“O muthu ua tobho, ió ka uabhela kutanga o jinjimbu mu jurnale; maji ua beta o kutobha, ió u xikina mu milongi ioso ia tanga mu jurnale.” —August von Schlözer, mukua musoso ni musoneki, ua tokala ku ixi ia Alemanha (1735-1809).

KU 200 ja mivu ku dima, o athu ka kexile mu xikina mu milongi ioso ia ji jurnale. Lelu, etu ki tu tokala kuxikina mu milongi ioso i tu tanga, mba i tuívua mu internete. Kuene milongi iavulu mu internete, mu kiki, o mitelembe ia ubhe ia katunda i tu kuatekesa kusanga o milongi ioso ni lusolo. Saí milongi iavulu iambote, ia kidi, ki i bhekela maka oso-oso, maji kuene ué milongi iavulu ia makutu, ki iala ni valolo, i tena ku tu bhangesa ku di ta mu iluezu. Mukonda dia kiki, tua tokala kusola kiambote o milongi i tua-nda tanga. Saí athu, kioso kia mateka kukalakala ni internete, nange a banza kuila, o milongi ioso ia kidi mukonda iala mu internete, mba mukonda a i tumikisa ku makamba mâ. Ene nange a xikina mu misoso ioso-ioso, né muéne se milongi i bhekela jiphata. Maji o Bibidia i tu dimuna: “Kilalu maka oso a zuela kuala athu, muene u a xikina; maji ió ua sunguluka-phe, u zonga kiambote kioso kienda.”Jisabhu 14:15.

Kioso ki tu xikina mu milongi ioso i tuívua, tu londekesa o kutobha, maji se tu kamba kuxikina mu milongi ioso i tuívua, tu londekesa kuila, tu ji njimu. Se tu londekesa unjimu, tua-nda dilanga kiambote, ni kuxikina ngó mu milongi i tuejiia kiambote kuila ia kidi. Ki tua-nda xikina ku tu nganala bhu kaxi ka milongi ia makutu i tu sanga mu internete, né muene se athu avulu a xikina mu milongi ienioió. Ihi i tena ku kukuatekesa kukala u njimu, mba ku di langa? Kia dianga dibhuidise: ‘O kuila o athu, mba kibuka kia soneka o musoso iú a ejiia kala athu a kidi? Inga, o athu a i soneka ki athu a kidi? O kuila saí kibuka kia mukuá kia internete ki zuela o kidi, kia londekesa kiá kuila o milongi íii ia makutu?’ * (Tala ku luiji.) Mu kusukáku, sola ni “kilunji.” (Jisabhu 7:7) Se o milongi i kubhekela jiphata, nange milongi ia makutu. Se u tanga milongi ia iibha ia lungu ni akuenu, xinganeka se nanhi ueji katula mbote mu ku muanga o njimbu íii, ni mukonda diahi o muthu iú, nange ua mesena ku muanga o njimbu íii.

O KUILA O NJIMBU IOSO I U TAMBULA MU INTERNETE, U I TUMIKISA UÉ KU AKUENU?

Saí athu nange a tumikisa ji njimbu ku makamba mâ sé ku ji tonginina hanji kiambote se ja kidi mba kana, mba sé kubanza mu ima i tena kubhita mu ku  tumikisa o ji njimbu jiji. Nange ene a bhanga kiki phala ku a suua ku athu, mba nange a mesena kukala kupholo mu kutula o njimbu ku akuâ. (2 Samuuele 13:28-33) Maji o njimu, u xinganeka mu maka a tena kubheka o njimbu. Mu kifika, nange o njimbu i tua-nda tumikisa, i tena ku xidisa o dijina dia muthu, mba kisangela.

O muthu u tumikisa o njimbu, nange ka tokuesa kiambote phala kumona se musoso ua kidi mba kana, mukonda phala kubhanga kiki, kubhinga kithangana kiavulu ni nguzu. Muéne u mona kuila, o athu a tambula o njimbu ene a tokala kubhanga kiki. Maji o kithangana kiâ kiala ué ni valolo iavulu. (Efezo 5:15, 16) Mu kiki, mu veji dia kutumikisa milongi kuijiia hanji kiambote se ia kidi, kima kiambote kubanza kiki: “Kuma ngala ni phata, nga tokala ku jima o njimbu íii!”

Dibhuidise: ‘O kuila o njimbu ioso i ngene mu tambula mu internete, ngene mu i tumikisa ué ku akuetu?’ O kuila saí kizuua nga bhingi muloloki ku akuetu mukonda dia ku a tumikisa njimbu iala ni milongi ia makutu? O kuila saí muthu ua ngi kidika kiá ku mu tumikisa ji njimbu?’ Lembalala kuila, se o makamba mê a tena kubokona mu internete, ene a tena ué kusanga milongi ia bhindamena, ki ku bhingi ku a kuatekesa ku sanga o milongi. Ene ka mesena kutambula ji njimbu javulu jala ni misoso, ji vidiu mba jifoto ji bhangesa kuelela. Ki kima kiambote kutumikisa ji njimbu ja lungu ni madiskursu a Bibidia io ngalavale mba io soneke. * (Tala ku luiji.) Ejiia kuila, se muthu u tokuesa ubheka ué o milongi ia Bibidia ni kutanga o jivelusu, ni ku pelepalala o itambuijilu ia kiônge, muéne ua-nda katula dingi mbote. Maji se a mu bhangela-iu kua mukua, ni ku mu tumikisa o milongi bhu kaxi ka njimbu, muéne ka-nda katula mbote iavulu.

O kuila nga tokala kutumikisa o njimbu íii ku muthu uéngie?

Ihi i ua tokala o kubhanga se u sanga milongi ia makutu mu internete, ia lungu ni kilunga kia Jihova? Ditune o milongi ioso íii! Kana kuxikina mu milongi íii ia makutu! Ki kima kiambote ku tangela akuenu o milongi i ua tange mba ku a bhinga kikuatekesu, mukonda se u bhanga kiki, ua mu muanga dingi o milongi ienioió ia makutu. Se ua mono kima mu internete kia mu ku thandanganhesa, bhinga o unjimu kua Jihova, ni kuzuela ni jiphange a kulu mu nzumbi phala ku kuatekesa. (Tiiaku 1:5, 6; Juda 22, 23) Ki tu tokala ku sasumuka mu kumona kuila, saí athu a tu zuela kia iibha. Mu izuua ia Jezú, o athu akexile ué mu  zuela ima ia makutu ia lungu ni muéne, mu kiki, muéne ua dimuna o maxibulu mê kuila, eji ku a zukutisa ni ku a zuela ‘ima iaiibha iavulu ia makutu.’ (Matesu 5:11; 11:19; Nzuá 10:19-21) Se u kala ni kilunji kiambote, ua-nda tena kuijiia se o muthu ua mu zuela makutu, mba ua mesena ku nganala akuâ.”Jisabhu 2:10-16.

XILA AKUENU

Tua tokala ué ku di langa mu ku tumikisa njimbu ia lungu ni phange jetu, mba misoso i tuevu. Saí ithangana ki kima kiambote kutumikisa njimbu mba milongi, né muene se o milongi i tua mesena kutumikisa ia kidi. (Matesu 7:12) Mu kifika, ki tua-nda londekesa henda, se tu tumikisa ji njimbu ji zuela ima ia iibha ia lungu ni akuetu. (2 Tesalonika 3:11; 1 Timote 5:13) Saí milongi nange ikutu, o athu a mukuá ka tokala ku ijiia. O athu nange a mesena kuzuela ngó o maka mu kithangana kiéngi, mba mu ukexilu uéngi. Tua tokala kuxila o ibanzelu iâ, ia lungu ni kithangana kia mesena kuzuela o maka, ni kiebhi kia mesena kuzuela. Mu kidi, se tu dianga kiá kuzuela o maka ku athu oso, tu tena kubheka maka avulu.

Lelu, o ji njimbu a tena ku ji muanga ni lusolo, kikale se ja kidi mba ja makutu, jala ni valolo mba kana, njimbu jambote, mba ja iibha. Né muéne se u tumikisa o njimbu ku muthu umoxi ngó, mu kithangana kiofele, o muthu iú u tena kutumikisa o njimbu íii ku athu avulu, ku mundu uoso. Mu kiki, bhanga ioso phala ki u tumikise ji njimbu ku athu oso u uejiia, ni lusolo. Sumbala o henda i ‘xikana mu ima ioso,’ ki iene mu kala ni phata, maji ki tu tokala kutobha ni kuxikina mu milongi ioso mba misoso i tu mona kuila iambote. (1 Kolindo 13:7) Ki tu tokala kuxikina mu milongi ia makutu ia lungu ni kilunga kia Jihova ni ia lungu ni jiphange jetu, ji tua zolo kiavulu. Lembalala kuila, o athu a zuela o milongi íii ia makutu, ni ió ene mu i muanga, a mu bhanga o vondadi ia Satanaji o Diabhu, o “tata ia makutu oso.” (Nzuá 8:44) Mu kiki, tua tokala kukala tu ji njimu ni kuxinganeka kiambote se ihi i tua tokala o kubhanga ni ji njimbu ja tu tumikisa, ni milongi ioso i tu sanga mba i tuívua mu kizuua ni kizuua. O Bibidia i zuela: “O jisemenhi, hádia a tambula undundu ua kusebuluka; maji o jinjimu-phe, a kà zakela itundu ia kuijiia.”Jisabhu 14:18.

^ kax. 4 Né muene se m’ukulu a zuelele kiá kuila, o musoso ua makutu, nange o musoso mba njimbu i tena kumoneka hanji mu ithangana ni ithangana. Nange o athu a tena kulungulula bhofele o musoso, phala kubhangesa o athu kuxikina kuila, musoso ua kidi.

^ kax. 8 Tala o Nosso Ministério do Reino de abril de 2010, “Perguntas Respondidas.