“Ku yoso ya fwama ku langa, langa o muxima wé.”​—JISA. 4:23.

MWIMBU 36 Langa o Muxima Wé

I TWA-NDA DILONGA *

1-3. (a) Mukonda dyahi Jihova wa zolele Solomá? Mabesá ebhi a tambula Solomá? (b) O milongi yiyi ya-nda tambwijila ibhwidisu yebhi?

SOLOMÁ wa kituka sobha ya Izalayele mu unzangala wê. Ku dimatekenu dya usobha wê, Jihova wa mu tukulukila mu nzoji, yú wa mwambela: “Bhinga kyoso ki wandala ki ngi ku bhana.” Solomá wa tambwijila: ‘Eme-phe hanji ngi mon’awisu; ki ngijiya luwa kyoso ki ngi tunda, ni kyoso ki ngi bokona . . . . O ki ngal’iki, Ngana, ngi bhane, ngi mubhik’é, muxima wa belesela mu kufundisa o mundu wê.’ (1 Jis. 3:5-10) “Muxima wa belesela”—Solomá wa di tululula mu kubhana o kitambuijilu kiki. Jihova wa zolele Solomá! (2 Sam. 12:24) Nzambi yetu wa sangulukile kyavulu ni kitambwijilu kya munzangala Solomá o sobha, wa mu bhana “muxima wa kwijiya kinéne ni kutongoloka.”—1 Jis. 3:12.

2 Kyoso Solomá kyexile mu londekesa ufiyele, wa tambula mabesá avulu. Mwene wa tambula o ujitu wa kutunga tembulu phala ‘o dijina dya Jihova, Nzambi ya Izalayele. (1 Jis. 8:20) Mwene wa fumanene mukonda dya unjimu wa mu bhana Nzambi. O ima ya zwela ni kikwatekesu kya nzumbi ya Nzambi yo soneke mu madivulu atatu a Bibidya. Mu madivulu yá, dimoxi o divulu dya Jisabhu.

3 O kizwelu muxima a ki tumbula hama dya jiveji ndenge mu divulu dya Jisabhu. Mu kifika, o divulu dya Jisabhu 4:23, dyamba: “Ku yoso ya fwama ku langa, langa o muxima wé.” Ihi ilombolola o kizwelu “muxima” mu velusu yiyi? O milongi yiyi, ya-nda tambwijila o kibhwidisu kiki. Ya-nda tambwijila ibhwidisu yadi ya mukwa: Kyebhi Satanaji kya sota kufunyisa o muxima  wetu? Ihi i tu tena kubhanga phala kulanga o muxima wetu? Phala kukolokota mu ufiyele kwa Nzambi, twa bhingi kutendela o itambwijilu ya ibhwidisu yiyi.

“O IZWELU “MUXIMA WÉ” ILOMBOLOLA IHI?

4-5. (a) O Sálamu 51:6 i tu kwatekesa kyebhi ku tendelela se o kizwelu “muxima” kilombolola we ihi? (b) Kyebhi o ukexilu u tu langa o sawidi yetu mu xitu, u tu kwatekesa kubhana valolo mu ukexilu wetu moxi?

4 Mu divulu dya Jisabhu 4:23, o kizwelu “muxima” a ki tumbula phala kulombolola o muthu “moxi” dyetu, kifwa; o muthu “wa kambe kumoneka ku athu.” (Tanga Jisálamu 51:6) Mu izwelu ya mukwa, “muxima” ulombolola o ixinganeku yetu, kyebhi ki tu dívwa, o jivondadi, ni jihanji jetu. Kifwa, o ukexilu wetu moxi, ko ukexilu u moneka ngó bhu kanga.

5 Xinganeka kyebhi o sawidi yetu mu xitu ya lungu ni kubhana valolo mu ukexilu wetu moxi. Kya dyanga phala mukutu wetu kudisanza twa bhingi kudya kyambote ni kutungutisa o mukutu ithangana yoso. Kyene kimoxi we phala kudisanza mu nzumbi, twa bhingi kutanga o Bibidya ni madivulu amukwa a kilunga ni kulondekesa kwila twala ni kixikanu kwa Jihova ithangana yoso. Tu londekesa o kixikanu kyetu kwa Jihova mu kukumbidila o ima i tu dilonga, ni kuzwela ya lungu ni kixikanu kyetu. (Loma 10:8-10; Tiya. 2:26) Kayadi, mu kuxinganeka mu ima i mona o mesu, tu tena kubanza kwila, twala ni sawidi yambote, né mwene se yandu yetu ya moxi ya kate. Kyene kimoxi we mu nzumbi, mu kuxinganeka mu ima i twene mu bhanga mu nzumbi, nange tu banza kwila, o kixikanu kyetu kya kolo, maji ixinganeku ya bolo nange ya mu kulé hanji ku muxima wetu. (1 Kol. 10:12; Tiya. 1:14, 15) Twa tokala kulembalala kwila, Satanaji wa mesena ku tu funyisa ni ixinganeku yê. Kyebhi mwene kya tena kubhanga kiki? Ni kyebhi ki tu tena kudilanga?

KYEBHI SATANAJI KYA SOTA KUFUNYISA O MUXIMA WETU

6. Ihi ya mesena kubhanga Satanaji? Phala kubhanga ya mesena, u funya ndunge yebhi?

6 Satanaji muthu wa húku, wene mu bhukumukina o itumu ya Jihova. Mwene wa mesena kwila, tu kala we kala mwene. Satanaji ka tena ku tu jijidika kubhanga o ima ya mesena. Mu  kiki, mwene u sota kubhanga o ima ya mesena ni jindunge jengi. Mu kifika, mwene wejiya kwila a tu kondoloka ku athu a a funyisa kyá kwa mwene. (1 Nzwá 5:19) Mwene wa mesena kwila, tu sola kubhita na-wu kithangana, sumbala twejiya kuma, kudilunga ni athu ayibha, “kubolesa” o ixinganeku ni ibhangelu yetu. (1 Kol. 15:33) Yiyi yene o ndunge ya funyisa na-yu Sobha Solomá. Mwene wa kazala ni ahatu avulu, exile mu bheza jinzambi jengi, ‘a mu funyisa kyavulu,’ bhofele-bhofele a tena ku mu “dyangula o muxima.”—1 Jis. 11:3.

Kyebhi ki u tena kulanga o muxima wé mu nguzu i bhanga Satanaji phala ku tu funyisa ni ixinganeku yê? (Tala o kaxi 7) *

7. Satanaji wene mu mwanga dingi o ixinganeku yê bhu kaxi ka ima yebhi? Mukonda dyahi twa bhingi kudilanga ni ima yiyi?

7 Satanaji u mwanga o ixinganeku yê bhu kaxi ka jifilme, ni minangu ya mutelembe ya izuzumbya. Mwene wejiya kwila o misoso yo tange mba ifika i tena kutula ku mixima yetu ni ku dyangula, mukonda i tu longa kyebhi ki tu tena kuxinganeka, kudivwa ni kubhanga o ima. Jezú wa kexile mu longa kyambote ni ifika. Xinganeka mu ifika ya te ya lungu ni mukwa Samadya ni mona wa xisa o dibhana dya tat’ê, yú wa zanga-zanga o kitadi kyê. (Mat. 13:34; Luka 10:29-37; 15:11-32) Mu kiki, o athu a a funyisa ni ixinganeku ya Satanaji, a tena ku tu funyisa ni ifika mba misoso yâ. Twa bhingi kwijiya kusola. O jifilme ni minangu ya mitelembe ya izuzumbya i tena ku tu bhangesa kudivwa kyambote, ku tu longa sé ku funyisa o ixinganeku yetu. Maji twa tokala kudilanga. Kyoso ki tu sola itonokenu kima kyambote kudibhwidisa, ‘O kwila o filme mba minangu yiyi, i ngi longa kwila kima kyambote kubhanga o jivondadi yami joso ja xitu?’ (Nga. 5:19-21; Efe. 2:1-3) Ihi i weji bhanga se u mona kwila o minangu i wa mu kwívwa mba kumona ya mu mwanga o ixinganeku ya Satanaji? Wa tokala ku i lenga kala ki weji lenga uhaxi u sambukila!

8. Kyebhi o jitata kya tena kukwatekesa o twana twâ kulanga o mixima yâ?

8 Jitata, enu mwala ni kikalakalu kya katunda  kya kulanga o twana twenu ku jindunge ja Satanaji ja kufunyisa o mixima yâ. Sé phata enu mu bhanga yoso i mu tena phala kulanga an’enu mu uhaxi wa xitu. Suluka ni kuzelesa o inzo yé, texi o ima yoso i tena kubhangesa o twana twê kukwata uhaxi. Kyene kimoxi, wa bhinge kulanga o twana twê ku jifilme, minangu ya izunzumbya, jividyo geme, ni internete yene o ima i funyisa o muxima wa mone ni ixinganeku ya satanaji. Jihvova wa mu bhana o kikalakalu kya kulonga o twa twenu mu kwa kwatekesa kukala makamba me. (Jisa. 1:8; Efe. 6:1, 4) Mu kiki, kana kukala ni wôma wa kuta kijila ku mwiji wê bhu kaxi ka Bibidya. Tangela o twa twê o ima ya tokala kumona ni ihi ka tokala kumona ni kwa jimbululala se mukonda dyahi. (Mat. 5:37) Mu ku kula kwa ndé ni kwa longa ihi yawabha ni ihi ya zembe Jihova. (Jihe. 5:14) Lembalala kwila, o twa twê a-nda dilonga ni ima i u zwela, maji a-nda dilonga dingi ni ibhangelu yê.—Mate. 6:6, 7; Loma 2:21.

9. Kixinganeku kyebhi kyene mu mwanga Satanaji? Mukonda dyahi o kilwezu kukala ni kixinganeku kiki?

9 Satanaji u sota we kufunyisa o muxima wetu, mu ku tu bhangesa kudyelela mu unjimu wa athu mu veji dya kudyelela mu ixinganeku ya Jihova. (Kol. 2:8) Satanaji wene mu mwanga o kixinganeku kya kwila, o kima kya beta o kota ku mwenyu o kukala ni umvwama. O athu a banza kiki, a tena kukala jimvwama mba kana. Ene ala mu kilwezu. Mukonda dyahi? Mukonda ene a tena ku di kwatenena kya ngó mu kusota o kitadi, ka lange dingi o sawidi yâ, o ukamba wâ ni mwiji, katé mwene ni ukamba wâ ni Nzambi phala kukala ni kitadi. (1 Tim. 6:10) Tu tena kusakidila, mukonda o Tata yetu ya dyulu u tu kwatekesa kukala ni kibanzelu kya tokala kya lungu ni kitadi.—Ndo. 7:12; Luka 12:15.

KYEBHI KI TU TENA KULANGA O MUXIMA WETU?

Kala o mulangidi ni alangidi a miyelu mu ukulu, dilange, bhanga kima phala o ixinganeku yayibha ki i bokone ku muxima wé (Tala o kaxi 10-11) *

10-11 Ihi i twa tokala kubhanga phala kudilanga mba kulanga o mwenyu wetu? (b) Ihi yexile mu bhanga o mulangidi m’ukulu? Mu ukexilu webhi o kitongolwelu kyetu ki kalakala kala mulangidi?

10 Se twa mu ditunda kyambote mu kulanga o muxima wetu, twa tokala kutonginina o ilwezu ni kubhanga kima ni lusolo phala kulanga o mwenyu. O kizwelu “ku langa” mu divulu dya Jisabhu 4:23 ki tu lembalesa o kikalakalu kyexile mu bhanga o mulangidi. Mu izuwa ya Sobha Solomá o mulangidi wa kexile mu kwimana phala kulanga o imbaka ya mbanza. Se wa monene nguma ya mu bhixila, wa kexile mu xika koloneta. Kuxinganeka mu kifika kiki, ku tu kwatekesa kutendela ihi i twa tokala kubhanga phala kufidisa o ixinganeku ya Satanaji ku tu funyisa.

11 M’ukulu, o alangidi a imbaka ni alangidi a miyelu akexile mu kalakala kumoxi. (2 Sam. 18:24-26) Ene a kexile mu kwatekesa kulanga o mbanza mu kutonginina kyambote, se mabhitu a a jikile kyambote, mu kubhanga kiki, né mwene se jinguma ja zukamene, keji tena kubokona. (Neh. 7:1-3) O kitongolwelu kyetu kyo longe bhu kaxi ka Bibidya, * ki kalakala kala mulangidi wetu; kyoso Satanaji kya sota kufunyisa o muxima wetu u tu dimuna—mu izwelu ya mukwa, kyoso kya sota kufunyisa o ixinganeku, ni jivondadi jetu. Ithangana yoso i tu dimuna o kitongolwelu kyetu, twa bhingi kubhanga yoso i tu tena phala kulenga o kilwezu.

12-13. A tena ku tu tendala kubhanga ihi? Maji ihi i twa tokala kubhanga?

 12 Tu mone phangu ya lungu ni kyebhi ki tu tena kudilanga mu ixinganeku ya Satanaji. Jihova wene mu tu longa kwila, “o undumbu-phe, ni ufusa woso, ni hanji jayibha, ka j’ivwe né ku ji ta ngó maka mu’axaxe kenu.” (Efe. 5:3) Maji ihi i tu tena kubhanga se koleka ya salu mba ya xikola u mateka kuzwela maka a lungu ni undumbu? Twejiya kwila, twa tokala ‘kweha o kubhuma ni jihânji jayibha ja mundu.’ (Tito 2:12) O mulangidi, o kitongolwelu kyetu ki tena ku tu dimuna mu kilwezu. (Loma 2:15) Maji o kwila twene mu ki bhana matwí? A tena ku tu tendala se twívwa o jikoleka mba tu mona o jifoto jene mu ta mu internete. Maji twa bhingi kulenga o kilwezu, mu kulungulula o maka mba kutunda bhu kaxi kâ.

13 Kubhinga nguzu phala kudituna o ijijidiku kya jikoleka kya kuxinganeka mba kubhanga ima yayibha. Tu tena kudyelela kwila, Jihova u mona o nguzu i tu bhanga ni kwila, wa-nda tu bhana o nguzu ni unjimu u twa bhingi phala kudituna o ixinganeku ya Satanaji. (2 Mal. 16:9; Iza. 40:29; Tiya. 1:5) Ihi dingi i tu tena kubhanga phala kulanga o muxima wetu?

DILANGE

14-15. Ihi i twa bhing kubhanga phala kujikula o muxima wetu, ni kyebhi ki tu tena kubhanga kiki? (b) O divulu dya Jisabhu 4:20-22 di tu kwatekesa kyebhi kukatula dingi mbote mu kitangelu kyetu kya Bibidya? (Tala o kaxa, “ Kyebhi ki u Tena Kuxinganeka.”)

14 Phala kulanga o muxima wetu, ki tu tena ngó kudituna kubhanga o ima yayibha, twa bhingi kuxikina kubhanga o ima yambote. Xinganeka dingi mu kifika kya mbanza yo lange ni imbaka. O mulangidi wa mabhitu wa kexile mu jika o mabhitu a mbanza phala jinguma ki ji bokone. Maji mu ithangana ya mukwa, wa kexile mu jikula o mabhitu phala kwehela o kudya ni ima ya mukwa kubokona. Se mwene ka jikwile o mabhitu mu ithangana ya tokalele ku a jikula, o athu eji tala hadi. Kyene kimoxi we, twa bhingi kwehela ku tu funyisa ku ixinganeku ya Nzambi ithangana yoso.

15 O ixinganeku ya Jihova tu i sanga mu Bibidya; mu kiki, kala kithangana ki tu i tanga, kifwa twa mu kwehela o ixinganeku ya Jihova kufunyisa o ukexilu wetu wa kubanza, kudivwa ni kubhanga o ima. Kyebhi ki tu tena kukatula dingi mbote mu kitangelu kyetu kya Bibidya? Kima kyambote kusamba. Sayi phange ya muhatu wambe: “Ande dya kutanga o Bibidya, ngi samba kwa Jihova, ngi mu bhinga phala ku ngi kwatekesa kumona o ima yonene ya Maka mê.” (Jisá. 119:18) Twa bhingi we kuxinganeka mu ima i tu tanga. Kyoso ki tu samba, ki tu tanga ni kuxinganeka mu Mak’â Nzambi, twa-nda ku a “lunda mwene mu’axaxe ka muxima” wetu, twa-nda zola o ixinganeku ya Jihova.—Tanga Jisabhu 4:20-22; Jisá. 119:97.

16. Kyebhi jiphange javulu kyene mu katula mbote mu kumona o JW Broadcasting?

16 O ukexilu wa mukwa u tu tena kwehela o ixinganeku ya Nzambi ku tu funyisa, o kumona o milongi ya JW Broadcasting®. Sayi dikaza dyambe: “O milongi ya mbeji yene mu tambwijila o misambu yetu! Yene mu tu swinisa kyoso ki tu luwala mba tu divwa ubheka. Twene mu kwívwa o mimbu kubhata, kyoso ki twa mu lamba, kuxixila o inzu mba kyoso ki twa mudya.” O milongi yiyi, i tu kwatekesa kulanga o muxima wetu. Yene i tu longa kuxinganeka kala Jihova ni kudituna o kijijidiku ni kixinganeku kya Satanaji.

17-18. (a) Kala kilondekesa o divulu dya 1 Jisabhu 8:16, ihi i bhita kyoso ki tu kumbidila o ima i tu longa Jihova? (b) Ihi i tu tena kudilonga mu phangu ya Sobha Ezekiya? (c) Kala kilondekesa o musambu wa Davidi mu Sálamu 139:23, 24, ihi i tu tena kubhinga mu musambu?

17 Kyoso ki tu mona o mbote ya kubhanga o  ima yambote, o kixikanu kyetu ki kola dingi. (Tiya. 1:2, 3) Tu divwa kyambote mukonda twene mu sangulukisa o muxima wa Jihova. Mwene u twixana an’ê, o vondadi yetu ya ku mu sangulukisa i di bandekesa dingi. (Jisa. 27:11) Kala kibhidi ki moneka, kithangana phala kulondekesa kwila, twa mesena kusidivila Tata yetu ni muxima wa tenena. (Jisá. 119:113) Mu veji dya kiki, tu londekesa kwila twa zolo Jihova, ni muxima wa tenena, kifwa muxima wa mesena kubelesela o itumu yê ni kubhanga o vondadi yê ni muxima woso.—Tanga 1 Jisobha 8:61.

18 O kwila twa-nda lweza? Kyene; mukonda tu akwa ituxi. Se tu di bhukana tu lembalala o phangu ya Sobha Ezekiya. Mwene wa tondalele. Maji wa dyela o ituxi yê, yú wa suluka mu kubheza Jihova ni “muxima wa tenena.” (Iza. 38:3-6; 2 Mal. 29:1, 2; 32:25, 26) Tu ditune o jitendasá ja Satanaji ja ku tu funyisa ni ixinganeku yê. Tu sambyenu mu kubhinga “muxima wa belesela.” (1 Jis. 3:9; tanga Jisálamu 139:23, 24.) Tu tena kulondekesa o ufiyele wetu kwa Jihova, se tu langa dingi o muxima wetu kima kyoso-kyoso ndenge.

MWIMBU 54 ‘Yiyi Yene o Njila’

^ kax. 5 Twa-nda kolokota mu ufiyele wetu kwa Jihova, inga twa-nda kwehela Satanaji ku tu fudisa kusidivila o Nzambi yetu? O kitambwijilu ki kya lungu ni jipolova ja bhonzo ji moneka, maji kya lungu ni kulanga kyambote o muxima wetu. O kizwelu “muxima” kilombolola ihi? Kyebhi Satanaji kya sota kufunyisa o muxima wetu? Kyebhi ki tu tena ku u langa? O milongi yiyi, ya-nda tambwijila o ibhwidisu yiyi.

^ kax. 11 IZWELU YO JIMBULULE: Jihova u tu bhana uhete wa kutonginina o ixinganeku yetu, ibhangelu ni kyebhi ki tu divwa phala tu tene ku di fundisa mu dyetu. O uhete yú, a wixana kitongolwelu mu Bibidya. (Loma 2:15; 9:1) O kitongolwelu kyo longe bhu kaxi ka Bibidya, ki fundisa o ixinganeku ni ibhangelu ya muthu ya lungu ni kyawabha ni kyayibha, bhu kaxi ka itumu ya Jihova i tu sanga mu Bibidya.

^ kax. 56 KILOMBOLWELU KYA JIFOTO: Phange a mu batizala kyá wa mu tala minangu mu mutelembe wa izuzumbya, anga kwa moneka kima kya ufusa. Wa tokala kusola kyoso kya-nda bhanga.

^ kax. 58 KILOMBOLWELU KYA JIFOTO: Mulangidi mu thembu yokulu, u mona kilwezu ku mbandu ya mukwa ya mbanza. Mwene wixana o alangidi a mabhitu, ala ku lwiji, ene a jika o mabhitu a mbanza ni lusolo, ni ijijidiku ya moxi..