“O kididi kia kutula inama iami nga kà ki jingisa.”IZAIA 60:13.

MIMBU: 28, 136

1, 2. Ihi i tena kulombolola ué o kizuelu ‘kididi kia kutula o inama,’ mu Mikanda ia Hebalaiku?

JIHOVA NZAMBI uambe: ‘O diulu kiandu kiami, oxi kididi kia ku tula o inama iami.’ (Izaia 66:1) Nzambi ua kexile ué mu zuela ia lungu ni ‘kididi kia ku tula o inama’ iê, kioso kiambe: “O kididi kia kutula inama iami nga kà ki jingisa.” (Izaia 60:13) Kiebhi muéne kia jingisa o kididi kia kutula o inama iê, ni ku ki fuamesa dingi? Kiki kilombolola ihi phala o athu a tungu ku kididi kia kutula o inama iê, mba mu ixi?

2 Mu Mikanda ia Hebalaiku, o kizuelu ‘kididi kia kutula o inama,’ kilombolola ué o tembulu iexile mu Izalaiele iokulu. (1 Malunda 28:2; Jisálamu 132:7) Jihova uexile mu mona kuila, o tembulu ia fuamene, mukonda iexile o kididi kia betele kota kia ubhezelu. Iexile o kididi kia kuximana Jihova mu ixi.

3. Ihi ilombolola o kididi kia beta kota kia ubhezelu lelu, ni thembu kuxi kia mateka?

 3 Ihi ilombolola o kididi kia ubhezelu lelu? Ki inzo ia difuangana ni tembulu. Kilombolola tembulu mu nzumbi i ximanesa Jihova, o inzo ió tunge ndenge. Ihi ilombolola o tembulu mu nzumbi? Ilombolola o ima ia iudika Nzambi, phala ku kuatekesa o athu kukala makamba mê, ni ku mu bheza. Muéne ua iudika o ima íii bhu kaxi ka sata ia kukula kua Jezú. O ima íii ia mateka ku muvu ua 29, kioso Jezú kia mu batizala, ni ku mu unda kala Mukunji ua Dikota ua Jihova, mu tembulu mu nzumbi.Jihebeleu 9:11, 12.

O mundu ua Jihova uejiia kuila, o kima kia beta kota o ku mu ximana lelu mu ixi

4, 5. (a) Kala kia ki tange mu divulu dia Jisálamu 99, ihi ia mesena o kubhanga o abhezi a kidi a Jihova? (b) Ihi i tua tokala ku dibhuidisa?

4 Etu tu sakidila kiavulu Nzambi, mukonda dia kuiudika o ima phala o ubhezelu ua kidi. Tu londekesa o kisakidilu kietu, kioso ki tu zuela ku athu, ia lungu ni dijina dia Jihova, ni ujitu ua tu bhana, o sata ia kukula. Tua sanguluka kiavulu mu kuijiia kuila, mazunda a nake a Jikidistá ndenge a mu bheza Jihova izuua ioso! Sumbala athu avulu mu jingeleja a di nganala mu ku banza kuila, a-nda ximana Nzambi ku diulu kioso kia-nda fua, maji o mundu ua Jihova uejiia kuila, o kima kia beta-o-kota o ku mu ximana lelu mu ixi.

5 Kioso ki tu ximana Jihova, tu kaiela o phangu ia jiselevende ja fiiele ja Nzambi a a tange mu divulu dia Jisálamu 99:1-3, 5-7. (Tanga.) Maiala a fiiele kala Mozé, Alá, ni Samuuele, a bhangele ioso phala kukuatekesa o ubhezelu ua Nzambi m’ukulu. Lelu, ande dia Jikidistá a a undu ku mateka kusidivila kala akunji ni Jezú ku diulu, ene a mu sidivila kiá Jihova ni ufiiele uoso mu tembulu mu nzumbi. Mazunda ni mazunda a “jimbudi jamukuá” ene mu a kuatekesa. (Nzuá 10:16) O ibuka iiadi a bheza kumoxi Jihova. Maji, tua tokala ku dibhuidisa: ‘O kuila nga mu bhanga ioso phala kukuatekesa o ubhezelu ua kidi?’

KUSANGA O ATHU A SIDIVILA NZAMBI MU TEMBULU MU NZUMBI

6, 7. Maka ahi a moneka mu kilunga kia dianga kia Jikidistá, ni ihi ia bhitile ku muvu ua 1919?

6 Ki ku bhitile hanji 100 ia mivu kioso kia bhangele o Kilunga kia dianga kia Jikidistá, o ubhezelu ua makutu ua mateka kukula kala kia ki kanene mu Mikanda Ikola. (Ikalakalu 20:28-30; 2 Tesalonika 2:3, 4) Tundé o kithangana kieniókio, kia bhonzele kiavulu kusanga o abhezi a kidi a Nzambi. Kua bhitile hama ni ji hama ja mivu, ande dia Jihova ku tuma Jezú kumona se nanhi ua kexile mu bheza Nzambi mu tembulu Iê mu nzumbi.

7 Ku muvu ua 1919, o athu a tena kumona ni kuijiia o jiselevende ja kexile mu bheza  Nzambi mu tembulu iê mu nzumbi. Ene a lunguluile o ukexilu uâ ua kubheza, phala Jihova ku xikina o ubhezelu uâ. (Izaia 4:2, 3; Malakiia 3:1-4) Mu kiki, o kisuma kia monene poxolo Phaulu mu hama ja mivu kudima, kia matekene ku dikumbidila.

8, 9. Ihi ilombolola o “palaízu” ia mono Phaulu mu kisuma?

8 O kisuma kia Phaulu tu ki sanga mu divulu dia 2 Kolindo 12:1-4. (Tanga.) Mu kisuma kieniókio, Jihova ua londekesa kua Phaulu o kima kieji bhita ku hádia. Ihi ilombolola o “palaízu” ia mono Phaulu? Kia dianga, ilombolola o palaízu ia-nda kuíza ku hádia mu ixi. (Luka 23:43) Kia kaiiadi, i tena kulombolola o kutululuka kua-nda kala ku mundu uobhe. Kia katatu, ilombolola o ujitu ua katunda ua kukala ku diulu.Dijingunuinu 2:7.

9 Mukonda diahi Phaulu ua zuela kuila, muéne uevu “ima ki i xikina ku i lombolola mu maka, ima i kola ki i xikina ku i zuela ni mizumbu ia muthu?” Mukonda, ki kiexile hanji o kithangana phala muéne ku jimbulula kiambote, o ima ia madiuanu ia monene mu kisuma. Maji lelu, Jihova u tu ehela ku tangela akuetu o ima ia lungu ni mabesá ene mu tambula o mundu uê lelu!

10. Mukonda diahi o palaízu mu nzumbi, ni tembulu mu nzumbi ki ilombolola kima kimoxi ngó?

10 Tuene mu zuela mu veji javulu ia lungu ni palaízu mu nzumbi, maji ihi-phe ilombolola o palaízu mu nzumbi? Ilombolola o paze i bhana Nzambi ku mundu uê. Mu kiki, o palaízu mu nzumbi, ni tembulu mu nzumbi, ki i difu. O tembulu mu nzumbi, o ima ia iudika Nzambi phala o ubhezelu ua kidi. O palaízu mu nzumbi, ilondekesa kiambote o athu a a xikina kua Nzambi, a mu bheza mu tembulu iê mu nzumbi.Malakiia 3:18.

11. Ujitu uahi u tuala nau lelu?

11 Tu sanguluka kiavulu mu kumona kuila, tundé ku muvu ua 1919, Jihova uene mu kuatekesa o athu a kambe ku iuka, kukalakala ni kusuína, phala kubandekesa o palaízu mu nzumbi. O kuila eie uene mu kuatekesa o kikalakalu kiki kia katunda? O kuila eie ua mu bhana valolo ku ujitu ua kukalakala kumoxi ni Jihova, phala ku ximanesa o dijina diê mu ixi?

JIHOVA UA MU BHANGESA O KILUNGA KIÊ KU FUAMA DINGI

12. Kiebhi ki tuejiia kuila, o kikanenu mu divulu dia Izaia 60:17, kia mu di kumbidila? (Tala o foto ia dianga.)

12 O Polofeta Izaia ua kanene kuila, mu kilunga kia Nzambi mu ixi, ima iavulu ieji lunguluka. (Tanga Izaia 60:17.) O Minzangala mba o Jikidistá ja ubhe, evu mba a tange ngó o ima ia lunguluka. Maji kuene jiphange javulu ja mala ni ja ahatu, a mono o ima ioso íii! O jiselevende jiji ja fiiele, a xikina ni kidi kioso kuila, Nzambi ua mu kuendesa o kilunga Kiê bhu kaxi ka Sobha  ietu Jezú Kristu! Kioso ki tuívua o misoso ia Jikidistá jiji, o kixikanu kietu ni kidielelu kietu kua Jihova, ki di bandekesa dingi.

O “palaízu” mu nzumbi, ilombolola o paze i bhana Nzambi ku mundu uê lelu

13. Kala ki tu tanga mu divulu dia Jisálamu 48:12-14, ihi i tua tokala o kubhanga?

13 O Jikidistá joso ja kidi, a tokala kulonga o athu, o kidi kia lungu ni kilunga kia Jihova. Tu diuana mu kumona kuila, sumbala tua tungu bhu kaxi ka mundu ua Satanaji, maji né kiki tuala mu paze ni jiphange jetu! Tua-nda sanguluka mu kuzuela ia lungu ni kilunga kia Jihova ni palaízu ietu mu nzumbi, ku ‘miji ia kèza-ku!’—Tanga Jisálamu 48:12-14.

14, 15.Ima iahi ia lungulula kioso kia bhiti o muvu ua 1970, ni kiebhi o kilunga kiene mu katula mbote?

14 Adiakimi avulu mu ilunga ietu, a mono o ima ia lungulula, ia bhangesa o kilunga kia Jihova kuuabha dingi. Ene a di lembalala o thembu, kioso o kilunga kia kexile ni selevende imoxi ia kilunga, mu veji dia kukala ni kibuka kia tufunga, kioso o jixi ja kexile ni selevende imoxi ia filiiale, mu veji dia kukala ni Kibuka kia Filiiale, mba kioso o mutuameni ua Mbonge ietu, ua kexile mu kuendesa o ima, mu veji dia Kibuka Kia Utuminu kia Jimbangi ja Jihova. Sumbala o jiphange joso jiji a kexile ni akuatekexi a fiiele, maji muthu umoxi ngó ua kexile mu batula o maka mu ilunga, mu jifiliiale ni ku mbonge ietu. Kioso kia bhiti o muvu ua 1970, o ima ia lunguluka, o kibuka kia tufunga ene akexile mu kuendesa o ima, mu veji dia kukala muthu umoxi ngó.

 15 Mukonda diahi o ima ia lungulula ia kuatekesa o kilunga? Mukonda akexile mu tendela dingi o milongi ia Bibidia. Mu veji dia kukala muthu umoxi u batula o maka oso, o kilunga kiene mu katula mbote mu uhete ua tufunga tuoso, mukonda o tufunga, “maujitu” a tu bhana Jihova.Efezo 4:8; Jisabhu 24:6.

Jihova ua mu bhana ku athu oso ku mundu, o itendelesu ia bhindamena ku muenhu (Tala o kaxi 16, 17)

16, 17. Ima iebhi ia lungulula mu thembu íii, i ku sangulukisa dingi, ni mukonda diahi?

16 Xinganeka o milongi ia lungulula mu madivulu metu. Tu sanguluka kiavulu kioso ki tu bhana o madivulu metu ku athu mu ukunji, phala ku a kuatekesa. Xinganeka ué o ukexilu u tuene mu kalakala ni ji makina ja ubhe, phala kuboka o njimbu iambote. Mu kifika, tuene mu sanga dingi o athu bhu kaxi ka kijimbuete kietu jw.org, ni ku a kuatekesa mu ima ia bhindamena. Mu ima ioso íii, ia lungulula, tu tena kumona o henda ia Jihova ku athu oso mu ixi.

Tu sakidila o milongi ia Bibidia, i tuene mu di longa mu ji xikola jetu

17 Tua sanguluka ué kiavulu mukonda a sosola o iônge ietu, phala ku tu kuatekesa kukala dingi ni kithangana kia kubhanga o ubhezelu uetu ku muiji mba ku di longa ubheka uetu. Tua sanguluka ué ni ukexilu ua sokejeka o iônge ionene ni iônge ia makota. Mivu ioso o ima ia mu uabha dingi! Tu sakidila ué kiavulu mukonda dia milongi ia Bibidia, i tuene mu di longa mu ji xikola jetu. O ima ioso íii ilondekesa kuila, Jihova ua mu kuendesa o kilunga kiê, ni ku bhangesa o palaízu ietu mu nzumbi kuuabha dingi!

 KIEBHI KI TU TENA KUKUATEKESA O PALAIZU MU NZUMBI KUUABHA DINGI

18, 19. Kiebhi ki tu tena kukuatekesa o Palaízu ietu mu nzumbi ku fuama dingi?

18 Jihova ua tu bhana o ujitu ua kukuatekesa o palaízu ietu mu nzumbi kuuabha dingi. Maji kiebhi ki tu bhanga kiki? Tu tena kubhanga kiki, kioso ki tu boka o njimbu iambote ni ku suína kuoso, ni kubhanga maxibulu. Kioso ki tu kuatekesa muthu kukala selevende ia Nzambi, etu tua mu kuatekesa o palaízu ietu mu nzumbi kukula dingi.Izaia 26:15; 54:2

19 Etu tu kuatekesa ué o palaízu ietu mu nzumbi kuuabha dingi, kioso ki tu bhanga ioso phala kukala ni ukexilu ua Ukidistá. O kubhanga kiki, kubhangesa o athu engi kuíza mu palaízu ietu mu nzumbi. Mu kidi, o athu ka bokona ngó mu kilunga mukonda dia kuijiia ku tuala na-ku kua lungu ni Bibidia, maji mukonda dia ukexilu uetu ua zele ni uendelu uetu uambote ua tululuka, mu kusuluka, ene a zukama kua Jihova ni Jezú.

Eie u tena kukuatekesa o palaízu ietu mu nzumbi kukula (Tala o kaxi 18, 19)

20. Kala ki zuela o divulu dia Jisabhu 14:35, ukexilu uebhi u tua tokala kulondekesa?

20 Jihova ni Jezú a sanguluka kiavulu mu ku mona o palaízu ietu mu nzumbi lelu. O ku sanguluka ku tuala na-ku lelu mu kukuatekesa o Palaízu ietu kuuabha dingi, kulondekesa o kisangusangu kia dikota ki tua-nda kala na-kiu kioso ki tua-nda kalakala, phala kubhangesa o ixi ku kituka palaízu. Ithangana ioso tua tokala ku di lembalala o milongi mu divulu dia Jisabhu 14:35, iambe: “Muenexi ua di-uabhela ni selevende ia sanguluka; maji o njinda iê-phe i landula uoso o semenhi u bhanga ima i kuatesa jisonhi.” Tu londekese-nu unjimu, kioso ki tuia ni kukalakala phala kubhangesa o palaízu ietu mu nzumbi kuuabha dingi.