Ku bokona mu madisá

Ku bokona mu madisá

 MILONGI YA 50

Jihova Wanda Mi Bhana Ufôlo

Jihova Wanda Mi Bhana Ufôlo

“Mu kola o ufôlo phala akwa’xi oso-lolo a tunga-mu.”—IJILA 25:10.

MWIMBU 22 Utuminu wa Nzambi Wíze!

I TWANDA DILONGA *

1-2. (a) O fesa ya Njubilewu ihi? (Tala o kaxa “ O fesa ya Njubilewu ihi?”) (b) Maka-hi a zwela Jezú mu divulu dya Luka 4:16-18?

SAYI JIXI, a bhanga fesa yadikota kyoso o sobha mba n’amvwale kya tenesa 50 a mivu. O athu a tena kubhanga o fesa yiyi mu kizuwa kya mumvimba, semana mba mbeji. Maji o kusanguluka kuku kubhita, o athu anga a jimba o fesa yiyi ni lusolo.

2 Etu twanda dilonga maka a lungu ni Njubilewu ya beta dingi kota, o fesa yexile mu bhanga akwa Izalayele mu kutenesa 50 a mivu, ndenge. O fesa ya Njubilewu yokulu, yexile mu bhekela ufôlo ku akwa Izalayele. Mukonda dyahi twa tokala kudilonga o maka ya? Mukonda o Njubilewu ya akwa Izalayele, i tu lembalesa kima kya katunda kya bhange Jihova phala etu. O ndunge ya bhange Jihova, yanda tu bhekela ufôlo wakalelaku, tu tena kukatula-ku mbote né mwene kindala kiki. Jezú wa zwela we yalungu ni ufôlo yú wa katunda.—Tanga Luka 4:16-18.

Mu muvu wa Njubilewu, akwa Izalayele a sanguluka mukonda diyala wexile mubhika, wa tambula ufôlo. Wa mu vutuka ku mwiji mu dyembu dyê (Tala o kaxi 3) *

3. Kala kilondekesa Ijila 25:8-12, o Njubilewu yexile mukwatekesa kyebhi akwa Izalayele?

3 Twanda tendela dingi kyambote o izwelu ya Jezú ya lungu ni ufôlo, se tu dyanga kudilonga o Njubilewu ya bhanene Nzambi ku mundu wê m’ukulu. Jihova wambela akwa Izalyele: “Muvu wa makwinyi-a-tanu kôlesa-u, anga mu kola o ufôlo phala akwa’xi oso-lolo a tunga-mu; u mi kale muvu wa njubilewu, muthu ni muthu alukile [mba a vutuke] mu mikáwu ya undûndu wê, muthu ni muthu we alukile ku familiya yê.” (Tanga Ijila 25:8-12.) Mu milongi ya tundu-mu, twa mono o  mbote yexile mu katula akwa Izalayele, mu Jisabhalu joso. Maji mbote yebhi yexile mu katula akwa Izalayele mu Njubilewu? Mu kifika, se mukwa Izalayele ukala ni makongo avulu anga u bhinga kusumbisa o kibhela kyê phala kufuta o makongo, mu muvu wa Njubilewu o kibhekela kyê exile mu avutwila-kyu. Mu kiki-phe, o mukwa Izalayele weji tena kutambula dingi o “mikáwu ya undûndu wê,” phala twana twê ki tu kambe kima kya kulundula. Mba diyala wa disumbisa mba wa sumbisa mon’ê mu ubhika phala kufuta o makongo avulu. Mu muvu wa Njubilewu o mubhika wa tokalele kuvutula ‘ku mwiji wê.’ Kifwa-phe, mu Izalayele, sé-ku muthu weji kala mubhika ku mwenyu wê woso! O ndunge yiyi ya Jihova, ilondekesa kwila, mwene u suwa, wa mesena o mbote ya athu oso!

4-5. Mukonda dyahi kima kyambote etu kudilonga maka alungu ni Njubilewu ya akwâ Izalayele?

4 Maji mbote yebhi yamukwá yexile mu katula akwa Izalayele mu Njubilewu? Jihova wa jimbulula: “Momwenu ki mu kale ngadyama; kuma Jihova Nzambi yé wa-nda ku ku bhana kubhanduluka kwanzungule m’oxi ya-nda ku ku lundwisa phala ku ivwa.” (Mate. 15:4) Kiki ki kyene mu bhita ku mundu wa lelu! Lelu, o jimvwama ene mu bandekesa dingi o umvwama-wâ. O wadyama wa jingadyama wene mu dibandekesa dingi.

5 Kuma tu Jikidistá, ki twene mu belesela o Kijila kya Mozé. Kiki kilombolola kwila, etu ki twene mu kayela o kijila kya Njubilewu, kyexile mu jituna o athu ku ubhika, kuloloka o makongo ni kuvutwila o ibhela ku miji ya a tokala. (Loma 7:4; 10:4; Efe. 2:15) Né kiki, twa tokala kudilonga o maka a lungu ni Njubilewu. Mukonda dyahi? Mukonda tu tena kukala ni ufôlo, u tu lembalesa ya bhangele Jihova phala o mbote ya akwa Izalayele.

JEZÚ WABHANA O NGOLOKELA YA UFÔLO

6. Mukonda dyahi etwenyoso twa bhingi ufôlo?

6 Etwenyoso twa bhingi ufôlo mukonda twala mu ubhika wa kituxi. Kuma tu akwa ituxi twene mu kuka, kukata ni kufwa. Avulu a mona o kidi kiki kyoso kya di tala kulumwenu, ni kyoso kya sota o dotolo mukonda dya uhaxi.  Tu luwala we kyavulu kyoso ki tu ta kituxi. O yalungu ni kutondala, poxolo Phawulu wambe: “Kyene kí kyala ku ngi kutila mu ubhika wa kitumu kya ituxi kya ngi kala mu idyandu yami.” Mwene wa bhandekesa-ku dingi: “Kokolo dyami dya kuxixima kiki! Nanyi u ngi kudila ku mukutu yú wa mu ngi bheka mu kalunga.”—Loma 7:23, 24.

7. Yalungu ni ufôlo Izaya wa kanena ihi?

7 Phala o kuzediwa kwetu, Jihova wa yudika njila phala ku tu bhulula ku ituxi. Jezú mwene o njila phala o ufôlo yú. Mu 700 ya mivu ande dya Jezú kwiza mu ixi, polofeta Izaya wa bhangele kikanenu kya lungu ni ufôlo wadikota. O ufôlo yú weji beta dingi kota o muvu wa Njumbilewu ya akwa Izalayele ndenge. Mwene wa soneka: “Nzumbi ya Ngana Jihova Nzambi ya ngi tula ku thandu; mukonda Jihova wa ng’undu kutudila jingadyama njimbu ya mbote; wa ngi tumu kusaka oso ala ni kikote mu muxima; ni kuxika ngonge ya ufôlo wa abhika.” (Iza. 61:1) O polofesiya yiyi yalungu ni nanyi?

8. Izaya wa bhange polofesiya ya lungu ni ufôlo. O polofesiya yiyi yalungu ni nanyi?

8 O kikanenu kiki kya beta o kota kya mateka kudikumbidila kyoso Jezú kya mateka o ukunji wê. Kyoso Jezú kya ile mu dilombe mu mbanza ya mu vwalela ku Nazale, Jezú wa tangele o izwelu ya Izaya kupholo dya akwa Izalayele a dyongekele-mu. Jezú wa jimbulula kuma o izwelu yiyi ya dikumbidila kwa mwene mu kuzwela: ‘Nzumbi ya Jihova ya ngi tula, mukonda mwène wa ng’undu kutudila o jingadyama, Njimbu Yambote. Wa ngi tumu kuxika ngonge ya ufôlo wa a bhika, ni kubhana mesu o ifôfo, ni ku jituna oso a a kwika, ni kukola o muvu wa Jihova wa kubhanduluka.’ (Luka 4:16-19) Kyebhi Jezú kya kumbidila o polofesiya yiyi?

O ATHU A DYANGA KUTAMBULA O UFÔLO

Jezú wabhana ngolokela yalungu ni ufôlo mu dilombe dya Nazalé (Tala o kaxi 8-9)

9. Mu thembu ya Jezú, athu avulu exile mu kingila ufôlo webhi?

9 Mu thembu ya Jezú o athu a mateka kutambula o ufôlo wa kanena Izaya, wa tange we Jezú mu dilombe. Tu tena kudyelela mu izwelu yiyi mukonda Jezú wabhana o ngolokela: ‘Lelu kya dikumbidila, ki mwevu kyòsoneke mu mak’ama.’ (Luka 4:21) Avulu evu o ngolokela yoyo nange exile mu kingila kwa bhulula ku unguvulu wa Loma. Ene nange exile ni kixinganeku kya mayala ayadi ambele: “Twa kexi ku dyelela twixi, Mwène kya wa-ndu bhandulula o mundu wetu wa Izalayele!” (Luka 24:13, 21) Maji twejiya kwila, Jezú  ka swinisa o maxibulu-mê kubhukumukina o unguvulu wa Loma. Mu veji dya kiki, mwene wa a tendelesa kufuta “kwa Sézalu, ima yangene ya Sézalu.” (Mat. 22:21) Kyenyiki-phe, kyebhi Jezú kya bhekela o ufôlo mu kithangana kyokyo?

10. Ufôlo wahi wabhana Jezú ku athu?

10 O mon’â Nzambi, weza mu ixi phala kubheka ufôlo mu mawukexilu ayadi. Kyadyanga, Jezú weza phala kubhulula o athu ku ubhika wa milongi ya makutu yexile mu longa o atwameni a jingeleja mu thembu yê. Jijudé javulu mu thembu yoyo, exile mu ajijidika kukayela o ijila ni ixikanu ya makutu. (Mat. 5:31-37; 15:1-11) O athu ambele kwila a mu kwatekesa akwá kubheza Nzambi, kexile mu bheza Nzambi mu ukexilu wa tokala. Mu kidi, edile kala ifofo. Mu kudituna Mexiya ni milongi yê, ene a lembwa kwijiya Nzambi. Kifwa, a suluka ni ufôfo wâ, o ituxi yâ ka i loloka. (Nzwá 9:1, 14-16, 35-41) Bhu kaxi ka milongi ni phangu yê yambote, Jezú wa londekesa ku athu a lenduka o mixima, kyebhi kyeji jituka ku ubhika wa milongi ya makutu.—Mál. 1:22; 2:23–3:5.

11. Jezú wa bhana ufôlo mu ukexilu webhi wa kayadi?

11 Kayadi, Jezú wa jikula o njila phala kubhulula o athu ku ubhika wa kituxi ki twa lundula. Kuma Jezú wa bhakula o mwenyu wê kala sata ya kukula, Nzambi utena kuloloka o ituxi ya athu ala ni kixikanu anga a londekesa o kixikanu mu ibhangelu yâ. (Jihe. 10:12-18) Jezú wambe: “O Mona se wa mi bhana ufôlo, mu kala ni ufôlo wa kidi.” (Nzwá 8:36) Sé phata, o ufôlo yú wa betele kota, o wexile mu tambula o mukwâ Izalayele mu muvu wa Njubilewu, ndenge! Mu kifika, o muthu wa jituka ku ubhika mu muvu wa Njubilewu, mu kubhita kithangana, watenene kukituka dingi mubhika mba ufwa. Maji o ufôlo wa bhana Jezú, wanda kalelaku katé ku hádya ni hádya.

12. A nanyi a dyangela kutambula o ufôlo wa zwela Jezú?

12 Mu kizuwa kya Pendekoxi ya 33 K.K., Jihova wa undu ni nzumbi ikôla o jipoxolo ni athu amukwá afiyele, kikale mayala kikale ahatu. Mwene wa a kitula twana twê. Ku hádya anda kwa fukununa phala kutumina kumoxi ni Jezú ku dyulu. (Loma 8:2, 15-17) Yá éne a dyangela kutambula o ufôlo wa zwela Jezú mu dilombe mu Nazalé. O mayala ni ahatu yá, kexile dingi mu ubhika wa milongi ya makutu ni ijila ya atwameni a Jijudé. Nzambi wa a bhulula we ku kituxi kibhekela o kalunga. O ndunge ya Jihova ya kubheka dingi o ufôlo ya mateka kyoso kya undu o maxibhulu a Kidistu. Yanda suka mu Utuminu  wa Jezú wa Midi ya Mivu. Ima yahi yambote yanda bhita kindala katé kudisukilu dya Utuminu wa Midi ya Mivu?

MAZUNDA A ATHU ENGI ANDA TAMBULA WE O UFÔLO

13-14. Katu o Jikidistá a a undu, anyi dingi atena kutambula o ufôlo wa zwela Jezú?

13 Mu izuwa ya lelu, mazunda a athu a zele o mixima ku ifuxi yoso, a tokala ku “jimbudi jamukwá.” (Nzwá 10:16) Nzambi ka a solo phala kutumina ku dyulu ni Jezú. Mu veji dya kiki, o Bibidya yamba kwila, ene ala ni ujitu wa kutambula o mwenyu wa kalelaku mu ixi. O kwila kyene o kidyelelu kyé?

14 Né mwene kindala kiki, eye wene mu tambula kyá mbote yene mu tambula we yó anda bhanga mbandu ya Utuminu wa Nzambi ku dyulu. Kuma eye wa dyelela mu sata ya Jezú, wala ni ujitu wa kubhinga o muloloki kwa Nzambi, kyoso ki u ta kituxi. Kiki ki kubhekela ukamba wambote ni Nzambi, u kala we ni kutululuka ku muxima. (Efe. 1:7; Dij. 7:14, 15) Xinganeka we ku ufôlo u wala na-wu, tunde ki wa jituka ku ubhika wa milongi ya makutu. Jezú wambe: “O kidi mwa-nda ku k’ijiya, o kidi anga ki mi bhana ufôlo.” (Nzwá 8:32) Etu twa sanguluka kyavulu mu kukala ni ufôlo yú!

15. Ufôlo ni mabesá ebhi u twanda tambula ku hádya?

15 Maji o ufôlo wa beta-kota wa mu kwiza kupholo. Kwa kambe ngó, Jezú wanda bwika o jingeleja ja makutu ni jinguvulu jayibha.  Nzambi wanda langa o “mundu wavulu” wa mu mu sidivila. Mu kusuluka, wanda ku abhana o mabesá mu palayízu, mu ixi. (Dij. 7:9, 14) Athu avulu anda ku a fukununa. Anda ku a bhulula we ku ima yoso yayibha ya tu bhekela o kituxi kya Adá.—Ika. 24:15

16. Ufôlo wahi wa katunda wanda tambula o athu ku hádya?

16 Mu Utuminu wa Midi ya Mivu, Jezú ni yó anda tumina-nê kumoxi, anda kwatekesa o athu kukala ni sawidi ni ukamba wayuka ni Nzambi. O kithangana kyókyo kya kubhanduluka, kyanda difwe ngó ni Njubilewu ya akwa Izalayele m’ukulu. Kiki kilombolola kwila, o athu a sidivila Jihova ni ufiyele woso, anda kituka athu ayuka, a tenena. Ki kwanda kala dingi kituxi.

Jezú wabhana ngolokela yalungu ni ufôlo mu dilombe dya Nazalé (Tala o kaxi 17)

17. Kala kya kanena o divulu dya Izaya 65:21-23 ihi yanda bhita ni mundu wa Nzambi? (Tala o foto ya kapa.)

17 O divulu dya Izaya 65:21-23, di jimbulula kyebhi kyanda kala o mwenyu wa athu mu ixi ku hádya. (Tanga.) Ki twanda kala tu imonya. Ki kwanda tu kamba kima phala kubhanga. Mukonda, o Bibidya ilondekesa kwila, o mundu wa Nzambi, wanda bhanga ikalakalu isangulukisa. Tu tena ku dyelela kwila, ku di sukilu dya Utuminu wa Midi ya Mivu, “ibhangelu yoso hadya ya kà jituka ku ubhika wa kubôla, hé ya kà bokona mu ufôlo wa fuma, wa an’a Nzambi.”—Loma 8:21.

18. Mukonda dyahi tu tena kudyelela kwila ku hadya twanda kala ni kusanguluka?

18 M’ukulu, Jihova wa sokejeka o ima phala akwa Izalayele kukala ni kithangana kya kukalakala ni kithangana kya kunyoha. Kyene we kyanda bhanga ni mundu we mu Midi ya Mivu ya Utuminu wa Kidistu, ku hádya. Sé phata, kyokyo kyanda kala kithangana kya kubheza Nzambi. Lelu, phala kukala ni kisangusangu, kwa bhingi kubheza Nzambi. Kyene we kyanda kala ku mundu wobhe. Kyene mwene. Mu Utuminu wa Kidistu wa Midi ya Mivu, athu oso anda zediwa, anda kala ni kikalakalu kisangulukisa. Etwenyoso twanda bheza Nzambi.

MWIMBU 142 O Kidyelelu ki tu Bhana Nguzu

^ kax. 5 Jihova wa soto ndunge phala kubhana ufôlo ku akwa Izalayele m’ukulu. O ndunge yiyi o fesa ya Njubilewu. O Jikidista kya bhingi dingi kubelesela o Kijila kya Mozé. Né kiki, kima kyambote kudilonga maka a lungu ni Njubilewu. Mu milongi yiyi, twanda dilonga se o Njubilewu yokulu i tu lembalesa kima kyahi kya bhange Jihova phala etu, ni mbote yahi i tu tena kukatula-ku.

^ kax. 61 KILOMBOLWELU KYA JIFOTO: Mu kithangana kya Njubilewu, diyala wexile mubhika, wa tambula ufôlo. Wa mu vutuka ku mwiji mu dyembu dyê.