Ku bokona mu madisá

Ku bokona mu madisá

 MILONGI YA 14

O Kwila wa mu Kumbidila Kyambote o Ukunji Wé?

O Kwila wa mu Kumbidila Kyambote o Ukunji Wé?

“Kalakala kya tokala o mukunji wa Njimbu Yambote, kumbidila kyambote o ungunza wé kwa Nzambi.”—2 TIM. 4:5.

MWIMBU 57 Boka o Njimbu ku Athu Oso

I TWA-NDA DILONGA *

Kyoso kya mu fukununa, Jezú wa disange ni maxibulu mê, wa a tendelesa “Ndenu mwa ka longe maxibulu” (Tala o kaxi  1)

1. Ihi ya mesena kubhanga o jiselevende joso ja Nzambi ni mukonda dyahi? (Tala o foto ya kapa.)

JEZÚ KIDISTU wa tendelesa o akayedyê: “Ndenu, . . . , mwa ka longe jixibulu ku akwa jixi joso.” (Mat. 28:19) O jiselevende joso ja fiyele ja Nzambi a mesena kudilonga kyebhi kya tena ku “kumbidila kyambote” o ukunji yú wa tambula. (2 Tim. 4:5) Mukonda o kikalakalu kiki, kyene o kikalakalu kya beta kota, kya beta o kukala ni valolo, kya bhingi ku ki bhanga ni lusolo kima kyoso-kyoso ku mwenyu wetu ndenge. Maji ki tena ku tu bhonza kubhita o ithangana i twa mesena mu ukunji.

2. Mu kukumbidila kyambote o ukunji wetu, ibhidi yahi i tu dibhana na-yu?

2 Kwene ikalakalu yamukwá ya beta kota i tu nyana o kithangana ni nguzu. Nange phala kunganyala kitadi kya soko phala kudikila o ibhindamu ya mwiji wetu, twene mu bhinga kukalakala ola javulu ku salu yetu. Nange kya mu tu bhonza kukumbidila o ikalakalu i twala na-yu ku mwiji wetu, twa kate, twala ni kikote ku muxima mba twa mu di bhana ni jindolo ja kukuka. Kyebhi ki tu tena kukumbidila kyambote o ukunji wetu né mwene ni ibhidi yiyi?

3. Ihi i tu tena kuxinganeka bhu kaxi ka izwelu ya Jezú mu divulu dya Matesu 13:23?

3 Se ki twa mu tena kubhanga yoso i twa mesena mu sidivisu ya Jihova ki twa tokala kuluwala. Jezú wejidile kwila athu oso keji sokela mu kubhana ibundu ya Utuminu. (Tanga Matesu 13:23.) Jihova u bhana valolo yavulu mu ima yoso i tu bhanga phala kukumbidila o sidivisu yê ni muxima woso. (Jihe. 6:10-12) Ku mbandu yengi, nange tu tena kudivwa kwila twala ni kithangana phala kubhanga dingi. Mu milongi yiyi, twa-nda mona kyebhi ki tu tena ku ta kupholo o ukunji wetu, kusosolola o ima ku mwenyu wetu ni kubandekesa o uhete wetu wa kuboka  ni kulonga. Kya dyanga, ihi ilombolola kukumbidila kyambote o ukunji wetu?

4. Ihi i lombolola kukumbidila kyambote o ukunji wetu?

4 Kukumbidila kyambote o ukunji wetu, kulombolola kwila twa tokala kuboka ni kulonga mu ithangana yoso i moneka. Maji o kukumbidila kyambote o ukunji wetu, ki kya lungu ngó ni kithangana ki tu bhita mu kuboka. Phala Jihova, o kima ki tu bhangesa kuboka kyala dingi ni valolo ya dikota. Kuma twa zolo Jihova ni azukami etu, tu kalakala ni muxima woso mu ukunji wetu wa Ukidistá. * (Mál. 12:30, 31; Kol. 3:23) Kusidivila Nzambi ni muxima woso, kulombolola kubhakula o nguzu ni mawuhete m’etu mu sidivisu yê. Se tu tendela o ujitu wa kubhanga o kikalakalu kya kuboka, twa-nda bhanga yoso phala kubokela oso u tu tena.

5-6. Kyebhi o muthu wala ni ithangana ya tolo, kya tena ku ta kupholo o ukunji? Bhana phangu.

5 Xinganeka munzangala wa wabhela kuxika o viyola. Mwene wa wabhela kuxika kabasa kididi. Kyenyiki, mwene u mateka kukalakala mu restaurante kala ngimbidi mba muxiki mu masukilu a semana. Maji o kitadi kya mu tambula kala ngimbidi, ki ki soko phala kudikila o ibhindamu yê. Kyenyiki mwene u mateka kukalakala mu kididi kya kutambula kitadi mu diloja, tundé kya Sekunda ndu kya Sesa. Sumbala u bhita dingi kithangana mu diloja, maji mwene wa wabhela dingi o kikalakalu kya kwimba. Mwene u bandekesa o uhete we wa kwimba phala ku kituka ngimbidi ya katunda. Mwene u sota ndunge phala kuxika, né mwene mu ithangana yofele.

6 Nange eye ki wala ni kithangana ki wa mesenene kubhakula mu sidivisu ya kuboka. Maji kyene o kikalakalu ki wa wabhela dingi o kubhanga. Eye u bhanga yoso phala kubandekesa o uhete we wa ku bhixidisa o njimbu yambote ku mixima ya athu. Kuma wala ni ikalakalu yavulu phala kubhanga, nange utena kudibhwidisa: Kyebhi ki ngi tena ku ta kupholo o sidivisu ya kuboka ku mwenyu wami?

 KYEBHI KI U TENA KU TA O UKUNJI KUPHOLO?

7-8. Kyebhi ki tu tena kukayela o ukexilu wa Jezú wa kutala o ukunji?

7 Jezú wa tu xila phangu yambote ya lungu ni ukexilu wa kutala o ukunji. O kuzwela ya lungu ni Utuminu wa Nzambi kyexile o kima kya beta kota ku mwenyu wê. (Nzwá 4:34, 35) Mwene wendele dikanga dya lebha mu kubokela athu avulu. Mu ithangana yoso, mwene wa soto kuzwela ni athu ku mabhata-mâ mba ididi yoso-yoso ku a sanga. Jezú wa te kupholo o ukunji wé.

8 Etu tu tena kukayela Kidistu mu kusota jindunge ja kuzwela ni athu ya lungu ni njimbu yambote kabasa kithangana ni kididi ku tu a sanga. Etu twala polondo phala kuxisa ima kudima ni kudibhakula mu kikalakalu kya kuboka o njimbu yambote. (Mál. 6:31-34; 1 Phe. 2:21) Amoxi mu kilunga, ala ni kithangana kya kukala aboki a katunda, aboki a thembu yoso mba aboki a ithangana ni ithangana. Amukwá a dilongo dimi dyéngi mba ayi mu kididi mwa bhindamena dingi aboki. Maji o kikalakalu kyavulu kya kuboka, ene mu kibhanga ku aboki kya tena kubhanga o ima yiyi, maji a bhanga yoso ya tena. Kikale tu bhanga ikalakalu yavulu mba tu bhanga ngó ikalakalu yofele, twejiya kwila Jihova k’ene mu tu bhinga phala kubhanga kima kya túndu o nguzu yetu. Mwene wa mesena kwila, etwenyoso tu sanguluka mu sidivisu yê kyoso ki tuya ni kutula ‘o Njimbu Yambote ya tundu kwa Nzambi Ukôla, mukwa kusanguluka.’—1 Tim. 1:11; Mate. 30:11.

9. (a) Kyebhi Phawulu kya te kupholo o ukunji wé, né mwene kyoso ki kwa bhingile kukalakala phala kudikila o ibhindamu yê? (b) Ya lungu ni ukexilu wa Phawulu kutala o ukunji wê, ihi ilondekesa Ikalakalu 28:16, 30, 31?

9 Poxolo Phawulu wa tu bhana phangu yambote ya lungu ni kumona o ukunji kala o kima kya beta o kota ku mwenyu wê. Kyoso kya yile mu mbanza ya Kolindu mu njila yê ya kayadi, mwene ka kexile ni kitadi kya soko, mu kiki, wa bhingile kuyudika matenda. Maji o kubhanga o matenda ki kyene kyexile o kikalakalu kya beta o kota phala Phawulu. Mwene wexile mu bhanga o wenji yú, phala ku mu kwatekesa mu ukunji wa kuboka o njimbu yambote ku akwa Kolindu, ‘sé ku mu futa.’ Kifwa phala ka bhane salu ku akwâ. (2 Kol. 11:7) Sumbala Phawulu wa bhingile kukalakala, mwene wa suluka ni ku ta o ukunji ku pholo, wa boko mu Jisábhalu joso. Kyoso o ima ku mwenyu we ki ya lunguluka Phawlu wa bhange dingi mu sidivisu ya kuboka. Mwene wa “jijila ngó ku tanga o maka. U kala mu kwambela o Jijudé kuma Jezú mwène Kidistu.” (Ika. 18:3-5; 2 Kol. 11:9) Ku pholo dya kwenda, kyoso kya mu kutu mu dibhata dyê-mwène, ku Loma mu mivu iyadi Phawulu wa bhana umbangi ku athu ayile mu mu kunda, wa soneka mikanda. (Tanga Ikalakalu 28:16, 30, 31.) Phawulu wa bhange yoso phala ki kukale kima ki mu fidisa o kukumbidila o ukunji wê. Mwene wa soneka: “Etu ki tu kala ni usudi, kuma o Nzambi, . . . mwène wa tu bhana o kikalakalu’iki.” (2 Kol. 4:1) Kala Phawulu, né mwene se kubhinga kubhanga kikalakalu kyengi, tu tena ku ta o kikalakalu kya Utuminu ku pholo.

Kwene mawukexilu avulu u tu tena kukumbidila kyambote o ukunji wetu (Tala o kaxi 10-11)

10-11. Kyebhi ki tu tena kukumbidila kyambote o ukunji wetu, se o uhaxi ki wene mu twehela kubhanga ima yavulu?

10 Se ki tu tena kuboka nzo ni inzo kala ki twa mesena, mukonda dya kukuka mba uhaxi, tu tena kuboka mu mawukexilu engi. O Jikidistá mu hama ya dyanga a bokela o athu kabasa kididi kwa a sangele. Ene akexile mu katula mbote mu kuboka o kidi nzo ni inzo kyoso ki kwexile mu moneka kithangana ni kwoso kwa kexile mu sanga o athu “a takana-nâ.” (Ika. 17:17; 20:20) Se ki tu tena kwenda kyavulu, tu tena kuxikama mu kididi mu bhita athu avulu ni kubokela o athu a mu bhita. Mba tu tena kubhana umbangi kyoso ki kumoneka kithangana, kusoneka mikanda, ni kubhana umbangi  bhu kaxi ka mutelembe. Aboki avulu ka tena kuboka nzo ni inzo ene mu sanguluka kyavulu mu kuboka mu mawukexilu engi.

11 Sumbala ni uhaxi, u tena kukumbidila kyambote o ukunji wé. Xinganeka dingi mu phangu ya poxolo Phawulu. Mwene wambe: “Ima yoso nga soko na-yu mwa [Nzambi] yó mukwa ku ngi bhana o kutena.” (Fil. 4:13) Phawulu wa bhingile o kutena koko kyoso kya kate mu njila ya bhangele. Mwene wa jimbulwila akwa Ngalásya: “Kuma uhaxi wa xitu wa ngi bhekele, o thembu i nga dyangele ku mi bokela Njimbu Yambote.” (Nga. 4:13) Kyene kimoxi we, o mawuhaxi a tena ku kubhana kithangana phala kubokela akwenu o njimbu yambote, kala o jidotolo, o asaki ni athu engi ene mu ku langa. Kyoso o aboki kya boka nzo ni inzo, nange avulu mudyâ kene mu kala mu mabhata mâ.

KYEBHI KI U TENA KUSOSOLOLA O IMA KU MWENYU?

12. Ihi ilombolola kukala ni dyesu “dya yuka”?

12 Jezú wambe: “Kandeya ka mukutu, o dyesu. Kyenyiki se dyesu dyé di kala dya yuka, mukutu wé woso u kala mwazele.” (Mat. 6:22) Ihi ya mesenene kuzwela mwene? Mwene wa mesenene kuzwela kwila, twa bhingi kusosolola o mwenyu wetu mba ku di kwatenena mu kima kya beta kota, mu veji dya kutandanganya ni ima yengi. Jezú wa bhana phangu yambote mu kulunga o muxima wê mu ukunji; wa longo o maxibulu mê kulunga o muxima mu sidivisu ya Jihova ni mu Utuminu Wê. Se tu lunga o muxima wetu mu ukunji wa Ukidistá, twa mu kayela o phangu ya Jezú. Mwene wa tu tendelesa: “Dyangenu-phe kusota o Utuminu wa Nzambi ni uyukilu wê.”—Mat. 6:33.

13. Ihi i tena ku tu kwatekesa kulunga o muxima mu ukunji wetu wa Ukidistá?

 13 Ukexilu umoxi u tu tena kulunga o muxima mu ukunji wetu, o kusosolola o kithangana ki tu zanga ni kubhanga ima ki yala ni valolo yavulu, phala kubandekesa o kithangana kya kukwatekesa akwetu kwijiya ni kuzola Jihova. * Mu kifika, o kwila tu tena kusokejeka o ji ola ji tu bhanga ku salu phala kubhanga dingi mu ukunji mu kaxi ka semana? O kwila tu tena kusosolola o itonokenu i tena kuzanga ithangana yavulu?

14. Ima yahi ya xisa o dikaza phala kukala dingi ni kithangana, ni kusuwa dingi o ukunji?

14 Kiki kyene kya bhange kafunga Elias ni kazola kê. Mwene wa jimbulula: “Ku dimatekenu ki twexile mu tena kukala aboki a thembu yoso, maji kwexile ima i tweji lungulula phala kubhanga dingi mu sidivisu ya kuboka. Twa bhange ima yofele ya tu kwatekesa kubandekesa o kithangana kyetu mu ukunji. Mu kifika twa sosolola o ima i twexile mu sumba. Kuma twexile mu zanga ithangana yavulu ni itonokenu, twa i sosolola we. Twa bhingi ku jixefe jetu phala ku tu sosolola o ji ola kusalu ni tu kale dingi ni kithangana kya kuboka. Kubhanga kiki kwa tu kwatekesa kuboka mu usuku, kulonga o Bibidya, katé mwene kuboka luyadi mu mbeji mu kaxi ka semana. Twa sangulukile kyavulu!”

KYEBHI KI U TENA KUBANDEKESA O UHETE WÉ WA KUBOKA NI KULONGA?

Kukumbidila yoso i tu dilonga mu kyônge kya kaxi ka semana, kwa-nda tu kwatekesa kusuluka ni kubandekesa o uhete wetu wa kuboka ni kulonga (Tala o kaxi 15-16) *

15-16. Kala ki londekesa 1 Timote 4:13, 15, kyebhi ki tu tena kubandekesa o uhete wetu wa kuboka? (Tala we o kaxa “Jimbambe Ja-nda Ngi Kwatekesa ku Kumbidila Kyambote o Ukunji Wami.”)

15 O ukexilu wengi wa kukumbidila kyambote o ukunji wetu o kubandekesa o uhete wetu  mu kikalakalu kya kuboka. O athu ene mu bhanga ikalakalu a mawufunu mâ, ene mu a longa phala kubandekesa o kwijiya ni uhete wâ. Kiki ki bhita we ni aboki a Utuminu. Twa bhingi kusuluka ni kudilonga kyebhi ki tu tena kubandekesa o uhete wetu mu ukunji.—Jisa. 1:5; tanga 1 Timote 4:13, 15.

16 Kyebhi-phe ki tu tena kusuluka ni kukula mu ukunji wetu? Tu bhanga kiki mu kubhana matwí mu milongi yene mu tu bhana mu kyônge kya kaxi ka semana, Ukexilu wa Ukidistá ni Ukunji Wetu. O kyônge kiki, ki tu bhana milongi i tu kwatekesa kubandekesa o uhete wetu mu sidivisu ya kuboka. Mu kifika, kyoso o mwendexi wa kyônge kya bhana itendelesu ku jiphange a bhange mbandu, tu tena kudilonga jindunge ji tena ku tu kwatekesa kubandekesa o uhete mu ukunji wetu. Tu tena kukayela o jindunge ji twa dilongo kyoso ki tu tudila o njimbu yambote ku muthu mu ukunji. Tu tena kubhinga kikwatekesu ku kafunga wala kupholo ka kibuka kya sidivisu ya kuboka, mba kukalakala-nê mu ukunji, kukalakala ni muboki wengi wala kyá ni uhete, muboki wa thembu yoso mba kafunga ka ilunga. Kyoso ki tuya ni kubandekesa o uhete wetu wa kukalakala ni Ji Falamenda Jetu ja Kulonga, twa-nda wabhela dingi o kikalakalu kyetu kya kuboka ni kulonga.

17. Ihi ya-nda bhita neye se u kumbidila kyambote o ukunji wé?

17 Jihova wa twehela kukala “jingunza” jê, yú ujitu wa dikota! (1 Kol. 3:9) Se wenda ni “kusola o ima yoso yawabha” anga u lunga o muxima wé mu ukunji wa Ukidistá, eye wa-nda ‘sidivila Jihova ni kusanguluka.’ (Fil. 1:10; Jisá. 100:2) Kuma u mukunji wa Nzambi, u tena kudyelela kwila, mwene wa-nda kubhana o kutena ku wa bhingi phala kukumbidila kyambote o ukunji wé, né mwene se kumoneka ibhidi i kufidisa kubhanga dingi. (2 Kol. 4:1, 7; 6:4) Kikale se wene mu boka mu ithangana yavulu mba mu ithangana ya tolo, wa-nda tena ku “ta nzabala” mba kukala ni kima ki kusangulukisa, se u boka o njimbu ya ukunji wé ni muxima woso. (Nga. 6:4) Kyoso ki tu kumbila kyambote o ukunji wetu, tu londekesa o henda yetu kwa Jihova ni ku akwetu. “Kuma mu kubhanga kiki, wa-nda kwila ni eye-mwène u bhuluka, ni ene we a bhuluka oso a kwívwa.”—1 Tim. 4:16.

MWIMBU 58 Sota o Athu, a Wabhela o Kutululuka

^ kax. 5 Jezú wa tu tumina kuboka o njimbu yambote ya Utuminu ni kubhanga maxibulu. Mu milongi yiyi, twa-nda dilonga kyebhi ki tu tena kumbidila kyambote o ukunji wetu né mwene se twala ni ibhidi yavulu. Twa-nda dilonga we kyebhi ki tu kala tu aboki ambote ni kyebhi ki tu tena kubandekesa o kusanguluka kwetu kyoso ki tuya ni kuboka.

^ kax. 4 IZWELU YO JIMBULULE: O sidivisu yetu kwa Jihova ya lungu ni kuboka ni kulonga, kutunga ni kulanga ididi phala kusidivila Jihova. Kya lungu we ni kukwatekesa akwetu kyoso ki kubhita mavuwa.—2 Kol. 5:18, 19; 8:4.

^ kax. 13 Tala o sambwadi dya jindunge jala mu kaxa “Kyebhi ki u Tena Kusosolola o Ukexilu wa Mwenyu Wê” mu Mulangidi wa Kavwa wa 2016, difwe dya 8.

^ kax. 62 KILOMBOLWELU KYA JIFOTO: Phange ya muhatu wa mu bhanga mbandu ya kukunda o muthu mu veji ya dyanga, mu kyônge kya kaxi ka semana. Mu kusuluka kyoso o mwendexi kyayi ni ku mu bhana itendelesu mwene wa i soneka mu kadivulu kê, Mu Kulonga. Mu disukilu dya semana, o jindunge ja dilongo mu kyônge, wa ji kayela mu sidivisu ya kuboka.