“Mutendelelu iú-phe, mahezu’ê o henda i tunda mu muxima uazele, ni mu kitongoluelu kiambote.”1 TIMOTE 1:5.

MIMBU: 22, 48

1, 2. Nanhi ua tu bhana o kitongoluelu, ni mukonda diahi tua tokala kusakidila mu kukala ni kitongoluelu?

JIHOVA NZAMBI, ua bhange o athu ni ufôlo ua kusola. Jihova ua tu bhana kima phala ku tu kuatekesa kusola o ima ia tokala. O kima kiki, o kitongoluelu. O kitongoluelu, kima kiala moxi dietu, ki tu kuatekesa kusola o ima iambote mu íii ia iibha. Se tu kala ni kitongoluelu kiambote, kiene ki tena ku tu kuatekesa kubhanga o ima iambote ni ku dituna o ima iibha. O kitongoluelu kietu kilondekesa kuila, Jihova ua tu zolo, ni kuila, muéne ua mesena o mbote ietu.

2 Lelu, athu avulu a bhanga ima iambote. Sumbala kejiia o itumu ia Bibidia, ene a dituna o ima ia iibha. (Tanga Loma 2:14, 15.) Mukonda diahi? Mukonda dia kitongoluelu kiâ. O kitongoluelu ki fidisa athu avulu kubhanga ima ia iibha. Xinganeka o kuiibha kueji kala ku mundu, se o athu kexile ni kitongoluelu! Nange tueji mona ima iavulu ia iibha, o ima i tua mu mona lelu, ndenge. Tu sakidila Jihova, mukonda dia kubhanga o athu ni kitongoluelu!

Kiebhi o kitongoluelu kiambote ki tena ku tu kuatekesa kusola kiambote?

3. Kiebhi o kitongoluelu kietu ki tena ku tu kuatekesa mu kilunga?

 3 Athu avulu ka mona kuila, a bhingi kukala ni kitongoluelu kiambote. Maji o mundu ua Jihova ua mesena kukala ni kitongoluelu kiambote, mukonda ki tena ku a kuatekesa kukala ni ukamba uambote ni akuâ mu kilunga. Etu tua mesena kuila, o kitongoluelu kietu ki tu kuatekesa ku lembalala o ima iambote ni ia iibha, kala ki tendelesa o itumu ia Bibidia. Maji phala ku longa o kitongoluelu kietu ni kusola o ima ia tokala, ki tu tokala ngó kutanga o Bibidia. Tua tokala kuzola o itumu ia Nzambi, ni kudielela kuila, itumu iambote phala etu. Phaulu ua soneka: “Mutendelelu iú-phe, mahezu’ê o henda i tunda mu muxima uazele, ni mu kitongoluelu kiambote, ni mu kuxikana kua kidi ki kua kudibhangesa.” (1 Timote 1:5) Se tu longa o kitongoluelu kietu, ni ku ki belesela, o henda ietu kua Jihova ni kixikanu kietu kua muéne kia-nda dibandekesa. Se tu belesela o kitongoluelu kietu, tua-nda londekesa kuila, tuala ni ukamba uambote ni Jihova, ni kuila, tua mesena kubhanga o vondadi iê. O kitongoluelu kietu kilondekesa ué se tu athu ambote, mba kana.

4. Kiebhi ki tu tena ku longa o kitongoluelu kietu?

4 Maji kiebhi ki tu tena ku longa o kitongoluelu kietu? Tua tokala ku di longa o Bibidia ithangana ioso, kuxinganeka mu ima i tu tanga, ni kubhinga kua Jihova, phala ku tu kuatekesa kubelesela o milongi i tu di longa. Kiki kilombolola kuila, ki tu tokala ngó ku di longa o izulukutu ni itumu. Tua tokala ku di longa o Bibidia, phala kuijiia kiambote Jihova. Se tu bhanga kiki, tua-nda kuijiia kiambote o Ukexilu uê. Tua-nda kuijiia uê o ima ia uabhela, ni ima ia zembe. Se tu sota ku di longa dingi ia lungu ni Jihova, o kitongoluelu kietu kia-nda tu kuatekesa kuijiia o ima ia uabhela ni ima ia zembe muéne. Se tu longa kiambote o kitongoluelu kietu, tua-nda banza ué kala ki banza Jihova.

5. Ihi i tua-nda di longa mu milongi íii?

5 Maji nange tu dibhudisa: Kiebhi o kitongoluelu kiambote ki tena ku tu kuatekesa kusola kiambote? Kiebhi ki tu tena kuxila o kitongoluelu kia jiphange jetu? Ni kiebhi o kitongoluelu kietu ki tena ku tu kuatekesa kubhanga o ima iambote? Tu di longe ima itatu ia bhingi phala kukala ni kitongoluelu kiambote: (1) o ukexilu ua ku tu saka, (2) o itonokenu, ni (3) kikalakalu kietu kia kuboka.

LONDEKESA O KUTETULUKA

6. Ihi i tu sola ia lungu ni ukexilu ua ku tu saka?

6 O Bibidia i tu tendelesa kulenga o ima i tena ku tu kuama. Iene i tu dimuna ué phala ki tu die mba kúnua kiavulu. (Jisabhu 23:20; 2 Kolindo 7:1) Kioso ki tu belesela o itumu ia Bibidia, iene i tu kuatekesa kulanga o sauidi ietu. Maji né kiki, tuene mu  kata hanji ni ku kuka. Maka ahi a tena ku moneka a bhinga ku a batula? Mu jixi javulu, ene mu saka o athu mu maukexilu avulu. O jiphange ene mu soneka mikanda iavulu ku jifiliale, phala kuijiia o maukexilu ambote a ku a saka. Avulu ebhula: “O kuila o selevende ia Jihova a tena ku mu saka mu ukexilu iú?”

7. Kiebhi ki tu tena kusola o ukexilu uambote ua ku tu saka, sé kuxikina manhinga?

7 O jiphange ku filiiale, mba o tufunga mu kilunga, ka tokala kusola o ukexilu ua kusaka phala Kidistá, né muene se phange uibhula o ukexilu uambote ua ku mu saka. (Ngalásia 6:5) Maji o tufunga a tena kulondekesa o ima i zuela Jihova, phala kukuatekesa o Kidistá kusola ni unjimu. Mu kifika, o kitumu kia Nzambi ki zuela kuila, ki tu tokala kudia manhinga. (Ikalakalu 15:29) O kitumu kiki, ki kuatekesa o Kidistá kumona kuila, muéne ka tokala kuxikina ku mu ta manhinga, mba kuxikina milongo io bhange ni manhinga, phala ku mu saka. O milongi íii, i tena ku mu kuatekesa kumona se ua tokala kuxikina milongo io bhange ni manhinga mba kana. * (Tala ku luiji.) Itendelesu iebhi ia Bibidia, i tena ué ku tu kuatekesa kusola o ukexilu uambote ua ku tu saka?

8. Kiebhi o divulu dia Filipe 4:5, di tena ku tu kuatekesa o kusola ima iambote ia lungu ni sauidi ietu?

8 O divulu dia Jisabhu 14:15, di zuela: “Kilalu maka oso a zuela kuala athu, muene u a xikina; maji ió ua sunguluka-phe, u zonga kiambote kioso kienda.” Lelu, nange saí mauhaxi, ki iala ni milongo. Mu kiki, tua tokala ku di langa, phala ki tu xikine kutambula milongo ioso ioso. Mukonda sai milongo, ki io lole luua phala ku mona se i saka o uhaxi mba kana. Phaulu ua soneka: “Kalenu mu athu mua tetuluka, athu oso a m’ijiie na-kiu.” (Filipe 4:5) O kutetuluka kua-nda tu kuatekesa kuta o ubhezelu ua Jihova ku pholo, mu veji dia ku thandanganha kiavulu ni maka a lungu ni sauidi. Se tu ta o sauidi ku pholo, tua-nda xinganeka ngó mu ima ietu. (Filipe 2:4) Tuejiia kuila, ki tu tena kukala ni sauidi ia iuka ku mundu iú ua  iibha. Mu kiki, bhanga ioso phala ku ta o sidivisu ia Jihova ku pholo.Tanga Filipe 1:10.

O kuila u jijidika akuenu kubhanga o ima kala ki u banza? (Tala o kaxi 9)

9. Kiebhi o divulu dia Loma 14:13, 19, di tu kuatekesa kusola kiambote o ukexilu ua ku tu saka, ni kiebhi ki tu tena kuzanga o ukamba uetu ni jiphange mu kilunga?

9 O Kidistá ua tetuluka, ka jijidika akuâ kubhanga o ima kala ki banza muéne. Saí dikaza dia kexile mu suínisa akuâ kúnua milongo, phala kukala ni sauidi iambote. Saí jiphange a xikina, maji a mukuá ka xikina. Mu kumona kuila, ene ka kexile mu kala ni sauidi iambote kala kia a tangele, o jiphange ja kexile ni njinda. O dikaza dia kexile ni ufôlo ua kusola se a nua o milongo mba kana. Maji o kuila kima kiambote kuzanga o ukamba ni jiphange mu kilunga mukonda dia maka a lungu ni sauidi? M’ukulu, saí Jikidistá ku Loma, ka kexile mu mona o kudia ni jifesa mu ukexilu umoxi. Ihi ia a tendelesa Phaulu? Muéne uambe: “Sai muthu u fika kuma sai kizuua kia tundu akuá. Sai dingi muthu ua fika kuila izuua ioso ia sokela. Kala muthu a tetuluke ku muxima uê-muène mu ioso ia banza.” Tua tokala ku di langa, phala ki tu jijidike akuetu kubhanga kima ka mesena ku ki bhanga.Tanga Loma 14:5, 13, 15, 19, 20.

Bhanga ioso phala ku ta o sidivisu ia Jihova ku pholo

10. Mukonda diahi tua tokala kuxila o ukexilu ua akuetu ua ku batula o maka? (Tala o foto ia dianga.)

10 Saí ithangana, ki tu tena kutendela kiambote o kima kia bhangesa phange kubatula o maka mu ukexilu uê. Ihi i tua tokala kubhanga? Ki tu tokala ku mu fundisa, mba ku mu jijidika kubatula o maka mu ukexilu uéngi. Nange muéne ua bhingi dingi ku longa o kitongoluelu kiê, mba o ima i tu mona kala ima iambote, muéne u i mona kala ima ia iibha. (1 Kolindo 8:11, 12) Mba nange ki tuala ni kitongoluelu kiambote. Mu maka a lungu ni ukexilu ua kusaka, ni maka a mukuá, kala muthu mudietu muéne ua tokala o kusola, ni kukala polondo phala ku dibhana ni ibhidi i tena kumoneka.

SANGULUKA MU KUBHANGA O ITONOKENU

11, 12. Kiebhi o Bibidia i tu kuatekesa kusola o itonokenu ietu?

11 Jihova ua tu bhange ni vondadi ia kubhanga itonokenu ni kusanguluka kuoso, ni kumona o mbote ijila mu kubhanga o itonokenu. Solomá ua soneka kuila, saí “thembu ia kuolela” ni “thembu ia kutu-katuka.” (Ndongixi 3:4) Maji saí itonokenu, ki i tu kuatekesa kutululuka, mba ku divua kiambote. Ki tu tokala ué kuzanga kithangana kiavulu mu itonokenu. Kiebhi o kitongoluelu kietu ki tena ku tu kuatekesa kusanguluka, ni kukatula mbote mu itonokenu ia uabhela Jihova?

‘O kuila kioso ki moneka tendasá, o kitongoluelu kiami ki ngi bazela?’

12 O Bibidia i tu dimuna ku ‘ima i bhanga o xitu.’ O ima íii ia lungu ni “undumbu, ufusa, uhabhu. Ubhezelu ua iteka, uanga, athu a di kuatela unguma, a di dia milonga, a di bhanga kusuina, a di temena, a di kuata jimvunda, akua difuba, akua luimbi, a di zemba, a di muangununa ku madianda-madianda, ni ku ibuka-ibuka. Akua dixinga, ijibhanganga, jihôlua, o muenhu uâ ua ku di ta ngó mu izomba iaiibha, ni ima iamukuá ia di fu kiki.” Phaulu ua soneka kuila,  “oso akua kubhanga ima kala iii, kà tena kubhingana mu Utuminu ua Nzambi.” (Ngalásia 5:19-21) Mu kiki, tua tokala ku dibhudisa: ‘O kuila o kitongoluelu kiami ki ngi kuatekesa ku dituna o jijoko ji suínisa o kubhânga, ku di sokesa ni akuetu, kuzokela o ixi iami mba kubhanga o usuéia? O kuila kioso ki moneka filme ia lungu ni ufusa, undumbu, uhôlua mba kuzambula, o kitongoluelu kiami ki ngi bazela?

13. Kiebhi o divulu dia 1 Timote 4:8, ni divulu dia Jisabhu 13:20, di tu kuatekesa kusola kiambote o itonokenu?

13 O ijila ia Bibidia i tena ku tu kuatekesa ku longa o kitongoluelu kietu, phala kusola kiambote o itonokenu. Mu kifika, o Bibidia i zuela kuila, “o kudilonga nguzu ia mukutu, kubhanduluka kuê sai maji ki kua kidi.” (1 Timote 4:8) Avulu a banza kuila, o kutungutisa o mukutu, kubhangesa ku divua kiambote, ni kuila, kukuatekesa kukala ni sauidi iambote. Maji ihi i tuamba se tu mesena ku dibunda ni athu a mukuá mu kubhanga o kima kiki? O kuila tua tokala kusola kiambote o athu enhá? O divulu dia Jisabhu 13:20, di zuela: “Uoso uenda ni jinjimu, u biluka njimu; uoso-phe u kala kamba dia ku kaiela o ioua, kanange kukituka kala ene.” Sé phata, tua tokala kusola o itonokenu ni kikuatekesu kia kitongoluelu kietu, kio longe ni milongi ia Bibidia.

14. Kiebhi o muiji ua kaiela o itendelesu i tu sanga mu divulu dia Loma 14:2-4?

14 Christian ni Daniela ala ni kiiadi kia a’na a ahatu. Christian uambe: “Ku Ubhezelu uetu ku Muiji, tua zuela ia lungu ni itonokenu. Tua solo o itonokenu i tua tokala kubhanga, ni itonokenu i tua tokala ku dituna. A nanhi u tua tokala kusola phala kukala makamba metu? Mon’etu ua zuela kuila, mu ola ia ku nhoha bhu xikola, saí Jimbangi ja Jihova ja minzangala, kene mu bhanga ima iambote. Ene akexile ku mu jijidika kukaiela o ukexilu uâ. Tua mu kuatekesa ku mona kuila, kala muthu uala ni kitongoluelu kiê, ni kuila, tua tokala ku dielela o kitongoluelu kietu mu kusola o ima i tua-nda bhanga, ni athu u tua-nda kuenda  nau mu kubhanga o ima íii.”Tanga Loma 14:2-4.

O kitongoluelu kiê kiambote ki tena ku ku kuatekesa ku dilanga mu iluezu (Tala o kaxi 14)

15. Kiebhi o divulu dia Matesu 6:33, di tu kuatekesa kusola o itonokenu iambote?

15 O kuila uene mu zanga kithangana kiavulu mu itonokenu? O kuila uene mu ta o iônge, ni kikalakalu kia kuboka, ni ku dilonga o Bibidia ku pholo, inga uene mu ta o itonokenu ku pholo? Kima kiahi kia beta kota phala eie? Jezú uambe: “Diangenu-phe kusota o Utuminu ua Nzambi ni uiukilu uê, nda ima ioso iii a mi kuiila-iu.” (Matesu 6:33) Kioso ki u xinganeka kubhanga itonokenu, o kuila o kitongoluelu kiê ki ku lembalesa o kitendelesu kiki kia Jezú?

A TU SUÍNISA KUBOKA

16. O kitongoluelu kietu ki tu suínisa kubhanga ihi?

16 O kitongoluelu kiambote, ki ki tu dimuna ngó ku ima ia iibha, maji ki tu suínisa ué kubhanga ima iambote. O ima íii iambote, ia lungu ni kuboka nzo ni inzo, ni ku bokela o athu u tu sanga mu ididi ioso ioso. Kiene kia bhangele Phaulu. Muéne ua soneka: “Kuma katé bhu ngez’abha, kiene kia ngi fuama kubhanga. Kokolo diami se ngi kamba kukola o Njimbu Iambote!” (1 Kolindo 9:16) Se tu kaiela o phangu ia Phaulu, tua-nda kala ni kitongoluelu kiambote, mu kuijiia kuila, tua mu bhanga o kima kia tokala. Kioso ki tu boka o njimbu iambote ku akuetu, o phangu ietu iambote i tena ku a kuatekesa ku xikina o kidi kia Bibidia. Phaulu uambe: “Inda tu bhanga jinga ima ia fuama o kidi, kiene kia bhekela o ku tu tumbula kuala enhoso, bhu pholo ia Nzambi.”2 Kolindo 4:2.

17. Kiebhi o phange ua belesela o kitongoluelu kiê?

17 Kioso kiexile ni 16 kia mivu, Jacqueline ua di longo ima ia lungu ni ibhangelu bhu xikola. Maji akexile mu longa kuila, o athu a moneka ngó. “O kitongoluelu kiami ki ki ng’iehela kutambuijila kála ki nga kexile mu bhanga mu izuua ia mukuá. Nga zembe o milongi i zuela kuila, o athu a moneka ngó. Ngai mu zuela ni mesene, phala ku mu jimbuluila o kixikanu kiami. Nga tukumuka, mukonda muéne ua ngi tambulula kiambote, anga u ngi bhinga phala ku jimbulula o maka a lungu ni ibhangelu ku jikoleka joso mu ola ia ku di longa.” Jacqueline ua sanguluka mu kuívua ni kubelesela o kitongoluelu kiê kiambote. O kuila o kitongoluelu kiê ki ku suínisa kubhanga o ima ia tokala?

18. Mukonda diahi tua tokala kukala ni kitongoluelu kiambote, mba ki tu tena ku dielela?

18 Etu tua mesena kubelesela o ijila ni itumu ia Jihova. O kitongoluelu kietu ki tena ku tu kuatekesa kubhanga kiki. Kioso ki tu di longa ni ku xinganeka mu Mak’â Nzambi ithangana ioso, ni ku belesela o ima i tu di longa, tu longa o kitongoluelu kietu. Mu kiki, tua-nda dielela o ujitu iú ua dikota ku muenhu uetu!

^ kax. 7 Tanga divulu, ‘Kala mu Henda ia Nzambi’ mu mbandu 215-218.