Ku bokona mu madisá

Ku bokona mu madisá

Atangi a Madivulu Metu Ebhula

Atangi a Madivulu Metu Ebhula

O kuila kioso o Jikidistá kia fuá a tokala ku a oha?

O Mikanda Ikôla ki i zuela kuila, o athu kioso kia fuá ka tokala ku a oha.

Kuene misoso ia Bibidia ilondekesa kuila, o mikutu ni ifuba ia athu a kexile mu i oha. (Josu. 7:25; 2 Mal. 34:4, 5) O misoso íii ilondekesa kuila, o athu ió a oha, mukonda ka fuamene ku a funda. Maji ithangana ioso ia kexile mu kuoha o athu, ka kexile mu bhanga kiki mukonda o athu enhó ka fuamene ku a funda.

O musoso ua lungu ni ufuilu ua Sobha Saúlu ni an’ê kitatu, u londekesa o kidi kiki. O kiuana kiâ afú, mukonda a kexile mu luua ita ni akua Fidíxia. Umoxi uexile Jonata, uexile dikamba dia fiiele dia Davidi. Kioso o mala oso akua nguzu akua Izalaiele a tungile mu ixi ia Jabezi, kiévu o ima ia bhitile, ene a katula o mikutu iuana, a ioha, anga a funda o ifuba. Mu ku bhita kithangana, Davidi ua ximana o maiala enhó akua Izalaiele, mukonda dia kima kia bhangele.1 Sam. 31:2, 8-13; 2 Sam. 2:4-6.

O kidielelu kia Bibidia kia lungu ni ió afú, o difukunukinu, o kithangana kia Nzambi kia-nda bheka ku muenhu afú kiá. Ki kale o muthu u fuá, a mu oha mba kana, Jihova uala ni kutena kua ku bheka ku muenhu, o muthu uafu kiá ni mukutu ua uobhe. O minzangala itatu akua Hebeleu, a mesenene ku a jibha kua Sobha Nabukodonozolo mu kijiku kia túbhia tua muzukuta. Ene ka kexile ni uôma mukonda ejidile kuila né muene se a a jibhile, Nzambi ueji ku a fukununa. (Dan. 3:16-18) Kiene ué kimoxi ni jiselevende ja fiiele ja Jihova a a jibha ni ku a oha mu ibende ia akua ji Nazí. Jiselevende javulu ja Nzambi afú ku ji bomba, mu kiki, ka tena ku sanga o mikutu iâ. Maji né kiki, a-nda ku a fukununa.Dij. 20:13.

Jihova ka bhingi kuongeka o jimbandu joso ja mukutu ua muthu phala ku mu fukununa. Tu tena ku mona o kididi kiki, mu ukexilu ua Nzambi ua ku fukununa o Jikidistá a a undu, phala ku kala ni muenhu ku diulu. Kála Jezú, “a mu phaphumuna mu nzumbi,” o Jikidistá a a undu, a a fukununa ni mukutu ua nzumbi, maji ki muthu uéngi kana. Ene kai ku diulu ni mikutu iâ ia xitu.1 Phe. 3:18; 1 Kol. 15:42-53; 1 Nzu. 3:2.

O kidielelu kietu ku difukunukinu, ki ki lungu ni ima ia-nda bhanga ni mukutu uetu ua xitu, maji kia lungu ni kixikanu kietu kua Nzambi, uala ni kutena ni vondadi ia ku kumbidila o ikanenu iê. (Ika. 24:15) Nange ki tu tendela kiambote kiebhi Nzambi kia fukununa o athu mu madiuanu m’ukulu, nange ki tuejiia ué kiambote kiebhi kia-nda fukununa o athu ku hádia. Maji né kiki, tu dielela kuila Jihova ua-nda fukununa o athu afu. Muéne ua tu bhana o ‘kidielelu,’ kioso kia fukununa Jezú.Ika. 17:31; Luka 24:2, 3.

Kima kiambote o Jikidistá ku kaiela o ijila, ni ku xila o ibanzelu ia athu mu ixi mua tungu, ia lungu ni athu a fuá. (2 Kol. 6:3, 4) Mu ku suluka, o muiji ua tokala ku sola se a-nda kuoha o muthu uafu, mba a-nda mu funda.