexile dingi mu kalakala, eme nga tundu ku mbanza ia Bilbao. Juan ni Maite a tundu uá. Kuenhoko ki ngi kexile mu di longa o Bibidia. Maji nga kijidile kuila, nga sangele kima kia valolo. Nuka nga ki jimbile.

Mu ku bhita 20 a mivu, ki nga tenesa 82 a mivu, Juan ni Maite a vutuka ku mbanza ia Bilbao, a ngi kuatekesa eme ngai ku a kunda. Nga sangulukile kiavulu ku a mona dingi! Nga mono kuila Jihova ka ngi bhana dikunda, eme nga mateka dingi o ku di longa o Bibidia. Juan ni Maite akexile mu ngi longa o Bibidia ni muanhu uoso, mukonda nga kexile mu a bhanga ibhuidisu iavulu. Nga bhindamene kuívua o milongi ia Bibidia ithangana ioso phala ku jima o ilongesu ia makutu ia kexile ku muxima uami. Nga mesenene ué ku kala polondo phala ku jimbulula kiambote ku makamb’ami ni ndandu jami o kidi kia Bibidia.

Kia ngi batizala—mu 87 a mivu—kiexile o kizuua ki nga betele o ku sanguluka ku muenhu uami. A ngi batizala mu kizuua kia kiônge kionene kia Jimbangi ja Jihova. Saí kafunga ua bhange diskursu dia tokalele muene phala etu eji tu batizala mu kizuua kieniókio. O diskursu dia ngi bhangesa o ku dila. Ngevu o diskursu kala, Jihova ua kexile mu zuela ngó phala eme. Kioso kia ngi batizala, Jimbangi javulu ja Jihova eza mu ngi menekena—sumbala avulu nuka nga a muene!

MABESÁ U NGA TAMBULA: Ngejidile kiá tundé ukulu kuila, Jezú Kristu muéne o “njila.” (Nzuá 14:6) Maji, o milongi ia Bibidia ia ngi kuatekesa kuijiia kiambote Jihova, o muthu ua tu suínisa Jezú o ku mu bheza. Kindala ngi tena kiá ku samba kua Nzambi, kala Tata iami ia kazola ni Kamba diami. O ku tanga o divulu: Achegue-se a Jeová, * dia ngi suínisa kiavulu ku muenhu uami. Mu veji ia dianga, nga tange o divulu dioso mu usuku umoxi! Nga sangulukile kiavulu mu kuijiia kuila Jihova mukua henda.

Mu ku tala ku dima, mu ioso i nga bhange phala ku sanga o kidi mu jingeleja, ngi xinganeka mu izuelu ia Jezú: “Bhinga, nda a ku bhane; sota, nda u sange; phupha, nda a ku jikuile.” (Matesu 7:7) Kindala nga sange o itambuijilu ia ibhuidisu i nga mesenene, ngi sanguluka kiavulu ku tangela ué o athu.

Sumbala ngala kiá 90 a mivu, ngi divua kala ngi munzangala hanji mu nzumbi. Kala kizuua ki ngiia mu kiônge, kizuua kia katunda phala eme—mukonda dia milongi i ngi tambula ni mukonda dia ku kala kumoxi ni phange jami mu kilunga. Nga kingila ku kala dingi muboki mu Palaízu mu ixi. (Dijingunuinu 21:3, 4) Nga mu kingila ué ku di sanga ni ndandu jami ku vutuka ku muenhu ni ku a longa o kidi kia Bibidia. (Ikalakalu 24:15) Nga mu kingila kiavulu ku a jimbulula o ujitu ua dikota ua ngi bhana Jihova mu ukukilu uami!

[Ku luji]

^ kax. 15 A di bhange ku Jimbangi ja Jihova.

 [O pondo ia tokala ku mbandu 13]

Nga kijidile kuila, nga sangele kima kia valolo