O MUTUDI ngadiama, u koteka mon’ê umoxi ua diiala. Muéne ka xikina ia mu mona. Ki ku bhitile kithangana, kia kuatele bhu maku o kimbi kia mon’ê. Bhu kithangana ni mbandu, o muhatu ua mu mona mon’ê ua fukunuka, iu u sanguluka mu ku mu mona ua mu kuelela. O mujitu ua kexile ku bhata diê ua mu ambela: “Tala, mon’é-ze ió, ua phaphumuka kiá.”

O difukunukinu didi, dia bhiti kiá ku 3.000 ja mivu. Eie u tena ku tanga o musoso iú mu divulu dia 1 Jisobha mu kibatulu kia 17. O mujitu Elija, uexile polofeta ia Nzambi. O mama nanhi? Muéne ka mu tumbula o dijina, maji mutudi mukuá Seleta. O difukunukinu dia mon’ê, kizulukutu kia mu suinisine o kixikanu kiê. Kioso ki tua-nda di longa ia lungu ni muéne, tua-nda katula phangu iambote.

ELIJA UA SANGE MUTUDI MUKUA KIXIKANU

Jihova ua kanene kuila kueji bhita mivu iavulu sé ku noka, mu utuminu ua sobha Akabe, uexile sobha ia iibha mu Izalaiele. O kioso kia bhana o ngolokela kuila ki kueji noka, Nzambi ua lange Elija ku sobha Akabe, iu ua mu disa ni mbolo ni xitu ia kexile ku mu bhekela ku ilombelombe. Jihova anga uambela Elija: “Fundumuka, uie mu Seleta, ku ixi ia Sidone, ua kà kale muenhomo; mukonda muenhomo nga tumina-mu muhatu ua mutudi phala ku ku disa.”1 Jis. 17:1-9.

Elija kioso kia bhixila mu Seleta, muéne ua mono mutudi ua muhatu ua mu xanga jihuinhi. O kuila muéne uexile o muhatu ueji bhana o kudia ku polofeta? Kiebhi kieji mu disa se muéne uexile ngandiama? Sumbala Elija ua kexile ni hele maji ua zuela ni muhatu. Muéne uambe: “Nga kudiondo ngi bhekele-ku tumenha mu nganza ngi nue.” Kioso kiai o muhatu ku mu takena o menha, Elija ua mu bhingi dingi: “Kindala ngi bhekele-ku ue kamutetu ka mbolo bhu lukuaku lué.” (1 Jis. 17:10, 11) O  ku bhana kudia ku mujitu, ki ku bhonzele, maji o ku mu bhana mbolo kua bhonzele.

Muéne ua tambuijila: ‘Ngana Nzambi ié kuene kuala, kuma eme né ngó mbolo imoxi ki ngala na-iu; ngala ngó ni dibhûbhu dia tu fuba mu ímbia, ni tu maji tuòfele mu thenda. Kiki tala kunu, nga xanga o tu mixi tua jihuinhi tutu, eme ngala kuia kiá ku lamba o tu fuba tuenhoto anga tudia n’eme ni mon’ami, anga tufuetu kiá.’ (1 Jis. 17:12) Tu xinganeke ihi ilombola o maka akexile mu tá.

O mutudi uejidile kuila Elija ua tokalele mu Izalaiele, uejidile ué kuila uexile mubhezi a Nzambi. Kiki tu ki mona mu izuelu iê kioso kiambe: “Ngana Nzambi ié kuene kuala.” O izuelu iê ilondekesa kuila muéne uejidile kima kia lungu ni Nzambi ia Izalaiele, maji kejidile ima iavulu, kiki kiene kia mu fidisa kuzuela, “Nzambi iami,” kioso kia tumbula Jihova. Muéne ua tungile mu Seleta, o mbanza ia ‘tokalele ku’ Fidíxia mu ixi ia Sídone. Nange oso mu Seleta exile abhezi a Bahale. Maji Jihova ua monene kima kiambote ku mutudi muenho.

Sumbala o mutudi muenho uexile ngadiama, mukuá Seleta, ua kexile bhu kaxi ka abhezi a makutu, maji o ukexilu ué ua londekesele kuila ua kexile ni kixikanu ku Nzambi ia Izalaiele. Jihova ua tumikisa Elija mukonda dia muhatu íu ni muéne, Elija o polofeta iê. O musoso iú u tu longa phangu iambote.

Ko athu oso a tungile mu Seleta, mua kexile o ubhezelu ua Bahale, exile athu a iibha. Mu ku tumikisa Elija ku mutudi iú, Jihova ua londekesa kuila Muéne uejiia o athu ambote kala ku Mu sidivila luua. Sé phata, “ku akua jixi joso, uoso u mu xila muène, hé u bhanga ioso iaiuka, Muène u mu tambulula.”Ika. 10:35.

Athu akuxi a tungu mu diembu diê a difu ni mutudi mukuá Seleta? Sumbala ene a lungu ni athu a bheza jinzambi ja makutu, nange a mesena ku sanga o ubhezelu ua kidi. Nange kejiia kima kia lungu ni Jihova, mba ejiia bhofele, mu kiki a bhindamena kikuatekesu phala ku sanga o ubhezelu ua kidi. O kuila ua mu sota o athu iá, mba ku a kuatekesa?

“MAJI U DIANGA-PHE KU NGI BHANGELA-KU EME KAMBOLO KÓFELE”

Xinganeka kiambote ia bhingi Elija ku mutudi. Muéne ua zubhile ku mu ambela kuila kioso kieji zubha kulamba o kudia kua suku-ko, phala muéne ni mon’ê, ene eji kudia ni kufua. Né kiki, ihi ia zuela Elija? “Kana kukala ni uôma; ndé ka bhange ki ua zuela, maji u dianga-phe ku ngi bhangela-ku eme kambolo kófele, anga u ngi bhekela-ku bhu kanga bhabha; hé u bhanga kiua o iê eie ni ia mon’e. Mukonda o Jihova, Nzambi ia Izalaiele, uambe kiki: O fuba mu ímbia ki ia-nda kubhua, o maji ue mu thenda ki ma-ndu kamba, katé kizuua Jihova kia bhana dingi o mvula mu ngongo.”1 Jis. 17:11-14.

Nange o athu eji zuela, ‘tu ku bhana o kudia kuetu kua tolo ku tuala na-ku? Ua mu tonoka anga.’ Maji ki kiene kiambe o mutudi. Sumbala kejidile kiavulu ia lungu ni Jihova, muéne ua dielela kua Elija, iu ua bhange ia mu tumina. Kiki kia bhonzele kiavulu—maji muéne ua bhange kiambote!

O kixikanu kia mutudi ku Nzambi ia Elija, Jihova, kua mu bhulula o muenhu uê ni ua mon’ê

Nzambi ka landuka o mutudi ua ngadiama. Kala kia mu kanene Elija, Jihova ua bhangesa kuila muéne u kala ni kudia kuavulu, kua sokele phala Elija ni mutudi, ni mon’ê, katé kia mateka dingi ku noka. Sé phata, “o fuba mu ímbia ki iabhu, o maji ue mu thenda ki ma kambe. Anga ki bhita kienhiki, mu  kutenesa o kizuelu kia Ngana kia tangele mu ukunji ua Elija.” (1 Jis. 17:16; 18:1) Se o muhatu ka bhangele kála kia mu tumine Elija, o mbolo ia bhangele ni fuba iê ni maji mê akexile na-u, nange ieji kala o mbolo iê ia sukina. Mu veji dia kiki, muéne ua londekesa kixikanu, ua dielela kua Jihova, iu ua dianga ku bhana o kudia kua Elija.

O phangu íii, i tu longa kuila, Nzambi u besoala ió u mu xikana. Se u di bhana ni ibhidi anga u londekesa kixikanu, Jihova ua-nda ku kuatekesa. Muéne ua-nda kala Mubhani, Mulangidi, Dikamba phala ku ku kuatekesa ku dibhana ni ibhidi iê.Mak. 3:13-15.

Ku muvu ua 1898, Zion’s Watch Tower (O Mulangidi) ua tange o disá didi dia lungu ni musoso ua mutudi: “Se o muhatu ua kexile ni kixikanu kia bhingi phala ku belesela, muéne ueji tambula o kikuatekesu kia Ngana bhu kaxi ka Polofeta; se muéne ka londekesele o kixikanu, hinu ua solele mutudi uéngi uexile ni kixikanu. Kiene kimoxi uê ni etu—mu veji javulu ku muenhu, Ngana u tu bheka bhu kididi phala ku polovala o kixikanu kietu. Se tu londekesa o kixikanu, tua-nda tambula mabesá; se ki tu ilondekesa, tu texi o mabesá.”

Kioso ki tu di bhana ni ibhidi, tua tokala ku sota kikuatekesu mu Mak’â Nzambi ni mu madivulu metu a Bibidia. Mu ku suluka, tua tokala ku bhanga kala ki tu tendelesa Jihova, né muene se ki bhonza. Sé phata tua-nda tambula mabesá se tu kaiela o itendelesu íii mu divulu dia Jisabhu: “Dielela kua Jihova ni muxima ué uoso; kana kudielela ngó o kilunji kié. Mu suue muene ngó mu mauendelu mé moso, muene a iukise o njila jé joso.”Jisa. 3:5, 6.

‘UEZA KU NGI JIBHILA MON’AMI?’

Mu ku bhita kithangana o kixikanu kia mutudi a ki polovala dingi. O Bibidia iambe: “O kia bhiti ima iii, mon’a muhatu muen’iú o mama ia mukua dibhata, kukata ku mu kuata; anga uhaxi ua mona u bhita kiavulu, katé kia tula o muenhu.” Mu ku tokuesa kuebhi kua kexile mu tunda o uhaxi iú, o mama iexile ni dilamba uambela Elija: “Kima kiahi ki nga ku bhange eie u muthu ua Nzambi, tata? Kiene ki uejila ko kuami, mbé o ku ng’idikiza kituxi kiami ki nga jimbile, ni ku ngi jibhila mon’ami, kuambe?” (1 Jis. 17:17, 18) Ihi i lombolola o izuelu íii ia iibha?

O kuila o muhatu ua lembalala kituxi kia kexile ku mu lualesa? O kuila muéne ua banzele kuila o kalunga ka mon’ê, ka tundile ku diulu ni kuila Nzambi ua tumine Elija, o mukunji ua Nzambi, phala o kalunga kaka? O Bibidia ki i tu tangela, maji tuijia kuila: O mutudi ka tatela Nzambi mu kima kia iibha.

Elija nange ua thandanganhele ni kalunga ka mon’a mutudi, ni kibanzelu kia mutudi kuila, muéne ua jibhile o mon’ê. Kioso kiambata mon’ê ku inzo ia thandu, Elija ua dikola: “Kuambe, eie u Jihova, Nzambi iami, tata! Kifua u tatesa ue katé ni mutudi iú, nga tunganê anga u mu jibhila mon’ê?” O polofeta ka mesenene kuila o dijina dia Nzambi di fumana kia iibha, se Muéne uehelele o mutudi ió, uexile muhatu uambote, ku bandekesa ku hadi. Mu kiki Elija ua diondo: “Eie u Jihova, u Nzambi iami, nga ku diondo, muenhu ua kamona kaka vutula-u u bokone dingi moxi diê.”1 Jis. 17:20, 21.

“TALA, MON’É-ZE IÓ, UA PHAPHUMUKA KIÁ”

Jihova uevu o musambu ua Elija. O mutudi ua bhanene o kudia ku polofeta ia Nzambi, ua kexile ni kixikanu. Nange Nzambi uehela o mon’a ku kata, mu kuijiia kuila o difukunukinu—dia dianga ku tanga mu Mikanda Ikôla—dieji bhita ni ku bhana kidielelu ku athu ku hádia. Kioso Elija kia sambe kua Muéne, Jihova ua bheka o mon’a ku muenhu. Xinganeka o kisangusangu kia mutudi kioso kiambe Elija: “Tala, mon’é-ze ió, ua phaphumuka kiá.” Bhenhobho muhatu uambela Elija, uixi: “Mu kiki ki ua bhange ng’ejiia kiá kindala kuma eie u muthu ua Nzambi muene, ni kuila ue o kizuelu kia Ngana, mu dikanu dié, kia kidi.”1 Jis. 17:22-24.

O musoso mu divulu dia 1 Jisobha mu kibatulu kia 17, ki u zuela dingi, ihi ia bhiti ni muhatu iú. Maji o ku mu tumbula kuala Jezú, kulondekesa kuila, muéne ua kituka selevende ia fiiele ia Jihova. (Luka 4:25, 26) O musoso u tu longa ué kuila, Nzambi u besoala oso a bhanga ima iambote ku jiselevende jê. (Mat. 25:34-40) Kiki kilondekesa kuila Nzambi, u kuatekesa o jifiiele né muene mu ithangana ia bhonzo. (Mat. 6:25-34) O musoso iú, u tu londekesa o vondadi ia Jihova ni uhete ué, ua ku bheka o athu afú ku muenhu. (Ika. 24:15) Sé phata o kidi kiki, ki tu bhangesa ku lembalala o mutudi mukua Seleta.