Ku bokona mu madisá

Ku bokona mu madisá

O athu a bhingi kuxikina o kidimwinu kya Nzambi kya mu zukama bhu kaxi ka “kibhungu”!

Ifundisu ya Nzambi—O Kwila Nzambi Wene mu Dimuna o Athu ni Kithangana Kya Soko?

Ifundisu ya Nzambi—O Kwila Nzambi Wene mu Dimuna o Athu ni Kithangana Kya Soko?

O Muthu u langa o dikumbi, u talesa bhu kaxi ka jimakina se kuma kwanda noka mba-phe se kwanda bhusa. Mwene u mona kilwezu kya kibhungu mba kitembu kya dikota kya mu zukama bhu kididi bhwala athu avulu. Mwene wa thandanganya ni myenyu ya athu. Mu kiki, mwene u bhanga yoso ya tena phala ku a dimuna ande dya kubhixila o kilwezu.

Kyene we kimoxi, lelu Jihova wene mu dimuna we o athu mu ixi mu “kibhungu” kya di kotelele o kyoso-kyoso ndenge. Kyebhi kya bhanga kiki? Ni mukonda dyahi tu zwela kwila mwene wene mu bhana kithangana kya soko phala o athu kuxikina ku mu belesela? Phala ku tambwijila o kibhwidisu kiki, kya dyanga tu zwele ya lungu ni idimwinu ya bhana Jihova mu ukulu.

TUNDE UKULU NZAMBI WENE MU DIMUNA O ATHU NI KITHANGANA KYA SOKO

Mu ukulu Jihova wa dimwine o athu mu “ibhungu,” mba ifundisu yavulu, yeji bheka kwa yó ka mesenene kubelesela o itumu yê. (Jisa. 10:25; Jel. 30:23) Mu veji joso jiji, mwene wa bhana kithangana kya soko ni itendelesu ku athu phala kulungulula o ukexilu wâ. (2 Jis. 17:12-15; Neh. 9:29, 30) Phala ku a swinisa kulungulula o ukexilu wâ, mu veji javulu Jihova wexile mu tumina ji selevende jê mu ixi phala kutudila o jimbu ya kufundisa ku athu ni ku a kwatekesa kutendela kima ni lusolo.—Amoji 3:7.

Mu kifika, Nzambi wa tumikisa Nowé phala kutudila o njimbu ya kufundisa. Mu mivu yavulu mwene wa dimuna athu exile ifusa, ijibhangânga ya lungu ni diluvyu mba mvula ya dikota. (Dim. 6:9-13, 17) Wa a tangela we yoso ya tokalele kubhanga phala kubhuluka ku mvula ya dikota. Mukonda dya nguzu yoso ya bhangele, Nowé a mwixana “mujimbwidi wa maka mayuka.”—2 Phe. 2:5.

Sumbala ni nguzu yoso ya bhange Nowé, o athu mu thembu yê, kifwa, ande dya Dilúvyu, a ditunu kutumaka o njimbu ya mu bhele Nzambi. Ene kexile ni kixikanu. Kyenyiki, kyoso diluvyu “ki dya tula dí dya a kungulula ene oso,” ya afu. (Mat. 24:39; Jihe. 11:7) Kyenyiki-phe, kyoso o kibwika ki kya tula, ene ka kexile ni ujitu wa kuzwela kwila, Nzambi ka a dimuna.

Mu kithangana kya mukwa, Jihova wa dimuna o athu kwa kambele ngó phala kumateka o “kibhungu” kya ki kifundisu kyê. Né kiki, mwene wa bhange yoso phala o athu eji tambula o kidimwinu, a kale ni kithangana kya soko phala ku ki tumaka. Tala ngó, kyoso akwa Ijitu kya a bwika bhu kaxi ka Kwinyi dya Mabhebhu, mwene wa a dimuna ni kithangana kya soko. Mu kifika, Jihova wa tumikisa Mozé ni Alá phala kudimuna Falawó ni jiselevende jê kwila, o dibhebhu dya kasambwadi, mvula ya matadi, dyeji bheka kibwika kyonéne. Kuma o mvula ya matadi yeji mateka ngó mu kizuwa kya kayela, o kwila Nzambi ka bhana kithangana kya soko phala kulengela bhu kididi kya kondama, n’a bhuluka ku kibhungu kiki? O Bibidya ijimbulula: “Bhenyobho oso ku akwa mbèle ya Falawó ala ni woma wa Jihova, a tumu ngunza jâ, ni ibhaku kulenga-ku ku mukáwu n’eza ku bhata; Maji-phe oso ahuku, ngwa’wâ kusuwa kizwelu kya Jihova ni ngunza jâ ni ibhaku yâ, a i xalesa ku mukáwu.” (Mak. 9:18-21) Sé phata, Jihova wa bhana kithangana kya soko phala oso a tumaka, anga a lenga ni lusolo, ka fwe ku dibhebhu didi.

Falawó ni jiselevende jê a a dimuna mwene ande dya kubhixila o dibhebhu dya kakwinyi. Né kiki, mu ku tobha kwâ, a ditunu o idimwinu yiyi. (Mak. 4:22, 23) Mukonda dya kukamba kwívwa, o itwamena mba twana twa phande-kumbi, twafu. Kwala o wíndwa! (Mak. 11:4-10; 12:29)  O kwila ene exile ni kithangana kya soko phala kutumaka o idimwinu yiyi? Xé! Sé kulaleka, Mozé wa dimuna akwa Izalayele ku dibhebhu dya kakwinyi dya zukamene, wa a jimbulwila ya tokalele kubhanga phala kubhulula o miji yâ. (Mak. 12:21-28) Athu akuxi a belesela o itendelesu ya Mozé? Nange mazunda atatu a athu ni akwa Izalayele, “ni athu amukwá” kexile akwa Izalayele, ni akwa Ijitu, a xisa o ixi ya Ijitu, ya a bhuluka ku kifundisu kya Nzambi.—Mak. 12:38.

O misoso yiyi ilondekesa kwila, Jihova tunde ukulu ka bheka kibwika sé ku dimuna o athu ni ku a bhana kithangana kya soko phala kubhuluka. (Mate. 32:4) Ihi ya bhangesa Nzambi kubhanga kiki? Poxolo Phetele wa jimbulula kwila, Jihova “ka mesena kwila ku kala muthu u texika, mbata wa mesena ene oso eza mu kudyela.” (2 Phe. 3:9) Kidi mwene. Nzambi wa mesena o mbote ya athu. Mwene wa mesena kwila, o athu a dyela, a kayela o itendelesu yê ande dya kifundisu kyê kubhixila.—Iza. 48:17, 18; Loma 2:4.

TUMAKA O KIDIMWINU KYA NZAMBI LELU

Lelu, athu oso a tokala kubhana mátwi ku kidimwinu kya mu tudila mu ixi yoso. Kyoso Jezú kyexile mu ixi, wa dimuna kwila, o athu mu ngongo anda kwa bwika ku, “hadi ya dikota. (Mat. 24:21 nwt) Mwene wa bhange o kikanenu kijimbulula kyambote kwila o akayedi yê eji mona kyambote o malamba eji dibhana nawu eji londekesa kwila o kizuwa kiki kya bhixila. Jezú wa jimbulula kyambote o ima yeji bhita lelu.—Mat. 24:3-12; Luka 21:10-13.

Kala kya kanena, Jihova wa mu dimuna athu oso phala na solo ku mu sidivila. Mwene wa mesena kwila athu oso a mu belesela a sanguluka ku mwenyu kindala ni kutambula mabesá ku hádya, ku mundu wobhe, wa yuka. (2 Phe. 3:13) Jihova wa mesena kwila o athu a dyelela mu kikanenu kyê. Mwene wa mu kwixana athu bhu kaxi ka “Njimbu yiyi Yambote ya Utuminu wa Nzambi.” Jezú wa kanena kwila o njimbu yiyi i bhulula o myenyu ya athu “ya bhingi ku i tula mu ngongo yoso, mu kubhana umbangi ku akwa jixi joso.” (Mat. 24:14) Nzambi wene mu sokejeka o jiselevende jê ja kidi phala kubhana “umbangi,” mba kuboka o Mak’â Nzambi mu 240 a jixi. Jihova wa mesena kwila athu avulu a xikina o kidimwinu kyê phala na bhuluka ku hadi ya “kibhungu” mba kitembu kya dikota kya kifundisu kyê.—Sof. 1:14, 15; 2:2, 3.

Jihova wa mu bhana o kithangana kya soko phala kwa dimuna. O kwila o athu anda xikina o kidimwinu mu kithangana kya soko? Twejiya kwila tunde ukulu mwene wene mu dimuna o athu. Tu tena kusuluka mu kukwatekesa o athu ni njimbu yambote ya Nzambi phala na bhuluka ku hadi ya dikota.