‘Mu di loloka mudienu.’KOLOSE 3:13.

MIMBU: 53, 28

1, 2. Ihi ia kanene o Bibidia, ia lungu ni ku dibandesa kua mundu ua Jihova?

MU IXI, muene kilunga kimoxi kia athu a zolo Jihova. Ene a mesena ku mu sidivila. O athu iá, o Jimbangi ja Jihova. Sumbala ene akuâ ituxi, Jihova ua endesa bhu kaxi ka nzumbi iê ikola. Tu mone kiebhi kiene mua besoala.

2 Ku muvu ua 1914, o athu akexile mu bheza Jihova a tolele. Maji Jihova ua besoala o kikalakalu kia kuboka. Mukonda dia kiki, athu avulu a di longo o kidi kia Bibidia, anga a kituka Jimbangi jê. Jihova ua jimbulula o ku dibandekesa kua athu eji mu bheza, mu ku zuela: “Kamona kandenge, ua kà di-bhanga midi; o ua beta kutola u biluka kifuxi kionéne: Eme, ngi Jihova, bhu kumbi diê nga ka ki bhanga sé kufula.” (Izaia 60:22) Lelu, tu tena kumona ni kidi kioso kuila, o kikanenu kiê kia mu dikumbidila. O mundu ua Jihova ua difu ni kifuxi kionéne. Mu kidi, kuene jixi avulu ku mundu, o athu a tungu-mu a tolo, o mundu ua Jihova ua beta kuvula.

3. Kiebhi o jiselevende ja Nzambi kia londekesa o henda?

3 Mu izuua íii i sukidila-ku, Jihova uene mu kuatekesa o  mundu uê ku dizola dingi mudiâ. Kuma “Nzambi henda,” ene a kaiela o phangu iê. (1 Nzuá 4:8) Jezú ua tendelesa o akaiedi’ê ‘ku dizola mudiâ.’ Muéne ua tangela uê, uixi: ‘Kiene kia m’ijidila ku athu oso, kuma muala mu maxibulu ami, se mua di zolo mu dienu.’ (Nzuá 13:34, 35) Mu izuua ietu, o jiselevende ja Jihova ene mu londekesa o henda iâ mudiâ, né muene kioso o ifuxi i luua ita. Mu kifika, mu ita ia kaiadi ia bhiti ku mundu, 55 a mazunda a athu afú. Maji mu ita íii, o mundu ua Jihova ki ua jibha muthu. (Tanga Mikeia 4:1, 3.) Mu kiki, ene a zele, mukonda kala ni kikuma kia “manhinga” a athu.Ikalakalu 20:26.

4. Mukonda diahi tu diuana mu kumona o mundu ua Jihova ku dibandekesa?

4 O mundu ua Nzambi ua múia ni ku dibandekesa, sumbala uala ni nguma ia dikota, Satanaji. Satanaji, muene o “nzambi iaiibha ia mundu iú.” (2 Kolindo 4:4) Satanaji muene u langa o mitelembe ni jinguvulu ja mundu iú. Mu kiki, bhu kaxi ka jinguvulu ni mitelembe, muéne u bhanga ioso phala kufidisa o kikalakalu kia kuboka. Maji muéne ka tena kufidisa o kikalakalu kiki. Satanaji uejiia kuila, o thembu iê ia butu. Mu kiki, muéne u bhanga ioso phala ku tu fidisa kubheza Jihova.Dijingunuinu 12:12.

O KUILA UA-NDA KOLOKOTA MU UFIIELE UÉ, NÉ MUENE SE AKUENU A TA ITUXI?

5. Mukonda diahi saí ithangana, nange akuetu a tu luualesa? (Tala o foto ia dianga.)

5 O jiselevende ja Nzambi a di longa kuila, a tokala kuzola Nzambi ni akuá. Jezú uambe: “Zola Ngana, Nzambi iê, ni muxima ué uoso, ni muenhu ué uoso, ni kilunji kié kioso. Kiene kijila kia dianga kia dikota. Kia kaiadi kia difuê ngó ni kia dianga, kiki: Zola mukuenu kala ki ua di zola eie-muène.” (Matesu 22:35-39) Maji o Bibidia i zuela kuila, o athu oso a lundula o kituxi kia Adá. (Tanga Loma 5:12, 19.) Mu kiki, saí ithangana, nange bhu kala muthu u zuela mba u bhanga kima ki tu luualesa. Se kiki ki bhita n’etu, ihi i tua tokala o kubhanga? O kuila tua-nda kolokota mu kuzola Jihova? O kuila tua-nda londekesa o ufiiele uetu kua muéne ni mundu uê? O Bibidia i zuela ia lungu ni jiselevende ja Nzambi, a bhangele mba a zuelele ima ia bhangesa akuá kuluuala. Tu mone se ihi i tu tena kudilonga mu phangu iâ.

Se ua tungile mu Izalaiele mu thembu ia Eli ni an’ê, ihi i ueji bhanga? (Tala o kaxi 6)

6. Kiebhi Eli kia kambe kubazela an’ê?

6 Mu kifika, Eli uexile mukunji ua dikota ua Izalaiele, maji o kiiadi kia an’ê akexile mu xibhaka o itumu ia Jihova. O Bibidia i zuela: “An’a Eli-phe, a mala, anga a sekala kiavulu kuma a kexile an’a kadiaphemba; a lembua kuijiia ngó Jihova.” (1 Samuuele 2:12) Eli uejidile kuila, o an’ê akexile mu bhanga ima iaiibha. Maji né kiki, muéne ka bazela mu ukexilu ua tokala. Mu kubhita thembu, Jihova ua kaxtikala Eli ni an’ê. Mu kusuka-ku, muéne kehela o mbutu ia Eli kusidivila kala akunji. (1 Samuuele 3:10-14) Se ua tungile mu thembu ia Eli, anga u mona kuila muéne uehela o an’ê kubhanga o ima iaiibha, o kuila ueji bhuila mu kubheza Nzambi? O kuila ueji kuehela o maka enhá kuzozesa o kixikanu kié kua Jihova, ni kuxisa o ubhezelu ua kidi?

7. Kituxi kiahi kia tele Davidi, ni ihi ia bhange Nzambi?

7 Davidi ua kexile ni ídifua iambote. Mukonda dia kiki, Jihova ua mu zolele  kiavulu. (1 Samuuele 13:13, 14; Ikalakalu 13:22) Maji Davidi, ua bhangele ué ima iaiibha. Kioso Udiia kiexile mu ita, Davidi ua zeka ni muhatu’ê Bate-seba, anga u mu imitisa. Davidi ka mesenene kuila, o athu ejiia o kima kia bhangele. Mu kiki, ua tumu kuixana Udiia, anga u fikisa ku mu bhangesa kuia mu zeka ku bhata diê. Davidi ua mesenene kuila, Udiia u zeka ni Bate-seba, o athu-phe na banze kuila, Udiia muene uevu o mona. Maji Udiia ka xikina kuia ku bhata diê. Mu kiki, Davidi ua sokejeka o ima, phala kubhangesa Udiia kufua mu ita. Mukonda dia ituxi ia dikota ia tele, Davidi ni muiji uê a tale hadi iavulu. (2 Samuuele 12:9-12) Maji né kiki, Jihova ua londekesa o henda mu kuloloka Davidi. Muéne uejidile kuila, Davidi ua mesenene kubhanga o kima kia tokala. (1 Jisobha 9:4) Se ua tungile mu thembu’oió , kiebhi ki ueji divua mukonda dia ima ia bhangele Davidi? O kuila kueji sidivila dingi Jihova?

8. (a) Ihi ia bhange Phetele ilondekesa kuila, muéne ka kumbidila o izuelu iê? (b) Mukonda diahi Jihova uehela Phetele kusuluka ku mu sidivila, sumbala Phetele ua luezele?

8 O phangu ia mukuá ia Bibidia ia lungu ni poxolo Phetele. Jezú ua mu solele phala kukala poxolo. Maji né kiki, saí ithangana, Phetele ua bhange ima iaiibha. Mu kifika, Phetele ua zuelele kuila, né muene se akuá a dituna Jezú, muéne keji mu xisa. (Marku 14:27-31, 50) Maji kioso kia kase Jezú, ki kale Phetele mba o jipoxolo jamukuá, ene oso a mu xisa. Mu kusuluka, Phetele ua ditunu Jezú mu veji jitatu. (Marku 14:53, 54, 66-72) Maji Phetele ua divu kiaiibha mukonda dia kima kia bhangele.  Mukonda dia kiki, Jihova ua mu loloka, iú ua muehela ku mu sidivila. Se uexile u dixibulu mu kithangana kieniókio, anga u mona o ima ia bhangele Phetele, o kuila ueji kolokota mu kudielela kua Jihova?

Tu tena kudielela ni muxima uoso kuila, Jihova ua-nda bhanga o ima ia tokala mu ithangana ioso

9. Mukonda diahi u xikina kuila, Nzambi u bhanga o ima ia tokala mu ithangana ioso?

9 O jiphangu jiji, ji tu londekesa kuila, saí jiselevende ja Jihova, a bheka luualesa akuá, mukonda dia ima iaiibha ia bhangele. Se o ima íii i bhita lelu, ihi i ua-nda bhanga? O kuila kua-ndaia dingi mu iônge? O kuila ua-nda xisa Jihova ni mundu uê? Inga ua-nda lembalala kuila, Jihova mukuâ henda, ni kuila, nange muéne ua mu bhana thembu phala o muthu kudiela o kituxi kiê? Maji nange bhu kala kithangana, o muthu ua te o kituxi, ka diela o kituxi kiê. O kuila ua-nda dielela kuila, Jihova u mona o ima ioso, ni kuila, muéne ua-nda batula o maka mu kithangana kia tokala? Se ku bhinga, muéne u katula o muthu mu kilunga. O kuila u xikina kuila, Jihova u bhanga o ima ia tokala mu ithangana ioso?

KOLOKOTA MU UFIIELE UÉ

10. Sumbala Juda dia Kadiota ni Phetele ka londekesa o ufiiele, ihi ia bhange Jezú?

10 O Bibidia i tu tangela o misoso ia athu a kolokota mu ufiiele uâ kua Jihova, sumbala o athu a kondolokele akexile mu bhanga ima iaiibha. O phangu ia dikota, Jezú. Muéne ua bhiti o usuku uoso mu kusamba, phala kubhinga kikuatekesu kua Tat’ê. Mu kusuluka, ua solo o 12 kia jipoxolo. Maji umoxi mudiâ, Juda dia Kadiota, ua mu sumbisa. Poxolo Phetele ua ditunine ué Jezú, mu kuzuela kuila, ka muijidile. (Luka 6:12-16; 22:2-6, 31, 32) Kioso kia kambele ku mu londekesa o ufiiele, Jezú ka tatela Jihova, mba o maxibulu a mukuá. Mu veji dia kiki, Jezú ua kolokota mu kuzukama kua Tat’ê, ni ku mu sidivila ni ufiiele uoso. Mukonda dia kiki, Jihova ua mu besoala mu ku mu fukununa. Mu kubhita thembu, ua mu bhange Sobha ia Utuminu uê ku diulu.Matesu 28:7, 18-20.

11. Ihi ia kanena o Bibidia ia lungu ni jiselevende ja Jihova mu izuua íii isukidila-ku?

11 O phangu ia Jezú, i tu kuatekesa kulondekesa o ufiiele uetu kua Jihova ni mundu uê. Kuene ima iavulu i tu bhangesa kubhanga kiki. Tu tena kumona kuila, Jihova ua mu kuendesa o mundu uê mu izuua íii isukidila-ku. Muéne ua mu a kuatekesa kuboka o kidi kia Bibidia ku mundu uoso. Ene ngó a mu bhanga o kikalakalu kiki. Ene a zediua, a dibundu kumoxi mukonda dia ima iene mua longa Jihova. Jihova ua kanena o kidi kiki, kioso kiambe: “Talesa, jiselevende jami ja kà kala mu kuimba mukonda o mixima iâ ia sanguluka.”Izaia 65:14.

Ki tueji londekesa unjimu, se tu xisa Jihova ni mundu uê, mukonda dia kima kia bhange mba kia zuela muthu mu kilunga

12. Kiebhi ki tua tokala kumona o itondalu ia akuetu?

12 Mu kidi, etu tua zediua, mukonda Jihova u tuendesa. U tu kuatekesa ué kubhanga ima iavulu iambote. Maji o athu ku  mundu ua Satanaji, kala ni kisangusangu kia kidi, ene kála ni kidielelu. Ki tueji londekesa unjimu, se tu xisa Jihova ni mundu uê, mukonda dia kima kia bhange mba kia zuela muthu mu kilunga! Mu veji dia kiki, tua tokala kulondekesa o ufiiele uetu kua Jihova, ni kukaiela o itendelesu iê. Tua tokala ué ku di longa kiebhi ki tua tokala kumona ni kudibhana ni itondalu ia akuetu.

IHI I UA TOKALA O KUBHANGA?

13, 14. (a) Mukonda diahi tua tokala ku di londekesa o henda? (b) Kikanenu kiebhi ki tua tokala kulembalala?

13 Ihi i ua tokala kubhanga se phangi’é u zuela, mba u bhanga kima ki ku luualesa? O Bibidia i tendelesa: “Kana kulenguluka ku kala ni njinda mu muenhu ué, kuma njinda ia tunga bhu homba ia maióua.” (Ndongixi 7:9) Kuma etu enioso tu akuâ ituxi, tu lueza. Mu kiki, ki tu tena kukingila kuila, o jiphange jetu a bhanga o ima ia tokala mu ithangana ioso. Ki kima kiambote kuxinganeka mu iluezu iâ mu ithangana ioso. Se tu bhanga kiki, ki tua-nda sanguluka mu sidivisu ia Jihova. O kixikanu kietu ki tena kuzoza. Tu tena ué kuxisa o kilunga kia Jihova. Se kiki ki bhita, ki tua-nda sidivila dingi Jihova, mba kukala ni kidielelu kia kutunga ku mundu uobhe.

14 Ihi i tena ku kuatekesa kusanguluka mu sidivisu ia Jihova, né muene se akuenu a bhanga kima ki ku luualesa? Sota kulembalala o kikanenu kiê, kiambe: “Talesa, kuma eme ngi iudika kiá maúlu mobhe ni oxi iobhe; o ima ia bhiti kiá ki bhu kala dingi ku i banza, né ngó kuiza mu kilunji, lémbua.” (Izaia 65:17; 2 Phetele 3:13) Jihova ua-nda kubhana o mabesá iá, se u kolokota mu ufiiele ué kua muéne.

15. Kala kia zuela Jezú, ihi i tua tokala kubhanga se akuetu a tu luualesa?

15 Mu kidi, ki tuala luua ku mundu uobhe. Mu kiki, se muthu u bhanga kima ki tu luualesa, tua tokala kuxinganeka mu kima ki kingila Jihova kokuetu. Mu kifika, Jezú uambe: “Enu o athu se mu a loloka o ikuma iâ ia mi bhanga, Tat’enu ia diulu u mi loloka uenu. Se mu kamba-phe kuloloka athu ikuma iâ, ni Tat’enu uene ku diulu ka mi loloka ue ikuma ienu.” Kioso Phetele kiebhudisa Jezú se tua tokala kuloloka akuetu ‘sambuadi’ dia jiveji, Jezú ua tambuijila: ‘Ki ngi kuambela katé sambuadi dia jiveji, maji katé makuinhi a sambuadi ni sambuadi a jiveji.’ Jezú ua tu longo kuila, tua tokala kukala polondo phala kuloloka akuetu mu ithangana ioso.Matesu 6:14, 15; 18:21, 22.

16. Phangu iebhi ia xisa Zuze?

16 O phangu ia Zuze i tu longa se ihi i tua tokala kubhanga se akuetu a bhanga ima i tu luualesa. Jakobo ni Lakele, a vualele  ngó Zuze ni ndenge’iê. Jakobo ua vualele dingi dikuinhi dia ana ni ahatu engi, maji ua betele kuzola Zuze. Kiki, kia bhangesa o ana a mukuá kukala ni difuba dia Zuze. Kuma a mu zembele kiavulu, a mu sumbisa ku ubhika, anga a muambata ku Ijitu. Mu kubhita mivu iavulu, o sobha ia Ijitu ua tula Zuze ku ungana, mukonda ua diuanene ni kikalakalu kiambote kia kexile mu bhanga Zuze. Zuze uexile muthu uonene mu ixi ia Ijitu. Mu kubhita thembu, o jiphange ja Zuze ai ku Ijitu mu sumba kudia, mukonda kuexile nzala iavulu. Kioso kia sange Zuze, ene kejiidile kuila, muene Zuze, maji muéne ka a jimbile. Sumbala a mu bhangele kiaiibha, muéne ka a bhana kaxtiku. Mu veji dia kiki, muéne ua soto kuijiia se ene a lunguluile kiá o ukexilu uâ uaiibha. Kioso Zuze kia mono kuila, ene a lunguluile o ukexilu uâ, muéne ua ambela kuila, uexile phang’iâ. Mu kubhita kithangana, muéne ua tululukisa mu ku a tangela: ‘Ki mu kale ni uôma; eme ngi mi tambula konda ni enu ni an’enu. Kienhiki Zuze kia tululukisa o jiphange jê, iú ua bhuisa o hele ku muxima.’Dimatekenu 50:21.

17. Ihi i ua tokala kubhanga, se akuenu a lueza?

17 Kuma athu oso akuâ ituxi, lembalala kuila, u tena ué kubhanga kima ki luualesa akuenu. Mu kiki, se u mona kuila, ua bhange kima kia luualesa mukuenu, kaiela o kitendelesu kia Bibidia. Mu bhinge muloloki, u kale dingi ku paze ni muéne. (Tanga Matesu 5:23, 24.) Kioso kia tu loloka, tu sanguluka. Mu kiki, tua tokala ué kuloloka akuetu. O divulu dia Kolose 3:13, di zuela: “Mu di lendukile ni kudikuatekesa mudienu, mu di loloka, se bhuala muthu ua di kuata ni mukuá. Kala muthu a loloke mukuá kala kioso Nzambi kia mi loloka enu, kiene ue ki mu bhanga jinga.” Se tua zolo muene o jiphange jetu, ki tua-nda kala ni njinda mukonda dia kima kia iibha kia tu bhangele m’ukulu. (1 Kolindo 13:5) Se tu loloka akuetu, Jihova ua-nda tu loloka ué. Mu kiki, se akuetu a lueza, tua tokala ué ku a londekesa o henda, kála ki bhanga Tat’etu, Jihova.Tanga Jisálamu 103:12-14.