“O ku di lunga ni athu aiibha, ku bolesa o ifua iambote.”1 KOLINDO 15:33.

MIMBU: 25, 20

1. Etu tuala mu jithembu jebhi?

ETU tuala mu “jithembu jabhonzo.” Tundé kia mateka o “izuua isukidila-ku” ku muvu ua 1914, o kuiibha ku mundu kuene mu di bandekesa dingi. (2 Timote 3:1-5) Mu kidi, etu tuejiia kuila, o kuiibha ku mundu iú kua-nda dibandekesa, mukonda o Bibidia izuela: ‘Athu aiibha-phe, akua makutu, jindunge jâ jiia ni ku dibandekesa.’2 Timote 3:13.

2. Itonokenu iebhi iene mu bhanga o athu? (Tala o foto ia dianga.)

2 Athu avulu lelu, a tonoka ni ima ia ujibhangânga, ia ufusa mba ia uloji. Mu kifika, o internete, ni milongi ia mitelembe ia izunzumbia, jifilme ni madivulu, ji bhangesa o athu kubanza kuila, o ufusa kima kiambote. Saí ima m’ukulu, exile mu i mona kala ima ia iibha, lelu o athu mu ididi ia mukuá a mona kuila ima iambote. Maji kiki, ki kilombolola kuila, Jihova u xikina o ima íii ia iibha.Tanga Loma 1:28-32.

3. Ihi i banza o athu ia lungu ni ió a kaiela o itendelesu ia Nzambi?

 3 Ku hama ia dianga, o athu akexile ué mu mona ima ia ujibhangânga ni ia undumbu mu itonokenu. Maji o akaiedi a Jezú ka kexile mu bhanga o ima íii, mukonda ene akexile mu belesela o itendelesu ia Nzambi. Mukonda dia kiki, o athu akexile mu “diuana.” Ihi iexile mu bhanga o athu enhá? Ene akexile mu tobhesa o Jikidistá ni ku a zukutisa. (1 Phetele 4:4) Lelu, athu avulu a banza kuila, o athu a kaiela o itendelesu ia Nzambi, a tobho. Mu kidi, o Bibidia i tu tendelesa kuila, o athu a kaiela o phangu ia Jezú Kristu, ‘a-nda tala hadi ni ku a zukutisa.’2 Timote 3:12.

“O KU DI LUNGA NI ATHU A IIBHA KU BOLESA O IFUA IAMBOTE”

4. Mukonda diahi ki tu tokala kuzola o mundu iú?

4 Se tua mesena kubhanga o vondadi ia Nzambi, ki tu tokala “kuzola o mundu, mba o ima iene ku mundu.” (Tanga 1 Nzuá 2:15, 16.) Satanaji, ‘o nzambi ia mundu iú,’ muéne ua mu tumina o mundu. Muéne u nganala o athu bhu kaxi ka jingeleja, jinguvulu, isangela ia uenji, ni bhu kaxi ka milongi ia mitelembe. (2 Kolindo 4:4; 1 Nzuá 5:19) Kuma ki tu mesena ku tu funhisa ku mundu, tua tokala ku dituna ku di lunga ni athu a iibha. O Bibidia i tu dimuna: “Kana kudinganala! O ku dilunga ni athu aiibha, ku bolesa o ifua iambote.”1 Kolindo 15:33.

5, 6. Ki tu tokala ku dilunga ni athu a ukexilu uebhi, ni mukonda diahi?

5 Etu ki tu xikina ku dilunga ni athu a bhanga ima ia iibha, mukonda tua mesena kukala ni ukamba uambote ni Jihova. Ki tu xikina ku dilunga katé muéne ni athu a zuela kuila, a bheza Jihova, maji ka belesela o itendelesu iê. Se athu enhá a ta kituxi kia dikota sé ku diela, etu ki tu xikina ku dilunga dingi ni ene.Loma 16:17, 18.

6 O athu a uabhela kubhanga o ima ia zolo o makamba mâ. Mu kiki, se tu bhanga o ukamba ni athu a xibhaka o itumu ia Nzambi, tu tena kubhanga ué o ima iene mu bhanga ene. Mu kifika, se tu dilunga ni akua ufusa, tu tena ué kubhanga o ima íii. Kiki kiene kia bhiti ni jiphange jetu javulu, ja mala ni ja ahatu. O athu ka diela o ituxi iâ, a a kaie mu kilunga. (1 Kolindo 5:11-13) Se ene ka diela o ituxi iâ, a tena ku sokela ni athu a tumbula Phetele.Tanga 2 Phetele 2:20-22.

7. A nanhi a tokala kukala makamba metu?

7 Sumbala tua tokala kulondekesa o henda ku athu oso, maji ki tu tokala kubhanga ukamba ni athu ka belesela Nzambi. Se Mbangi ia Jihova u sola kutunga kumoxi ni dikamba ka belesela o itumu ia Jihova, muéne u londekesa kuila, ua kambe kilunji. Kiene kimoxi, kieji kala kituxi, se Mbangi ia Jihova u sota ku tangesa muthu, ki Mbangi ia Jihova. Kia beta dingi kota kukala ni ukamba uambote ni Nzambi, o ukamba  ni athu ka mu zolo ndenge. Tua tokala ngó kubhanga o ukamba ni athu a bhanga o vondadi ia Nzambi. Jezú uambe: “Kuma uoso u bhanga vondadi ia Nzambi, muène phange iami ia diiala, muène phange iami ia muhatu, muène mam’etu.”Marku 3:35.

Kia beta dingi kota kukala ni ukamba uambote ni Nzambi, o ukamba ni athu ka mu zolo ndenge

8. Ihi ia bhiti ni akua Izalaiele mukonda dia ku dilunga ni athu a iibha?

8 O ku dilunga ni athu a iibha ku bhekela ibhidi iavulu. Mu kifika, xinganeka mu ima ia bhitile ni akua Izalaiele. Ande dia kubokona mu Ixi ia a Kanene, Jihova ua a dimuna ia lungu ni athu a tungile mu ixi ienioió. Muéne uambe: ‘Enu-phe kana kufukamena o nzambi jâ, kana ku ji diondela mba eie ua kà fikisa o imbamba iâ ia bhanga; inda ene mua a sengulula muene, o iteka iâ mu i bula-bula. Enu-phe mua kà bhikila ngó Jihova Nzambi ienu.’ (Makatukilu 23:24, 25) Maji athu avulu akua Izalaiele, ka belesela o itendelesu ia Nzambi, ene a mu bhukumukina. (Jisálamu 106:35-39) Ihi ia bhiti? Mu ku bhita thembu, Jihova ua ditunu o kifuxi kia Izalaiele, iú ua solo o kilunga kia Jikidistá phala kukala mundu uê.Matesu 23:38; Ikalakalu 2:1-4.

DILANGE NI IMA I U TANGA, NI IMA I U MONA

9. Mukonda diahi o milongi mu mitelembe ni madivulu a mundu iú, a tena kukala kiluezu kia dikota?

9 Ima iavulu ku mundu, kala o minangu ia mitelembe ia izunzumbia, milongi ia internete, ni madivulu, i tena kuzanga o ukamba uetu ni Jihova. O ima íii kene mu i bhanga phala kusuínisa o kixikanu kia Jikidistá, ni kukolesa o kidielelu kiâ ku ikanenu ia Jihova. Mu veji dia kiki, o ima íii i suínisa o athu kudielela ku mundu iú ua iibha ua Satanaji. Mukonda dia kiki, tua tokala ku dilanga, phala ki tu mone, ki tu tange mba tuivue kima kioso-kioso ki tena ku tu bhangesa kukala ni “jihânji jaiibha ja mundu.”Tito 2:12.

10. Ihi ia-nda bhita ni milongi ioso ia mitelembe ia mundu iú?

10 Kua kambe ngó bhofele, o mundu ua Satanaji ni milongi ioso ia iibha ia mitelembe, a-nda i buika. O Bibidia izuela: “O mundu-phe u buila, ni ima iê ioso iene mu kuinda athu. Maji uoso-phe u bhanga o vondadi ia Nzambi, ió muène o muthu u nangenena.” (1 Nzuá 2:17) O mukua Jisalamu uembi ué: “Mukonda oso a bhanga ima ia iibha, a xikamena ku a batula bhoxi.” Muéne uambe dingi: “Oso-phe a lenduka, ene a lundula o ixi; A kala ku ngalasa ni kutululuka kuavulu.” Mu ithangana ikuxi? “Ixi-phe i xalela ku athu iá aiuka, ene a i lundula, muene mua tunga, o thembu iâ ki ibhu.”Jisálamu 37:9, 11, 29.

11. Kiebhi Nzambi kiene mu tu kuatekesa kukolesa o kixikanu kietu?

11 O kilunga kia Jihova ki ki difu ni mundu ua Satanaji, mukonda o kilunga kia Nzambi ki tu kuatekesa kukala ni uendelu uambote ua-nda tu bhangesa kutambula o muenhu ua kalelaku. Jezú ua sambe kua Jihova, mu kuzuela: “O muenhu ki uábhua uenhú: Kuila oso a ku ijiie eie u Nzambi ia kidi imoxi-èlele, ni kuijiia ue Jezú Kristu, ió ua mu tumu eie.” (Nzuá 17:3) Bhu kaxi ka kilunga kiê, Jihova uene mu tu bhana ioso i tua bhindamena phala ku muijiia kiambote. Mu kifika, tuala ni tu  madivulu tuavulu, madivulu, jividiu, ni milongi ia internete, iene mu tu kuatekesa kukolokota mu ku sidivila Nzambi. O kilunga kiê kiene mu sokejeka o ima, phala kubhanga o iônge mu 110. 000 ja ilunga ndenge ku mundu uoso. O milongi ia Bibidia i tuene mu di longa mu iônge ia ilunga, ni mu iônge ia makota, i suínisa o kixikanu kietu ni kidielelu kietu, ku ikanenu ia Jihova.Jihebeleu 10:24, 25.

KAZALA NGÓ “MUA NGANA”

12. Jimbulula o kitumu kia Bibidia kia lungu ni kukazala ngó “mua Ngana.”

12 O Jikidistá a mesena kukazala, a tokala ku di langa kiambote mu kusola o muthu phala kukazala nê. O Mak’â Nzambi a tu tendelesa: “Ki mu sote ku di ta mu kikalakalu kimoxi ni iá a kambe kuxikana, kala enu uenu mua sokela-nâ. Kuma o kuiuka ku kala kiebhi mu kisangela ni kubhengalala? Mba o muanha u di lunga kiebhi ni usuku?” (2 Kolindo 6:14) O Bibidia i tendelesa o jiselevende ja Nzambi phala kukazala ngó “mua Ngana,” kiki kilombolola kukazala ngó ni muthu a mu batizala, u belesela o itumu ia Jihova. (1 Kolindo 7:39) Se u kazala ni muthu ua zolo Jihova, eie ua-nda tunga ni muthu ua-nda kukuatekesa kukolokota mu ufiiele uê kua Nzambi.

Se u kazala ni muthu ua zolo Jihova, eie ua-nda tunga ni muthu ua-nda kukuatekesa kukolokota mu ufiiele uê kua Nzambi

13. Kitendelesu kiahi kia bhanene Nzambi ku akua Izalaiele?

13 Jihova uejiia o ima ia beta kota phala etu, o kitumu kiê kia kukazala ngó “mua Ngana,” ki kia lelu kana. Mu kifika, xinganeka ihi ia zuelele Jihova ku akua Izalaiele, ia lungu ni ifuxi ia kambele ku mu sidivila. Bhu kaxi ka Mozé, muéne ua a bhana o kitendelesu kiki: ‘Ku di tange-nau undandu; an’é a ahatu ku a bhane mu kusakana ni an’â a mala; eie ue kana kusola an’â a ahatu phala an’é, a mala; kuma enhó asoko-bhu ku hunganesa an’é a mala n’a lembua ku di tuma n’eme anga a kuata ku bheza jinzambi jengi; kiókio-phe o njinda ia Jihova i mi uamena anga mu jima o mbutu kindala.’Matendelelu 7:3, 4.

14, 15. Ihi ia bhiti ni Solomá mukonda dia ku xibhaka o kitumu kia Jihova?

14 Mu kubhita thembu kioso Solomá kia habe kala sobha ia Izalaiele, muéne ua sambele kua Jihova mu kubhinga unjimu, mu kiki, Jihova uevu o musambu uê. Mukonda dia kiki, Solomá a mu ijidile ku athu oso kuma sobha mukua unjimu, ni kuila, o kifuxi kiê kia zediuile. Katé muéne ni mvuale mukua Sabá, ua di uanene ni unjimu ua Solomá, muéne uambe: “Eie ua somboka mu kuijiia ni mu fuma ia jimbote joso ji ngevu.” (1 Jisobha 10:7) Maji o phangu ia Solomá, i tu longa ué ia lungu ni kiluezu kia ku xibhaka o kitumu kia Nzambi,  ni kukazala ni muthu ka sidivila Jihova.Ndongixi 4:13.

15 Sumbala a mu besoalele kua Jihova, Solomá ua bhukumukina o kitumu kia Nzambi. Solomá ua dizolo ni “ahatu avulu akua jixi jengi,” ka kexile abhezi a Jihova, iú uéza mu kala ni 700 a ahatu ni 300 ja ahatu a mukuá. Maka ahi a moneka? Kioso Solomá kia kuka, o akaj’ê “a mu diangula o muxima uê, hé u kuata kiá kukaiela jinzambi jengi . . . Solomá anga u bhanga kiaiibha ku mesu ma Ngana.” (1 Jisobha 11:1-6) O ku dilunga ni athu a iibha, kua mu bhangesa ku xisa o ubhezelu ua Jihova. O kia bhitile ni Solomá, ki tena kubhita ni muthu uoso-uoso mudietu. Mukonda dia kiki, etu ki tu xikina né ngó kuxinganeka kukazala ni muthu ka zolo Jihova!

16. Milongi iebhi i bhana o Bibidia ku muthu uala ni dikaza, ka sidivila Jihova?

16 Maji ihi i tuamba ia lungu ni muthu ua kazala, ande dia ku mateka kusidivila Jihova? O Bibidia izuela: “Enu ahatu beleselenu anume enu, phala né-mbe bhu kala ni iá a kamba kutumaka o maka ma Nzambi, ki bhekela ku a nganhala mu uendelu ua mbote ua ahatu â.” (1 Phetele 3:1) O milongi íii, ia tokala ué ku diiala diala ni muhatu ka bheza Jihova. Mu kidi, o Mak’â Nzambi a mu zuela: Sota kukala diiala mba muhatu uambote, ni kukumbidila o itumu ia Nzambi ia lungu ni ukaza. Kioso o kazola kê, kia-nda mona kuila eie ua lungulula o ukexilu uê, muéne ua-nda mesena ué kusidivila Jihova. Kiki, kiene mu bhita ni makaza avulu.

 DILUNGE NI IÓ A ZOLO JIHOVA

17, 18. Ihi ia kuatekesa Noué kubhuluka ku Dilúvio, ni ihi ia kuatekesa o Jikidistá ku hama ia dianga kubhuluka ku kibuikilu kia Jeluzaleme?

17 O ku dilunga ni athu a iibha ku tena ku tu bhangesa ku xibhaka Jihova, maji o ku dilunga ni athu ambote, ku tu kuatekesa kukolokota mu ku mu londekesa o ufiiele uetu. Noué phangu iambote phala etu. Mu thembu iê, o ‘kubhukumuka kua muthu kua di vualele mu ngongo, o ilunji ioso ia ku xinganeka kua muxima uê, ia iibhile ithangana ioso.’ (Dimatekenu 6:5) O athu akexile mu bhanga ngó ima ia iibha, mukonda dia kiki, Jihova ua mono kuma ua tokalele kubuika o mundu uenhó ua iibhile. Maji Noué ka di fuile ni athu enhá. O Bibidia izuela kuila, muéne uexile “muthu uaiuka,” ni kuila, muéne ‘uende ni Nzambi ia kidi.’Dimatekenu 6:7-9.

18 Noué ka dilungile ni athu ka zolele Jihova. Muéne ni muiji uê akexile mu kalakala ni kusuína kuoso mu kutunga o álaka, muene uexile ué “mujimbuidi ua maka maiuka.” (2 Phetele 2:5) Kikale Noué ni muhatu uê, ni kitatu kia an’ê ni ahatu’â, exile makamba ambote. Ene a kolokota mu kubhanga o ima ia uabhele Nzambi, mukonda dia kiki, ene a bhuluka ku Dilúvio dia menha. Etu enoso tua tundu kua ene, mukonda dia kiki, tua tokala kusakidila Noué ni muiji uê, mukonda dia kubelesela Jihova, ni ku dituna ku dilunga ni athu a iibha. Kiene ué kia bhiti ku hama ia dianga, mu thembu ienioió, o Jikidistá ka xikinine ku dilunga ni athu ka zolele Jihova. Ene a mu belesela, mukonda dia kiki, kioso kia buika o mbanza ia Jeluzaleme ku muvu ua 70 K.K., ene a bhuluka.Luka 21:20-22.

O ku dilunga ni athu a zolo Jihova, ku tu kuatekesa kuxinganeka o muenhu u tua-nda tambula ku mundu uobhe (Tanga o kaxi 19)

19. Ihi ia-nda tu kuatekesa kukolokota mu ufiiele uetu kua Jihova?

19 Kala Noué ni muiji uê, ni Jikidistá ku hama ia dianga, etu ki tu xikina kubhanga o ukamba ni athu ka sidivila Jihova. Etu tuala ni mazunda ni mazunda a jiphange ja fiiele, ji tu tena kusola phala kubhanga nau o ukamba. Ene a-nda tu kuatekesa ku ‘di fikidila mu kuxikana,’ mu jithembu jiji ja bhonzo. (1 Kolindo 16:13; Jisabhu 13:20) Xinganeka o kisangusangu kia kubhuluka ku dizubhilu dia mundu iú ua iibha, ni kutunga ku mundu uobhe ua Jihova! O kima kia beta-o-kota ki tua tokala kubhanga kindala, o ku dituna ku dilunga ni athu a iibha!