‘Tuia ni kukula katé mu kitala kia tenena kia Kristu.’EFEZO 4:13.

MIMBU: 11, 42

1, 2. Mbambe iebhi i suua o Jikidistá? Bhana phangu.

MUKONDA diahi o muhatu uia mu kitanda, u sola kiambote o ibundu ia-nda sumba? Nange muéne ka bhanga kiki phala kusanga o kibundu kia dikota, mba ki i te kalu iavulu. Mu veji dia kiki, muéne u sota kiambote mukonda ua mesena kusanga kibundu kiala ni dizumba diambote, kia buingita kiambote, kia tokala phala ku ki dia. Mu kidi, muéne u sota kibundu kiabhi kiá.

O Kidistá ua kulu mu nzumbi u kolokota mu kusota o ijila ia Bibidia, ia-nda mu kuatekesa kuijiia o kima kia uabha, mu kiki kia iibha

2 Kioso o muthu kia di longa ia lungu ni Jihova ni ku mu batizala, o ukamba ué ni Nzambi u kula dingi. Muéne u suua o mbambe ia kukala Kidistá ua kulu mu nzumbi. O kukula kuku, ki kulombolola kukula mu kitala kia mukutu. Kulombolola, kukula mu nzumbi, mba kukala ni ukamba uambote ni Jihova. Poxolo Phaulu ua mesenene kuila, o Jikidistá akua Efezo a kula mu nzumbi. Muéne ua a suínisa kukolokota mu kukala kumoxi mu kuxikana, ni ku di longa ia lungu ni Jezú, phala kukala adiakimi, ni kuia ni ‘kukula katé mu kitala kia tenena kia Kristu.’Efezo 4:13.

3. Kiebhi ki tu tena kusokesa o kilunga kia Efezo, ni mundu ua Jihova lelu?

 3 Kioso Phaulu kia sonekene o akua Efezo, o kilunga a ki iudikile kiá thembu. Avulu mu kilunga kieniókio, exile Jikidistá a kudile kiá mu nzumbi. Maji né kiki, athu a mukuá a tokalele hanji kukolesa o ukamba uâ ni Jihova. Kiene kimoxi ué, lelu, saí jiphange javulu ja mala ni ja ahatu, Jikidistá a kulu mu nzumbi, ene mu sidivila Jihova mu mivu iavulu. Maji mu kilunga, saí a mukuá ka kulu luua mu nzumbi. Mu kifika, midi ni jimidi ja athu ene mu a batizala mivu joso, a mukuá a bhingi hanji kukula mu nzumbi. Abha eie?Kolose 2:6, 7.

KIEBHI O KIDISTÁ KIA TENA KUKULA MU NZUMBI?

4, 5. Kiebhi o Jikidistá ja kulu mu nzumbi ki ji difu mu maukexilu oso, ni mu ukexilu uebhi ene a difu? (Tala o foto ia dianga.)

4 Kioso ki u mona o ibundu iabhi mu kitanda, eie u tena kumona kuila, o ibundu ioso ki i difu. Maji o ibundu ienioió iala ni ima ia difu, ilondekesa kuila iabhi kiá. Kiene kimoxi ué ni Jikidistá ja kulu mu Nzumbi. Ene ka difu mu maukexilu oso. Ene a tundu mu jixi ki ji difu, ala ni ijila ki i difu. O mivu iâ ki i difu, o ima ia uabhela ni ia ibhila ki i difu ué. Maji né kiki, o Jikidistá joso ja kulu mu nzumbi jala ni ídifua ia difu, i bhangesa ku a mona kala athu a kulu mu nzumbi. Idifuá Iebhi?

‘O kuila saí ima i nga tokala kulungulula phala kukaiela kiambote Jezú?’

5 O Kidistá ua kulu mu nzumbi u kaiela o phangu ia Jezú, ni ku ‘mu kaiela mu makanda.’ (1 Phetele 2:21) Jezú uambe kuila, o muthu ua tokala kuzola Jihova ni muxima uê uoso, ni muenhu ué uoso, ni kilunji kiê kioso, ni kuzola o athu kala kia di zolo muéne. (Matesu 22:37-39) O kidistá ua kulu mu nzumbi, u bhanga ioso phala kubelesela o kitendelesu kiki. O ukexilu uê ua muenhu ulondekesa kuila, o ukamba uê ni Jihova, ni henda iê ku athu, ia beta kota o ima ia mukuá ndenge.

O Jikidistá adiakimi a tena kukaiela o phangu ia kulenduka kua Jezú, mu kukuatekesa o minzangala a tambula ikalakalu ia ubhe (Tala o kaxi 6)

6, 7. (a) Idifuá iebhi dingi ilondekesa o Kidistá ua kulu mu nzumbi? (b) Ibhuidisu iebhi i tu tena o kubhanga?

6 O Kidistá ua kulu mu nzumbi ulondekesa o henda. (Ngalásia 5:22, 23) Muéne ulondekesa ué kuila, muthu u di tumina jihanji, ua xididika, ni kuila, mukua muanhu. O ídifua íii, i tena ku mu kuatekesa kukolokota mu ithangana ia bhonzo, sé ku divuua kia iibha, ni kukolokota kukala ni kidielelu, né muene se saí kima ki i tundu kala kia mesenene muéne. Mu ku di longa ubheka uê, o muthu ua kulu mu nzumbi u  kolokota mu kusota o ijila ia Bibidia ia-nda mu kuatekesa kuijiia o kima kia uabha, mu kiki kia iibha. Mu kiki, bhu kaxi ka kitongoluelu kiê kio longe ni milongi ia Bibidia, muéne u tena kusola o ima iambote. O Kidistá ua kulu mu nzumbi, muthu ua lenduka, mu kiki, muéne u xikina kuila, o ukexilu ua Jihova ua kubhanga o ima, ua beta-o-kota o ukexilu uê ndenge. * (Tala ku luiji.) Muéne u boka o njimbu iambote ni kusuína kuoso, ni kubhanga ioso phala kukuatekesa o jiphange mu kilunga kukala ni ukamba uambote.

7 Kikale se tua mu sidivila Jihova thembu iavulu mba kana, etu enoso tua tokala ku dibhuidisa: ‘O kuila saí ima i nga tokala kulungulula phala kukaiela kiambote Jezú? Ihi i ngi tena o kubhanga phala ku i lungulula?’

“O KUDIA KUA NGUZU-PHE KUA TOKALA ADIAKIME”

8. Kiebhi Jezú kia londekesa kuila, uejidile kiambote o Bibidia ni kuila ua kexile mu i tendela kiambote?

8 Jezú Kristu uejidile kiambote o Mikanda Ikôla, muéne uexile ué mu i tendela kiambote. Né muene kioso kia kexile ni 12 kia mivu, muéne ua jikula o Mikanda Ikola, kioso kia kexile mu zuela ni jimesene  mu tembulu. ‘Oso bhenhobo, akexile ku muívua, a diuana kiavulu o kuijiia kuê, ni kia kexile mu kumbulula adiakimi.’ (Luka 2:46, 47) Mu ku bhita thembu kioso kia kexile mu boka, ni unjimu uoso, ua katula mbote mu Mak’â Nzambi, phala kubhangesa o jinguma jê ku di xibha.Matesu 22:41-46.

9. (a) Kiebhi kia di longa o Kidistá ua kulu mu nzumbi? (b) Mukonda diahi tuene mu di longa o Bibidia?

9 O muthu ua mesena kukala Kidistá ua kulu mu nzumbi, u kaiela o phangu ia Jezú, muéne u bhanga ioso phala kutendela kiambote o milongi ia Bibidia. Izuua ioso muéne u tokuesa o milongi ia kidi kia Mikanda Ikola, mukonda muéne uejiia kuila, ‘o kudia kua nguzu kua tokala adiakimi.’ (Jihebeleu 5:14) O Kidistá ua kulu mu nzumbi, u sota “kuijiia” kiambote o milongi ia Bibidia. (Efezo 4:13) Mu kiki, dibhuidise: ‘O kuila ngene mu tanga o Bibidia izuua ioso? O kuila ngene mu di longa ubheka uami? O kuila ngene mu bhanga o ubhezelu ku muiji semana joso?’ Kioso ki u di longa o Bibidia, sota ijila i tena ku ku kuatekesa kuijiia o ima i banza Jihova ni kiebhi ki divua muéne. Se kubhinga kusola kima, mba kubatula maka oso-oso, lembalala o milongi ienioió i ua di longo. O kubhanga kiki, kua-nda kukuatekesa kuzukama dingi kua Jihova.

10. Kiebhi o Kidistá ua kulu mu nzumbi, kia mona o itendelesu ni ijila ia Nzambi?

10 O Kidistá ua kulu mu nzumbi, ka sota ngó kuijiia o ima i longa o Bibidia. Muéne ua tokala kuzola o itendelesu ni ijila ia Nzambi. Muéne ua tokala kulondekesa o henda iê ku ijila ia Nzambi, mu kusola kubhanga o vondadi ia Jihova mu veji dia kubhanga o vondadi iê muene. Muéne u lungulula o ukexilu uê ua muenhu, o ukexilu ua kubanza, ni ua kubhanga o ima. Mu kifika, muéne u kaiela o phangu ia Jezú mu kusota kukala ni ukexilu ua ubhe a u “bhangulula mu kidifua kia Nzambi, ki di monekena mu kukala ni muenhu ua kuiuka, ni mu kuzela kua kidi.” (Tanga Efezo 4:22-24.) Kima kiambote kulembalala kuila, bhu kaxi ka nzumbi iê ikola, Nzambi ua bhangesa o asoneki a Bibidia kusoneka o Bibidia. Mu kiki, kioso o Kidistá kia di longa o Bibidia, o nzumbi ikola ia Nzambi i mu kuatekesa kukula mu kuijiia, mu henda, ni mu ukamba uê ni Jihova.

DI SUÍNISE PHALA KUKALA NI UKAMBA UAMBOTE NI AKUENU

11. Ima iahi ia bhiti na-iu Jezú kioso kiexile mu ixi?

11 Jezú uexile diiala dia iuka. Maji kioso kia kexile mu ixi, Jezú a mu kondolokele ku athu akua ituxi. O jitata jê ni jiphange jê ja mala ni ja ahatu, exile akua ituxi. Katé muene ni maxibulu mê, a londekesa o ídifua ia iibha, kála o luímbi ni ku di zangeleka. Mu kifika, mu usuku ande dia kufua kuê, o maxibulu mê akexile mu zoka se “nanhi ua tokala kukala o dikota.” (Luka 22:24) Sumbala ene akexile ni ibanzelu ia iibha, maji Jezú uejidile kuila, o maxibulu mê eji kala Jikidistá ja kulu mu nzumbi, ni kuila, ene eji bhanga mbandu ku kilunga kieji kala ni ukamba uambote mudiâ. Mu usuku uenió, Jezú ua sambele phala ene kukala ni ukamba uambote. Muéne ua bhingi kua Tata iê ia diulu, phala ene kukala kála muthu umoxi ngó. Muene uambe:  ‘Kala eie u tata iami, uala kumoxi n’eme, eme ngala kumoxi n’eie.’ Muéne uambe dingi: “Ene ni a kale umoxi, kala etu ki tuala umoxi.”Nzuá 17:21, 22.

12, 13. (a) Kuma tu Jikidistá, ihi i tua mesena? (b) Kiebhi o phange kia di longo kusuínisa o ukamba?

12 O Kidistá ua kulu mu nzumbi u suínisa o ukamba mu kilunga. (Tanga Efezo 4:1-6, 15, 16.) Kuma tu Jikidistá, tua mesena kukalakala “kumoxi mu henda.” Phala kukalakala kumoxi ni akuâ, o Kidistá ua tokala kukala mukuá kulenduka. Mu kiki, né muene se muthu uoso-uoso u mu bhanga kima kia iibha, mukonda dia kukala mukua ituxi, o Kidistá ua kulu mu nzumbi u kolokota mu kusuínisa o ukamba mu kilunga. Mu kiki, dibhuidise: ‘Ihi i ngi bhanga kioso phange ia diiala mba ia muhatu, u bhanga kima kia ngi ibhila? Kiebhi ki ngi divua kioso kia ngi bhanga kima kia iibha? O kuila ki ngi zuela dingi ni muthu ua ngi bhange kia iibha? Inga ngi bhanga ioso phala kukala dingi ni ukamba uambote ni muéne?’ O kidistá ua kulu mu nzumbi, u bhanga ioso phala kubatula o maka, mu veji dia kubhekela maka ku akuâ.

13 Dilonge o phangu ia Uwe. M’ukulu, muéne ua kexile mu divuua kia iibha mukonda dia ima ia kexile mu bhanga o jiphange. Mu kiki, muéne ua kuata o Bibidia, ni divulu Estudo Perspicaz das Escrituras, phala kutokuesa o musoso ua Davidi. Mukonda diahi muéne ua solo o musoso ua Davidi? Mukonda Davidi ua di bhanene ni ibhidi iavulu ni jiselevende ja mukuá ja Nzambi. Mu kifika, o Sobha Saulu ua mesenene kujibha Davidi, saí athu akua kifuxi kiê a mesenene ku mu buba ni matadi, katé muene ni muhatu uê uexile ku mu sebhulula. (1 Samuuele 19:9-11; 30:1-6; 2 Samuuele 6:14-22) Sumbala ni ima ioso ia bhangele o athu, Davidi ua zolele Jihova, iú ua kexile ku mu dielela. Davidi ua londekesa ué o henda. Uwe uambe kuila, muéne ua tokalele ué kubhanga kiki. Mu ku di longa o Bibidia, muéne ua mono kuila, ua tokalele kulungulula o ukexilu uê ua kumona o ituxi ia jiphange jê. Muéne ka tokalele kulembalala dingi o ituxi ia jiphange, maji ua tokalele kukolokota mu ku suínisa o ukamba uambote mu kilunga. O kuila kiene ué ki ua mesena o kubhanga?

SOLA O MAKAMBA MÊ BHU KAXI KA ATHU A BHANGA O VONDADI IA NZAMBI

14. Kiebhi Jezú kia solo o makamba mê?

14 Jezú Kristu uexile mu dibhana kiambote ni athu oso. Ki kale o maiala, ni ahatu, minzangala ni ana jindenge, enoso akexile mu divuua kiambote mu kukala ni Jezú. Maji muéne ua solo kiambote o makamba mê. Muéne uambe ku jipoxolo jê: “Enu mu makamba mami se mu bhanga ima ioso i nga mi tumu.” (Nzuá 15:14) Jezú ua solo o makamba mê a kazola bhu kaxi ka ió akexile ku mu kaiela ni ufiiele uoso, a zolele kusidivila Jihova. O kuila eie u sola makamba a zolo Jihova ni muxima uoso? Mukonda diahi kima kiambote kubhanga kiki?

O kuila eie u sola makamba a zolo Jihova ni muxima uoso?

15. Kiebhi o minzangala kia tena kukatula mbote mu kubhanga ukamba ni Jikidistá ja kulu mu nzumbi?

 15 Kuene ibundu iavulu ibhia dingi kiambote ni muanha. Kiene kimoxi ué, o henda ia jiphange jetu ja mala ni ja ahatu, i tena ku kukuatekesa kukala Kidistá ua kulu mu nzumbi. O kuila eie u munzangala, ua mesena kusola se ihi i ua-nda bhanga ku muenhu? Se kiene, kima kiambote kusola makamba a sidivila Jihova mu thembu iavulu, ene mu suínisa o jiphange kukala ni ukamba uambote mu kilunga. Nange ene a bhiti kiá mu ibhidi iavulu, maji né kiki, ene mu kolokota mu kusidivila Jihova. Ene a tena ku kukuatekesa kusola o ukexilu ua muenhu u bheka o kusanguluka kua kidi. O kukala kumoxi ni ene, kua-nda kukuatekesa kusola kiambote ni kukala Kidistá ua kulu mu nzumbi.Tanga Jihebeleu 5:14.

16. Kiebhi o adiakimi mu kilunga kia kuatekesa phange mu unzangala uê?

16 Helga u di lembalala kuila, ku muvu ua sukina mu xikola, o jikoleka jê, ja kexile mu zuela ia lungu ni ima ia mesenene o kubhanga ku hádia. Avulu mudiâ a mesenene kubokona mu xikola ia katunda, phala ku di tunda kiambote ku muenhu. Maji Helga, ua zuela ni makamba mê mu kilunga, a kudile mu nzumbi. Muéne uambe: “Avulu exile adiakimi, mukonda dia kiki, ene a ngi kuatekesa kiavulu. Ene a ngi suínisa kubokona mu sidivisu ia thembu ioso. Tundé mu kithangana kieniókio, nga kolokota mu sidivisu ia thembu ioso mu mivu itanu. Lelu, eme nga sanguluka kiavulu, mukonda nga bhakula o unzangala uami mu sidivisu ia Jihova. Sé-ku kima ki tena ku ngi bhangesa o kudiela, mu kusola kubhanga o sidivisu íii.”

17, 18. Kiebhi ki tu tena kusidivila kiambote Jihova?

17 Kioso ki tu kaiela o phangu ia Jezú, tu kula dingi, tu kala tu Jikidistá ja kulu mu nzumbi. Tu zukama dingi kua Jihova, mu kiki, o vondadi ietu ia ku mu sidivila, i di bandekesa dingi. O muthu u sidivila kiambote Jihova, se ua kulu mu nzumbi. Jezú ua suínisa o maxibulu mê: “O mukengeji uenu u muikine bhu pholo ia athu, ene a mone ima iambote i mu bhanga, ni a ximane Tata ienu uene mu diulu.”Matesu 5:16.

18 Tua di longo kuma, o Kidistá ua kulu mu nzumbi, kikuatekesu kia dikota phala o kilunga. O Kidistá ulondekesa ué kuma ua kulu mu nzumbi, mu ukexilu uê ua kusola o ima bhu kaxi ka kitongoluelu kiê. Kiebhi o kitongoluelu kietu ki tena ku tu kuatekesa kusola kiambote? Ni kiebhi ki tu tena ku xila o kitongoluelu kia akuetu? Tua-nda tambuijila o ibhuidisu íii, mu milongi ia-nda kaiela.

^ kax. 6 Mu kifika, o phange muadiakimi kiá, uala ni uhete uavulu, u tena kuxisa o kikalakalu ku phange munzangala, a tena ué ku mu bhinga phala kukuatekesa o munzangala.