“Ngi ku ximana bhu kyônge bhwa bhongoloka o mundu.”—JISÁ. 22:22.

MWIMBU 59 Tu Ximane Jihova

I TWA-NDA DILONGA *

1. Kyebhi kya divu Davidi ya lungu ni Jihova? Kiki kya mu bhangesa kubhanga ihi?

SOBHA DAVIDI wa soneka: “Jihova ukôla, wa tokala ku mu ximana kyavulu.” (Jisá. 145:3) Mwene wa zolele Jihova, o henda yiyi ya mu bhangesa kuximana Nzambi “bhwa bhongoloka o mundu.” (Jisá. 22:22; 40:5) Sé phata, eye we wa zolo Jihova, u xikina mu izwelu ya Davidi, kyoso kyambe: ‘Tana-ku, eye u Jihova Nzambi ya tat’etu Jakobo, katé ku hádya ni hádya.’—1 Mal. 29:10-13.

2. (a) Kyebhi ki tu tena kuximana Jihova? (b) Ibhidi yebhi yene mu dibhana na-yu amoxi mu dyetu? Ihi i twa-nda bhitulula?

2 Ukexilu umoxi u tu tena kuximana Jihova lelu, o kutambwijila mu yônge ya Ukidistá. Maji sayi jiphange ene mu dibhana ni ibhidi. Ene a mesena kutambwijila mu yônge maji o wôma wene mu a fidisa. Kyebhi kya tena kutolola o wôma wâ? Jindunge jebhi ji tena ku tu kwatekesa kubhana itambwijilu i swinisa? Ande dya kutambwijila o ibhwidisu yiyi, tu bhitulule ima iwana ya beta kota i tu bhangesa kutambwijila mu yônge.

TWENE MU TAMBWIJILA MU YÔNGE MUKONDA DYAHI?

3-5. (a) Kala kya ki jimbulula mu divulu dya Jihebelewu 13:15, mukonda dyahi twene mu tambwijila mu yônge? (b) O kwila etwenyoso twa tokala kutambwijila mu ukexilu umoxi? Jimbulula.

3 Etwenyoso, Jihova wene mu tu bhana o ujitu wa ku mu ximana. (Jisá. 119:108) O itambwijilu yetu mu yônge i bhanga mbandu ku “sata i twa bhakula,” se-ku muthu u tena ku tu bhangela o sata yiyi mu kididi kyetu. (Tanga Jihebelewu 13:15.) O kwila Jihova u jijidika o athu kubhana sata mba kutambwijila mu ukexilu umoxi? Kana!

 4 Jihova wejiya kwila o mawuhete ni ithangana yetu ki i difu, mwene u bhana valolo yavulu mu sata i tu tena ku mu bhana. Xinganeka mu jisata ja xikina mwene ku akwa Izalayele. Sayi akwa Izalayele, exile mu tena kusatela mbudi mba hombo. Maji o ngadyama mukwa Izalayele, weji tena kusatela “membe mayadi, mba twana tuyadi twa jipomba.” Se mukwa Izalayele ka tenene kusatela twana tuyadi twa jipomba, Jihova wexile mu xikina, “kakinda ka fuba ya fina ka tena mbandu ya kakwinyi ya efah.” (Iji. 5:7, 11) O fuba ki i tele kitadi kyavulu, maji Jihova wa kexile mu bhana valolo ku ujitu yú, se ya kexile “fuba ya fina.”

5 O Nzambi yetu ya henda kyene hanji kya divwa lelu. Kyoso ki tu tambwijila, mwene ka tu jijidika kukala tu jimesene ja kuzwela kala Apolo mba kubhanga o athu kuxikina kima kala Phawulu. (Ika. 18:24; 26:28) Jihova wa mesena kwila tu bhana yoso i tu tena kubhanga ni uhete u twala nawu. Lembalala o mutudi wa bhanene tumilambongo tuyadi. Mwene wa kexile ni valolo kupholo ya Jihova, mukonda wa bhana o kima kya betele kota kya kexile na-kyu.—Luka 21:1-4.

O kutambwijila kubhekela mbote kokwetu ni oso a twívwa (Tala o kaxi 6-7) *

6. (a) Kala ki zwela o divulu dya Jihebelewu 10:24, 25, o itambwijilu i twívwa i tu bhangesa kudivwa kyebhi? (b) Kyebhi ki u tena kulondekesa o kisakidilu mu itambwijilu i ku swinisa?

6 Tu di swinisa mudyetu bhu kaxi ka itambwijilu. (Tanga Jihebelewu 10:24, 25.) Etwenyoso twa wabhela kwívwa itambwijilu ya mawukexilu avulu mu yônge yetu. Tu sanguluka mu kwívwa o itambwijilu ya bhebhuluka i tunda ku mixima ya tumbonga. Ki tu swinisa kwívwa dízwi dya phange wa mu jimbulula maka a lungu ni kidi kya dilongo. Tu diwana we o ku “bhwa wôma” kwene mu londekesa oso a bhana itambwijilu, sumbala akwa jisonyi, mba a mateka kudilonga o dimi dyetu kindala. (1 Tes. 2:2) Kyebhi ki tu tena kulondekesa o kisakidilu kyetu mu nguzu yene mu bhanga? Tu tena ku a sakidila mu itambwijilu yâ i swinisa ku disukilu dya yônge. O ukexilu wa mukwa wa kusakidila, o kubhana we o kitambwijilu kyê. Ku disukilu, ki tu tambula ngó kiswinisu mu yônge yetu maji tu bhana we.—Loma 1:11, 12.

7. Mbote yebhi i tu katula kyoso ki tu tambwijila mu yônge?

7 Tu katula mbote kyoso ki tu tambwijila. (Iza. 48:17) Kiki ki bhita kyebhi? Kya dyanga,  se twa mesena kutambwijila, tu kala dingi ni vondadi ya kudipelepalala kyambote phala o kyônge. Kyoso ki tu dipelepalala kyambote, tu tena kutendela kyambote o milongi ya zongo ya Mak’â Nzambi. O kutendela kyambote, kwa-nda tu kwatekesa kukumbidila o ima i twa mu dilonga. Kayadi, twa-nda wabhela dingi o kyônge mukonda mu yoso ya zwela twa bhange-mu we mbandu. Katatu, mukonda o kubhanga nguzu phala kutambwijila, ku tu kwatekesa kulembalala o jipondo ji twa dilongo né mwene se kubhita thembu yavulu.

8-9. (a) Kala kya kilondekesa mu Malakiya 3:16, kyebhi Jihova kya divwa ya lungu ni itambwijilu yetu? (b) Ibhidi yebhi yene mu di bhana na-yu amoxi mu dyetu?

8 Tu sangulukisa Jihova kyoso ki tu zwela ya lungu ni kixikanu kyetu. Tu tena kudyelela kwila Jihova u twívwa, u bhana valolo mu nguzu i tu bhanga phala kutambwijila mu yônge. (Tanga Malakiya 3:16.) Mwene u londekesa kwila, u tu bhana valolo, mu ku tu besowala kyoso ki tu bhanga nguzu phala ku mu sangulukisa. —Mal. 3:10.

9 Sé phata twala ni ima yambote i tu bhangesa kutambwijila mu yônge. Né kiki nange sayi yá a kala hanji ni wôma wa kuleka o lukwaku. Se kyene ki wene mu divwa, kana kuluwala. Tu mone itumu ya Bibidya, phangu ya athu, ni jindunge ji tena ku tu kwatekesa kutambwijila dingi mu yônge.

KYEBHI KI U TENA KUTOLOLA O WÔMA WA KUTAMBWIJILA?

10. (a) Wôma webhi wala na-wu jiphange javulu bhu kaxi ketu? (b) Mukonda dyahi o wôma wa kutambwijila utena kukala kijimbwete kyambote?

10 O kwila wene mu teketa ni wôma mu ola ya kuzangula o lukwaku phala kutambwijila? Se kyene, k’eye ngó. Mu kidi, avulu mu dyetu ene mu dívwa we kiki, mu ola ya kutambwijila. Phala kutolola o wôma wene mu kufidisa, wa bhingi kwijiya o kima ki kubhangesa kukala ni wôma yú. O kwila u kala ni wôma wa kujimba o kima ki wa mesena kuzwela, mba kwa-nda bhana o kitambwijilu kya tokala? O kwila u tandanganya, kwila o kitambwijilu kyê ki kya-nda wabha kala o kitambwijilu kya akwenu? Mu  kidi, kukala ni wôma yú, kutena kukala kijimbwete kyambote. U londekesa kwila u muthu wa lenduka, u mona akwenu kala a beta kota, eye ndenge. Jihova wa zolo o athu a lenduka. (Jisá. 138:6; Fil. 2:3) Maji Jihova wa mesena we kwila, u mu ximana, u swinisa o jiphange jê mu yônge. (1 Tes. 5:11) Mwene wa kuzolo, wa-nda kubhana o nguzu i wa bhingi.

11. Ilembalesu yebhi ya Bibidya i tena ku tu kwatekesa?

11 Tu mone i tu lembalesa o Mak’â Nzambi. O Bibidya yamba kwila, etwenyoso twene mu tondala mu ima i tu zwela ni mu ukexilu u tu zwela. (Tiya. 3:2) Jihova ni jiphange jetu, ka kingila kuyuka ko kwetu. (Jisá. 103:12-14) Ene a tokala ku mwiji wetu mu nzumbi, a tu zolo. (Mar. 10:29, 30; Nzwá 13:35) Ene ejiya kwila, sayi bhabha ki twa-nda tena kuzwela i twa mesenene kuzwela.

12-13. Ihi i tu dilonga mu phangu ya Nehemiya ni ya Jona?

12 Xinganeka mu phangu ya athu i tena ku kukwatekesa kutolola o wôma wê. Lembalala Nehemiya. Mwene wa kalakala mu inzo ya sobha wa kexile ni kutena kwavulu. Nehemiya wa luwalele mukonda wevu kwila, o imbaka ni mabhitu a Jeluzaleme ka i tungile luwa. (Neh. 1:1-4) Xinganeka o wôma wa kexile na-wu kyoso sobha kya mwibhwidisa: Mukonda dyahi wa luwala? Ande dya kutambwijila, Nehemiya wa sambe ni lusolo. O sobha wa kwatekesa kyavulu o mundu wa Nzambi. (Neh. 2:1-8) Xinganeka we mu phangu ya Jona. Kyoso Jihova kya mu tumu phala kuzwela ni akwa Ninive, Jona wôma wa mu kwata, wa lengela ku mbandu yengi, kwa mu tumine ki kwene. (Jona 1:1-3) Maji ni kikwatekesu kya Jihova, Jona wayile mu bokela akwa Ninive. O izwelu ya Jona ya tula ku mixima ya akwa Ninive. (Jona 3:5-10) Mu phangu ya Nehemiya twa dilongo kwila, kima kyambote kusamba ande dya kutambwijila. Mu phangu ya Jona, twa dilongo kwila, Jihova u tena ku tu kwatekesa ku mu sidivila né mwene se tu kala ni wôma wavulu. Mu kidi, se-ku kilunga ki kwatesa wôma wavulu kala akwa Ninive!

13 Jindunge jebhi ji tena ku kukwatekesa kubhana itambwijilu i swinisa mu yônge? Tu mone tu ndunge.

14. Mukonda dyahi twa tokala ku di sokejeka kyambote phala o yônge yetu? Tu tena kumateka ku di sokejeka thembu kuxi?

14 Pelepalala o jimbandu joso ja yônge. Se u di pelepalala kyambote, ni kithangana kya soko, wa-nda divwa dingi kyambote phala kutambwijila. (Jisa. 21:5) Mu kidi kala muthu mudyetu wala ni kithangana kyê phala ku di pelepalala phala o yônge. Eloise, mutudi wala ni 80 a mivu, wene mu mateka kupelepalala o milongi ya Mulangidi mu dimatekenu dya semana. Mwene wamba, “Ngi katula dingi mbote mu yônge se ngi dilonga ni kithangana kya soko.” Joy, wene mu kalakala kizuwa kya muvimba, u sota kithangana ku ji Sábhalu phala kudilonga o Mulangidi. Mwene wambe: “Ki ku ngi bhonzo kulembalala o milongi se ngi pelepalala kizuwa  kimoxi ande dya kizuwa kya kyônge.” Ike, kafunga muboki wa thembu yoso, wala ni ikalakalu yavulu, wambe: “Mu dyami nga mono kwila, kota se ngi dilonga bhofele-bhofele kala kizuwa, mu veji dya kudilonga milongi yavulu mu kizuwa.”

15. Kyebhi ki u tena ku di pelepalala kyambote phala o yônge?

15 Ihi ya bhingi phala kupelepalala kyambote o yônge? Samba kwa Jihova mu kubhinga o nzumbi ikôla ande dya kumateka kudilonga. (Luka 11:13; 1 Nzwá 5:14) Katula tu ithangana phala kuyala o milongi yoso. Tala, xinganeka mu dyambu, tu dyambu twofele, o ifika ni milongi ya jikaxa. Kyoso ki wa-ndaya ni kudilonga o makaxi, sota kutanga o jivelusu jo tumbule katé bhwa suku o kithangana kyê. Xinganeka mu milongi, benge-benge o jipondo ji wa mesena kutambwijila. Se u dipelepalala kyambote, wa-nda katula dingi mbote, ki kwa-nda kubhonza kutambwijila.—2 Kol. 9:6.

16. Jifalamenda jebhi ji twala naju? Kyebhi ki tu tena kukalakala naju?

16 Se ki bhana, dilonge bhu kaxi ka mitelembe yala ni ji falamenda jetu, mu dimi di wejiya. Bhu kaxi ka kilunga kyê, Jihova wene mu tu bhana jifalamenda ja katunda ji tu kwatekesa ku pelepalala o yônge. O aplikativu JW Library® i tu kwatekesa kukatula o madivulu m’etu, phala ku ji bhaka mu mutelembe wetu. Ki tu zubha o ku ji katula, tu tena kyá kudilonga, kutanga mba kwívwa o milongi i twa katula mu kididi ni ola yoso i twa mesena. Amoxi a dilonga bhu kaxi ka JW Library® ku salu mu ola ya ku dimosala, ku xikola mba kyoso kya mu kwenda njila. O Watchtower Library ni Watchtower ONLINE LIBRARYyene mu kwatekesa kyavulu kutokwesa kyambote o jipondo ni milongi i wa mesena kwijiya dingi.

Ithangana yebhi i wene mu pelepalala o yônge? (Tala o kaxi 14-16) *

17. (a) Mukonda dyahi kima kyambote kupelepalala itambwijilu yavulu? (b) Ihi i u tena kudilonga mu vidyu, Kala u Dikamba Dya Jihova—Pelepalala o Itambwijilu Yé?

17 Se u tena, pelepalala itambwijilu yavulu mu milongi ya semana imoxi. Mukonda dyahi? Mukonda, ki wejiya se ibhwidisu yebhi ya-nda kusola phala kutambwijila kyoso ki wa-nda leka o lukwaku. O jiphange jamukwá a-nda leka we o maku mu kithangana kimoxi n’eye. O phange wa mu kwendesa, u tena kusola phange yoso-yoso. Phala kuzubha o kyônge mu ola ya tokala, o jipondo ja mukwá o mwendexi nange ka-nda kwehela jiphange ku ji jimbulula kyavulu. Kyenyiki, kana kuluwala mba u ta xingu bhu mbandu se ku dimatekenu dya milongi a kamba ku kusola phala kutambwijila. Se u pelepalala itambwijilu yavulu, wa-nda tena kuleka o lukwaku mu veji javulu, kyenyiki, ki wa-nda fula ku tambwijila. O itambwijilu i wa tokala kupelepalala, i tena kukala o kutanga velusu mu Bibidya. Maji se wa tena, disokejeke we phala kutambwijila mu izwelu yé mwene. *

18. Mukonda dyahi twa tokala kubhana itambwijilu ya butu?

 18 Kana kuzwela kyavulu. Mu veji javulu, o itambwijilu i swinisa dingi, o itambwijilu ya butu, ya bhebhuluka. Kyenyiki, bhanga nguzu phala kutambwijila mu izwelu yofele. Bhana o itambwijilu yé mu kaxaxi ka kithangana. (Jisa. 10:19; 15:23) Se wene mu tambwijila kya mu yônge tundé ukulu, eye wa tokala kubhana phangu yambote—mu ku tambwijila mu izwelu yofele. Se u kala ni kifwa kya kuzwela ima yavulu mu ithangana yavulu, akwenu a tena kudivwa kyayibha, mu kuxinganeka kwila, ene ka-nda kala ni uhete wa kutambwijila kyambote kala eye. Kumbandu yengi, kubhana itambwijilu mu izwelu ya butu, kwa-nda kwehela we akwenu kutambwijila mu kyônge. Kotelele se éye wa twama kutambwijila mu mbandu, wa tokala kutambwijila o kibhwidisu mu izwelu ya bhebhuluka. Kana kusota kuzwela o jipondo joso mu mbandu. Se o pondo ya beta kota yo tambwijile kyá, eye u tena kutumbula o jipondo ja mukwá.—Tala o kaxa “ Itambwijilu Yebhi i Ngi Tena Kubhana?

19. Kyebhi o mwendexi kya tena ku kukwatekesa? Maji ihi i wa bhingi kubhanga?

19 Zwela ni mwendexi kwila sayi kaxi wa mesena kutambwijila. Se u sola kubhanga kiki, zwela kyambote ni mwendexi ande dya kyônge kumateka. Kyoso kya-nda bhixila o kithangana kya kutambwijila o kaxi ku wa solo, leka o lukwaku ni lusolo, ki kya-nda bhonza phala o mwendexi ku kumona phala ku kusola.

20. Kyebhi o yônge mu kilunga ya soko ni kudya ni makamba?

20 Tala o kyônge kya kilunga kala kudya kumoxi ni makamba. Xinganeka kwila sayi makamba mu kilunga a kwixana phala kutonoka na-wu, anga a kubhinga phala kulamba ka kudya. Kyebhi ki weji tambwijila? Weji thandanganya, maji weji bhanga nguzu phala kwambata kima. Oso eji sanguluka mu nguzu i wa bhange. Jihova, Muzaledi wetu, wene mu pelepalala o meza yezala ni kudya phala etu, mu kyônge. (Jisá. 23:5; Mat. 24:45) Mwene u sanguluka kyavulu kyoso ki tu bhanga nguzu phala ku mu bhana ujitu, né mwene kófele phala etu, maji kyene kya beta kota phala mwene. Kyenyiki, disokejeke kyambote, bhana o itambwijilu i u tena. Mu kiki ki wa-nda divwa kwila wala ubheka ku meza ya Jihova maji kala wa mu dya kumoxi ni kilunga.

MWIMBU 2 Dijina Dyé, Jihova

^ kax. 5 Etwenyoso twa zolo Jihova, twa wabhela ku mu ximana kala o mukwa jisálamu Davidi. Twala ni ujitu wa katunda wa kulondekesa o henda kwa Nzambi, kyoso ki tu dyongeka mu kilunga phala ku mu bheza. Maji amoxi mu dyetu, kyene mu a bhonza kutambwijila mu yônge yetu. Se wene mu dibhana ni kibhidi kiki, o milongi yiyi, i tena ku kukwatekesa kutendela mukonda dyahi wene mu kala ni wôma; ni kutolola o wôma wé.

^ kax. 17 Tala mu site jw.org, o vidyu Kala u Dikamba Dya Jihova—Pelepalala o Itambwijilu Yé. Jikula o mbandu ENSINOS BÍBLICOS > CRIANÇAS.

^ kax. 63 KILOMBOLWELU KYA JIFOTO: O Jiphange mu kilunga a sanguluka mu kudilonga kumoxi o Mulangidi.

^ kax. 65 KILOMBOLWELU KYA JIFOTO: Jiphange ja tokala kilunga kimoxi, a mu pelepalala o milongi ya Mulangidi mu kithangana kya soloSumbala kala muthu wala ni kithangana kyé, enyoso a soto kithangana phala kupelepalala o kyônge.