“Zwatenu kibhakatu kyoso kya mi bhana Nzambi, phala mu di fikidile mu kubhânga ni jindunge joso ja Dyabhu.”—EFEZO 6:11.

MIMBU: 7, 55

1, 2. (a) Mukonda dyahi o minzangala a mu tolola o ita ni Satanaji ni madimonyo mê? (Tala o foto ya dyanga.) (b) Ihi i twa-nda dilonga?

O POXOLO Phawlu wa sokesa o Jikidistá ni masoladi. Etu twa mu bhânga mu ita, o nguma yetu muthu wa kidi! Maji ki twa mu bhânga ni athu mu xitu kana, twa mu bhânga ni Satana ni madimonyo. Ene ala kyá ni uhete wa kubhânga mu ita, mukonda ene mu ki bhanga kyá mu mivu yavulu. Kiki ki moneka kala ki twa-nda tena kutolola o ita yiyi, benge-benge se tu minzangala hanji. O kwila mu kubhânga ni jinguma jiji jyala ni kutena, o minzangala a tena kutolola o ita? Kyene, ene a tena. Ene mu a tolola kyá! Mukonda dyahi? Mukonda ene mu tambula kutena kwa Jihova. Ku mbandu ya mukwa, kala masoladi a disokejeka kyambote mu kukayela o kitendelesu kiki: “Zwatenu kibhakatu kyoso kya mi bhana Nzambi.” Kyenyiki ene a kala polondo phala o ita.—Tanga Efezo 6:10-12.

2 Kyoso Phawlu kya te o kifika kiki, mwene wa kexile mu xinganeka mu izwatu ya kexile mu ta o masoladi akwa Loma. (Ikalakalu 28:16) Mu milongi yiyi, twa-nda dilonga o kifika  kiki. Twa-nda dilonga we ya zwela o minzangala ya lungu ni ibhidi ni mbote ya kuzwata o kibhakatu kyetu kyoso mu nzumbi.

O kwila wa zwata o jimbandu joso jya kibhakatu kyê?

KUDIKUTA “O KIDI KALA PHONDA”

3, 4. Kyebhi o kidi kya Bibidya kya difu ni phonda ya disoladi dya Loma?

3 Tanga Efezo 6:14. O phonda ya disoladi mukwa Loma, yexile ni plaka ya felu, phala kulanga o dilembe. Say jiphonda ja kexile we mu fikidila o kibhakatu phala ni ki kwatenena mu mukutu wa disoladi. Ya kexile we ni kididi phala o xibhata ni kididi phala o phoko mba mukwale. Ni phonda yiyi yokute kyambote, o masoladi ka kexile ni hele mukonda ya kexile mu a fikidila kyambote mu ita.

O kidi ki twa di longo mu mak’â Nzambi ki tu langa mu milongi ya makutu

4 Kala ki bhita ni phonda, o kidi ki twa di longo mu mak’â Nzambi ki tu langa mu milongi ya makutu. (Nzuá 8:31, 32; 1 Nzuá 4:1) Kyoso ki tuya ni kubandekesa o kwijiya kwetu kwa Bibidya, ki kwa-nda tu bhonza kukayela o itumu ya Nzambi mba kuzwata o “kivunga-thulu” kyetu. (Jisálamu 111:7, 8; 1 Nzuá 5:3) Ku mbandu ya mukwa, se tu tendela kyambote o kidi kiki, ki kwa-nda tu bhonza kubhânga ni jinguma jetu.—1 Phetele 3:15.

5. Mukonda dyahi twa tokala kuzwela o kidi ithangana yoso?

5 Phala etu, o kidi kya Mak’â Nzambi ki kima kya kutonoka. Mukonda dya kiki, tu belesela o itendelesu yala mu Bibidya; tu zwela o kidi ithangana yoso. O makutu, uta wa beta o kota wa Satanaji, wene mu ditunda na-u kyambote. O makutu a kwamesa ki kale yó wa mu a ta, ni yó u a xikina. (Nzuá 8:44) Kyenyiki né mwene tu akwa ituxi, tu bhanga nguzu yoso phala ki tu tange makutu. (Efezo 4:25) Kiki ki bhonza. Abingayle, wala mu 18, dya mivu wambe: “Kuzwela o kidi say bhabha kumoneka kala ki kwala ni valolo, benge-benge se kutanga o makutu ku tena ku kukatula mu kanjila ka jokota.” Kyenyiki-phe mukonda dyahi wene mu bhanga yoso phala kuzwela o kidi? Mwene wambe: “Kyoso ki ngi zwela o kidi, o kitongolwelu kyami ki zela bhu pholo ya Jihova. O makamba ni jindandu jami, a ngi dyelela.” Victoria, wala mu 23, wambe: “Kyoso ki u zwela o kidi, ni kuzokela o kixikanu kyê a tena ku kuxongwena. Maji u tambula mabesá avulu ithangana yoso: A ku dyelela dingi, u zukama dingi kwa Jihova, oso a kuzolo a kuxila dingi.” Wa mono se mukonda dyahi kima kyambote kuzwata ‘o phonda ya kidi’ ithangana yoso?

O phonda ya kidi (Tala o kaxi 3-5)

“O KIVUNGA-THULU KYA KUYUKA”

6, 7. Mukonda dyahi o kuyuka a kusokesa ni kivunga-thulu?

6 O kivunga-thulu kya disoladi dya Loma, akexile mu kibhanga ni felu. O ji felu akexile mu ji kuta ni kibha, akexile mu ta-ku we jifunete, ni jifivela ja felu. O isuxi ya disoladi, akexile mu i futa we ni felu. Ni kivunga-thulu kiki, o disoladi ka tenene kulenga mba kudizambesa kala kya mesenene. Wa bhingile we kutala se kya kexile mu kididi kya tokala veji jyavulu. Maji, kya kexile mu langa o thulu ni idyandu ya mukwa, ya disoladi, phala ka mu jibhe ni jisosa mba jixibhata!

Ki kyala mu kwijiya kwetu o kulanga o muxima wetu

 7 O itumu ya yuka ya Jihova, yene mu langa o “muxima” mba o muthu moxi dyetu, a tena ku i sokesa ni kivunga-thulu. (Jisabhu 4:23) O disoladi ka xikinine kuzula o kivunga-thulu kyê kya felu phala kuta kyengi kya beleketa. Kyene we kimoxi etu ki tu xikina kubhukumukina o itumu ya Jihova ni tu kayela o ixinganeku yetu ya lungu ni kyawabha. Ki kyala mu kwijiya kwetu o kulanga o muxima wetu. (Jisabhu 3:5, 6) Kiki kyene ki tu bhangesa ku ditonginina ithangana yoso se “o kivunga-thulu” kyetu kya mu langa hanji o muxima wetu.

8. Mukonda dyahi twa tokala kubelesela o itumu ya Jihova?

8 O kwila say ithangana u dívwa kuma o itumu ya Jihova ya mu kukatula o ufôlo wa kubhanga yoso i wa mesena? Daniyele, wala mu 21, wambe: “O alongexi ni jikoleka jami a ngi xongwena mukonda dya kukayela o itumu ya Bibidya. Say ithangana, ki Ngi kexile dingi ni nguzu ya kuzokela o kixikanu kyami, muxima wami wa tolokele.” Maji kindala mwene wa mu dívwa kyebhi? Mwene wambe: “Ku disukilu, Nga mono o mbote ya kukayela o itumu ya Jihova. Say ‘makamba’ mami a mateka kunwa jidroga, amukwa a a kaye mu xikola. Nga luwala mu kumona kyebhi kya lunguluka o myenyu yâ. Jihova u tu langa mwene mu kidi.” Madison, wala mu 15, kya mivu wambe: “Kwa bhingi nguzu phala ku di kwatenena mu kukayela o itumu ya Jihova ni kudituna o ijijidiku ya jikoleka jami phala kubhanga o ima yene mu xinganeka ene kwila ya fwama.” Ihi-phe ya bhange mwene? “Nga di lembalala kwila, nga mu kwambata o dijina dya Nzambi ni kumona o jitendasá kala jihome ja Satanaji phala ku ngi tolola. Kyoso ki ngi mu tolola, ngi dívwa kyambote, ngi kala dingi ni nguzu.”

O kivunga-thulu kya kuyuka (Tala o kaxi 6-8)

“MU ZWATA JIHAYI JA KU DI YUDIKA MU NJIMBU YAMBOTE YA PAZE”

9-11. (a) Jihayi jebhi mu nzumbi ji zwata o Jikidistá? (b) Ihi i tena ku tu kwatekesa kudivwa kyambote kyoso ki tu boka?

9 Tanga Efezo 6:15. O disoladi dya Loma, ka tenene kuya mu ita ni makanda a hatu. O jihayi jê, a kexile mu ji bhanga ni kidyotelu kyexile mu kwambata ibha itatu. Kyenyiki, tu tena kuzwela kwila, jene jya kolele mwene kyavulu. Maji ki jya kexile mwa bhekela jifidila kana, ene a tenene kulenga sé hele ya kuxalumuka.

10 O jihayi jya masoladi akwa Loma jya kexile mu a kwatekesa kuditunda kyambote mu ita. O jihayi mu nzumbi ji tu kwatekesa kuboka o “njimbu yambote ya paze.” (Izaia 2:7; Loma 10:15) Né kiki, say ithangana phala kuboka kubhinga kuswina. Bo, wala mu 20 a mivu wambe: “Eme ngene mu kala ni woma wa kubokela o jikoleka jami. Ngexile ni jisonyi. Mu kutala kudima ki ngejiya mukonda dyahi nga kexile mu dívwa kiki. Lelu nga sanguluka mu kubokela o jikoleka jami.”

11 Minzangala yavulu a dívwa dingi kyambote phala kuboka se a dipelepalala ni kithangana kya soko ande dya kuya mu boka. Ihi i u tena kubhanga phala ku di sokejeka?  Julia, wala mu 16 a mivu, wambe: “Ngene mu kwambata madivulu mu mbwenga yami ya xikola, ngila matwí tekenge kyoso o jikoleka jami kya mu zwela o ixinganeku ni ixikanu yâ. Mu kubhanga kiki, ngi tena kuxinganeka kyebhi ki nga-nda kwa kwatekesa. Kyoso ki ngi di pelepalala, ngi tena kuzwela kima kya-nda a kwatekesa.” Makenzie, wala mu kitala kya 23, wambe: “Se u kala u muthu wa henda, ni mukwa kwívwa kyambote, wa-nda kwijiya o ibhindamu ya mu dibhana na-yu o jikoleka jê. Ngi bhanga nguzu phala kutanga o milongi yoso ya lungu ni minzangala. Kyenyiki ngi a londekesa kima mu Bibidya mba mu jw.org, kya-nda ku a kwatekesa.” Ku di pelepalala kyambote phala kuboka, kwa soko ni kuzwata “idyotelu” ji kusoka kyambote.

Kuzwata o jihayi ja ku di yudika (Tala o kaxi 9-11)

“O NGUBU YA KUXIKANA”

12, 13. ‘Mifula yebhi ya wama’ yala na-yu Satanaji?

12 Tanga Efezo 6:16. O disoladi dya Loma, dyexile ni ngubu phala ku mu vungina tundé mu isuxi, katé mu jiphuna. Kyenyiki, kikale o jixibhata, o jisosa ni mifula, ki i kexile mwa kwama.

 13 ‘Mifula yebhi ya wama’ yene mu tu takula Satanaji? Say ithangana u zoka n’eye bhu kaxi ka makutu a lungu ni Jihova. Satanaji wa mesena eye u dívwa kwila Jihova ka kuzolo, ni kwila se-ku muthu wa-nda kulanga. Ida, wala mu kitala kya 19, wambe: “Mu veji javulu nga divu kwila Jihova wala dikanga ni kwila, ka mesena kukala Dikamba dyami.” Ihi ya bhange mwene kyoso kya divu kiki? “O yônge yene mu kolesa kyavulu o kixikanu kyami. Eme ngexile ni kifwa kya kuxikama ngó se kubhana itambwijilu, nga xinganekene kwila se-ku muthu weji mesena kwívwa o itambwijilu yami. Maji lelu, ngi pelepalala o yônge ngi di pelepalala phala o yônge, ngi sota kubhana itambwijilu iyadi mba itatu. Ki bhonza bhofele, maji ngi dívwa kyambote kyoso ki ngi ki bhanga. O jiphange ene mu ngi swinisa kyavulu. Izuwa yoso ki ngi tunda mu yônge, ngi tunda-mu ni kixinganeku kya kwila Jihova wa ngi zolo.”

14. Ihi i twa di longo ni musoso wa Ida?

14 O ngubu ya masoladi ya kexile ni kitala kimoxi. Maji kala ki twa dilongo mu phangu ya Ida, o kixikanu kyetu ki kyene ki kya tokala kukala. O kixikanu kyetu, ki tena kukula mba kukonana, kukola mba kuzoza. Etu tu sola. (Matesu 14:31; 2 Tesalonika 1:3) Phala “o ngubu ya kixikanu” kyetu ku tu langa, twa tokala ku ki komesa ni ku ki kolesa!

O ngubu ya kuxikana (Tala o kaxi 12-14)

“KAPASETE KA KUBHULUKA”

15, 16. Mu ukexilu wahi o kidyelelu kyetu kya difu ni kapasete?

15 Tanga Efezo 6:17. O disoladi dya Loma, dya kexile mu ta we kapasete phala kulanga o mútwe, o xingu ni pholo. Say bhabha, ku kapasete a kexile mu ta-ku kinyengenu, phala o masoladi a tene ku kambata bhu maku.

16 Kala o kapasete ka langa o wongo wa disoladi, o “kapasete ka kubhuluka” ka langa o ixinganeku yetu. (1 Tesalonika 5:8; Jisabhu 3:21) O kidyelelu ki tu kwatekesa kutala o ikanenu ya Nzambi, ki tu kwatekesa we phala ki tu bhwile mukonda dya ibhindamu ku mwenyu wetu. (Jisálamu 27:1, 14; Ikalakalu 24:15) Maji phala o kidyelelu kyetu ku tu langa kyene kya tokala ki kala kya kidi mwene. Twa tokala ku ta o “kapasete” ketu ku mútwe, mu veji dya ku kambata bhu maku!

17, 18. (a) O kwila Satanaji u tena ku tu katula o kapasete ketu? (b) Kyebhi ki tu tena kulondekesa kwila, ka tu nganala kwa Satanaji?

17 Kyebhi Satanaji kya tu bhangesa kukatula o kapasete? Xinganeka ya mesenene kubhanga ni Jezú. Satanaji wejidile kwila, Jezú mwéne weji tumina o athu. Maji ande dya kiki, Jezú weji tala hanji hadi, ni kufwa. Mu kusuluka weji kingila kukala Sobha mu kithangana kya solo Jihova. Kyenyiki Satanaji wa mu bhana o ujitu wa kutumina kyá se kukingila dingi. Satanaji wa kanena kwila se Jezú u mu bheza ngó lumoxi, mwene weji kituka kyá sobha ya ngongo yoso, mu kithangana kyenyókyo. (Luka 4:5-7) Satanaji wejiya we kwila, Jihova wa kanena ku tu bhana ima yambote ku mundu wobhe. Maji twa tokala kukingila hanji phala kutambula o ikanenu yiyi, katé ki bhixila o kithangana kiki, twa-nda dibhana hanji ni maka avulu. Mu kiki Satanaji u tu bhana kithangana kya kukala kyá ni mwenyu wambote kindala. Mwene wa mesena kwila, tu ta kupholo o jivondadi jetu, o Utuminu wa Nzambi u kala kudima.—Matesu 6:31-33.

18 Minzangala yavulu ya Jikidistá, ka a nganala kwala Satanaji. Mu kifika, Kiana,  wala mu 20 a mivu, wambe: “Eme ngejiya kwila o Utuminu wa Nzambi wene ngó wa-nda zubha o hadi yetu yoso.” Kyebhi o kidyelelu kiki, kya mu bhangesa kukala ni ibanzelu yambote ni kukala ni ukexilu wambe ku mwenyu? Kiki kya mu kwatekesa kulembalala kwila, o jimbote jya mundu yú ki ji nange kubhita. Mu veji dya kubhanga yoso phala kufumana o ngongo yiyi, Kiana wa mu lunga o nguzu yê phala kusidivila Jihova.

O kapasete ka kubhuluka (Tala o kaxi 15-18)

“XIBHATA YA MI BHANA KWALA O NZUMBI IKÔLA’ O MAKA MA NZAMBI”

19, 20. Kyebhi ki tu tena kubandekesa o uhete wetu wa kutokwesa o Mak’â Nzambi?

19 O masoladi a Loma, akexile mu kwenda ni xibhata ya kexile ni kaxaxi ka metulu mu kulebha. Ene ejidile kuphéla kyambote ni jixibhata jâ, mukonda a kexile mu kalakala na-ju izuwa yoso.

20 O poxolo Phawlu wambe kwila o mak’â a Nzambi a difu ni xibhata. Jihova wa tu bhana-yu. Maji twa tokala kwijiya kukalakala na-yu ni uhete, phala kuzokela o kixikanu kyetu mba kulungulula o ibanzelu yetu. (2 Kolindo 10:4, 5; 2 Timote 2:15) Kyebhi ki u tena kubandekesa o uhete wê? Sebastian, wala mu kitala kya 21, wambe: “Eme nga soneka velusu imoxi mu ibatulu yoso ya Bibidya kyoso ki ngene mu i tanga. Nga soneka kamukanda mwala o jivelusu ji nga wabhela dingi.” Kiki ki ngi kwatekesa kutendela kyambote o ixinganeku ya Jihova. Daniyele wate-ku dingi wixi: “Kyoso ki ngi tanga o Bibidya Ngi sola velusu, i Ngi banza kwila ya-nda kwatekesa athu u ngi sanga mu sidivisu ya kuboka. Nga mono kwila o athu a xikina dingi se a mona kwila eye wa zolo mwene o Bibidya, wa mu bhanga yoso i u tena phala ku a kwatekesa.”

O xibhata ya nzumbi ikôla (Tala o kaxi 19-20)

21. Mukonda dyahi ki tu bhingi kukala ni woma wa Satanaji ni madimonyo?

21 Kala ki twa dilongo mu phangu ya minzangala mu milongi yiyi, ki twa bhingi kukala ni woma wa Satanaji ni madimonyo. Mwene wala ni kutena kwavulu, kidi, maji Jihova wa beta kota mu kutena. Ene kanda kala ni mwenyu wa kalela-ku. A-nda kwa takula mu dikungu ki di moneka hole, ka-nda tena dingi kukwamesa muthu mu Midi ya mivu ya Utuminu wa Kidistu, mu kusuluka a-nda ku a bwikisa. (Dijingunuinu 20:1-3, 7-10) Twejiya o nguma yetu, o jiphito jê ni yoso ya mesena. Ni kikwatekesu kya Jihova tu tena kubhânga nê!