Ku bokona mu madisá

Ku bokona mu madisá

Sidivila Jihova Ande Dia Izuua Ia Bhonzo Ku Bhixila

Sidivila Jihova Ande Dia Izuua Ia Bhonzo Ku Bhixila

‘Lembalala ió uoso ua ku Bhange.’NDO. 12 :1.

1, 2. (a) Kitendelesu kiahi kia bhana Salomá ku minzangala? (b) Mukonda diahi o kitendelesu kiki kia bhana Solomá, kia tokala ué ku Jikidistá ala ni 50 a mivu mba a somboka o mivu íii?

SOBHA SALOMÁ ua soneka ia lungu ni minzangala: ‘Mu izuua ia unzangala ué, lembalala Ió uoso ua ku Bhange, kioso o izuua ia bhonzo kiluua i bhixila.’ Iebhi “o izuua ia bhonzo?” Salomá ua soneka izuelu ia katunda phala ku lombolola o ibhidi iene mu di bhana na-iu o athu a kuka—o maku ku teketa, o inama i kamba o nguzu, o ku bhua o mazu mu kanu, o ku kamba ku mona kiambote, o ku kamba kuívua kiambote, jimvi, ni mukutu ku di nhongota. Ki tu tokala ku kingila o izuua ia ku kuka phala ku sidivila Jihova.Tanga Ndongixi 12:1-5.

2 Jikidistá javulu ala mu kitala ki 50 a mivu, mba a somboka o mivu íii, ala hanji ni nguzu iavulu. Sumbala ala kiá ni jimvi, maji nange kala lua ni sauidi ia bhonzo kala kiambe Salomá. O kuila o adiakimi iá a kuka kiá, a tena ku katula mbote ku milongi ia bhana ku minzangala: Lembalala Ió uoso ua ku Bhange?’ Ihi i lombolola o kitendelesu kiki?

3. Ihi i lombolola o ku lembalala Ió ua tu Bhange?

3  Né muene tua mu sidivila kiá Jihova ku mivu iavulu, mu ku bhita kithangana, tua tokala ku xinganeka, phala kuijiia kiambote ió ua tu Bhange. O muenhu ujitu ua madiuanu. O athu ka tena kuijiia kiebhi Nzambi kia bhange o muenhu. Ioso ia bhange Jihova, ima iambote, i tu kuatekesa phala ku kala ni muenhu ua sanguluka. Maji kioso ki tu xinganeka mu ibhangelu ia Jihova, i tu bhangesa ku bhana dingi valolo ku henda iê, ku unjimu ué, ni mu kutena kuê. (Jisá. 143:5) O ku lembalala Ió ua tu Bhange, kua lungu ué ni ku xinganeka ku íii i tua tokala o ku bhanga, i tu bhinga muéne. O ku xinganeka ku ima ioso íii, i tu bhangesa ku sakidila ió ua tu Bhange, mu ku bhanga ioso i fuama mu sidivisu iê, ku muenhu uetu.Ndo. 12:13.

IMA I TU TENA O KU BHANGA KIOSO KI TU KUKA

4. Ibhuidisu iahi ia tokala o ku di bhanga o Jikidistá ala ni uhete uavulu ua ku longa, ni mukonda diahi?

4 Se eie uala kiá mu mivu iavulu mu sidivila Nzambi, dibhudise: ‘Ihi i nga-nda bhanga ni muenhu uami mu kindala, ni nguzu i ngala na-iú hanji?’ Kuma eie u Kidistá uala ni uhete, eie uala ni kikalakalu, akuenu kala na-kiu. Eie u tena ku longa o minzangala, ioso ia ku longo kua Jihova. U tena ku suínisa akuenu, mu kua tangela ima i uejiia kioso ki ua kexile mu sidivila Nzambi mu maukexilu avulu. O Sobha Davidi ua sambe phala ku kala ni kikalakalu kia ku bhanga kienhiki. Muéne ua soneka: “Eie, Ngana Nzambi, ua ngi longo tunde mu undenge . . . O ki nga kuk’iki, nge’di kiá bobòbo, ni jimvi mu mùtue, kana dingi ku ng’ehela, Ngana Nzambi; katé ki ngi longa o muiji iú ua lelu, kioso ki endesa o lukuaku lué, o oso ue a kèze-ku, n’a k’ejiie ki kala o kutena kué.”Jisá. 71:17, 18.

5. Kiebhi o Jikidistá a kuka, kia tena o ku longa akuâ ku íii ia di longo?

5 Kiebhi ki u tena o ku longa akuenu, o kuijiia kuoso ku ua di longo, ku mivu iavulu? O kuila eie u tena kuixana minzangala ku bhata diê, phala ku a suínisa? U tena kua bhinga phala kuia nau kumoxi mu sidivisu ia ku boka, phala kua londekesa o kisangusangu ki uala na-kiu kia ku sidivila Jihova? Edihu uambe: “O izuua i zuele, ndumba dia mivu i longe o kuijiia.” (Jobe 32:7) O poxolo Phaulu uambela o ahatu a Jikidistá ala ni uhete, a tokala a suínisa akuâ bhu kaxi ka izuelu ni ibhangelu. Muéne ua soneka: “Ambela ue adiakimi a ahatu kuila ende mù longa jinga ima ia mbote.” Tito 2:3.

KUATEKESA AKUENU NI UHETE U UALA NAU

6. Mukonda diahi o Jikidistá ala ni uhete uavulu mu sidivisu ia Jihova, ka tokala ku bhaka o uhete iú?

6 Se eie u Kidistá uala kiá mu mivu iavulu, eie uala ni ima iavulu i u tena o ku bhanga phala akuenu. Xinganeka ioso i uejiia lelu, ku ijidile ku 30 mba 40 a mivu kudima. Eie uejiia kiebhi ki u tena o ku kaiela o itumu ia Bibidia ku muenhu. Eie uala ni uhete ua ku longa akuenu, mu ku tula o kidi kia Bibidia, ku mixima iá. Se u kafunga, eie uejiia ku kuatekesa o jiphange a tondala. (Nga. 6:1) Nange ua di longo kiambote kiebhi kiendesa o ikalakalu mu kilunga, mu iônge ia ilunga, mba mu ku tunga Ididi ia Ubhezelu. Eie u tena kuijiia kiebhi kia tena ku kuatekesa ji dotolo ku saka o athu, se ku a ta manhinga. Né muene se kuala luua mu mivu iavulu mu kilunga, maji uala ni unjimu ku muenhu uê. Mu kifika, se ua sase an’a, eie uala ni uhete uavulu. O Jikidistá ja kuka, a suínisa kiavulu o mundu ua Jihova mu ku a longa, ni kuendesa o jiphange, ni ku a suínisa. O Bibidia izuela: “O kuijiia kuala ni iá a kuka kiá; o mu kuvula izuua muene muala o kilunji ni kutongoloka.”—Tanga Jobe 12:12.

7. Ihi i tena o ku longa o adiakimi a Jikidistá ku minzangala?

7  Kiebhi ki u tena o ku kuatekesa akuenu ni uhete uê? Nange u tena kulondekesa o minzangala kiebhi kia mateka ni ku longa o Bibidia ku dixibulu. Se u phange ia Kidistá ia muhatu, o kuila u tena ku suínisa o ilumba iala ni an’a, phala ku a kuatekesa mu ku sidivila kiambote Nzambi, kioso kiaia ni ku sasa o tuana tuâ? Se o phange ia diiala, u tena ku longa o minzangala ia Jikidistá phala ku bhanga madiskursu ambote ni ku boka ni uhete o njimbu iambote? U tena kua londekesa kiebhi eie ki uene mu kunda o jiphange ja maiala ni ja ahatu a kuka, phala kua suínisa mu nzumbi? Né muene kuala dingi ni nguzu kála ki ua kexile, eie uala hanji ni kikalakalu kia ku longa o minzangala. O Mak’â Nzambi ambe: “Makembu a minzangala, o kuvula nguzu; o kuuabha kua adiakimi, o jimvi mu mutué.”Jisa. 20:29.

SIDIVILA KUOSO KUA BHINGI KIKUATEKESU KIAVULU

8. Ihi ia bhangele poxolo Phaulu ku muenhu sumbala ua kukile kiá?

8 O poxolo Phaulu ua kalakalele kiavulu mu sidivisu ia Nzambi, né muene kia kukile. Kioso kia mu katula mu kaleia mu Loma ku muvu ua 61 K.K., muéne ua kalakalele kiá kiavulu, ua bhitile mu jipolova javulu mu sidivisu ia ukunji, mu kiki, se ua mesenene, ueji sola ku kála mu Loma phala ku boka. (2 Kol. 11:23-27) O jiphange mu Loma eji ki uabhela se Phaulu ua xalele mu Loma phala ku a kuatekesa. Maji Phaulu ua mono kuila mu jixi jengi, mua betele ku bhindamena aboki. Kumoxi ni Timote ni Tito, muéne ua suluka ni kikalakalu kiê kia ukunji, mu ku ia mu Efezo, iu uai dingi mu Keleta, nange uai ué ku Masedonha. (1 Tim. 1:3; Tito 1:5) Ki tuijiia se muéne uendele ué ku Espanha, maji muéne ua mesenene kuia kuenhoko.Loma 15:24, 28.

9. Thembu kuxi kiai Phetele mu sidivila bhu kididi kua bhindamene kikuatekesu? (Tala o foto ia dianga.)

9 O poxolo Phetele sumbala ua kexile ni 50 a mivu kioso kiai mu tunga mu kididi mua bhindamene kikuatekesu. Kiebhi ki tua kijiia? Se muéne ua kexile mu kitala kimoxi ni Jezú mba uexile dikota, kilondekesa kuila, muéne uexile ni 50 a mivu ku muvu ua 49 K.K., kioso kia disange ni jipoxolo ni akuâ mu Jeluzaleme. (Ika. 15:7) Mu kithangana kiéngi, Phetele uai mu tunga mu Babilonha, sumbala phala ku boka o mundu ua ji Judé ku mbandu ienioió. (Nga. 2:9) Muéne ua kexile kuenhoko, kioso kia soneka o mukanda ué ua dianga ku muvu ua 62 K.K. (1 Phe. 5:13) Ku tunga ku ixi iéngi, ki bhonza, maji Phetele kehela kuila o kitala kiê ki mu fidisa ku sidivila kiambote Jihova.

10, 11. Zuela ia lungu ni muthu ua tundu mu ixi iê, phala kuia ku sidivila ku kididi kiéngi kua bhindamena kikuatekesu.

10 Lelu, Jikidistá javulu ala mu 50 mba a bhiti mu kitala kiki, a mono kuila, o ima ku mienhu iâ ia bhiluka phala ku sidivila dingi Jihova mu maukexilu engi. A mukuá a ai kuoso kua bhingi kikuatekesu kiavulu. Mu kifika, Robert ua soneka: “O muhatu’ami n’eme, tua bhitile kiá mu 50 a mivu, kioso ki tua mono kuila tuala hanji ni kithangana kia ku sidivila Jihova. O mon’etu umoxi, ka kexile dingi n’etu, ki tu kexile dingi ni jitata phala kua langa, tua lundula o kitadi kia tu xile o jitata jetu, maji ki ki vudile. Eme nga mono kuila, o ku sumbisa o inzo ietu ieji kuatekesa o ku futa o dikongo di tua tambule mu bango, phala ku sumba o inzo ienii, ni ku tu kuatekesa mu ibhindamu ietu katé ki ngeji tambula o kitadi ku nga kalakele mu kulu. Ngevu kuila ku Bolívia, kuala athu avulu a xikina o ku di longa o Bibidia, ni kuila o ima ki i te kalu iavulu. Mu kiki, tuai kuenhoko. Kia bhonzele o ku kala mu inzo iéngi ia ubhe. Ioso ia kexile kiéngi, ki iene i tuejidile kioso ki tua kexile ku Thunda  ia América. Maji o nguzu i tua bhange ia tu bhekela mabesá.”

11 Robert uambe dingi: “O muenhu uetu uoso, o ku bhanga ngó o ikalakalu ia kilunga. Athu a mukuá u tua longo o Bibidia, a a batizala. Saí muiji u tua mu longa o Bibidia, jingadiama, a tungu mu sanzala iala o dikanga. Maji kala semana, o muiji uenió, ene mu bhanga njila ia lebha ia bhonzo phala kuia mu mbanza iéngi phala kuia mu Iônge. O kuila u tena ku mona o kisangusangu ki tuala na-kiu, o ku mona o muiji iú ua mu kula mu nzumbi, katé muene o mon’a ua phande kumbi, muboki ua thembu ioso?”

KUA BHINDAMENA ABOKI MU IDIDI MUA ZUELA MADIMI A JIXI JENGI

12, 13. Zuela kifika kia Kidistá, ua sidivila Jihova mu ukexilu uéngi, kioso kia nhoha ku salu.

12 O ilunga ni ibuka i zuela o dimi diéngi, a tena uá ku katula mbote ku jiphange ja ahatu ni ja mala a kuka kiá. O jimbambe jiji, sumbala ji bheka kisangusangu kiavulu ku kalakala-mu. Mu kifika, Brian ua soneka: “O muhatu’ami n’eme, tua divuile kala ki tuala dingi ni valolo, kioso ki tua kexile ni 65 a mivu ku ixi ia Grã-Bretanha. O an’etu ka kexile dingi n’etu, ki tu kexile mu sanga athu a mesena ku di longa o Bibidia. Maji ngejidile munzangala mukua China ua kexile mu tokuesa madivulu mu Xikola ia katunda. Muéne ua xikina o kuia mu kiônge, eme nga mateka o ku mu longa o Bibidia. Mu ku bhita jisemana, muéne ua bheka ué koleka iê mukua China. Kioso kia bhiti semana jiiadi, ua bheka dingi koleka ia katatu, mu suluka ua bheka dingi ia kauana.

13 “Katé mu kithangana kioso o muthu ua katanu mukua China, kia bhingi o ku mu longa o Bibidia, eme nga banze: ‘Mukonda dia ku kala ni 65 a mivu, ki ki londekesa kuila eme nga tokala ku nhoha mu sidivisu ia Jihova.’ Mu kiki, eme nge bhuidisa muhatu’mi, nga mu bhiti mu mivu iiadi ia kitala, se muéne ua mesena ku di longa o dimi dia China. Etu tua kexile mu di longa mu kursu io ngalavale ia dimi dia China. Kiki kia bhiti ku dikuinhi dia mivu ku dima. O ku boka mu mbambe ia dimi dia ixi iéngi, nga divu mu imana, kála ngi munzangala. Katé lelu, tua longo o Bibidia ku 112 dia athu akua China! Ene oso, a kexile múia mu iônge. O mukuá, muboki ua thembu ioso.”

Sumbala eie ku kuka luua kiavulu phala ku bhandekesa dingi mu o ukunji uê (Tala o kaxi 12, 13)

 SANGULUKA MU KU BHANA IMA I U TENA

14. Ihi i tena o ku sangulukisa o Jikidistá ja kuka, ni kiebhi o phangu ia Phaulu ia a suínisa?

14 Né muene saí Jikidistá javulu ala ni 50 a mivu, ala ni kithangana kia ku sidivila Jihova mu maukexilu avulu, maji saí a mukuá ka tena. A mukuá kala ni sauidi iambote, saí iá a mu langa o jitata jâ a kuka kiá, mba a mu sasa tuana. Eie u tena ku sanguluka, mu kuijiia kuila Jihova u bhana valolo ku nguzu ioso i u bhanga mu sidivisu iê. Mu kiki, mu veji dia ku luuala, mukonda dia íii ku tena ku i bhanga, sanguluka ku ima i u tena o ku bhanga. Xinganeka ku phangu ia poxolo Phaulu. Muéne a mu kutile ku mivu iavulu, mu kiki, ku mivu ienhií, ka tenene ku bhanga o ukunji ué. Maji kioso o athu kia kexile mu ku mu kunda, muéne ua kexile mua zuelela ia lungu ni Mikanda Ikôla, phala kua suínisa o kixikanu kiá.Ika. 28:16, 30, 31.

15. Mukonda diahi o Jikidistá ja kuka, ene mu ku a bhana valolo?

15 Jihova u bhana valolo ku sidivisu i bhanga o Jikidistá a kuka. Né muene Solomá ua zuela kuila o izuua ia ku kuka, izuua ia bhonzo, ki izuua iambote, Jihova u bhana valolo ku Jikidistá a kuka ku nguzu ia bhanga phala ku mu sidivila. (Luka 21:2-4) O ilunga iene mu bhana valolo ku phangu ia fiiele ia jiselevende ja kuka.

16. Kikalakalu kiahi sumbala Ana ka tenene dingi ku ki bhanga, maji ihi ia bhange phala ku bheza Nzambi?

16 O Bibidia iambe kuila , o muhatu a mu ixanene Ana, ua sulukile mu sidivila Jihova katé muene mu ukukilu ué. Muéne uexile mutudi mu kitala kia 84 a mivu kioso Jezú kia mu vuala. Mukonda muéne ua kukile kiá kiavulu, ka kexile dingi ku muenhu phala ku kaiela Jezú mba ku mu unda ni nzumbi ikôla, mba ku boka o njimbu iambote ia Utuminu. Maji né muene kiki, o ia tenene ku bhanga Ana, ua i bhange ni kisangusangu kioso. “Muène, mu Tembulu kutunda-mu dingi, u kala-phe mu kalakela Nzambi ni mu usuku ni mu muanha.” (Luka 2:36, 37) Kioso o mukunji kia kexile mu bhana sata mu tembulu, mu kamene ni mu usuku, o Ana ua kexile mu kala kumoxi ni mundu bhu kanga mu bhanga misambu katé sumbala mu ola ia muvimba. Kioso muéne kia mono o kambonga Jezú, muéne ua mateka ku “tanga o kamona ku athu oso a kexile mù kinga o kubhanduluka kua Jeluzaleme.”Luka 2:38.

17. Kiebhi ki tu tena o ku kuatekesa o Jikidistá a kuka mba a kate, phala ku bhanga mbandu mu ubhezelu ua kidi?

17 Lelu, etu ué tua tokala ku kuatekesa o Jikidistá a kuka mba a kate. Saí a mukuá, a mesena o kuia mu iônge ia ilunga ni iônge ionene, mu veji javulu, maji sumbala ka tena dingi. Mu ididi ia mukuá, o jiphange a bhanga kima phala o jiphange a kuka kuívua o milongi bhu kaxi ka mitelembe ia kafuetele. Maji mu ididi iéngi, kiki, ki ki bhana. Né muene o Jikidistá jiji ka tena kuia mu iônge, maji ene hanji mu kuatekesa mu ubhezelu ua kidi. Mu kifika, o misambu iâ i tena ku kuatekesa ku ubhezelu ua kilunga kia Jikidistá.Tanga Jisálamu 92:13, 14.

18, 19. (a) Mukonda diahi o Jikidistá a kuka sumbala ka tena kuijiia kuila ene a mu suínisa akuâ? (b) Nanhi ua tokala o ku kaiela o itendelesu íii iambe: ‘Lembalala Ió uoso ua ku Bhange?’

18 O Jikidistá a kuka sumbala ka tena ku mona o ki kuatekesu kia bhana ku akuâ. Mu kifika, né muene Ana ua kexile muthu ua fiiele mu ithangana ioso mu tembulu, muéne sumbala ka kijidile kuila o phangu iê, mu ku bhita hama ja mivu ieji suínisa akuâ. O henda ia Ana kua Jihova, a i soneke mu Mikanda Ikôla. Kiene ué kimoxi, o henda iê kua Nzambi, ka-nda i jimba ku jiphange jê. Ki tu tena ku diuana kioso o Mak’â Nzambi kia zuela: “Jimvi kitundu kia ujitu, se uala na-ju mu njila ia kuiuka!”Jisa. 16:31.

19 Mu sidivisu ia Jihova, tu bhanga ngó ioso i tua tena. Maji etu tuala hanji ni nguzu ia soko, tua tokala ku belesela o itendelesu íii ia Mikanda Ikôla: ‘Lembalala Ió uoso ua ku Bhange, kioso o izuua ia bhonzo kiluua i bhixila.’Ndo. 12:1.