Ku bokona mu madisá

Ku bokona mu madisá

 MILONGI YA 45

O Nzumbi Ikôla i tu Kwatekesa Kyebhi

O Nzumbi Ikôla i tu Kwatekesa Kyebhi

“Ima yoso nga soko na-yu mwa . . . yó mukwa ku ngi bhana o kutena.”—FIL. 4:13.

MWIMBU 104 Nzambi u tu Bhana o Nzumbi Ikôla

I TWA-NDA DILONGA *

1-2. (a) Ihi yene mu tu kwatekesa kukolokota mu ibhidi yoso? Jimbulula. (b) Ihi i twanda dilonga mu milongi yiyi?

“KYOSO ki ngi xinganeka mu yoso i nga bhiti, ngi tonginina kwila, ubheka wami ki ngeji tena.” O kwila wa zwelele kyá kiki? Avulu mudyetu a ki zwela kyá. Nange u zwela kiki, kyoso ki u xinganeka: Kwebhi kwa tundu o nguzu phala kukolokota kyoso ki nga katele mba kyoso ki nga fundu ndandu yami ya kazola? Mu kuyala kudima, eye u xikina kwila, wa tena kukolokota mukonda o nzumbi ikôla ya Jihova ya kubhana “o nguzu i lenda yoso.”—2 Kol. 4:7-9.

2 Etu tu dyelela we ku nzumbi ikôla, mu kudibhana ni ifunyisu ya mundu yú wayibha. (1 Nzwá 5:19) Ku mbandu yengi, twene mu bhânga we ni “jinzumbi ja phulu.” (Efe. 6:12) Twanda dilonga mawukexilu ayadi a tu kwatekesa o nzumbi ikôla, phala kudibhana ni itatesu yoso yiyi. Mu kusuluka, twanda dilonga ihi i twa tokala kubhanga phala kutambula o mbote yoso ku nzumbi ikôla.

O NZUMBI IKÔLA I TU BHANA KUTENA

3. Jihova u tu kwatekesa mu ukexilu webhi phala ni tu kolokota mu ibhidi?

3 O nzumbi ikôla ya Jihova, i tu kwatekesa mu ku tu bhana o kutena mba nguzu, phala kukumbidila o ikalakalu yetu, sumbala ni ibhidi. Poxolo Phawulu wa mono kwila, wa tenene ngó kusuluka ni kusidivila Jihova sumbala ni ibhidi, mukonda wa dyelele mu “nguzu ya Kidistu.” (2 Kol. 12:9) Mu njila ya kayadi ya bhange kala mukunji wa jixi, Phawulu wa kalakala ni nguzu yoso mu kuboka, maji wa dikila we o ibhindamu yê. A mu zalela kwal’o dikaza Akwila ni Pidisila, exile akwa kutunga matenda. Phawulu wa dilongo we o ufunu wa kubhanga matenda, wexile mu kalakala mu ufunu yú kaxaxi ka kizuwa. (Ika. 18:1-4) O nzumbi ikôla ya bhana o kutena kwa Phawulu phala kudikila o ibhindamu yê ya xitu ni kukumbidila o ukunji wê.

4. Kala kilondekesa 2 Kolindu 12:7b-9, ibhidi yahi ya dibhenene nayu Phawulu?

 4 Tanga 2 Kolindu 12:7b-9. Mu jivelusu jiji, ihi ya mesenene kuzwela Phawulu kyoso kyambe mwene wexile mu dibhana ni ‘mwinya mu xitu’? Se wexile ni mwinya mu xitu weji kale mwene kyambote? Kana. Weji kwívwa ndolo yavulu. Kyenyiki-phe, Phawulu wa kexile mu zwela kwila, wexile mu dibhana ni ibhidi yexile ku mu bhekela ndolo yavulu. Mwene wambe kwila, o maka exile mu dibhana na-u, edile kala “mukunji wa Satana” wexile mu mu “bhana jihuxi.” Nange ki Satanaji ni madimonyo-mê exile mu bhekela o ibhidi kwa Phawulu, yedile kala mwinyia mu xitu. Maji kyoso o jinzumbi jiji ja phulu kya mono kwila Phawulu wexile ni “mwinya,” ene nange a bweta-ku dingi, kifwa, phala kubandekesa o ndolo ya Phawulu. Ihi ya bhangele Phawulu?

5. Kyebhi Jihova kya tambwijila o misambu ya Phawulu?

5 Kyadyanga, Phawulu wa mesenene kwila, Jihova u mu katula o “mwinya” yú. Mwene wambe: “Uhaxi weni’ú anga ngi u dyondela lutatu kwa Ngana [Jihova], phala a ngi katule-u.” Sumbala ni misambu ya Phawulu, Jihova ka katula o mwinya mu xitu. O kwila kiki kilondekesa kuma Jihova ka tambwijila o musambu wa Phawulu? Kana. Mwene wa mu tambwijila. Jihova ka katula o maka a Phawulu, maji wa mu bhana nguzu phala kukolokota. Jihova wambe: “Nguzu yami i beta kota mu kutena mu ku bhwila kwé.” (2 Kol. 12:8, 9) Ni kikwatekesu kya Nzambi, Phawulu wexile ni kusanguluka ni kutuluka kwa muxima, mu ukunji wê!—Fil. 4:4-7.

6. (a) Kyebhi Jihova kya tena kutambwijila o misambu yetu? (b) Kidyelelesu kyahi ki tu sanga mu velusu yo tumbule, i kuswinisa?

6 Kala Phawulu, o kwila eye wa bhingile kyá kwa Jihova, phala ku kukatula mu kibhidi? Sumbala ni misambu i wa bhange, o ibhidi yê ki yabhu. Nange ya dibandekesa dingi. Mu kiki, wa mateka kuxinganeka: O kwila Jihova wa luwala n’eme? Se kiki kibhita n’eye, lembala o phangu ya Phawulu! Jihova ka katula o ibhidi ya Phawulu. Maji bhu kaxi ka nzumbi ikôla, wa mu bhana nguzu phala kukolokota. (Jisá. 61:3, 4) U tena ku divwa wila a ku “kwama,” maji Jihova kanda ku kwehelela.—2 Kol. 4:8, 9; Fil. 4:13.

O NZUMBI IKÔLA I TU KWATEKESA KUSULUKA NI KUSIDIVILA JIHOVA

7-8. (a) Mu ukexilu webhi o nzumbi ikôla ya adifu ni kitembu? (b) Kyebhi poxolo Phetele kya jimbulula o ukalekelu wa nzumbi ikôla?

7 O kwila o nzumbi ikôla i tena ku tu kwatekesa mu ukexilu wengi? Kala o kitembu kyambote, ki lutula o ulungu bhu kididi kya fwama, sumbala ni kalemba ku kalunga; o nzumbi ikôla i tu kwatekesa we kubhixila ku kididi kyambote kya kanena Nzambi, ku mundu wa ubhe, sumbala ni ibhidi yavulu.

8 Kuma poxolo Phetele wexile mutambi’a jimbiji, wejidile kyambote o ufunu wa kwenda ni ulungu. Kyenyiki-phe, kima kyambote kumona kyebhi kya jimbulula o ukalakelu wa nzumbi ikôla bhu kaxi ka kifika kya ulungu. Mwene wa soneka: “Mbata nuka kukala muzambu wa polofeta wijila ku vondadi ya muthu. Maji athu a zwela jinga mu kutula o Njimbu i tunda kwa Nzambi kala kyoso kya a tuma jinga kuzwela kwala o nzumbi Ikôla.” O kizwelu mu Ngeleku kyo lungulule “a tuma,” mu izwelu ya bhebhuluka kilombolola “a a endesa; a a lutula.”—2 Phe. 1:21.

NDUNGE YA DYANGA: Bhanga jinga o kikalakalu kya Jihova kya bhana ku jisevende jê

NDUNGE YA KAYANDI: Kala polondo phala kubhanga o kikalakalu kya Jihova ni uhete woso (Tala o kaxi 11) *

9. Ihi ya mesenene kulombolola Phetele, ni kizwelu “a a lutula”?

9 Ihi ya mesenene kulombolola Phetele, ni kizwelu “a a lutula”? Luka wa soneka o divulu dya Ikalakalu, wa tumbula we kizwelu kyengi mu Ngeleku kya difu kiki, phala kujimbula ulungu exile mu ‘wambata’ mba ku u “phephulula” kwala o kitembu. (Ika. 27:15) Sayi mukwa kutokwesa o Bibidya wambe: Kyoso Phetele kyambe  kwila, o asoneki a Bibidya ‘a tumu,’ mwene wa solo izwelu yeji bhangesa o athu kuxinganeka mu ukexilu wa kwendesa o ulungu. Mu kidi Phetele wambe kwila, o ulungu ubhinga kitembu phala kubhixila bhu kididi kya kane. Kyene we kimoxi ni jipolofeta ni asoneki a Bibidya. Ene a a bhusu kwala o nzumbi ikôla phala kukumbidila o ikalakalu yâ. O mukwa kutokwesa mwenyú, wambe dingi: Mukwa ni ulungu a wendesa kwala o kitembu, o asoneki a Bibidya exile mu a endesa kwala o nzumbi ikôla. Ene exile polondo phala kubhanga o kikalakalu kya tumina Nzambi bhu kaxi ka nzumbi ikôla. Jihova wa bhange o mbandu yê. Mwene wa bhana “o kitembu,” kifwa, o nzumbi ikôla. O asoneki a Bibidya, a bhange we o mbandu yâ. Ene ehela o nzumbi ikôla ku a endesa.

10-11. Jindunge jyebhi jiyadi ji twa bhingi kubhanga phala kwehela o nzumbi ikôla ku twendesa? Bhana phangu.

10 Mu kidi twejiya kwila, lelu Jihova kene mu bhusa dingi athu phala kusoneka madivulu a Bibidya. Maji Jihova wene mu bhana hanji o nzumbi yê ikôla phala kwendesa o jiselevende jê. Jihova wa mu bhanga hanji o mbandu yê. Kyebhi ki tu tena kukatula mbote mu nzumbi ikôla ya Nzambi? Twa bhingi kusuluka mu kubhanga o mbandu yetu. Kyebhi ki tu bhanga kiki?

11 Xinganeka mu kifika kiki. Se o mwendexi wa ulungu wa mesena kuma o kitembu ki mu kwatekesa, wa bhingi kubhanga ima iyadi. Kya dyanga wa bhingi kuta o ulungu wé kwoso kwa mu bhusa o kitembu. Se mwene ka ki bhange o ulungu wé ki wandaya kupholo. Kayadi, mwene wa bhingi kujikula kyambote o jimvwela ja ulungu phala o kitembu ki tene kwambata o ulungu wé. Mu kidi, né mwene se kwala kitembu kyavulu, o ulungu ki wandaya kupolo se u kamba kujikula o jimvwela. Kyene kimoxi we netu. Twanda tena ngó kukolokota mu sidivisu ya Jihova ni ki kwatekesu kya nzumbi ikôla. Phala kukatula o mbote ya nzumbi ikôla twa bhingi we kubhanga ima iyadi. Kya dyanga, twa tokala kwehela o nzumbi ikôla ya Nzambi ku twendesa, mu kubhanga ikalakalu i bhinga o kifwinyisu kya nzumbi ikôla. Kayadi, twa tokala kubhanga o ikalakalu yiyi ni  uhetu wetu woso u tu tena. (Jisá. 119:32) Kyoso ki tu kayela o jindunge jiji o nzumbi ikôla yanda twendesa kupholo sumbala ni ibhidi ku mundu yú wa bhonzo kate ku mundu wobhe wa kanena Nzambi.

12. Ihi i twanda dilonga kindala?

12 Kate bhabha twa zwela mawukexilu ayadi a tena ku tu kwatekesa o nzumbi ikôla. O nzumbi ikôla i tu bhana kutena i tu kwatekesa kukala fiyele kyoso ki tu dibhana ni ibhidi. O nzumbi ikôla i twendesa i tu kwatekesa kubhanga o kikalakalu kya tu bhana Jihova. Kubhanga kiki ku tu bhekela mwenyu wa kalelaku. Kindala twanda dilonga ima i wana i twa tokala kubhanga phala kukatula o mbote mu nzumbi ikôla.

KYEBHI KI TU KATULA O MBOTE MU NZUMBI IKÔLA?

13. Kala kilondekesa 2 Timote 3:16, 17, o Bibidya i tena ku tu kwatekesa kyebhi, maji ihi i twa tokala kubhanga?

13 Kyadyanga, dilonge o Mak’â Nzambi. (Tanga 2 Timote 3:16, 17.) Nzambi wa “bhusu” o ixinganeku yê mu ilunji ya asoneki a Bibidya bhu kaxi ka nzumbi ikôla. Kyoso ki tu tanga o Bibidya ni kuxinganeka mu yoso i twa tange, o itendelesu ya Nzambi i bokona mu kilunji ni muxima wetu. O milongi yiyi i tu bhangesa kulungulula o mwenyu wetu phala kusangulukisa Jihova. (Jihe. 4:12) Maji phala kukatula o mbote ya tenena ku kikwatekesu kya nzumbi ikôla, izuwa yoso twa tokala kubhaka kithangana phala kudilonga o Bibidya, ni kuxinganeka mu ima i twa dilongo. Mu kusuluka-phe, o Mak’â Nzambi anda fwinyisa yoso i tu zwela ni yoso i tu bhanga.

14. (a) Mukonda dyahi tu tena kuzwela kwila, o nzumbi ikôla yene mu kala mu yônge yetu? (b) Kyebhi ki tu tena kujikula o jimvwela jetu mu yônge”?

14 Kayadi, bheza Nzambi mu kilunga. (Jisá. 22:22) O nzumbi ikôla ya Jihova, yene mu kala mu yônge yetu, mu ilunga. (Dij. 2:29) Mukonda dyahi tu tena kuzwela kiki? Mukonda kyoso ki tu dyongeka ni Jikidistá ni akwetu, twene mu bhinga o nzumbi ikôla mu musambu, twimba mimbu ya Utumina yo katule mu Mak’â Nzambi, twivwa we milongi mba madiskulusu a bhanga o jiphange jetu, a solo bhu kaxi ka nzumbi ikôla. O nzumbi ikôla, yene we i kwatekesa o jiphange jetu ja ahatu kupelepalala ni kubhaga o jimbandu jâ ku ditala. Maji-phe, phala kukatula o mbote ya tenena ku kikwatekesu kya nzumbi ikôla, twa bhingi kujikula o jimvwela jetu, kifwa, kupelepalala ni kutambwijila mu yônge. Se tu bhanga kiki kyoso ki tu kala mu yônge, twanda kala polondo phala kukatula o mbote ya nzumbi ikôla, kala kibhanga o ulungu kyoso kya u jikula kyambote o jimvwela.”

15. O nzumbi ikôla i tu kwatekesa kyebhi mu ukunji wetu?

15 Katatu, boka o njimbu yambote. Kyoso ki tu kalakala ni Bibidya mu kuboka ni mu kulonga, kifwa, twa mu kwehela o nzumbi ikôla ku tu kwatekesa mu ukunji wetu. (Loma 15:18, 19) Phala ku katula mbote ya tenena mu kixinganeku kya nzumbi ya Nzambi, twa tokala kuboka mu veji javulu, ni kutanga o Bibidya mu ukunji kyoso ki moneka kithangana. U tena kubandekesa o uhete wê wa kuzwela ni athu mu sidivisu ya kuboka, se u kayela o ji ndunge phala kubhana umbangi, mu milongi phala o yônge Ukexilu wa Ukidista ni Ukunji Wetu.

16. Webhi o ukexilu wa beta-kota wa kutambula o nzumbi ikôla?

16 Kawana, samba kwa Jihova. (Mat. 7:7-11; Luka 11:13) O ukexilu wa beta-kota wa kutambula o nzumbi ikôla, o ku u bhinga kwa Jihova bhu kaxi ka musambu. Sé-ku kima ki tena kufidisa o misambu yetu kubhixila kwa Jihova, mba kufidisa o kikwatekesu kya nzumbi ikôla ku thandu dyetu—né kaleya, né mwene Satanaji. (Tiya. 1:17) Kyebhi ki twa tokala kusamba phala ni tu tambule o mbote ya tenena ku nzumbi ikôla? Phala kutambwijila o kibhwidis kiki, twanda tonginina kyambote o maka a lungu ni  musambu, mu kifika ki moneka ngó mu divulu dya Luka. *

SAMBA NI KINYENGE

17. Disá dyebhi di twa dilongo mu kifika kya Jezú kyo soneke mu divulu dya Luka 11:5-9, 13?

17 Tanga Luka 11:5-9, 13. O kifika kya Jezú kilondekesa se kyebhi ki twa tokala kubhinga o nzumbi ikôla mu musambu. Mu kifika kiki, o diyala dya tambula ya bhindamene “mukonda dya kujiza kwê.” Mwene kyexile ni wôma wa kubhinga o kikwatekesu kwa kamba dyê sumbala kwexile kya mu kaxi ka usuku. (Tala Ukexilu wa Ukidista ni Ukunji Wetu wa kavwa 2018 mba. 5.) Kyebhi Jezú kya sokesa o kifika kiki ni musambu? Mwene wambe: “bhingenu, nda a mi bhane. Sotenu, nda mu sange. Bundenu, nda a mi jikwile dibhitu.” Mu kiki-phe disá dyebhi di tu dilonga? Phala kutambula o nzumbi ikôla twa tokala kusamba ni kujiza mba ni kinyenge.

18. Kala kilondekesa o kifika kya Jezú, mukonda dyahi tu tena kudyelela kwila Jihova wanda tu bhana o nzumbi yê ikôla?

18 O kifika kya Jezú ki tu kwatekesa we kumona se mukonda dyahi Jihova u tu bhana o nzumbi ikôla. O diyala mu kifika wa mesenene kukala muzaledi wambote. Mwene wa mono kuma wa bhingile kubhana kudya ku mu sonyi wa bhixila mu usuku, maji mwene kexile ni kima phala ku mu bhana. Jezú wambe kuma o vizinyu yê wa mu bhana ngó o mbolo mukonda dya kujiza kwê. Ihi ya kexile mulonga Jezú? Se diyala mukwa ituxi wexile polondo phala kukwatekesa vizinyu yê wa mu jiza ni kubhinga, tu tena kudyelela kwila Tat’etu ya henda wala kudyulu wanda tu kwatekesa we se tu jiza mu kubhinga o nzumbi ikôla! Kyenyiki-phe tu tena kusamba ni kidyelelu kyoso kwila Jihova wanda tambwijila kyoso ki tu mu bhinga o nzumbi ikôla.—Jisá. 10:17; 66:19.

19. Mukonda dyahi tu tena kudyelela kwila twanda kolokota?

19 Tu tena kudyelela kwila twanda kolokota né mwene se Satanaji u sota ku tu tolola. Mukonda dyahi? Mukonda o nzumbi ikôla i tu kwatekesa mu mawukexilu ayadi. Kya dyanga, yene i tu bhana o kutena ku twa bhindamena phala kukolokota mu ibhidi. Kayadi, yene o ngunzu i bhusa o “jimvwela jetu,” i tu kwatekesa kuya kupholo mu kusidivila Jihova, kate ki tu bhixila ku mundu wobhe wa kanena Nzambi. Kyenyiki-phe, tu bhangi’enu yoso i tu tena phala kukatula o mbote ya tenena mu ki kwatekesu kya nzumbu ikôla!

MWIMBU 41 Ivwa Musambu Wami

^ kax. 5 O nzumbi ikôla ya Nzambi i tena ku tu kwatekesa kukolokota mu ibhidi. O milongi yiyi yanda jimbulula se kiki kibhita kyebhi. Yanda jimbulula we i twa tokala kubhanga phala kukatula mbote ku kikwatekesu kya nzumbi ikôla.

^ kax. 16 Ku a soneki awana a soneka o madivulu a mwenyu wa Jezú, Luka mwene dingi wa tu kwatekesa kutendela kwila, o musambu wexile kima kya beta-kota ku mwenyu wa Jezú.—Luka 3:21; 5:16; 6:12; 9:18, 28, 29; 18:1; 22:41, 44.

^ kax. 59 KILOMBOLWELU KYA JIFOTO: NDUNGE YA DYANGA: Jiphange ja mala ni ja ahatu a mu bhixila mu Kididi kya Ubhezelu. Mu kudyongeka ni jiphange abhezi ni akwá, ene a mu bhanga mbandu mu kididi bhu kala o nzumbi ikôla ya Jihova. NDUNGE YA KAYANDI: Ene a dipelepalala phala kutambwijila mu yônge. O jindunge jiyadi jiji ja lungu we ni ikalakalu i twa tumbula mu milongi yiyi, kala: Kudilonga o Mak’â Nzambi, kuboka ni kusamba kwa Jihova.