Ku bokona mu madisá

Ku bokona mu madisá

Jihova—o Dikamba Dietu Dia Beta-o-kota

Jihova—o Dikamba Dietu Dia Beta-o-kota

“Nzambi anga u mu ixana, uixi: Kamba diami Mbalahamu.”TIIA. 2:23.

1. Mu ku tu bhanga mu kídifua kia Nzambi, uhete uahi u tuala nau?

O ATHU ene mu ta kifika kia kuila, “ki kala o tata kiene ué ki kala o mona.” Sé phata, an’a avulu a difuangana ni jitata jâ. Maji o mon’a, u katula ku ídifua ia tata ni ku mama. Jihova, o Tata ietu ia diulu, muéne ua tu Bhana o muenhu. (Jisá. 36:9) Sumbala tu an’e mu xitu, maji tuala ni ídifua iê. Mu ku tu bhanga mu kídifua kiê, tu tena ku xinganeka, ku sola o ima, ni ku sola makamba ambote.Dim. 1:26.

2. Kiebhi ki tu tena ku kala ni Ukamba ua beta-o-kota ni Jihova?

2 Jihova u tena ku kala Dikamba dietu dia beta-o-kota. Tu tena ku kala ni ukamba iú mukonda Nzambi ua tu zolo ni mukonda dia kixikanu kietu kua muéne ni kua Mon’ê. Jezú uambe: “Mbata Nzambi ua zola o mundu, katé kia suku mu kubhana Mon’ê umoxi-èlele, phala uoso u mu xikana muène, káfue, maji a kale ni muenhu ki uábhua.” (Nzuá 3:16) M’ukulu kuexile athu avulu akexile ni ukamba uambote ni Jihova. Tu di longe kiiadi kia athu.

‘MBALAHAMU DIKAMBA DIAMI’

3, 4. Ihi ki i difuile mu ukamba ua Mbalahamu ni Jihova, ni ukamba ua akua Izalaiele ni Jihova?

3 Jihova uexana o tata ia akua Izalaiele oso, ‘Mbalahamu dikamba diami.’ (Iza. 41:8) O divulu dia Kaiiadi dia Malunda 20: 7, di tumbula ué Mbalahamu kuila kamba dia Nzambi. Ihi ia bhangesa kuila Mbalahamu u kala ni ukamba uambote ni Mubhangi uê? O kixikanu kia Mbalahamu.Dim. 15:6; tanga Tiiaku 2:21-23.

4 O muiji ua Mbalahamu uexile o kifuxi kia Izalaiele, akexile ué ni Ukamba ni Jihova, muéne uexile ué Tata iâ. Maji ene a texi o ukamba uâ ni Nzambi. Mukonda diahi? Mukonda ene ka kexile dingi mu dielela mu ikanenu ia Jihova.

5, 6. (a) Kiebhi ki ua kituka Kamba dia Jihova? (b) Ihi i tua tokala ku di ibhuidisa?

5 Kioso ki uia ni kuijiia Jihova, o kixikanu kiê ki suína dingi, ua-nda mu zola ué kiavulu. Xinganeka kioso ki ua mateka ku di longa kuila Nzambi Muthu ua kidi, ni kuila eie ueji tena ku kala kamba diê dia kazola. Ua di longo ué kuila, etu enioso tu akua ituxi, mukonda dia kituxi kia Adá. Ua di longo kuila, o athu ku mundu kala ku paze ni Nzambi. (Kol. 1:21) Ua di longo ué kuila, o Tata ietu ia henda ku diulu ki muthu uala dikanga, ni kuila muéne u tu langa. Kioso ki tua di longo kuila Jihova ua bhana o Mon’ê mu sata phala ku tu kula, inga tu mateka ku dielela ku sata íii, kiene ki tua mateka ku kala ni ukamba ni Nzambi.

6 Kioso ki tu xinganeka kiebhi ki tueza mu kuijiia Jihova, tua tokala ku di ebhuidisa: ‘O kuila o ukamba uami ni Nzambi ua mu suína dingi? O kuila o kidielelu kiami kua Kamba diami Jihova kia suína, ni henda iami ia mu di bandekesa izuua ioso?’ O muthu ua mukuá ua kexile kamba dia Nzambi, Ngidiione. Tu di longe o phangu iê iambote, ni kiebhi ki tu tena ku kaiela o phangu iê.

“JIHOVA MUENE PAZE”

7-9. (a) Madiuanu ahi a mono Ngidiione, ni ihi ia bhiti? (Tala o foto ia dianga.) (b) Kiebhi ki tu tena ku kala ni ukamba ni Jihova?

7 O mufundixi Ngidiione, ua sidivile Jihova mu izuua ia bhonzo, kioso kia bokona akua Izalaiele mu Ixi ia Kanana. Mo divulu dia Afundixi kibatulu 6, di zuela kuila o anju ia Jihova ia kundile Ngidiione mu Ofila. Mu kithangana kieniókio, o akua Midiiana exile jinguma ja akua Izalaiele. Mukonda dia kiki, Ngidiione ua kexile mu vunda o tiliku mu ditangi dia ku kamena vinhu, phala akua Midiiana ka i mone. Ngidiione ua tukumuka kioso kia mono anju ia mu ixana, “dizonda dia nguzu.” Sumbala Jihova ua bhuluile akua Izalaiele mu Ijitu, Ngidiione ua kexile ni phata kuila, muéne ueji ku a bhulula dingi o veji ienioió. Jihova ua zuela bhu kaxi ka anju, kuila muéne ueji kuatekesa Ngidiione.

8 Kienhiki-phe Ngidiione ua kexile mu kuibhula kiebhi Jihova kieji ‘kudila Izalaiele bhu lukuaku lua akua Midiiana.’ Jihova ua mu tambuijila: “Eme ngi kala ni eie sé kufula, akua Midiiana-phe ua kà a nemeka kala muthu umoxi ngó.” (Afun. 6:11-16) Ngidiione ua kexile ni phata, kiki kia mu bhangesa ku bhinga kijimbuete. Maji Ngidiione ka londekesa kuila ua kexile ni phata kuma Nzambi Muthu ua kidi.

9 Kua bhiti kima, kia suínisa o kixikinu kia Ngidiione, kia suínisa ué kiavulu o ukamba uê ni Nzambi. Ngidiione ua lambe, iu ua tela o anju. Kioso o anju kia sununa o mbangala iê ku kudia, o kudia kua jokota, Ngidiione u mona kuma anju ia Jihova. Ngidiione uixi: “Aiué, Jihova Nzambi, tata! Manhi anju ia Jihova nga di mono-nê pholo ni pholo.” (Afun. 6:17-22) O kuila o kizulukutu kiki, kia zange o ukamba ua Ngidiione ni Nzambi? Kana! Maji o ukamba ua di dibandekesa. Ngidiione ua kexile ku paze ni Nzambi. Tua kijiia mukonda o kalatódio ka tungu Ngidiione, muéne ua ka luku, “Jihova muene Paze.” (Tanga Afundixi 6:23, 24.) Kioso ki tu xinganeka mu ima  iene mu tu bhangela Jihova izuua ioso, tu mona kuila muéne Dikamba dia kidi. O kuzuela ni Nzambi izuua ioso mu musambu, ku bandekesa o paze ietu, ku suínisa ué o ukamba uetu ni muéne.

NANHI ‘U NANGA MU BALAKA IA JIHOVA’

10. Kala ki tanga o divulu dia Jisálamu 15:3, 5, ihi i tu bhinga Jihova, se tua mesena ku kala kamba diê?

10 Phala Jihova ku kala Dikamba dietu, saí ima i tua tokala o ku bhanga. Kala ki tu tanga mu divulu dia Jisálamu 15, Davidi uembi, se ihi i tua tokala ku bhanga phala ku ‘nanga mu balaka ia Jihova,’ kulombolola ku kala kamba dia Nzambi. (Jisá. 15:1) Tu di longe ima iiadi—kueha o ku tanga makutu, ni kuzuela ngó o kidi. Davidi uambe kua ió a a xikina ku kala kamba dia Jihova: “Ka xingi ndaka ni dimi diê . . . ka xikina kitadi kia kúdia mangonha.”Jisá. 15:3, 5.

11. Mukonda diahi tua tokala kueha o ku tanga makutu?

11 Davidi ua tendelesa ué: ‘Aluka! Dimi diê ki di kale ni phulu.’ (Jisá. 34:13) Se tu xibhaka o itendelesu íii, tu tena ku zanga o ukamba uetu ni Tata ietu ia diulu. Sé phata, o makutu kijimbuete kia nguma ia dikota ia Jihova, Satanaji, o Diabhu. O dijina “Diabhu,” dia tundu mu Ngeleku, dilombolola “makutu.” Se tu di langa ku ima i tu zuela ia lungu ni akuetu, kiki kia-nda tu kuatekesa ku zukama dingi kua Jihova. Benge benge ki tu zuela ia lungu ni jiphange a a te Nzambi ku pholo mu kilunga.Tanga Jihebeleu 13:17; Juda 8.

12, 13. (a) Mukonda diahi tua tokala kuzuela o kidi mu ithangana ioso? (b) Ihi i zuela o athu kioso kia mona o ukexilu uetu?

12 O jiselevende ja Jihova, a ejiia ku mundu uoso kuila athu a kidi. O poxolo Phaulu ua soneka: “Kolokotenu ni ku tu sambela. Kuma tua di fika kukala ni kitongoluelu kia zele, mbata tua mesena kubhanga mu kidi o ima ioso.” (Jihe. 13:18) Mukonda tua mesena “kubhanga mu kidi o ima ioso,” tu eha o ukexilu ua ku nganala o jiphange jetu mu nzumbi. Mu kifika, se ene akalakadi etu, etu tua tokala tu a futa o kitadi kioso ki tua a kanena ku a futa. Etu tu Jikidistá, tu zuela o kidi ni akalakadi’etu ni athu a mukuá. Se tu akalakadi a jiphange jetu, tua tokala ku aluka phala ki tu jijile ima ki i tokala.

13 Ku mundu o athu a ximana o Jimbangi ja Jihova mukonda dia ku kala athu a kidi. Mu kifika, saí xefe ia ditenda dionene dia kutunga, ua mono kuila o Jimbangi ja Jihova a kumbidila o ikanenu iâ. Muéne uambe: “Enu mu bhanga ioso i mu kanena o ku bhanga.” (Jisá. 15:4) O ukexilu iú, u tu kuatekesa ku kala ni Ukamba ni Jihova, ni ku bhekela kijingu kua Tata ietu ia henda ku diulu.

KUATEKESA AKUENU KU KALA MAKAMBA A JIHOVA

Etu tu kuatekesa akuetu ku kala makamba a Jihova (Tala o kaxi 14, 15)

14, 15. Mu ukunji uetu, kiebhi ki tu tena ku kuatekesa athu ku kala makamba a Jihova?

14 O athu u tuene mu sanga kioso ki tuia mu boka, avulu a xikina kuila kuene Nzambi, avulu ka mu mono kala Dikamba diâ dia beta-o-kota. Kiebhi ki tu tena ku a kuatekesa? Xinganeka o itendelesu ia bhana Jezú ku 70 a maxibulu, kioso kia a tumikisa phala ku boka: “Inzo ioso i mua kà bokona, mu dianga kuila: O kutululuka kukale mu dibhata didi. Se bhu kala-phe mukua uembu mu dibhat’omo, o uembu uenu u mu tula ku thandu diê; se kana-bhu, u mi vutukila dingi enu’enu.” (Luka 10:5, 6) Nange o athu a mesena dingi kuijiia o kidi se tu a talatala kiambote. Né muene se o athu a tu zembe, tu a talatala kiambote, nange kiki kia a bhangesa ku tululuka, ni ku  tu tambulula kiambote mu kithangana kia mukuá.

15 Kioso ki tu sanga athu ene kiá ni ngeleja iâ, mba a kaiela ijila ia jingeleja ja makutu, né kiki tu a talatala kiambote, ni kutululuka kuoso. Tu tambulula kiambote o athu oso eza mu iônge ietu benge-benge ió ka sanguluka ni ukexilu ua mundu iú, a mesena kuijiia dingi o Nzambi i tuene mu bheza. O milongi mu Mulangidi izuela: “O Bibidia i Lungulula o Ukexilu ua Athu,” tu sanga-mu phangu ia athu avulu.

KU KALAKALA NI DIKAMBA DIETU DIA BETA-O-KOTA

16. Kiebhi ki tu tena ku kala makamba a Jihova ni ku kala ué “jingunza” jê?

16 Saí bhabha, o athu a kalakala kumoxi, a kala makamba ambote. Oso a di bhakula kua Jihova a tambula o ujitu ua ku kala makamba mê ni ku kala “jingunza” jê. (Tanga 1 Kolindo 3:9.) Kioso ki tu boka ni ku bhanga maxibulu tu tendela kiambote o ídifua ia Tata ietu ia diulu. Tu mona kiebhi o nzumbi iê ikôla, i tu kuatekesa ku boka o njimbu iambote.

17. Kiebhi o milongi i tu tambula mu iônge ionene ni iônge ia makota, i londekesa kuila Jihova Kamba dietu?

17 Kioso ki tu bhita kithangana kiavulu mu sidivisu ia ku boka, tu zukama dingi kua Jihova. Mu kifika, tu mona kiebhi Jihova kia fidisa o jinguma ku fidisa o kikalakalu kia ku boka. Xinganeka mu mivu ia bhiti. O kuila ki tu mono kiebhi kia mu tuendesa Nzambi? Tu diuana ni kudia kuavulu mu nzumbi. O milongi i tu tambula mu iônge ionene ni iônge ia makota, i londekesa kuila Jihova Tata ietu, uejiia o maka u tu bhita na-u ni ibhindamu ietu. Mu ku sakidila o kiônge kietu, saí muiji ua soneka: “O milongi ia tula ku mixima ietu. Tua mono kiebhi Jihova kia zolo muthu ni muthu mu dietu, ni kuila muéne ua mesena o mbote ietu.” Kioso kia tundu mu kiônge kia dikota ku ixi ia Irlanda, o dikaza akua Alemanha a sakidila o ukexilu ua a tambulula ni ua a talatala, ene a zuela: “Maji o kisakidilu kia dikota kia tokala kua Jihova ni Sobha ia undu, Jezú Kristu. Ene a tu exana phala ku bhanga mbandu ku kifuxi kiki kia di zolo. Ki tua mu zuela ngó ia lungu ni henda maji tua mu tambula henda mu izuua ioso. O ima ia bhiti ku muenhu uetu ni ima i tua di longo mu kiônge mu mbanza ia Dublim, ia-nda tu kuatekesa ku di lembalala o ujitu u tuala na-u ua ku sidivila Nzambi ietu ni enu oso phange jetu.”

O MAKAMBA A DI ZUELESA KIAMBOTE

18. Ihi i tua tokala ku dibhudisa ia lungu ni kuzuela ni Jihova?

18 O makamba a tena ku di bhana  kiambote kioso kia di zuelesa kiambote. Lelu o athu ene mu di tumikisa njimbu mu Internete. Maji ihi i tu zuela ia lungu ni ku di zuelesa ni Jihova, o Dikamba dietu dia beta-o-kota? Sé phata, muéne ‘mukua kuívua o misambu.’ (Jisá. 65:2) O kuila tuene mu zuela né ithangana ioso?

19. Se kiene mu tu bhonza ku sanga izuelu phala ku tangela o maka metu kua Jihova, o Tata ietu ia diulu, ihi i tena ku tu kuatekesa?

19 Saí jiselevende ja Nzambi, kiene mu ku a bhonza ku jikula o mixima iâ phala kuzuela ioso ia a kala ku mixima. Maji Jihova ua mesena tu jikula o mixima ietu, kioso ki tu samba. (Jisá. 119:145; Kud. 3:41) Se ki tua mu sanga izuelu ia tokala phala ku jimbulula kiebhi ki tua mu divua, tuala ni kikuatekesu. Phaulu ua sonekena o Jikidistá mu Loma: “Kuma etu ki tuijiia kusamba kioso kia tokala. Maji o Nzumbi muene u tu diondela kua Nzambi ni kukumba ki ku xikina ku ku lombolola ni izuelu. O Nzambi-phe mukua kutekula o mixima ia athu, uejiia kioso ki sola Nzumbi. Mukonda muène u tena kudiondela athu’ ê angene, kala ki ala mu vondadi ia Nzambi.” (Loma 8:26, 27) Kioso ki tu tanga misoso mu madivulu a Bibidia, kála Jobe, Jisálamu, ni Jisabhu tu tena kuijiia kiebhi ki tua tokala ku tangela o maka metu kua Jihova.

20, 21. Kiebhi ki tu tululukisa o izuelu ia Phaulu mu divulu dia Filipe 4:6, 7?

20 Kioso ki tu di bhana ni maka a bhonzo, tua tokala ku lembalala o izuelu ia Phaulu ku akua Filipe: “Ki mu kale ni hele ia kima, ki mu ile bhidibhidi, maji ima ioso-phe iiza-ku, mu ila ni kusamba ni kudionda, kumoxi ni kusakidila, mu ende ni kubhinga kua Nzambi ioso i mua mesena.” O kuzuela kiambote ni dikamba dietu dia beta-o-kota, kua-nda tu tululukisa o muxima, mukonda Phaulu ua bandekesa dingi: “Bheniobho o kutululuka kua Nzambi kua somboka o kitongoluelu kioso kia muthu, kuanda ku mi bateka mixima ni ilunji, mu ukamba ni Kristu Jezú.” (Fil. 4:6, 7) Tua tokala tu sakidila ithangana ioso, o ‘kutululuka kua Nzambi’ ku bhateka o mixima ietu ni ilunji ietu.

Kiebhi o musambu u tena ku suínisa o ukamba uetu ni Nzambi? (Tala o kaxi 21)

21 O misambu i tu kuatekesa ku kala ni ukamba uambote ni Jihova. Kiki-phe, tu “sambenu sé kufula.” (1 Tes. 5:17) Tua tokala ku suínisa o ukamba uetu ni Nzambi ni ku bhinga ioso ia tu tumina. Tua tokala ué ku katula kithangana phala ku xinganeka mu mabesá a tu bhana, mukonda Jihova muene Tata ietu, Nzambi ietu, Dikamba dietu.