Nga kexile ngó ni dikuinhi dia mivu ku muvu ua 1985, kioso o an’a ndenge akua ixi ia Camboja, kia bhixila bhu xikola iami ku mbanza ia Columbus, Ohio, ku ixi ia Estados Unidos ia América. Bhua kexile mon’a ndenge uejidile kuzuela bhofele o dimi dia Kingileji. Ni ki kuatekesu kia ifikula, muéne ua kuata ku ngi tangela misoso ia iibha i tesa uôma, ia lungu ni kibetu kia ku jibha, ujibhangânga ni ku lenga. Mu usuku kioso ki nga kexile mu xinganeka ku an’a ndenge iá, nga kexile mu dila. Eme nga mesenene kua tangela ia lungu ni kidielelu kia Palaízu ni difukunukinu, maji ene ka kexile mu tendela o dimi di nga kexile mu zuela. Né muene nga kexile hanji ngi mon’a ndenge, nga banzele ku di longa o dimi dia Camboja, phala ku tangela o jikoleka jami ia lungu ni Jihova. Ki ngi kexile mu ku banza kuila, o kima ki nga solo, kieji ngi kuatekesa ku hádia.

O ku di longa o dimi dia ixi ia Camboja, kia bhonzele kiavulu. Mu veji jiiadi, nga xinganeka o ku bhuila o ku di longa, maji Jihova ua ngi suínisa bhu kaxi ka jitata jami. Mu ku bhita ithangana, o alongexi ni jikoleka jami, a mateka o ku ngi suínisa phala ku kala ni ufunu u bhana kitadi kiavulu. Maji eme nga mesenene ku kala muboki ua thembu ioso, mukonda dia kiki, nga solo ku di longa xikola i ngi kuatekesa ngó ku sota salu ia ku kalakala kaxaxi ka kizuua, phala ngi tene ku kála muboki ua thembu ioso. Kioso ki nga kexile mu tunda bhu xikola, nga kexile múia kumoxi ni aboki a thembu ioso, mu sidivisu ia kuboka. Nga di bhakula phala ku longa athu a mesenene o kuijiia o dimi dia Kingileji—o kima ki nga solo, kia ngi kuatekesa ku pholo.

Kioso ki nga kexile ni 16 dia mivu, ngevu kuila kuexile kibuka kia athu a zuela o dimi dia Camboja ku mbanza ia Long Beach, Califórnia, Estados Unidos ia América. Eme ngendele-ko, kuene ku nga di longo ku tanga o dimi dia Camboja. Kioso ki nga zubha o ku di longa bhu xikola, nga kituka muboki ua thembu ioso, anga ngi suluka mu bokela o athu akua Camboja, a tungile bhua zukamene o inzo iami. Kioso ki nga tenesa o 18 dia mivu, nga kexile mu banza kuia mu tunga ku ixi ia Camboja. Kiexile kididi kia iibha, maji nga kijidile kuila, o dikuinhi dia mazunda athu a tungile ku ixi ia Camboja, kua kexile athu a tolo evuidile o njimbu iambote ia Utuminu. Mu thembu ienioió kuexile ngó kilunga kia 13 a aboki mu ixi ioso. O ki nga dianga kuia ku ixi ia Camboja, nga kexile ni 19 dia mivu. Kioso kia bhiti mivu iiadi, ngai mu tunga kuenhoko. Nga sange salu ia kaxaxi ka kizuua, ia lungu ni ku lungulula ni ku longa mu dimi dia Kingileji, phala ku ngi kuatekesa eme ni ku kikalakalu kia ukunji. Mu ku bhita ithangana, nga kazala ni muhatu ua mesenene o ku bhanga kikalakalu ki nga mu bhanga eme. Kumoxi, tua kuata ku kuatekesa o athu avulu a kua ixi ia Camboja, ku bhakula o mienhu iá kua Nzambi.

Jihova ua ngi bhana ‘ki nga solo ku muxima.’ (Jisá. 37:4) O ku bhanga maxibulu, ufunu ua beta-o-kota ku maufunu oso, mukonda o kikalakalu kiki, ki bhekela ku sanguluka. Ku 16 a mivu i nga tungu ku ixi ia Camboja, o kilunga kimoxi kiofele, kia kexile ni 13 a jiselevende ja Jihova, kia kulu, lelu kuala 12 dia ilunga ni ibuka 4!—Kala kia tange Jason Blackwell.