“Tua-nda kuia ni enu, mukonda tuene mu kuívua kuila o Nzambi uala ni enu.”ZAKADIIA 8:23.

MIMBU: 32, 31

JIHOVA uambe kuila, mu izuua ietu “kuinhi dia muthu a tokala ku madimi m’engi ma miji ioso mu ngongo, a kà naminina, ni kidi-ze muene, a kà naminina ku muxiku ua kizuatu kia Judé imoxi, anga a muambela, exi: Tua-nda kuia ni enu, mukonda tuene mu kuívua kuila o Nzambi uala ni enu.” (Zakadiia 8:23) O “Judé,” ilombolola o athu a a undu kua Nzambi ni nzumbi ikola. Ene a exana uê Izalaiele ia “Nzambi!” (Ngalásia 6:16) O ‘kuinhi dia athu,’ a lombolola o athu oso ala ni kidielelu kia kutambula o muenhu ua kalelaku mu ixi. Ene ejiia kuila, Jihova uene mu besoala o kibuka kia Jikidistá a a undu, a mona ué kuila, ujitu ua dikota kubheza Nzambi kumoxi ni ene.

1, 2. (a) Ihi ia zuela Jihova ieji bhita mu izuua ietu? (b) Ibhuidisu iebhi i tua-nda tambuijila mu milongi íii? (Tala o foto ia dianga.)

2 Kala kia zuelele polofeta Zakadiia, Jezú ua zuela ué kuila, o mundu ua Nzambi ueji kala kumoxi. Muéne ua tumbula o athu ala ni kidielelu kia kuia ku diulu kala “kakilunga kófele,” o ala ni kidielelu kia kutunga mu ixi kala “jimbudi jamukuá.” Maji Jezú ua zuela kuila, ene oso eji kala “kilunga kimoxi” ngó, ni ku mu kaiela muéne kala ‘mubhidi umoxi.’ (Luka 12:32;  Nzuá 10:16) Mu kumona kuila kuala ibuka iiadi, saí athu nange a dibhuidisa: (1) O kuila o jimbudi ja mukuá a bhingi kuijiia o majina a Jikidistá joso a a undu? (2) O kuila o Jikidistá a a undu a tokala kubanza kuila, ene a beta-o-kota, akuá ndenge? (3) Se muthu mu kilunga u mateka kudia o mbolo, ni kúnua o vinhu mu kizuua kia Lembalasa ia kufua kua Jezú, kiebhi ki nga-nda dibhana nê? (4) O kuila nga tokala ku thandanganha mu kumona kuma, o athu a dia o mbolo ni a nua o vinhu mu Lembalasa a mu dibandekesa? O milongi íii, ia-nda tambuijila o ibhuidisu íii.

O KUILA TUA BHINGI KUIJIIA O MAJI A A ATHU OSO A A UNDU?

3. Mukonda diahi ki tu tena kuijiia ni kidi kioso, se nanhi ua-nda bhanga mbandu mu kibuka kia 144.000 kia Jikidistá a a undu?

3 O kuila o jimbudi ja mukuá a bhingi kuijiia o majina a Jikidistá joso a a undu, ala hanji mu ixi? Kana. Mukonda diahi? Mukonda sé-ku muthu u tena kuijiia ni kidi kioso, se ene a-nda tambula o futu iâ mba kana. [1] (Tala ku disukilu dia milongi.) Sumbala Nzambi ua a solo phala kuia ku diulu, maji ene a-nda tambula ngó o futu iâ, se a kolokota mu ufiiele uâ. Satanaji uejiia o maka enhá, mukonda dia kiki, muéne u sota ku a “jimbidisa” mba ku a nganala bhu kaxi ka “jipolofeta ja makutu.” (Matesu 24:24) O Jikidistá a a undu ka tena kuijiia ni kidi kioso kuila, a-nda tambula o futu iâ, kikale ngó se Jihova u a mona kuila, ene a kolokota mu ufiiele uâ. Jihova ua-nda ku a ta o kidimbu kia sukina, ande dia ufuilu uâ, mba ande dia kumateka o “hadi ia dikota.”Dijingunuinu 2:10; 7:3, 14.

Jezú muéne Ngana ietu, tua tokala ku mu kaiela ngó muéne

4. Kuma ki tu tena kuijiia o majina a Jikidistá joso a a undu ala hanji mu ixi, kiebhi-phe ki tu tena “kuia” nau kumoxi?

4 Kuma ki tu tena kuijiia o majina a Jikidistá joso a a undu ala hanji mu ixi, kiebhi-phe o jimbudi ja mukuá kia tena “kuia” nau kumoxi? O Bibidia izuela kuila, kuinhi dia maiala eji “naminina ku muxiku ua kizuatu kia Judé imoxi, anga a muambela, exi: Tua-nda kuia ni enu, mukonda tuene mu kuívua kuila o Nzambi uala ni enu.” O Bibidia izuela ngó ia lungu ni Judé imoxi. Maji o kizuelu “enu,” ki ilombolola ngó muthu umoxi, maji athu avulu. Kiki kilombolola kuila, o Judé ki ilombolola ngó muthu umoxi, mu veji dia kiki, o Judé ilombolola o kibuka kioso kia Jikidistá a a undu. O jimbudi ja mukuá ejiia kiambote o maka enhá, mu kiki, ene a sidivila Jihova kumoxi ni kibuka kiki. Ene ka bhingi kuijiia o majina a athu oso a tokala mu kibuka kiki, ni ku a kaiela. Jezú muéne Ngana ietu, o Bibidia izuela kuila, tua tokala ku mu kaiela ngó muéne.Matesu 23:10.

O KUILA O JIKIDISTÁ A A UNDU A TOKALA KUBANZA KUILA, ENE A BETA-O-KOTA AKUÂ NDENGE?

5. Kitendelesu kiebhi kia tokala kuxinganeka o Jikidistá a a undu, ni mukonda diahi?

5 O Jikidistá a a undu a tokala kuxinganeka kiambote mu milongi i tu sanga mu divulu dia 1 Kolindo 11:27-29. (Tanga.) Mu  ukexilu uebhi nange o Kidistá a mu undu u tena kudia o mbolo, ni kúnua o vinhu “ni ufusa,” mu kizuua kia Lembalasa? Se muéne kale ni ukamba uambote ni Jihova, anga u kamba ku mu kala fiiele, kioso muéne kia dia o mbolo ni kúnua o vinhu, muéne ua mu bhukumukina Nzambi. (Jihebeleu 6:4-6; 10:26-29) O kitendelesu kiki kia dikota, ki bhangesa o Jikidistá a a undu kulembalala kuila, ene a tokala kukolokota mu ufiiele uâ, se a mesena kutambula o dilau dia exanena “ku diulu kuala Nzambi, mua Kristu Jezú.”—Filipe 3:13-16.

6. Kiebhi o Jikidistá a a undu kia tokala ku di mona?

6 Phaulu ua tangela o Jikidistá a a undu: “Eme ngi hutile, a ngi kutu mukonda dia kubhikila Ngana, nga mi diondo mu enda kioso kia fuama mu kixanu’okio kia m’ixana na-kiu Nzambi.” Kiebhi ene kia tena kubhanga kiki? Phaulu ua jimbulula: “Ithangana ioso muila ni kubatâma kuoso, ni kubelesela, ni kuxididika, ni ku di lendukila. Mu londekesa jinga o henda ienu mu ku di kuatekesa kala muthu ni mukuâ. Mu kuata muanu ua kubhanga kioso ki mua tena mu ku di bhaka mu usoko ua kuongama kua mi bhana o [nzumbi], mu dijikita diê dia paze.” (Efezo 4:1-3) O nzumbi ikola ia Jihova, i kuatekesa o jiselevende jê kukala athu a lenduka, mu veji dia kukala akuâ ku di zangeleka. (Kolose 3:12) Mu kiki, o Jikidistá a a undu ka banze kuila, ene a beta-o-kota akuâ ndenge. Ene ejiia kuila, Jihova ka beta kubhana nzumbi ikola ku Jikidistá a a undu, o jiselevende ja mukuá ndenge. Ene ka banze kuila, a tendela dingi kiambote o milongi ia Bibidia, akuâ ndenge. Ene ka zuela ku muthu phala kudia ué o mbolo, ni kúnua o vinhu ia Lembalasa, mukonda ene a mono kuila, o muthu a mu undu ué. Mu veji dia kiki, ene a lenduka, ejiia kuila, Jihova muéne ngó u sola o athu phala kuia ku diulu.

7, 8. O Jikidistá a a undu ka kingila ihi, ni mukonda diahi?

7 Sumbala o Jikidistá a a undu ejiia kuila, o ku a sola phala kuia ku diulu ujitu ua dikota, maji ene ka kingila kuila, o athu a a talatala kala athu a katunda. (Efezo 1:18, 19; tanga Filipe 2:2, 3.) Ene ejiia kuila, kioso Jihova kia a sola, muéne ka ijidisa athu engi. Mu kiki, o Kidistá a mu undu ka sasumuka se muthu uoso-uoso, ka xikina kuila muéne a mu undu kua Nzambi. Muéne uejiia kuila, o Bibidia i tu tangela kuma, ki tu tokala kuxikina ni lusolo muthu uoso-uoso, u zuela kuila, Nzambi ua mu bhana kikalakalu kia katunda. (Dijingunuinu 2:2) Kuma o muthu a mu solo kua Nzambi ka kingila kuila, o athu a mu talatala mu ukexilu ua katunda, muéne ka sota kuzuela ku muthu uoso-uoso kuila, a mu undu kua Nzambi. Mu kidi, nange muéne ka-nda zuela o maka enhá ni muthu uoso-uoso. Muéne ka dizangeleka ni ima ia madiuanu ia-nda bhanga ku diulu.1 Kolindo 1:28, 29; tanga 1 Kolindo 4:6-8.

8 O Jikidistá a a undu ka sota ngó kukala ni Jikidistá jamukuá a a undu, kála o ibuka ia kujokala. Ene ka sota o jiphange ja mukuá a a undu phala kuzuela ia lungu ni ujitu uâ, mba kubhanga ibuka phala ku di longa kumoxi o Bibidia. (Ngalásia 1:15-17) Se a bhangele kiki, o athu mu kilunga keji kala ni ukamba uambote. Ene keji kaiela o kitendelesu kia Nzambi bhu kaxi ka nzumbi iê ikola, i kuatekesa o mundu uê kukala ni kutululuka, ni kukala ni ukamba uambote mudiâ.Tanga Loma 16:17, 18.

 KIEBHI KI TUA TOKALA KU DIBHANA NI JIKIDISTÁ A A UNDU?

9. Mukonda diahi ua tokala ku di langa, kioso ki u dibhana ni athu a dia o mbolo, ni a nua o vinhu mu Lembalasa? (Tala o kaxa “ O Henda ‘ki Iene mu Bhanga Ima ia Iibha.’”)

9 Kiebhi ki ua tokala ku dibhana ni jiphange a a undu? Jezú ua tangela o maxibulu mê: “Enu oso mu jiphange.” Muéne uambe dingi: “Uoso u di zangeleka, a kà mu tululula; ni ió uoso u di tolesa, a kà mu zangeleka.” (Matesu 23:8-12) Mu kiki, kieji kala kiluezu kia dikota kuximana mba ku jingisa kiavulu muthu uoso-uoso, né muéne se muthu a mu solo phala kukala phange ia Kristu. O Bibidia i tu suínisa kukaiela o kixikanu kia tufunga, maji ki i tu tangela kuila, muthu uoso-uoso ua tokala kukala ngana ietu. (Jihebeleu 13:7) Mu kidi, o Bibidia izuela kuila, saí athu “a fuama o ujitu uâ.” Maji ene ka fuama o ujitu, mukonda a a undu. Mu veji dia kiki, ene a fuama o ujitu, mukonda “a tumina ni kukalakala kiambote,” ni kuila, “a kalakala mu kuboka o Njimbu Iambote ni kulonga.” (1 Timote 5:17) Se tu ximana kiavulu o jiphange a a undu, ni ku a talatala kala athu a katunda, ene a-nda divua kia iibha. O kubhanga kiki, ku tena ku a bhangesa ku di zangeleka. (Loma 12:3) Mu kidi, ki tu mesena kubhanga kima kioso-kioso, ki tena kubhangesa o Jikidistá a a undu ku ta kituxi.Luka 17:2.

Kiebhi ki ua tokala ku dibhana ni muthu u dia o mbolo, ni u nua o vinhu, mu kizuua kia Lembalasa? (Tala o kaxi 9-11)

10. Kiebhi ki u tena kulondekesa kuila, u xila o Jikidistá a a undu?

10 Kiebhi ki tu tena kulondekesa kuila, tu xila o athu a a undu kua Jihova? Etu ki tua tokala ku a ebhuidisa se kiebhi kia a undu. O maka enhá, a tokala kua ene, ki tu bhingi ku a ejiia. (1 Tesalonika 4:11; 2 Tesalonika 3:11) Ki tu tokala kuxinganeka kuila o makaza mâ, jitata, mba athu engi a tokala ku miji iâ, a a undu uâ kua Nzambi. O muthu ka tena kulundula o kidielelu kia muiji uê. (1 Tesalonika 2:12) Ki tu tokala ué kubhanga ibhuidisu i tena kubhangesa akuetu ku divua kia iibha. Mu kifika, ki tu tokala kuibhuidisa o muhatu ua phange a mu solo phala kuia ku diulu, se kiebhi ki divua mu kuijiia kuila, ua-nda kala mu ixi katé ku hádia ni hádia, sé o munumi’ê. Mu kidi, etu tuejiia kuila, ku mundu uobhe, Jihova ua-nda bhangesa kuila, o “mienhu ioso i dia, ikuta ni ima iambote.”Jisálamu 145:16.

11. Mu ukexilu uebhi o kukamba ku “kala ni kathombo k’athu,” ku tu kuatekesa?

11 O kukamba ku talatala o Jikidistá a a undu mu ukexilu ua katunda, ku tu kuatekesa ué. Kiebhi? O Bibidia izuela kuila, mu kilunga mueji moneka “jiphange ja makutu,” eji zuela kuila, Jikidistá a a undu kua Nzambi. (Ngalásia 2:4, 5; 1 Nzuá 2:19) Tuejiia ué kuila, saí Jikidistá a a undu, nange ka-nda kolokota mu ufiiele uâ. (Matesu 25:10-12; 2 Phetele 2:20, 21) Mu kiki, se ki tu “kala ni kathombo k’athu,” ki tua-nda kaiela akuetu, né muene se Kidistá a mu undu, mba muthu u sidivila kiá Jihova tundé ukulu. Mu kiki, se athu enhá a xisa o kilunga, o ukamba uetu ni Jihova ki ua-nda zoza, ki tua-nda lembua ué kusidivila Jihova.Juda 16.

O KUILA TUA BHINGI KUTHANDANGANHA NI ATHU A MU DI BANDEKESA?

12, 13. Mukonda diahi ki tu bhingi kuthandanganha ni athu a dia o mbolo, ni a nua o vinhu mu kizuua kia Lembalasa?

12 Mu mivu iavulu ku dima, o athu akexile kudia o mbolo, ni kúnua o vinhu mu kizuua kia Lembalasa, a tolele. Maji mu mivu íii, o athu a mu dibandekesa dingi. O kuila  tua tokala kuthandanganha ni maka enhá? Kana. Tu mone se mukonda diahi ki tu bhingi kuthandanganha.

13 Jihova “uejiia oso a mu tokala.” (2 Timote 2:19) O jiphange ene mu kondala o athu ene mu dia o mbolo, ni kúnua o vinhu mu Lembalasa, kejiia ni kidi kioso se nanhi a mu solo kua Nzambi phala kuia ku diulu. Maji Jihova uejiia kiambote o athu a solo. Mu kiki, mu kizuua kia Lembalasa, o jiphange a kondala katé muene ni ió a banza kuila a a undu kua Nzambi, maji mu kidi ka a undu. Mu kifika, saí athu akexile kudia o mbolo ni kúnua o vinhu, mu kubhita thembu a lembua kudia o mbolo, ni kúnua o vinhu mu kizuua kia Lembalasa. A mukuá nange ala ni masambisambi, mu kiki, a dielela kuila, a-nda tumina kumoxi ni Kristu ku diulu. Mu kidi, etu ki tuejiia se mu ixi muala Jikidistá jikuxi a a undu.

14. Ihi izuela o Bibidia ia lungu ni Jikidistá a a undu a-nda kala hanji mu ixi, kioso kia-nda mateka o hadi ia dikota?

14 Kioso Jezú kia-nda kuíza phala kuambata o Jikidistá a a undu ku diulu, mu ixi mua-nda kala hanji Jikidistá a a undu. O Bibidia izuela kuila, Jezú “ua kà tuma o ji-anju jê ni dízui dia koloneta, anga ji bhongolola athu’ê ósole ku itembu iuana, tunde kua tundu o diulu katé ku dia suku.” (Matesu 24:31) O Bibidia ilondekesa ué kuila, mu izuua isukidila-ku, mu ixi mua-nda kala hanji Jikidistá jofele a a undu. (Dijingunuinu 12:17) Maji ki izuela se kua-nda subhuka jikidistá jikuxi, kioso kia-nda mateka o hadi ia dikota.

15, 16. Ihi i tua tokala kuijiia ia lungu ni 144.000 a athu a a solo kua Jihova?

15 Jihova muéne uejiia o kithangana kia tokala phala kusola muthu. (Loma 8: 28- 30) Jihova ua mateka kusola o Jikidistá a a undu kioso Jezú kia mu fukununa. Nange ku hama ia dianga o Jikidistá joso ja kidi, a a solele phala kuia ku diulu. Mu hama ni hama ja mivu, kioso kia bhiti o izulukutu íii, athu avulu akexile mu zuela kuila Jikidistá, ka kexile mu kaiela o milongi ia Kristu ni kidi kioso. Sumbala mu mivu ienioió o Jikidistá ja kidi a tolele, maji né kiki, Jihova ua a undu. Ene exile kala o jimbutu jambote ja mbele Jezú kuila, jeji kula bhu kaxi ka jimbundu ja iangu. (Matesu 13:24-30) Tundé kia mateka o izuua ia sukidila-ku, Jihova uene mu suluka ni kusola athu a-nda bhanga mbandu ku kibuka kia 144.000 a Jikidistá. [2] (Tala ku disukilu dia milongi.) Mu kiki, se Nzambi u sola athu a mukuá ande dia kuíza o dizubhilu, ki tu tokala kukala ni phata, mukonda tuejiia ni kidi kioso kuila, muéne ua-nda bhanga o kima kia tokala. (Izaia 45:9; Daniiele 4:35; tanga Loma 9:11, 16.) [3] (Tala ku disukilu dia milongi.) Tua tokala ku di langa, phala ki tu bhange kala o maiala a divu kia iibha, mukonda ngana iâ ua a sokelesa, ni ió a kalakala ngó ola imoxi.Tanga Matesu 20:8-15.

16 Ko athu oso ala ni kidielelu kia kuia ku diulu a bhanga mbandu mu kibuka kia ‘kimbadi kia fiiele.’ (Matesu 24:45-47) Kala kia bhitile ku hama ia dianga, lelu Jihova ni Jezú a mu disa mba kulonga mundu uavulu bhu kaxi ka athu a tolo. Ku hama ia dianga, o Jikidistá a a undu a sonekene o Mikanda ia Ngeleku, a tolele. Lelu ué o Jikidistá a a undu ala ni kikalakalu kia kubhana o kúdia ku mundu ua Nzambi mu “ola joso ja tokala,” a tolo.

17. Mbote iahi i ua katula mu milongi íii?

17 Ihi i tua di longo mu milongi íii? Jihova ua kanena kubhana muenhu ua kalelaku mu ixi ku athu avulu a tokala ku mundu uê, maji a mukuá a-nda kala ni ujitu ua kutumina kumoxi ni Jezú ku diulu. Jihova u besoala o jiselevende jê joso, kikale o “Judé” ni “kuinhi dia muthu,” muéne ua mesena kuila, o ibuka iiadi a belesela o itumu iê ni kukolokota mu ufiiele uâ. Oso a tokala kukala athu a lenduka. Enioso a tokala ku mu bheza kumoxi, ni kukala ni ukamba uambote. Enioso a tokala kubhanga ioso, phala mu kilunga mu kale kutululuka. Mu kuijiia kuila o dizubhilu dia zukama, tu kolokotenu mu kusidivila Jihova ni kukaiela Kristu, mukonda tu kilunga kimoxi ngó.

^ [1] (kaxi 3) Kala kilondekesa o divulu dia Jisálamu 87:5, 6; ku hádia, nange Nzambi ua-nda tanga o majina a ió a mu tumina kumoxi ni Jezú ku diulu.Loma 8:19.

^ [2] (kaxi 15) Sumbala o divulu dia Ikalakalu 2:33, di londekesa kuila Jezú uejiia kioso muthu kia mu sola, maji Jihova muéne ngó u sola o muthu.

^ [3] (kaxi 15) Phala kuijiia dingi ia lungu ni maka enhá, tanga o milongi “Perguntas dos Leitores” mu A Sentinela de 1.° de maio de 2007, mu mbandu ia 30-31.