“Kolokota ni kubhanga ima ienhi’ii, suua ngó iene mu iene, athu oso a ku mone ki uia kiambote ku pholo.”1 TIMOTE 4:15.

MIMBU: 22, 52

1, 2. Ihi i bhangesa o athu ku di tungula ku iama?

O UONGO ua athu ua di tungula. Mu kifika, o athu ala ni uhete ua ku di longa madimi engi. O madimi a tu kuatekesa kutanga, kusoneka, kuzuela ni kutendela o maka oso u tuívua. A tu bhana ué o uhete ua kusamba, ni kuximana Jihova bhu kaxi ka mimbu. O ima ioso íii, i tu bhangesa ku di tungula ku iama. O jingijiie ka tena kutendela kiambote, se kiebhi o uongo uetu u tena kubhanga o ima ioso íii.

2 O uhete uetu ua kuzuela madimi, ujitu ua tu bhana Jihova. (Jisálamu 139:14; Dijingunuinu 4:11) Saí dingi ujitu ua mukuá ua tu bhana muéne, u tu bhangesa ku di tungula ku iama. O athu a a bhange “mu kidifuanganu” kia Nzambi. Etu tuala ni ufolo ua kusola o ima i tua mesena. Mu kiki, tu tena kusola kusidivila ni kuximana Nzambi ni dimi dietu.Dimatekenu 1:27.

3. Ihi ia tu bhana Jihova, i tu bhangesa kukala ni unjimu?

3 Jihova ua tu bhana o Bibidia phala ku tu longa, se kiebhi ki tua tokala ku mu sidivila ni ku mu ximana. Kikale mu  jimbandu mba ia tenena, o Bibidia a i soneka kiá mu 2.800 ja madimi ndenge. Kioso ki tu xinganeka mu milongi ia Bibidia, tu mateka kubanza kala ki banza Nzambi. (Jisálamu 40:5; 92:5; 139:17) O ibanzelu ia Jihova i tu bhangesa kukala tu jinjimu, ia-nda tu kuatekesa ué kutambula o muenhu ua kalelaku.Tanga 2 Timote 3:14-17.

4. O kuxinganeka kulombolola ihi, ni ibhuidisu iebhi i tua-nda tambuijila?

4 O kuxinganeka, kulombolola kukolokota mu kubanza mu kima. (Jisálamu 77:12; Jisabhu 24:1, 2) Etu tu katula mbote iavulu, kioso ki tu xinganeka mu milongi i tu di longa ia lungu ni Jihova ni Jezú. (Nzuá 17:3) Mu milongi íii, tua-nda tambuijila o ibhuidisu íii: Kiebhi ki tu tena o kutanga mu ukexilu u tu kuatekesa kuxinganeka mu milongi? Mu ima iebhi i tua tokala kuxinganeka? Ihi i tena ku tu kuatekesa kukolokota mu kuxinganeka, ni ku katula mbote?

SOTA KUKATULA MBOTE MU MILONGI I U DI LONGA

5, 6. Ihi i tena ku kukuatekesa kulembalala ni kutendela kiambote o milongi i u tanga?

5 O kuila ua mono kiá kuila, saí ima iavulu i u tena o kubhanga sé kuxinganeka? O ima íii ia lungu ni kuenda, kubhuima, ni kuendesa bixi. Mu kidi, saí ithangana, nange eie u tena kutanga sé kuxinganeka. Nange mu kithangana ki ua mu tanga, eie u tena kumateka kubanza ima iéngi. Ihi i u tena o kubhanga phala kiki, ki ki bhite? Kima kiambote ku ta o muxima uê mu milongi i ua mu tanga, ni kuxinganeka mu dilomboluelu dia maka. Kioso ki u zubha ku di longa kaxi, mba mbandu imoxi ia divulu, imana bhofele, ni u xinganeke mu milongi i ua di longo. Banza mu ioso i ua di longo, bhanga nguzu phala ku i tendela kiambote.

O kutanga o Bibidia ni dízui dia suína, kua-nda ku kuatekesa ku ta o muxima ué mu milongi i u tanga ni ku i lembalala kiambote

6 O Jingijiie a mono kuila, o athu a tena dingi kulembalala kiambote kima, se a ki tanga ni dízui dia suína. O Mubhangi uetu, uejiia o kidi kiki, mukonda dia kiki, muéne ua tumina Josuué ku “banza” jinga mu divulu dia Kitumu, mba kutanga ni kufueta. (Tanga Josuué 1:8.) O kutanga o Bibidia ni dízui dia suína, kua-nda ku kuatekesa ku ta o muxima ué mu milongi i u tanga ni ku i lembalala kiambote.

7. Kithangana kiebhi kia tokala phala kuxinganeka mu milongi ia Bibidia? (Tala o foto ia dianga.)

7 Kubhinga kusuína, phala kuxinganeka mu milongi i tu di longa. Mukonda dia kiki, kima kiambote kuxinganeka mu milongi, kioso ki uala ni nguzu mu mukutu, ni kukala bhu kididi kia tululuka, ki muala ima iavulu i tena ku kulandukisa. O mukua jisalamu Davidi, ua kexile mu xinganeka mu hama iê, mu kaxaxi ka usuku, kioso kia tululukile. (Jisálamu 63:6) Sumbala Jezú uexile muthu ua iuka, maji muéne ua kexile mu sota ididi ia tululukile phala kuxinganeka ni kusamba.Luka 6:12.

 O IMA IAMBOTE I TU TENA KUXINGANEKA

8. (a) Mu ima iebhi i tu tena kuxinganeka? (b) Kiebhi ki divua Jihova, kioso ki tu zuela ku akuetu ia lungu ni muéne?

8 Sumbala ua tokala kuxinganeka mu milongi i u di longa mu Bibidia, maji kuene dingi ima i u tena kuxinganeka. Mu kifika, kioso ki u mona o ima ia iuka ia bhange Jihova, dibhuidise: ‘Ihi i ngi tena ku di longa ia lungu ni Jihova?’ O kuxinganeka kiki, ku tena ku ku suínisa kusakidila Jihova bhu kaxi ka musambu. Mu kiki, se u kala ni athu a mukuá, eie ua-nda mesena ku a tangela kiebhi ki u divua. (Jisálamu 104:24; Ikalakalu 14:17) Jihova uivua kiambote anga u sanguluka, kioso ki tu xinganeka, ki tu samba ni kioso ki tu zuela ku akuetu ia lungu ni muéne. O Bibidia i tu tangela: “U ki soneka mu divulu kuma dilembalelu bhu pholo iê, kua iá akua uoma uê; iá ene mu ‘xinganeka’ Dijina diê.”Malakiia 3:16.

O kuila eie uene mu xinganeka mu maukexilu a kukuatekesa o maxibulu mê a Bibidia? (Tala o kaxi 9)

9. (a) Phaulu ua suínisa Timote kuxinganeka mu ihi? (b) Ihi i tu tena kuxinganeka kioso ki tua mu di pelepalala phala o ukunji?

9 Poxolo Phaulu ua tendelesa Timote phala kuxinganeka, kiebhi o athu kia kexile mu mona o ukexilu uê ua kuzuela, o uendelu uê, ni ukexilu ua ku longa. (Tanga 1 Timote 4:12-16.) Eie u tena ué kuxinganeka mu ima íii. Mu kifika, ua tokala kukatula kithangana phala kuxinganeka, kioso ki ua mu pelepalala o milongi ia Bibidia phala kulonga dixibulu. Xinganeka kiambote mu ibhindamu ia dixibulu, ni u sote ibhuidisu mba ifika i tena ku mu kuatekesa kukula mu nzumbi. Se u pelepalala o  milongi ia maxibulu mê mu ukexilu iú, eie ua-nda kolokotesa o kixikanu kiê, ua-nda kala mulongexi uambote ua Bibidia. Se u xinganeka ande dia kuia mu sidivisu ia kuboka, ua-nda katula ué mbote iavulu. (Tanga Ejidala 7:10.) Nange u tena kutanga kibatulu mu divulu dia Ikalakalu, phala ku kuatekesa kuboka ni kusuína kuoso. U tena ué kuxinganeka mu jivelusu ja Bibidia ji ua mesena kutanga ni athu mu ukunji, ni mu madivulu i ua mesena kubhana ku athu. (2 Timote 1:6) Xinganeka mu ibhindamu ia athu a mbambe iê, phala kuzuela o ima ia bhindamena. Se u di pelepalala mu ukexilu iú, ua-nda tena kukalakala kiambote ni Bibidia, mu kubhana umbangi ku athu.1 Kolindo 2:4.

Eha o milongi i u tanga kutula ku muxima uê, ni kusakidila Jihova mukonda dia ima ioso iambote i ua mu di longa

10. Mu ima iebhi iambote mu tu tena kuxinganeka?

10 Ihi i u tena kuxinganeka? Se u soneka milongi mu kithangana kia kiônge kia dikota, mba kioso ki uivua diskursu dia katunda, sota kithangana phala kutanga ni kuxinganeka mu milongi i ua soneka. Kioso ki uia ni kuxinganeka, dibhuidise: ‘Ihi i nga di longo mu Mak’â Nzambi ni mu kilunga kiê?’ Eie u tena ué kuxinganeka mu milongi i u tanga mu madivulu metu kala O Mulangidi ni Despertai! ni mu milongi ia madivulu i u tambula mu kiônge kia dikota. Kioso ki u tanga o divulu anuário, emana bhofele kioso ki u zubha kutanga musoso, xinganeka mu musoso u ua tange, eha o maka kutula ku muxima uê. Kioso ki u tanga o madivulu metu, kima kiambote kuxinda o jipondo ja beta kota, ni kusoneka ku mbandu o jipondo ji ua uabhela. O kubhanga kiki, kua-nda kukuatekesa kioso ki u di pelepalala phala kuvutuka ni kulonga o dixibulu, mba kukunda phange ua bhindamena kikuatekesu, mba kioso ki u di pelepalala phala kubhanga diskursu. O kia beta kota, kioso ki uimana ni u xinganeka mu milongi i ua mu tanga, eie u bhangesa o milongi kutula ku muxima uê, mu kiki, bhu kaxi ka musambu, eie u tena kusakidila Jihova mukonda dia ima ioso iambote i ua mu di longa.

XINGANEKA MU MAK’Â NZAMBI IZUUA IOSO

11. Milongi iebhi ia beta-kota i tua tokala o kuxinganeka, ni kiebhi o kubhanga kiki kua-nda tu kuatekesa? (Tala ku luiji.)

11 Mu kidi, o milongi ia beta-kota i tua tokala o kuxinganeka o milongi ia Bibidia. Maji ihi i ueji bhanga, se a ku fidisile kukala ni Bibidia? * (Tala ku luiji.) Sé-ku muthu u tena ku ku fidisa kuxinganeka mu milongi i ua te ku muxima uê, kala o ibatulu ia Bibidia i ua uabhela, ni mimbu ia Utuminu ua uabhela kiavulu. (Ikalakalu 16:25) O nzumbi ia Nzambi, ia-nda kukuatekesa kulembalala o ima i ua di longele kiá, kiki kia-nda kukuatekesa kukolokota mu ufiiele uê.Nzuá 14:26.

12. Kiebhi ki u tena ku di sokejeka phala kutanga o Bibidia izuua ioso?

 12 Kiebhi ki u tena ku di sokejeka phala kutanga o Bibidia izuua ioso? Saí izuua, nange eie u tena kukaiela o kitangelu kia Bibidia kia semana, mu milongi ia Xikola ia Ukunji ua Nzambi. Mu izuua ia mukuá eie u tena kutanga o madivulu a Matesu, Marku, Luka, ni Nzuá, ni kuxinganeka mu ima ia zuelele ni ia bhangele Jezú. (Loma 10:17; Jihebeleu 12:2; 1 Phetele 2:21) Tuala ué ni divulu di jimbulula kiambote o izulukutu ioso ia bhitile ni Jezú, tundé mu uvualukilu uê katé ku ufuilu uê. O divulu didi, di tena ku kukuatekesa kukatula mbote iavulu kioso ki u tanga o madivulu a Bibidia a zuela ia lungu ni Jezú.Nzuá 14:6.

MUKONDA DIAHI KIMA KIAMBOTE KUXINGANEKA?

13, 14. Mukonda diahi kima kiambote kuxinganeka mu milongi ia lungu ni Jihova ni Jezú, kiki kia-nda tu suínisa kubhanga ihi?

13 O kuxinganeka mu milongi ia lungu ni Jihova ni Jezú, kutena kukuatekesa o muthu kukula mu nzumbi, ni kukala ni kixikanu kia kolo. (Jihebeleu 5:14; 6:1) Se muthu ka xinganeka kiavulu mu milongi ia lungu ni Nzambi, o ukamba uê ni Jihova ua-nda zoza, mu kiki, muéne u tena kuxibhaka Nzambi. (Jihebeleu 2:1; 3:12) Jezú ua tu dimuna kuila, se tu dituna kuívua o Mak’â Nzambi, “ni muxima ua kidi, ua uabha,” ki tua-nda tena ku “ma lunda” ku muxima. Mu kiki, o ‘luímbi lua jimbongo, ni mísendu ia muenhu iú,’ ia-nda tu diangula.Luka 8:14, 15.

14 Tua tokala kukolokota mu kuxinganeka mu milongi ia Bibidia phala kuijiia kiambote Jihova. O kubhanga kiki, kua-nda tu suínisa ku kaiela kiambote o idifuá iê. (2 Kolindo 3:18) Tu tena ku suluka ni ku di longa dingi ia lungu ni Tata ietu ia diulu, ni kukaiela o phangu iê katé ku hádia ni hádia. Iú uene o ujitu ua beta-kota u tuala nau!Ndongixi 3:11.

O kuxinganeka mu milongi ia lungu ni Jihova ni Jezú, kua-nda ku kuatekesa kusuína mu ubhezelu uê

15, 16. (a) Mbote iebhi i uene mu katula mu kuxinganeka mu milongi ia lungu ni Jihova ni Jezú? (b) Mukonda diahi, saí ithangana kibhonza kuxinganeka, ni mukonda diahi tua tokala kukolokota mu kuxinganeka?

15 O kuxinganeka mu milongi ia lungu ni Jihova ni Jezú, kua-nda ku kuatekesa kusuína mu ubhezelu uê. O kusuína kuê, kua-nda kolokotesa o jiphange jê ni athu mu ukunji. Se u xinganeka mu ima ia bhange Jihova phala o mbote iê, mu kubhana Jezú kala sata phala ku tu kula, eie ua-nda bhana valolo iavulu ku ukamba uê ni Nzambi. (Loma 3:24; Tiiaku 4:8) Phange Mark ua tungu ku ixi ia África do Sul, ua bhitile mivu itatu mu kaleia mukonda dia kixikanu kiê, uambe: “Tu tena kusokesa o kuxinganeka ni kubhanga njila iambote. Se tu katula kithangana kiavulu phala kuxinganeka, tua-nda kuijiia ué ima iavulu ia lungu ni Nzambi ietu Jihova. Se nga luuala mba ngala ni hele ia ima i tena kubhita ku hádia, ngi kuata o Bibidia, anga ngi tanga ni kuxinganeka mu milongi ia Mikanda Ikola. Ngi  mona kuila, o kubhanga kiki, ku ngi kuatekesa ku divua kiambote.”

16 Ku mundu iú, kuene ima iavulu i tu landukisa, mu kiki, ki bhonza kiavulu kusanga kithangana phala kuxinganeka mu milongi ia Bibidia. Phange Patrick, ua tungu mu ixi ia África, uambe: “O kitongoluelu kiami kia difu ni kitutu kia jinjimbu, muala mikanda i nga bhindamena ni mikanda ki ngi i bhindamena, mu kiki, nga tokala ku i uanuna izuua ioso. Kioso ki ngi sota milongi mu kitongoluelu kiami, ngene mu sanga ibanzelu ia iibha, mu kiki, ngi samba kua Jihova phala ku ngi kuatekesa kuxinganeka mu milongi ia Bibidia ni kitongoluelu kia zele. Sumbala ku bhinga thembu phala kubhanga kiki ande dia kumateka kuxinganeka mu milongi ia Nzambi, maji né kiki, ngi mona kuila, ngi zukama dingi kua Jihova. O kubhanga kiki, ku ngi kuatekesa kujikula o muxima uami, phala kutendela kiambote o kidi kia Bibidia.” (Jisálamu 94:19) Mu kidi, kioso ki tu xinganeka mu milongi ia Bibidia izuua ioso, tu tena kukatula mbote iavulu.Ikalakalu 17:11.

KIEBHI KI U TENA KUSANGA KITHANGANA PHALA KUTANGA NI KUXINGANEKA

17. Kiebhi ki u tena kusanga kithangana phala kuxinganeka mu milongi ia Nzambi?

17 Saí athu a uabhela kubalumuka selu, phala kutanga, kuxinganeka mu milongi ni kusamba. Amukuá a bhanga kiki kioso kia zumbuka phala ku dimosala. Nange eie u mona kuila, o kithangana kia fuama phala kutanga o Bibidia, mu usuku mba ande dia kuzeka. Saí athu a uabhela kutanga o Bibidia mu kamene ni mu ola ia kuzeka. (Josuué 1:8) O kima kia beta-kota ki tua tokala o kubhanga, o ku ‘kumbidila kiambote o kithangana’ kietu, mu kukatula kithangana phala kuxinganeka mu Mak’â Nzambi izuua ioso.Efezo 5:15, 16.

18. Kikanenu kiahi ki tu sanga mu Bibidia phala o athu ene mu xinganeka ni ku kumbidila o milongi iene mu di longa mu Mak’â Nzambi?

18 Bhu kaxi ka Bibidia, Jihova ua kanena kubesoala o athu oso ene mu xinganeka ni kukumbidila o milongi iene mu di longa mu Maka mê. (Tanga Jisálamu 1:1-3.) Jezú uambe: “A beta o kuzediua oso évua o maka ma Nzambi anga a ma lunda!” (Luka 11:28) Kima kiambote kuijiia kuila, o kuxinganeka mu Mak’â Jihova izuua ioso, kua-nda tu kuatekesa kubhanga o ima i mu sangulukisa. Se tu bhanga kiki, Jihova ua-nda tu besoala mu ku tu bhana o kuzediua kua kidi lelu, ni ku tu bhana o muenhu ua kalelaku ku hádia.Tiiaku 1:25; Dijingunuinu 1:3.

^ kax. 11 Tala o milongi “Nossa luta para permanecer espiritualmente fortes” mu A Sentinela 1.° de dezembro de 2006.