“Nzambi henda.”1 NZUÁ 4:8, 16.

MIMBU: 18, 51

1. Kiebhi o kídifua kia beta kota kia Nzambi? Kiebhi ki u divua mu kuijiia o kidi kiki?

O BIBIDIA i tu tangela kuila, “Nzambi henda.” (1 Nzuá 4:8) Maji ihi ilombolola o izuelu íii? Sumbala o henda ia tokala ué ku ídifua iambote ia Jihova, maji o henda iene o kídifua kia beta kota kia Jihova. Mu veji dia kukala ngó ni henda, muéne henda. Muéne u bhanga o ima ioso mukonda dia henda. Tu sakidila kiavulu Jihova, mukonda o henda ia mu bhangesa kubhanga o ngongo ni ima ioso iala-mu!

2. Kidielelu kiahi ki tu bhana o henda ia Nzambi? (Tala o foto ia dianga.)

2 Jihova ua zolo o ibhangelu iê. O henda iê i tu bhangesa ku dielela kuila, o vondadi iê ia lungu ni athu, ia-nda dikumbidila. Kioso kia-nda kumbidila o vondadi iê, o athu a belesela a-nda zediua. Mu kifika, mu henda iê, Jihova “ua xindi kiá kizuua kia kufundisa mundu uoso mu kidi, kua muthu uê ua mu tungula,” Jezú Kristu. (Ikalakalu 17:31) Tuejiia ni kidi kioso kuila, o kikanenu kia lungu ni kufundisa, kia-nda dikumbidila  muene. O kufundisa kuku, kua-nda bheka o muenhu ua kalela-ku phala o athu a belesela Nzambi.

IHI IENE MU LONDEKESA O IZULUKUTU KU MUNDU

3. Ihi ieji bhita n’etu se Nzambi ka tu zolele?

3 Ihi ieji bhita ni athu, se o henda ki iexile o kídifua kia beta-o-kota kia Nzambi? O athu eji suluka ni ku di tumina mudiâ. Satanaji, o nzambi ia iibha ia kambe o henda, ueji kolokota ué mu ku a nganala. (2 Kolindo 4:4; 1 Nzuá 5:19; tanga Dijingunuinu 12:9, 12.) Se Jihova ka tu zolele, ki tueji zediua ku muenhu!

4. Mukonda diahi Jihova uehela o athu kubhukumukina o utuminu uê?

4 Kioso kia bhukumukina o Utuminu ua Nzambi, Satanaji ua bhangesa ué o jitata jetu ja dianga, kubhukumukina o utuminu ua Nzambi. Muéne ua zuela kuila, Nzambi kejiia Kutumina. Muéne uambe kuila, o ukexilu uê ua kutumina ua beta kota, o ua Nzambi ndenge. (Dimatekenu 3:1-5) Jihova uehela Satanaji kutumina, phala kumona se ueji tumina kiambote. Maji o ima iene mu bhita ku mundu ilondekesa kuila, ki kale o athu mba Satanaji, ka tena ku tumina kiambote.

Jihova ka bhange o athu ni kutena kua ku di tumina mudiâ

5. O izulukutu iene mu bhita ku mundu ilondekesa ihi?

5 Lelu, o kuiibha kua múia ni ku dibandekesa ku mundu. Ku 100 ia mivu ia bhiti, 100 a mazunda a athu afu mu ita. Ia lungu ni ‘izuua ia sukidila-ku,’ o Bibidia i zuela: ‘Athu aiibha-phe, akua makutu, jindunge jâ jiia ni ku di bandekesa.’ (2 Timote 3:1, 13) O Bibidia i zuela ué: “Jihova, tata, eme ngejiia kuila o njila ienda o muthu ki iene bhu lukuaku lua muthu-muène, mba muthu kienda, [ki] muéne u tongesa o makanda mê-muène.” (Jelemiia 10:23) O izulukutu iene mu bhita ilondekesa kuila, o izuelu íii, kidi. Jihova ka bhange o athu ni kutena kua ku di tumina mudiâ.

6. Mukonda diahi Nzambi uehela o kuiibha?

6 Mu kuehela o ima ia iibha kubhita mu kithangana kioso kiki, Jihova ua londekesa ué kuila, muene ngó uala ni kutena kua kutumina ni kuiuka kuoso. Ku hádia, Nzambi ua-nda zubha o kuiibha kuoso. Mu kithangana kieniókio, Nzambi ua-nda buika o muthu uoso uoso u bhukumukina o ungana ué. Nange o izulukutu iene mu bhita lelu, ia-nda mu kuatekesa kulondekesa kuila, o athu a bhukumuka a tokala ku a buika. Ki kua-nda kala dingi kuiibha.

KIEBHI NZAMBI KIENE MU LONDEKESA O HENDA IÊ?

7, 8. Kiebhi Jihova kia tu londekesa o henda iê?

7 Jihova uene mu londekesa o henda iê mu maukexilu avulu. Xinganeka o unéne ni kuiuka kua ngongo. Iene iala ni ibuka iavulu ia jithéthembua. Kala kibuka kiala ni jithéthembua javulu. Mu kibuka kietu kia jithéthembua, tu sanga-mu ué o muanha. Se ki ku kexile muanha, se-ku kima kieji kala ni muenhu mu ixi. O ibhangelu ioso íii ilondekesa kuila, Jihova muene o Mubhangi uetu. Iene ilondekesa ué o ídifua ia Jihova, kala o kutena, o unjimu ni henda. Sé phata,  o ídifua ia Nzambi “ia kambe kumoneka ku mesu, kutale o nguzu iê inanga, uixi o unzambi uê, ki i jimbi, mukonda ia di monekena. Kuma athu ia a jimbulukila mu imbamba ia bhanga Nzambi.”Loma 1:20.

Ioso ia bhange Jihova mu ixi, i kuatekesa o iama ni athu

8 Jihova ua bhange o ixi mu ukexilu u kuatekesa o ima kukala ku muenhu. Ioso ia bhange Jihova mu ixi, i kuatekesa o iama ni athu. Nzambi ua bhange o jaludim ia iuka phala o athu ku tunga-mu. Muéne ua a bhange ni ilunji ni mikutu ia iuka, phala kukala ku muenhu katé ku hádia ni hádia. (Tanga Dijingunuinu 4:11.) Muéne u bhana ué “kúdia ku jixitu joso; kuma kulenduka kuê ki kuene kúbhua.”—Jisálamu 136:25.

9. Sumbala Jihova Nzambi ia henda, ihi ia zembe?

9 Sumbala Jihova Nzambi mukua henda, muéne ua zembe o ima ia iibha. Mu kifika, ia lungu ni Jihova, o divulu dia Jisálamu 5:4-6 di zuela: “Eie ku Nzambi ia kuila u xikina kuuabhela ituxi; . . . eie ua di zemba ni ene oso [a ta o] ituxi.” Muéne ua zembe ué o ‘kijibhangânga ni mukua kunganala akuâ.’

O DISUKILU DIA HADI DIA ZUKAMA

10, 11. (a) Ihi ia-nda bhita ni athu a iibha? (b) Kiebhi Jihova kia-nda besoala o athu a belesela?

10 Mu kithangana kia tokala, Jihova ua-nda zubha o kuiibha kuoso mu ngongo, mukonda muéne Nzambi ia henda, ni kuila, muéne ua zembe o kuiibha. O Mak’â Nzambi a kanena: “Oso a bhanga ima ia iibha, a xikamena ku a batula bhoxi; oso-phe a kinga Jihova, ene a lundula ixi. Bhu bhita ngó kathangana, mukua phulu-ó ubhua athu ku mesu.” O jinguma ja Jihova, ‘a-nda jimuka kala dixi.’—Jisálamu 37:9, 10, 20.

11 O Mak’â Nzambi a kanena ué: “Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.” (Jisálamu 37:29) O athu a fiiele, a-nda kala ni “ngalasa ni kutululuka kuavulu.” (Jisálamu 37:11) Mukonda diahi? Mukonda, ithangana ioso, Nzambi ietu ia henda, u bhanga o kima kia beta kota phala o jiselevende jê ja fiiele. O Bibidia i tu tangela: “Muène u a kondona o masoxi moso ku mesu mâ! Ki ku kala dingi kùfua, nè ngó mukôndo, mba kudila, mba kukata. Mukonda ima ia diangèle-ku, ia bhiti.” (Dijingunuinu 21:4) Didi dibesá dia dikota phala o athu oso a belesela ni kusakidila Nzambi, mukonda dia henda iê!

12. Nanhi “o muthu u bhanga ima ia kidi”?

12 O Bibidia i tu tangela: “Batekela o muthu u bhanga ima ia kidi, u tale kiambote uemana nzanza; kuma ku pholo kuia muthu ió, kuà kala kutululuka. Iá-phe a xibhaka, kibuika kiâ kimoxi kia kà fuila; ku pholo ku aia ió abhumu a kà jikinina.” (Jisálamu 37:37, 38) “O muthu u bhanga ima ia kidi,” ió u di longa o kidi kia lungu ni Jihova ni Mon’ê, anga u bhanga o vondadi ia Nzambi. (Tanga Nzuá 17:3.) Muéne u xikina ni kidi kioso kuila, “o mundu-phe u buila, ni ima iê ioso iene mu kuinda athu. Maji uoso-phe u bhanga o vondadi ia Nzambi, ió muène o muthu u nangenena.” (1 Nzuá 2:17) Kuma o dizubhilu dia mundu dia zukama,  tua tokala ‘kukingila kua Jihova, ni kukolokota mu njila iê.’—Jisálamu 37:34.

O HENDA IA DIKOTA IA LONDEKESA NZAMBI

13. Kiebhi o kima kia dikota kia bhange Nzambi, phala kulondekesa o henda iê kokuetu?

13 Né muene tu akua ituxi, tu tena kubelesela Nzambi. Tu tena ué kukala ni ukamba uambote ni Jihova mukonda dia sata ia kukula kua Jezú, o kima kia dikota kia bhange Nzambi phala kulondekesa o henda iê kokuetu. Bhu kaxi ka sata ia kukula, Jihova ua bhulula o athu a belesela, ku kituxi ni kalunga. (Tanga Loma 5:12; 6:23.) Kioso kiexile ku diulu, Jezú ua londekesa o ufiiele uê kua Nzambi mu mivu iavulu. Mu kiki, Jihova uejidile ni kidi kioso kuila, o Mon’ê ueji londekesa ué o ufiiele uê mu ixi. Kuma Jihova Tata ia henda, muéne ua luualele kiavulu, kioso kia mono o ima ia iibha ia kexile mu bhanga o athu kua Mon’ê. Maji né kiki, Jezú ua zokela o ungana ua Nzambi ni ufiiele uoso. Mu kiki, muéne ua londekesa kuila, o muthu ua iuka u tena kukolokota mu ufiiele uê kua Nzambi, né muene se u dibhana ni ibhidi ia dikota.

Mu henda iê, Nzambi ua tumikisa Mon’ê (Tala o kaxi 13)

14, 15. Kiebhi o kufua kua Jezú kua kuatekesa o athu?

14 Sumbala Jezú ua dibhanene ni ibhidi ia dikota, maji muéne ua kolokota mu ufiiele uê, ni kuzokela o ungana ua Jihova. Tua tokala kusakidila o sata ia kukula kua Jezú, mukonda i kuatekesa o athu kutunga ku mundu uobhe ua Nzambi, katé ku hádia ni hádia! O poxolo Phaulu ua jimbulula o henda ia londekesa Jihova ni Jezú, bhu kaxi ka sata ia kukula. Muéne uambe: “Kuma ki tua kexile hanji tua lémbua kubhanga kima kioso-kioso, Kristu kia bhixila bhu thembu iê ia solo Nzambi, ua fuila athu abhumu bhu kididi. Né muthu uaiuka, mukuâ ka moneka kindala u xikina ku mu fuila bhu kididi. Maji se kia bhonzo sai-ku ni iú u xikina kufuila o muthu uambote bhu kididi. Maji o Nzambi-phe ua tu idikiza o henda ia muène ia tu kuatela; mukonda kioso ki tua kexile hanji tu akua ituxi, kiene kia tu fuila Kristu bhu kididi.” (Loma 5:6-8) O poxolo Nzuá ua soneka: “Muene mua tu tukuluila Nzambi o henda iê ia tu kuatela, Nzambi kia katula Mon’ê umoxi-èlele, anga u mu tumikisa mu  ngongo, phala etu ni tu mone muenhu kua muène. Muenhumu mua kala o henda, mu kuila: Etu ki etu tua zola Nzambi, maji muène-ku ua tu zola, iú ua tumikisa Mon’ê mu kukala kiluuluilu kia ku tu lolokesa o ituxi ietu.”—1 Nzuá 4:9, 10.

15 Jezú uambe: “Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.” (Nzuá 3:16) Sumbala kia mu bhekela ndolo iavulu, maji Jihova ua bhana Mon’ê kala sata. O kima kia bhange kilondekesa kuila, muéne ua zolo kiavulu o athu. O henda íii, ia-nda nangenena. Phaulu ua soneka: “Eme nga tetuluka kuila kana-ku kima ki tu batula ku henda ia Nzambi. Né kalunga, né muenhu; né ji-anju; né atumini mba makota ma ji-anju; né ima ia kindala, né ima ia hadia; né kusuina, né o mundu uala ku thandu dietu, né ima iala bhoxi-elele. Né kima dingi kioso-kioso kia di bhange, kana-ku kima ki tena ku tu batukisa ku henda ia Nzambi, iene mua Kristu Jezú.”—Loma 8:38, 39.

O UNGUVULU UA NZAMBI UA MU TUMINA KIÁ

16. O Utuminu ua Mexiia ihi? Nanhi a mu solo kua Jihova phala kukala ku pholo dia Utuminu iú?

16 O Utuminu ua Mexiia mba o utuminu ua Nzambi, ulondekesa ué o henda ia Jihova ku athu. Mukonda diahi? Mukonda Jihova ua solo kiá Jezú Kristu phala Kutumina. Muéne ua mu solo, mukonda ua zolo o athu, ni kuila, uala ni uhete ua kutumina. (Jisabhu 8:31) Nzambi ua solo 144.000 a athu, phala kutumina kumoxi ni Kristu ku diulu. (Dijingunuinu 14:1) Kioso kiexile mu ixi, Jezú ua kexile mu longa dingi ia lungu ni Utuminu. Muéne ua longo o maxibulu mê kusamba kiki: “Tata ietu uene mu diulu, dijina dié a dixile. Utuminu ué uize. Vondadi ié a i bhange bhoxi, kala kiala ku i bhanga ku diulu.” (Matesu 6:9, 10) Tua mu kingila ni hanji ioso, o kithangana kia-nda dikumbidila o misambu íii. Mu kithangana kiki, o Utuminu ua Nzambi ua-nda bheka mabesá avulu phala o athu!

17. Sokesa o utuminu ua Jezú ni utuminu ua athu.

17 O utuminu ua henda ua Jezú, ki u sokela ni utuminu ua athu. O utuminu ua athu, ua bhangesa mazunda ni mazunda a athu kúfua mukonda dia ita. Maji o Sobha ietu, Jezú, ua tu zolo ni kidi kioso, mu kiki, muéne ulondekesa o ídifua iambote ia Jihova, kala o henda iê. (Dijingunuinu 7:10, 16, 17) Jezú uambe: ‘Zenu kokuami enu oso mua bhuila, enu mua tate ni imbamba ia mi nemena, eme nda ngi mi nhohese. Di tuikienu jungu iami, mu di longe ko kuami; mbata eme nga belesela, nga batama muxima, nda mu mone kutululuka kua mienhu ienu. Mbata o ima iami ioso i ngi m’inda na-iu, ki i bhonzo; o kimbamba kiami ki ngi mi tuika, kia bhebhuluka.’ (Matesu 11:28-30) Kiki kikanenu kia henda!

18. (a) Ihi iene mu bhita tundé ku muvu ua 1914? (b) Ihi i tua-nda di longa mu milongi ia-nda kaiela?

18 O Bibidia ilondekesa kuila, o Utuminu ua Nzambi ua mateka kutumina ku diulu ku muvu ua 1914. Tundé o kithangana kieniókio, ene mu bhongolola o athu a sukidila-ku, a-nda tumina kumoxi ni Jezú ku diulu. Ene mu bhongolola ué o “mundu uavulu,” mba o athu a-nda bhuluka ku dizubhilu dia mundu iú, phala kutunga ku mundu uobhe. (Dijingunuinu 7:9, 13, 14) O kuila lelu o kibuka kia mundu uavulu, kibuka kionene? Ihi i kingila Nzambi ku athu iá? O milongi ia kaiela ia-nda tambuijila o ibhuidisu íii.