‘Wenda we ni kusakidila.’—KOL. 3:15.

MWIMBU 46 Twa Sakidila, Jihova

I TWA-NDA DILONGA *

1. Kyebhi o mukwa Samadya a mu sakele kwa Jezú kya londekesa kisakidilu?

DIKWINYI dya mayala a kexile mu kithangana kya bhonzo. Ene a kexile ni uhaxi wa dibhute, kexile ni kidyelelu kwila ku hádya eji disanza. Maji sayi kizuwa, ene a mono Jezú, o Mulongexi wa Dikota, wa kexile mu bhita. Ene evu kwila Jezú wa kexile mu saka mawuhaxi oso, ene a dyelela ni kidi kyoso kwila eji kwa saka. Mu kiki ene a dikola: “Jezú, Mesene! Tu kwatele henda!” O dikwinyi dya mayala a a sake. Mu kidi enoso a sakidila mukonda dya mbote ya londekesa Jezú. Maji mu dikwinyi didi, sayi-ku diyala dimoxi, dya bhange dingi, o kudivwa kyambote ndenge—mwene wa londekesa o kisakidilu * kyê kwa Jezú. O mbote ya bhange ku diyala dyódyo dya mukwa Samadya, a mu sakele ya mu bhangesa kuximana Nzambi ni “dízwi dya zangumuka.”—Luka 17:12-19.

2-3. (a) Mukonda dyahi tu tena kujimba kulondekesa kisakidilu? (b) Ihi i twa-nda dilonga mu milongi yiyi?

2 Kala o mukwa Samadya, etu twa mesena kulondekesa o kisakidilu kyetu, ku akwa kubhanga o mbote. Maji sayi ithangana, nange tu jimba kusakidila akwetu mu mbote ya tu bhanga, ki kale mu izwelu wixi mu ibhangelu.

3 Mu milongi yiyi, twa-nda mona se mukonda dyahi kima kyambote kulondekesa o kisakidilu kyetu, mu izwelu ni mu ibhangelu yetu. Twa-nda dilonga madisá mu phangu ya athu a a tumbula mu Bibidya a londekesa kisakidilu ni yó a kambe ku  ki londekesa. Twa-nda dilonga mawukexilu u tu tena kulondekesa o kisakidilu kyetu.

MUKONDA DYAHI TWA TOKALA KULONDEKESA KISAKIDILU?

4-5. Mukonda dyahi twa tokala kulondekesa kisakidilu?

4 Jihova wa tu bhana phangu yambote ya kulondekesa kisakidilu. Ukexilu umoxi wa kubhanga kiki, o kubesowala yó ene mu mu ximanesa. (2 Sam. 22:21; Jisá. 13:6; Mat. 10:40, 41) O Mikanda Ikôla i tu swinisa ‘kufikisa Nzambi, kala tu an’ê a muxima.’ (Efe. 5:1) O kima kya beta o kota ki tu bhangesa kulondekesa kisakidilu, o kwijiya kwila, twa mesena kukayela o phangu ya Jihova.

5 Xinganeka mu kima kyengi ki tu bhangesa kulondekesa o kisakidilu kyetu ku akwetu. O kisakidilu tu tena ku ki sokesa ni kudya kwambote, kuwabha dingi kyoso ki tu dya ni akwetu. Kyoso ki twijiya kwila, akwetu a sakidila kima ki twa mu bhanga, tu sanguluka. Kyoso ki tu londekesa o kisakidilu kyetu tu sangulukisa we akwetu. O muthu u tambula o kisakidilu kyetu, wejiya kwila o nguzu ya bhange phala ku tu kwatekesa mba ku tu bhana kima ki twa bhindamene kya tu kwatekesa mwene. Mu kubhanga kiki, o ukamba wa muthu wa bhana o kiximanu ni yó wa ki tambula, u kola dingi.

6. Kyebhi o izwelu ya kisakidilu ya difu ni jimasá ja ulu?

6 O ukexilu wetu wa kulondekesa kisakidilu wala ni valolo. O Bibidya i tendelesa: “Kima se u ki zwela bhu thembu yê ya tokala, kila kala jimasá ja ulu bhu mabandeja ma phalata.” (Jisa. 25:11) Xinganeka o kubhenya kwa masá yo bhange ni ulu anga a i tadika mu dibandeja dya phalata! Xinganeka o valolo yala na-yu! Kyebhi ki weji dívwa se wa tambwile o ujitu yú? O izwelu ya kisakidilu i u zwelela akwenu i tena kukala ni valolo yiyi. Xinganeka mu kidi kiki: Masá yó bhange ni ulu, yeji tena kubhanga thembu yavulu. Kyene we kimoxi, o athu  u wene mu londekesa o kisakidilu, a tena ku di lembalala ni ku ki bhaka ku mixima yâ ku mwenyu woso.

ENE A LONDEKESA KISAKIDILU

7. Kala ki twa mono mu Sálamu 27:4, kyebhi Davidi ni asoneki amukwa a jisálamu kya londekesa o kisakidilu kyâ?

7 Jiselevende javulu ja Nzambi m’ukulu a londekesa o kisakidilu. Davidi wala bhu kaxi ka jiselevende jiji. (Tanga Jisálamu 27:4.) Mwene wa londekesa o kisakidilu mu ubhezelu wa kidi, wa londekesa o kisakidilu kyê mu ima ya bhange. Mwene wa bhana ima ya valolo phala kutunga o tembulu. O ana a Azafo a londekesa o kisakidilu kyâ mu ku soneka o jisálamu mba mimbu ya kiximanu. Mu mwimbu umoxi ene a sakidila Nzambi, a londekesa kwila a diwana ni ‘ikalakalu ya madiwanu ya Jihova.’ (Jisá. 75:1) Sé phata, ki kale Davidi wixi o ana a Azafo, a mesenene kulondekesa kwa Jihova o kisakidilu kyâ kya dikota mu mabesá oso a tambula kwa mwene. O kwila u tena kuxinganeka mawukexilu a kukayela o akwa jisalamu yâ?

O Mukanda wa Phawulu ku akwa Loma u tu longa ihi ya lungu ni kulondekesa o kisakidilu? (Tala o kaxi ka 8-9) *

8-9. Kyebhi poxolo Phawulu kya londekesa o kisakidilu ku jiphange jê? Nange ihi ya bhiti?

8 Poxolo Phawulu wa londekesa kisakidilu ku jiphange jê mu ukexilu wa zwela ya lungu ni ene. Mwene wexile mu sakidila Nzambi mu misambu ya kexile mu bhanga ubheka, mukonda dyâ. Mwene wa londekesa we o kisakidilu kyê kwa ene kyoso kya a sonekena. Mu 15 kya jivelusu ja dyanga, mu divulu dya Loma kibatulu 16, Phawulu wa tumbula 27 a Jikidistá mu majina. Phawulu wa tumbula Pidisila ni Akwila kuma, “a bhakwile kyá jixingu jâ ene” mukonda dya mwene. . . “mukwatekexi wa athu avulu,” kate mwene ni Phawulu. Mwene wa ximana o jiphange jiji ja kazola, a kalakala ni nguzu yoso, suku ni mwanya.—Loma 16:1-15.

9 Phawulu wejidile kwila o jiphange jojó exile akwa ituxi maji ku disukilu dya mukanda wa sonekena akwa Loma, mwene wa di kwatenena mu idifwa yâ yambote. Xinganeka kyebhi kya divu o jiphange jiji, kyoso kyevu o kiximanu kya Phawulu mu kilunga! Sé phata o ukamba wâ ni Phawulu wa kolo dingi. O kwila wene mu sakidila izuwa yoso o ima yambote i zwela ni i bhanga o jiphange mu kilunga kyé?

10. Ihi tu tena kudilonga mu ukexilu wa Jezú wa kulondekesa kisakidilu ku akayedi’ê?

10 Jezú wa londekesa kisakidilu mu kikalakalu kyexile mu bhanga o akayedi’yê mu ilunga ya Azya Menor, bhu kaxi ka njimbu ya a sonekena. Mu kifika mwene wa mateka o njimbu yê phala o kilunga kya Tiyatila mu kuzwela: ‘Eme ngejiya o ima yoso i wa mu bhanga kindala. Ngejiya ni henda yé, ni kuxikana, ni kukalakala kwé ni mwanu. Ngejiya we kwila o ima i wa sukidila kubhanga yala kota, ya dyangele-ku ndenge.’ (Dij. 2:19) Jezú ka tumbula ngó o kibandekesu kya ikalakalu yê maji wa ximana we idifwa ya a bhangesa kubhanga kiki. Sumbala sayi jiphange ku Tiyatila a bhingile kwa bazela kwa Jezú, maji mu disukilu dya njimbu yê mwene wa a swinisa. (Dij. 2:25-28) Xinganeka mu ungana wala nawu Jezú mu kukala mutwameni wa ilunga yoso. Mwene ka bhingi ku tu sakidila mu kikalakalu ki tu bhanga phala mwene. Né kiki, mwene u londekesa o kisakidilu kyê. Phangu yambote ya xisa phala o tufunga!

ENE KA LONDEKESA KISAKIDILU

11. Kala kilondekesa Jihebelewu 12:16, kyebhi Izawú kya kexile mu tala o ima ikôla?

11 Sayi athu a a tange mu Bibidya ka londekesa kisakidilu. Mu kifika sumbala Izawú a mu sase ku jitata ja zolele ni kuxila Jihova, mwene ka londekesa kisakidilu ku ima ikôla. (Tanga Jihebelewu 12:16.) O ukexilu we wa kukamba  o kisakidilu wa di monekena kyebhi? Izawú ni wowa wê wa sumbisa o ukota wê kwa ndeng’yê Jakobo, mu dilonga dya makunde. (Dim. 25:30-34) Kupholo, Izawú wa dyela kyavulu mu kima kya solele kubhanga. Maji mwene ka londekesa kisakidilu. Kyenyiki, mwene kexile dingi ni ujitu wa kutambula o ukota.

12-13. Kyebhi akwa Izalayele kya londekesa kukamba kisakidilu, ni ihi ya bhiti?

12 Akwa Izalayele a kexile ni ima yavulu phala kulondekesa kisakidilu. Ene a a bhulula mu ubhika, kyoso Jihova kya bheka Dikwinyi dya Mabhebhu ku akwa Ijitu. Mu kusuluka Nzambi wa a bhulula mu kikangalakata mu ku bwika o kifuxi kyoso kya masoladi akwa Ijitu mu Kalunga Kakusuka. Akwa Izalayele a sakidila kyavulu, katé kya suku mu kwimba mwimbu wa kisakidilu phala kuximana Jihova. O kwila ene eji suluka ni kulondekesa o kisakidilu kiki?

13 Kyoso akwa Izalayele kya dibhana ni ibhidi ya ubhe ene a jimbi o ima ya a bhangele Jihova ni lusolo. Ene a londekesa o kukamba kisakidilu kyâ. (Jisá. 106:7) Kyebhi? “O kyônge kyoso kya an’a Izalayele anga a kwata ku longolola Mozé ni Alá” mu kidi, a longolola Jihova. (Mak. 16:2, 8) Mwene wa luwala kyavulu ni kukamba kisakidilu kya mundu wê. Kupholo mwene wa kanene kwila o kifuxi kyoso kya Izalayele kyeji fwa mu kikangalakata, kweji bhuluka ngó Josuwé ni Kalebe. (Dya. 14:22-24; 26:65) Tu mone kyebhi ki tu tena kudituna kukayela o phangu ya athu a yibha yá ni kyebhi ki tu tena kukayela o phangu ya athu ambote.

LONDEKESA KISAKIDILU LELU

14-15. (a) Kyebhi o makaza kya tena ku di londekesa kisakidilu mudyâ? (b) Kyebhi o jitata kya tena kulonga o twana twâ kulondekesa kisakidilu?

14 Ku mwiji. Oso ku mwiji a katula mbote, se kala muthu mudyâ u londekesa kisakidilu. O makaza a-nda di zukama dingi se a londekesa kisakidilu mudyâ. Ki kya-nda kwa bhonza we ku di loloka. O diyala dilondekesa o kisakidilu ku muhatu wê, ka tale ngó o ima yambote i izwela ni i bhanga, maji we “u balumuka, u mu tanesa.” (Jisa. 31:10, 28) O muhatu wala ni unjimu, u tangela ku munumi wê o ima ya wabhela kwa mwene.

15 Jitata, kyebhi ki mu tena kulonga an’enu phala n’a londekesa kisakidilu? Kana kujimba kwila, o mon’ê wa-nda fikisa yoso i u zwela ni yoso i u bhanga. Kyenyiki-phe bhana phangu yambote mu kusakidila kyoso mon’ê kya bhanga kima kya ku wabhela. Longa we mon’ê  phala n’a kale ni kifwa kya kusakidila kyoso akwa kya bhanga ima yambote phala mwene. Kwatekesa mon’ê kutendela kwila, o kisakidilu ki tunda ku muxima, ni kwila o izwelu yê i tena kusangulukisa akwâ. Mu kifika, sayi phange a mwixana Clary, wambe: “Kyexile ni 32 a mivu, mam’etu a muxi ni twana tutatu phala kusasa, ubheka. Ki nga tenesa we 32 a mivu, nga tonginina kwila, kya mu bhonzele kyavulu kusasa o twana ni kitala kyokyo. Kyenyiki, nga mu tangela kwila, muxima wami wezalele ni kisakidilu mu ima yoso ya bhange phala ku tu sasa. Izuwa kudima, mwene wa ngi tangela kwila ya mu tula ku muxima, wa i wabhela kyavulu, wene mu i xinganeka jinga veji javulu, yene ku mu sangulukisa.”

Longa mon’ê phala kukala ni kifwa kya kulondekesa o kisakidilu (Tala o kaxi ka 15) *

16. Bhana phangu ya lungu ni kyebhi o kulondekesa kisakidilu ku swinisa akwenu?

16 Mu kilunga. Kyoso ki tu londekesa kisakidilu mu izwelu ku jiphange jetu, ene a swina dingi. Tala mu kifika kya phange Jorge, kafunga wala mu 28 a mivu, wa katele kyavulu. Wa bhiti mbeji ya muvimba sé kuya mu yônge, mukonda dya uhaxi. Né mwene kya mateka dingi kuya mu yônge, mwene ka tenene hanji kubhanga mbandu mu yônge. Phange Jorge wambe: “Eme nga divu kwila ki ngala ni valolo mukonda dya uhaxi ni mukonda dya ku lémbwa kubhanga o ikalakalu yami mu kilunga. Maji sayi kizuwa, ku disukilu dya kyônge, sayi phange wa ngambela wixi: ‘Nga kusakidila mu phangu yambote i wene mu bhana ku mwiji wami. Twa wabhela kyavulu o madiskulusu u wa bhange mu mivu ya bhiti kudima. Ya tu kwatekesa kukula mu nzumbi.’ Izwelu yiyi ya ngi tula ku muxima, nga mateka kudila. O izwelu yê yene mwene i nga bhindamene kwívwa.”

17. Kala kya ki tumbula Kolose 3:15, kyebhi ki tu tena kulondekesa kisakidilu mu ukexilu wa Jihova wa kubhana?

17 Kwa Nzambi yetu, mukwa kubhana. Jihova wene mu tu bhana kudya kwavulu mu nzumbi. Mu kifika, twene mu tambula itendelesu i tu kwatekesa mu yônge, mu madivulu ni mu sayte yetu. O kwila wevwile kyá diskulusu, wa tangele milongi mba wa talele minangu mu broadcasting ya ku bhangesa kuzwela: ‘Milongi yiyi yene mwene i nga bhindamene’? Kyebhi ki tu tena kulondekesa o kisakidilu kyetu kwa Jihova? (Tanga Kolose 3:15.) Tu tena kulondekesa o kisakidilu kyetu, mu ku mu sakidila izuwa yoso mukonda dya mawujitu yá ambote, mu misambu.—Tiya. 1:17.

Kukwatekesa mu kikalakalu kya kuzelesa o Kididi kya Ubhezelu, ukexilu wambote wa kulondekesa o kisakidilu kyetu (Tala o kaxi ka 18)

18. Mu mawukexilu ebhi u tu tena kulondekesa kisakidilu mu Ididi yetu ya Ubhezelu?

18 Tu londekesa we o kisakidilu kwa Jihova,  kyoso ki tu zelesa ni kusokejeka o Kididi kyetu kya Ubhezelu. Tu xisa kithangana phala kuzelesa ni kuyudika o Ididi yetu ya Ubhezelu. O jiphange a kalakala ni iselekete ya mimbu ni jividyu, a dilanga kyambote phala ki ji zanganye. Se tu langa mu ukexilu wa tokala o Ididi yetu ya Ubhezelu, yene ya-nda nangenena dingi, ki kwa-nda bhinga ku yudika jinga kyavulu. Se tu bhanga kiki, twa-nda kala dingi ni kitadi phala kutunga Ididi yengi ya Ubhezelu ku mundu woso.

19. Ihi i wa dilongo mu musoso wa kafunga ka ilunga ni muhatu wê?

19 Kwa yó a kalakala kyavulu phala o mbote yetu. Kyoso ki tu londekesa o kisakidilu, o izwelu yetu i tena kulungulula o ixinganeku ya muthu wa mu dibhana ni ibhidi yavulu. Tala ngó ya bhiti ni kafunga ka ilunga ni muhatu wê. Ene a kalakala mu sidivisu ya kuboka. Mu ku vutuka kubhata, a bhwila kyavulu. O inzo yâ ya talalele kyavulu, katé muhatu wa bhingile kuzeka ni kazáku kê ka mbambi. Ki kwaki, mwene wa tangela munum’yê kwila, keji tena dingi kusuluka mu kikalakalu kya kukunda o ilunga. Kumbi ki dya bande-ku dingi, a tambula mukanda wa tundu ku filiyale phala mwene. O mukanda wa mu ximana kyavulu mukonda dya ukunji ni kukolokota kwê. O jiphange ejidile kwila, kwa bhonzele mwene kyavulu semana joso kuzeka inzo yengi. Mwadi we wambe: “O kiximanu kiki kya mu tula ku muxima, mwene wa divu kyambote. Tundé o kizuwa kyenyókyo o kixinganeku kya kuxisa o sidivisu ya kukunda o ilunga ki kya mwiza dingi ku muxima. Mu kidi, mu ithangana yavulu mwene kya wa ngi swinisa kyoso ki ngexile ni ibanzelu ya kuxisa o kikalakalu kiki.” Kwa kambele ngó phala o dikaza didi kutenesa 40 a mivu mu sidivisu ya kukunda o ilunga.

20. Ihi i twa tokala kubhanga kizuwa ni kizuwa ni mukonda dyahi?

20 Tu tena kulondekesa o ukexilu wetu wa kusakidila mu izwelu ni ibhangelu yetu. O ima i tu zwela ni ibhangelu yetu, nange yene ya bhindamena akwetu phala kuya kupholo, bhu kaxi ka mundu yú wa kambe o kisakidilu. O ukexilu wetu wa kusakidila u tena kubheka ukamba u nangenena. Kya beta kota, twa-nda kayela o phangu ya Tat’yetu ya henda, mukwa kusakidila, Jihova.

MWIMBU 20 Wa Bhana o Mon’é wa Kazola

^ kax. 5 Ihi i tu tena kudilonga mu phangu ya Jihova, Jezú ni mukwa Samadya wa kexile ni uhaxi wa dibhute, ya lungu ni kulondekesa kisakidilu? Mu milongi yiyi twa-nda dilonga o jiphangu jiji ni ja mukwa. Twa-nda mona se mukonda dyahi kima kya beta kota kulondekesa kisakidilu ni kyebhi ki tu tena kubhanga kiki.

^ kax. 1 IZWELU YO JIMBULULE: Kusakidila muthu mba kima kya tu bhange, kulombolola kuxikina o valolo ya muthu mba ya kima kiki. O kizwelu kiki ki tena kulombolola kusakidila ni muxima woso.

^ kax. 55 KILOMBOLWELU KYA JIFOTO: A mu tanga o mukanda wa Phawulu mu kilunga kya Loma. Akwila, Pidisila, Fibe ni jiphange jengi a mu tumbujuka ni kisangusangu mu kwívwa o majina mâ o tumbule mu mukanda..

^ kax. 57 KILOMBOLWELU KYA JIFOTO: Mama ya mu kwatekesa o kana-kê phala kusakidila o phange ya mwadyakime, wene mu bhana phangu yambote.