Ku bokona mu madisá

Ku bokona mu madisá

 IMA IETU IO BHAKELE

100 ia Mivu ia Izulukutu ia Madiuanu, i Suínisa o Kixikanu mu Mak’â Nzambi

100 ia Mivu ia Izulukutu ia Madiuanu, i Suínisa o Kixikanu mu Mak’â Nzambi

O muthu ua mono o “Fotodrama” ku 1914 uambe kuma, “o phange Russell u moneka kiambote mu Fotodrama, o ku mu mona ku mesu ndenge!”

KU MUVU iú o “Fotodrama da Criação,” ia tenesa 100 ia mivu tundé mu kizuua kia dianga kia i londekesele, a i bhangele phala ku kuatekesa o athu ku kala ni kixikanu mu Bibidia, o Mak’â Nzambi. Mu thembu, o athu ka kexile ni kixikanu, akexile mu kaiela o ilongesu ia kuila o ima ia moneke ngó, ni kuzuela kia íibha, ni ku kamba kixikanu kua Nzambi, kia bhangesa athu avulu ku kamba ku kala ni kixikanu, maji o “Fotodrama,” ia londekesa kuila, Jihova Mubhangi ua ima ioso.

Charles T. Russell, ua kexile ku pholo ia Adilongi a Bibidia, ni muanhu uoso, ua soto ndunge ia tokala ni lusolo ia ku sanzumuna o ilongesu ia kidi ia Bibidia. O Adilongi a Bibidia, mu makuinhi atatu a mivu, akexile kia mu bhana madivulu a iudika. Maji a mono ndunge iéngifilme bhu kaxi ka jifoto.

KU BOKA O NJIMBU BHU KAXI KA FILME

Ku muvu ua 1890 a bhange ko filme phala o athu oso. Ku dimatekenu dia muvu ua 1903, sai ngeleja ia londekesa filme ia ngeleja mu Mbanza ia Nova Iorque. Bhu dimatekenu dia ku bhanga o jifilme bhu kaxi ka jifoto, dia kexile ku dimatekenu, kioso o phange Russell, ku muvu ua 1912, ni ku suína kuoso, kia mateka o ku iudika o “Fotodrama.” Muéne ua kijidile kuila o ndunge íii ieji kuatekesa kiavulu o ku ijidisa o kidi kia Bibidia, o ku bhana ngó o madivulu ki kieji soka.

O kulondekesa o “Fotodrama,” mu dinake dia ji ola, akexile mu i bhanga mu mbandu ji uana, ia kexile mu londekesa mu 96 a madisá a Bibidia, o ngalavale, a kexile mu i jimbuluila bhu kaxi ka muthu a muijidile kiambote, kexile ni dízui dia mbote mu thembu ienioió. Bhua kexile ué mu xika mimbu iambote kioso kia kexile mu londekesa o jifilme. O jiphange akexile ni uhete ua ku kalakala ni ji makina, akexile mu bhangesa o ku xika o mimbu ni dízui dio ngalavale ni misoso ia Bibidia, kala kia mu londekesa o jifoto mu filme.

“Íii ia kumbidila ioso, tundé ku ibhangelu ia jithéthembua katé ku disukilu dia Midi ia Mivu ia Utuminu ua Kristu.”—F. Stuart Barnes, ua kexile ni 14 dia mivu ku muvu ua 1914

O ndumba ia jifilme ni jifoto, a ji sumbile ku athu akua ku bhanga uenji ua jifoto. O Athu akexile ni uhete ua maufunu akua Filadélfia, Nova Iorque, Paris ni akua Londres, ene a pelepalala o ima íii ia tokala ku filme, a i iudika ni ku i pindala. O jiphange ja mukua, akexile mu kalakala mu Betele mu Kididi Kia Ufunu, a pelepalala uâ mbandu ia filme. Katu-ko o jimbandu ja filme ja sumbu, o akalakadi a muiji ua Betele, a  filmala ué o jiphange ja Betele ku Sanzala a ixana Yonkers, ku Nova Iorque, a londekesa kala Mbalahamu, Izake, ni kiebhi Mbalahamu kia mu fidisa ku anju o ku satela mon’ê.Dim. 22:9-12.

O filme ia kexile ni 3, 2 kilómetulu mu ku lebha, o akalakadi a a longo kiambote, a sokejeka o filme, mu 26 a izuelu ni 500 ia jifoto mu kithangana kia soko

O phange ia mukua ua kexile mu kalakala ni phange Russell, uambe kuila o kikalakalu kiki kieji “kuatekesa mundu uavulu o ku di longa o Bibidia, mukonda o kikalakalu kiki, kia betele-kota, o ikalakalu ia mukua [io] bhangele phala ku sanzumuna o kidi, kudima ndenge.” O kuila o atuameni a jingeleja eji kuatekesa ku kikalakalu kiki, phala ku kuatekesa o athu ala ni dinhota mu nzumbi? Tua mono kuila, o akunji a Kidistándade a zuela kia iibha ia lungu ni kikalakalu kiki kia “Fotodrama,” katé muene a bhange ioso phala ku fidisa o athu o ku mona o filme íii. Bhu kididi kia mukuá bhua mesenene o jiphange kulondekesa o filme, akunji a jingeleja, a batula o mukengeji.

O alondekexi akexile mu ilunga ia zukamene, a bhana mazunda a jikopia mua kexile o ifikula ia lungu ni “Fotodrama”

A mukuá mu kiônge a tambula “Kalatá” mua kexile o foto ia Jezú kiexile mon’a ndenge. O jikalatá jiji, ja kexile mu lembalesa kuila o muthu ua i te, “mon’a ua paze”

Né muene kiki, o kididi kiezalele ni athu avulu a mesenene o ku mona o “Fotodrama,” sé ku futa. Ku Estados Unidos, kala kizuua, 80 a jimbanza akexile mu londekesa-mu o “Fotodrama.” Athu mu kizuua kiá kia dianga kia ku tala o filme, a sangulukile mukonda dia ‘kuívua o izuelu.’ Bhu kaxi ka ifikula, a mono kana ka sanji, ka mu tunda mu diiaki, ni kithulu kia mu jikuka phala kulondekesa o kuiuka kué. O ima íii, ilondekesa o ibhangelu ia madiuanu ua unjimu ua Jihova. Kala ki tua mono ku dimatekenu, muthu ua mono o “Fotodrama” uambe kuma, “o phange Russell u moneka kiambote mu Fotodrama, o ku mu mona ku mesu ndenge!”

KIZULUKUTU KIA DIKOTA MU KILAKALU KIA KU LONGA O BIBIDIA

O “Fotodrama” ia londekesa, kia dianga mu kizuua kia 11 kia mbeji ia Katatu, ka 1914 bhu kididi kiki kia ku talela jifilme mu Mbanza ia Nova Iorque, kia kituka inzo ia tokala ku Adilongi a Bibidia

O muthu uene mu tanga misoso ni ku bhanga jifilme, a mu ixana Tim Dirks, uambe kuma o “Fotodrama” íii, “o filme ia dianga ia kexile ni mimbu ia londekesele kiambote ni ifikula ienda kumoxi ni dízui diambote dia ngalavala, ni lâmbada i muika mu filme.” O jifilme ja mukuâ ja moneka kioso kia bhange o “Fotodrama,” ja londekesa ué o ima íii, maji ki ji di fuile kiambote kala jojo, benge benge, ja kexile ni ilondekesu ia Bibidia. Né muene kiki o jifilme jojo ja moneka, ki bhua kexile mu kala athu avulu—a soka mu divua dia mazunda a athu, ku América do Norte, ku Europa, ku Austrália, ni ku Nova Zelandia ku muvu umoxi ngó!

O kizuua kia dianga kia londekesele o “Fotodrama,” kiexile ku mbeji ia Katatu mu kizuua kia 11 kia 1914, ku mbanza ia Nova Iorque. Mu ku bhita sambuadi dia jimbeji, kua bhiti divuua, eza mu dixana Ita ia Dianga ia Mundu. Maji o athu a suluka ni ku diongeka ku mundu uoso phala ku mona o “Fotodrama,” mukonda a sangele-mu kikuatekesu mu ifikula ia kexile mu londekesa o ikanenu ia Bibidia ia lungu ni mabesá a Utuminu ua-nda kuíza ku hádia. Ku muvu ua 1914, o “Fotodrama” ia londekesa, iexile kizulukutu kia beta-kota ku muvu uenhó.

Makuinhi a iiadi a mbandu ia “Fotodrama,” a kexile mu ilondekesa ku ibuka ku mbandu joso ja América do Norte